1, 2. (a) Songon dia do Sitindangi Ni Jahowa marimbar sian agama na asing? (b) Aha do na laho taulas di artikel on dohot di artikel na mangihut?

DI GODANG agama, adong do baoa manang borua na gabe pamimpin. Alani i, jotjot do disungkun nasida tu Sitindangi Ni Jahowa, ”Ise do Pamimpinmuna?” Tangkas do tapaboa, ndang jolma na gabe Pamimpin di hita. Alana, Jesus Kristus do Pamimpin di hita! Jala ibana pe unduk do tu Pamimpinna, i ma Jahowa.—Mat. 23:10.

² Adong do muse pigapiga baoa na didok ”naposo haposan jala na marroha”, na manguluhon naposo ni Debata saonari. (Mat. 24:45) Alai, sian dia do taboto molo Jahowa manguluhon hita marhite AnakNa? Taida ma tolu alus na mambahen pos rohanta. Nang pe dipillit Jahowa pigapiga halak laho manguluhon naposoNa, alai Jahowa do sasintongna na gabe Pamimpin ni naposoNa.—Jes. 58:11.

3. Aha do na mangurupi si Musa laho manguluhon halak Israel?

³ Dipargogoi tondi parbadia do halak na gabe wakil ni Debata. Dipillit Debata si Musa manguluhon halak Israel. Aha do na mangurupi si Musa mandalanhon  tanggung jawab on? Dilehon Jahowa do ”Tondina na badia i” tu si Musa. (Jaha Jesaya 63:11-14.) Alani i, Jahowa do na manguluhon naposoNa, ala diurupi do si Musa marhite tondiNa.

4. Aha do na patuduhon molo si Musa dipargogoi tondi parbadia? (Ida gombar di mula ni parsiajaran.)

⁴ Boasa boi diboto halak si Musa dipargogoi tondi parbadia? Dipargogoi tondi parbadia do si Musa mambahen tanda halongangan dohot paboahon goar ni Debata tu si Firaun. (2 Mus. 7:1-3) Tondi parbadia mangurupi si Musa gabe pamimpin na burju jala sabar. Imbar do ibana sian pamimpin na jahat di inganan na asing! (2 Mus. 5:2, 6-9) Tangkas ma, Jahowa do na mamillit si Musa manguluhon naposoNa.

5. Ise do muse na mandapot tondi parbadia sian Jahowa laho manguluhon naposoNa?

⁵ Ise do muse na mandapot tondi parbadia sian Jahowa laho manguluhon naposoNa? Bibel mandok, ”Gok Tondi hapistaran ma roha ni si Josua, anak ni si Nun.” (5 Mus. 34:9) ”Tondi ni Jahowa songgop tu si Gidion.” (Pangh. 6:34) Jala ”songgop ma Tondi ni Jahowa tu si Daud”. (1 Sam. 16:13) Tondi parbadia do na diasahon nasida laho mangurupi mangulahon na so boi diulahon sian gogona sandiri. (Jos. 11:16, 17; Pangh. 7:7, 22; 1 Sam. 17:37, 50) Alani i, Jahowa do na patut dipuji.

6. Boasa lomo roha ni Debata asa diargai naposoNa angka pamimpin di Israel?

⁶ Aha do na ingkon diulahon halak Israel dung diida nasida tondi parbadia mangalehon gogo tu si Musa, si Josua, si Gidion, dohot si Daud? Ingkon dipatudu halak Israel do pangargaion tu nasida. Tingki marungutungut nasida tu si Musa, parrohahon ma na didok Jahowa, ”Sadia leleng on insahan ni bangso on Ahu?” (4 Mus. 14:2, 11) Jahowa do na mamillit angka baoa i laho manguluhon naposoNa. Molo unduk nasida tu angka baoa i, Jahowa do na diihuthon nasida gabe Pamimpin.

7. Songon dia do surusuruan mangurupi si Musa?

⁷ Diurupi surusuruan do halak na gabe wakil ni Debata. (Jaha Heber 1:7, 14.) Disuru Debata surusuruan manogunogu si Musa. Parjolo, ro ma ”surusuruan na niidana di ramba” i mangalehon tanggung jawab laho paluahon jala manguluhon halak Israel. (Ul. 7:35) Paduahon, disuru Debata do surusuruan mangalehon Patik tu si Musa, laho mangajari bangso i. (Gal. 3:19) Patoluhon, didok Jahowa, ”Laho ma ho, togihon ma bangso i tu tano naung hupaboa i tu ho; ida ma, ingkon Suruanki mardalan manguluhon ho!” (2 Mus. 32:34) Ndang dipaboa Bibel na  diida halak Israel surusuruan mangulahon i. Alai, sian cara ni si Musa mangalehon tudutudu, tangkas ma surusuruan do na mangurupi ibana.

8. Songon dia do surusuruan mangurupi si Josua dohot si Hiskia?

⁸ Ise do muse na diurupi surusuruan? Bibel mandok ”partogi ni parangan ni Jahowa”, i ma surusuruan, mangurupi si Josua manaluhon halak Kanaan. (Jos. 5:13-15; 6:2, 21) Tingki Raja Hiskia manguluhon naposo ni Debata, ro ma tentara ni Assur mamorangi Jerusalem. Alai holan di sada borngin, ”ruar ma suruan ni Jahowa, jala dibunu di parsaroan ni Assur saratus ualupulu lima ribu halak”.—2 Raj. 19:35

9. Nang pe ndang tipak na manguluhon bangso Israel, aha do na ingkon diulahon nasida?

⁹ Tipak do surusuruan. Alai, halak na diurupi nasida ndang tipak. Hea do si Musa ndang pasangaphon Jahowa. (4 Mus. 20:12) Tingki halak Gibeon laho mambahen parjanjian tu si Josua, ndang jolo disungkun si Josua tu Jahowa aha na laho ulahononna. (Jos. 9:14, 15) Si Hiskia pe hea do marginjang ni roha. (2 Kron. 32:25, 26) Nang pe ndang tipak nasida, ingkon dioloi halak Israel do nasida. Diboto halak Israel do na disuru Jahowa surusuruan mangurupi angka baoa on. Tangkas ma, Jahowa manguluhon naposoNa.

10. Songon dia do si Musa ditogutogu marhite Patik ni Debata?

¹⁰ Halak na gabe wakil ni Debata ditogutogu marhite HataNa. Didok di Bibel, Patik na dilehon tu halak Israel, i ma ”patik ni si Musa”. (1 Raj. 2:3) Alai tangkas dipaboa Bibel, Jahowa do na mangalehon Patik i. Si Musa pe ingkon mangoloi patik i. (2 Kron. 34:14) Dung dipaboa Jahowa songon dia cara paulihon tabernakel, ”dipatupa si Musa ma sude songon na tinonahon ni Jahowa tu ibana songon i do dibahen”.—2 Mus. 40:1-16.

11, 12. (a) Aha do na ingkon diulahon si Josua dohot angka raja na manguluhon bangso ni Debata? (b) Songon dia do Hata ni Debata manogunogu angka baoa na manguluhon?

¹¹ Tingki gabe pamimpin, adong do buku patik di si Josua, jala didok Jahowa, ”Sai pingkirpingkiri ma i arian dohot borngin, asa diradoti ho, jala dipatupa ho, hombar tu sude na tarsurat di bagasan i.” (Jos. 1:8) Ingkon dijaha angka raja na manguluhon bangsoNa do Patik i ganup ari, disurat jala unduk tu ”sude hata ni patikon dohot angka aturan on, laho patupahon angka i”.—Jaha 5 Musa 17:18-20.

¹² Songon dia do Hata ni Debata manogunogu baoa na manguluhon naposo ni Debata? Pingkirhon ma taringot tu Raja Josia. Tingki jumpang ni malim Hilkia buku patik ni si Musa, dijahahon si Sapan ma i tu si Josia. * ”Alai dung dibege rajai angka hata ni buku patik i, disansani rajai ma pangkeanna.” Gabe taronjar ma roha ni si Josia manutung sude ganaganaan di Israel jala dibahen ma ari Paska na umbalga. (2 Raj. 22:11; 23:1-23) Ala si Josia dohot pamimpin na asing mangihuthon Hata ni Debata,  olo do nasida manguba tudutuduna hombar tu Hata ni Debata. On mangurupi naposo ni Debata gabe unduk.

13. Aha do imbar ni na manguluhon naposo ni Debata sian na manguluhon bangso na asing?

¹³ Pamimpin ni bangso na asing ditogutogu bisuk ni jolma. Umpamana, pamimpin ni Kanaan dohot rakyatna mangulahon na jahat, songon parmainanon tu na samudar, baoa marjolmahon baoa, parmainanon tu binatang, mamelehon ianakhon, dohot manomba ganaganaan. (3 Mus. 18:6, 21-25) Ndang dos aturan taringot tu haiason na dibahen pamimpin ni Babel dohot Misir tu na dibahen naposo ni Debata. (4 Mus. 19:13) Alai diboto naposo ni Debata, dipatogu angka baoa na manguluhon i do nasida asa tongtong badia, ias pamatangna, jala pasidingkon ulaon na rorang. Tangkas ma, Jahowa do na manguluhon nasida.

14. Boasa dipasingot Jahowa pigapiga halak na manguluhon naposoNa?

¹⁴ Adong do angka raja na manguluhon naposo ni Debata, na so mangihuthon tudutuduNa na dilehon marhite tondi parbadia, surusuruan, dohot HataNa. Sipata, dipasingot Jahowa do nasida manang dilului panggantina. (1 Sam. 13:13, 14) Alai, adong do sahalak na dipillit Jahowa gabe pamimpin na dumenggan.

15. (a) Songon dia do angka panurirang paboahon na laho ro sada pamimpin na dumenggan? (b) Ise do pamimpin na dumenggan i?

¹⁵ Saleleng marratus taon, marjanji do Jahowa laho mamillit pamimpin na dumenggan tu naposoNa. Didok si Musa tu halak Israel, ”Panurirang sada, songon ahu on patindangon ni Jahowa, Debatam sian tongatongami, sian angka hahaanggim; Ibana tama tangihononmuna.” (5 Mus. 18:15) Si Jesaya mandok, Pamimpin on laho gabe ”partogi dohot silehon patik”. (Jes. 55:4) Si Daniel manurat taringot tu Messias, na laho gabe ”pangarajai”. (Dan. 9:25) Dipatudu Jesus, ibana do Pamimpin ni naposo ni Debata. (Jaha Mateus 23:10.) Diihuthon angka siseanna do Jesus, jala porsea nasida Jahowa do na mamillit Jesus. (Joh. 6:68, 69) Aha do na paposhon roha ni nasida molo Jesus nunga dipillit Jahowa manguluhon naposoNa?

16. Aha do na patuduhon molo Jesus diurupi tondi parbadia?

¹⁶ Dipargogoi tondi parbadia do Jesus. Tingki tardidi Jesus, diida si Johannes ma ”mungkap langit, jadi songgop ma Tondi i songon darapati tu Ibana”. Dung i, ”ditogihon Tondi i ma Ibana tu halongonan”. (Mrk. 1:10-12) Saleleng di tano on, diurupi tondi parbadia do Jesus mangajar dohot mambahen tanda halongangan. (Ul. 10:38) Diurupi do muse Jesus patuduhon holong, las ni roha, dohot haporseaon na togu. (Joh. 15:9; Heb. 12:2) Ndang  adong pamimpin na asing na dumenggan sian Jesus. Tangkas ma, Jahowa do na mamillit Jesus gabe Pamimpin.

17. Aha do na diulahon surusuruan laho mangurupi Jesus?

¹⁷ Diurupi surusuruan do Jesus. Ndang sadia leleng dung tardidi, ”ro ma angka pardisurgo marhobasi di Ibana”. (Mat. 4:11) Pigapiga jom andorang so mate, ro ma ”surusuruan sian banua ginjang i, na margogoihon Ibana”. (Luk. 22:43) Diboto Jesus, suruon ni Jahowa do surusuruan mangurupi di tingki na dihaporluhon.—Mat. 26:53.

18, 19. Songon dia do Hata ni Debata manogunogu Jesus di ngoluna dohot di pangajarionna?

¹⁸ Hata ni Debata manogunogu Jesus. Sian mula ni pangkobasionna sahat tu na mate, diihuthon Jesus do Hata ni Debata. Tingki laho mate pe, dipatudu do molo ibana manggohi surirang taringot tu Messias. (Mat. 4:4; 27:46; Luk. 23:46) Alai, imbar do pamimpin ni agama di tingki i. Ndang olo nasida mangihuthon Hata ni Debata molo maralo tu nasida. Tingki mandok taringot tu nasida, dienet Jesus Hata ni Debata, ”Dipasangap pamangan ni bangso on do Ahu; alai anggo rohanasida dao do sian Ahu. Jala magopo do pambahennasida pasangaphon Ahu, ai poda ni jolma do dipodahon nasida.” (Mat. 15:7-9) Ndang dipillit Jahowa halak na so mangihuthon HataNa laho manguluhon naposoNa.

¹⁹ Ndang dipangke Jesus bisuk dohot pengalamanna tingki mangalusi pamimpin agama. Alai, diajari ibana do  halak marhite Hata ni Debata. (Mat. 22:33-40) Molo dipaboa Jesus taringot tu ngoluna di surgo dohot taringot tu panompaon, boi do gabe longang roha ni halak. Alai, ala mangihuthon Hata ni Debata, marsitutu ma ibana paboahon i tu na asing, gabe ”dibungkai ma rohanasida, asa diantusi na tarsurat i”.—Luk. 24:32, 45.

20. (a) Songon dia do Jesus pasangaphon Jahowa? (b) Aha do imbar ni Jesus tu si Herodes Agripa I?

²⁰ Nang pe longang roha ni halak mambege hata ni Jesus, alai Guruna do na dipasangap Jesus, i ma Jahowa. (Luk. 4:22) Tingki sahalak baoa na mora manjou Jesus ”Guru, na denggan roha”, serep do roha ni Jesus jala didok, ”Boasa didok ho Ahu na denggan roha? Ndang adong na denggan roha, dungkon ni sasada Debata!” (Mrk. 10:17, 18) Alai hirahira ualu taon dungkon i, si Herodes Agripa I gabe pamimpin ni Juda. Mansai imbar do ibana sian Jesus. Tingki di sada ulaon na sumurung, dipangke si Herodes ma pangkean hasangapon na mansai arga. Tingki diida halak ibana, didok nasida ma, ”Soara ni Debata do i, ndada soara ni jolma!” Lomo hian roha ni si Herodes dipuji. Alai, aha ma na masa? ”Pintor dipastap surusuruan ni Debata ma ibana, ala so dilehon hasangapon tu Debata; jadi dipangan gulok ma ibana, laos mate.” (Ul. 12:21-23) Tangkas ma, ndang si Herodes na dipillit Jahowa gabe pamimpin. Alai dipatudu Jesus do dirina na dipillit Debata, jala tongtong pasangaphon Jahowa, Pamimpin na Tumimbul.

21. Aha do na laho taulas di artikel na mangihut?

²¹ Lomo roha ni Jahowa asa unang holan satongkin Jesus gabe Pamimpin. Dung dipahehe, didok Jesus tu siseanna, ”Nunga sahat tu Ahu nasa huaso na di banua ginjang dohot na di tano on.” Didok muse, ”Ai ida ma, sai na dongananku do hamu ganup ari, rasirasa ro ajal ni hasiangan on!” (Mat. 28:18-20) Alai songon dia do Jesus manguluhon naposo ni Debata, hape ibana nunga mardaging tondi di surgo? Ise do na dipillit Jahowa mewakili Jesus di tano on? Songon dia do halak Kristen mamboto ise na sinuru ni Debata? Artikel na mangihut mangulas sungkunsungkun on.