1, 2. (a) Aha do na dipaboa Jahowa tu hita? (b) Janji aha do na didok di Jesaya 46:10, 11 dohot 55:11?

BAGAS do lapatan ni hata na parjolo na disurat di Bibel, ”Di mula ni mulana ditompa Debata langit dohot tano on.” (1 Mus. 1:1) Holan saotik dope na taida sian godang tompaan ni Debata di alam semesta on, jala holan saotik dope na taboto taringot tu luar angkasa, sinondang, dohot gravitasi. (Pjm. 3:11) Alai, dipaboa Jahowa do tu hita taringot sangkapNa tu tano on dohot tu jolma. Ditompa Ibana do jolma tudos tu rupaNa jala lomo rohaNa asa marlas ni roha nasida di tano on. (1 Mus. 1:26) Nasida gabe ianakhonNa, jala Ibana gabe Ama ni nasida.

² Di bindu tolu sian 1 Musa, taboto ma boasa sundat sangkap ni Jahowa i. (1 Mus. 3:1-7) Alai, ndang adong parsoalan na so boi dipasae Jahowa. Ndang adong na boi mangambati sangkap ni Jahowa. (Jes. 46:10, 11; 55:11) Pos do rohanta, sangkap ni Jahowa na parjolo ingkon saut di tingkina!

3. (a) Aha do na ringkot taboto asa taantusi isi ni Bibel? (b) Boasa i ringkot taparsiajari saonari? (c) Sungkunsungkun aha do na laho taulas?

 ³ Taboto do sangkap ni Jahowa tu tano on dohot tu jolma, jala songon dia Jesus dohot pasauthon i. On ma sada hasintongan na mansai ringkot, jala on ma ra na parjolo taboto tingki marsiajar Bibel. Saonari, lomo rohanta mangurupi halak laho mamboto on. Di taon on, tagokkon do angka halak asa ro tu Borngin Parningotan hamamate ni Jesus. (Luk. 22:19, 20) Molo ro nasida tu ulaon na ringkot on, botoon ni nasida ma taringot tu sangkap ni Debata na palashon roha. Alani i, saonari ma tingki na denggan laho mamingkirhon sungkunsungkun na laho tabahen manjujui halak asa ro tu ulaon i. Di artikel on, adong tolu sungkunsungkun na laho taulas: Aha do sangkap ni Debata tu tano on dohot tu jolma? Boasa sundat sangkapNa i? Boasa tobusan ni Jesus gabe dalan laho pasauthon sangkap ni Debata?

4. Songon dia do angka tompaan ”mamaritahon hamuliaon ni Debata”?

⁴ Jahowa, Panompa na so hatudosan. Mansai denggan do sude na tinompaNa. (1 Mus. 1:31; Jer. 10:12) Aha do na taparsiajari sian tompaan ni Jahowa na taratur jala uli? Taboto ma, marlaba do sude tompaanNa, sian na metmet sahat tu na mansai balga. Songon dia do pangkilalaanmuna tingki mamingkirhon taringot tu sel ni jolma, mangida posoposo na baru tubu, manang mangida mata ni ari tingki bonom? Las rohanta mangida tompaan ni Jahowa, alana tingki ditompa hita, dilehon do haboion laho mamboto dia na uli.—Jaha Psalmen 19:2; 104:24.

5. Aha do dibahen Jahowa asa taratur sude na tinompaNa?

⁵ Dibahen Jahowa do uhum tu sude tompaanNa. Dibahen do uhum na mangatur alam dohot moral. Dibahen Ibana uhum on, asa taratur sude na di alam semesta on. (Ps. 19:8-10) Sude di alam semesta on, nunga dibahen be ingananna jala marguna do i. Umpamana, hukum gravitasi mambahen atmosfer jonok tu tano on, jala hukum on ma na mangatur laut dohot pasang surut-na. Molo ndang adong gravitasi, ndang adong hangoluan di tano on. Taratur ma alam semesta on ala adong hukum na dibahen Jahowa. On patuduhon, adong do sangkapNa tu tano on dohot tu jolma. Tingki marbarita, taurupi ma halak asa mananda Sitompa hita.—Pgk. 4:11.

6, 7. Aha do silehonlehon ni Jahowa tu si Adam dohot si Hawa?

⁶ Sangkap ni Jahowa tu jolma, i ma asa mangolu salelengna di tano on. (1 Mus. 1:28; Ps. 37:29) Burju do Debata, jala dilehon do silehonlehon na mansai arga tu si Adam dohot si Hawa. (Jaha Jakobus 1:17.) Dilehon do hak laho mamillit, marpingkir, mangkaholongi, dohot maraleale. Mangkatai ma Debata tu si Adam jala dipaboa do tu ibana songon dia cara mangulahon na denggan. Diparsiajari si Adam do muse songon dia mangaradoti dirina,  binatang, dohot tano on. (1 Mus. 2:15-17, 19, 20) Dibahen Jahowa do si Adam dohot si Hawa boi mandai, maniop, marnida, marbinege, dohot manganggo angka na tinompa ni Debata tu nasida. Marlas ni roha ma nasida mangolu di tano on. Godang do ulaon ni nasida jala tongtong marsiajar taringot tu angka na baru salelengna.

⁷ Aha do muse sangkap ni Debata? Dibahen Jahowa do si Adam dohot si Hawa boi marpinompar. Ianakhon ni nasida pe boi marpinompar, sahat tu na gok jolma di tano on. Lomo do roha ni Jahowa asa dihaholongi natuatua ianakhonna, dos songon Ibana mangkaholongi si Adam dohot si Hawa. Dilehon Ibana do tano on dohot sude nasa isina tu jolma. Di tano on ma nasida maringanan salelengna.—Ps. 115:16.

8. Boasa dilehon Debata patik tu si Adam dohot si Hawa songon na disurat di 1 Musa 2:16, 17?

⁸ Aha do na mambahen gabe sundat sangkap ni Debata? Dilehon Jahowa do patik tu si Adam dohot si Hawa asa diboto aha na boi dohot na so boi diulahon nasida. Didok Debata, ”Jadi do panganonmu sian nasa hau di bagasan porlak on. Alai anggo sian hau parbinotoan ni na denggan dohot na roa, ndang jadi panganonmu; ai sadari dipangan ho sian i, sai na mate do ho.” (1 Mus. 2:16, 17) Ndang pola maol antusan ni nasida patik i, jala ndang maol mangulahon i. Alana, godang dope sipanganon na tabo di porlak i.

9, 10. (a) Aha do didok Sibolis taringot tu Jahowa? (b) Aha do na ingkon dipillit si Adam dohot si Hawa? (Ida gombar di mula ni parsiajaran.)

⁹ Marhite ulok, diotootoi Sibolis ma si Hawa asa unang unduk tu Jahowa. (Jaha 1 Musa 3:1-5; Pgk. 12:9) Didok Sibolis, ndang dipaloas Debata nasida mangallang parbue ni ”saluhut hau angka na di porlak” i. Hirahira songon on ma didok Sibolis, ’Na so dipaloas do ho mangulahon na dihalomohon roham?’ Didok Sibolis tu si Hawa, ”Ndang na tutu hamu mate.” Sasintongna, gabus ni Sibolis do i. Dielaela ma si Hawa asa unang manangihon Debata. Didok Sibolis, ”Diboto Debata do, sadari dipangan hamu sian i, tonggor ma matamuna.” Sibolis mandok, ndang lomo roha ni Jahowa molo didapot nasida parbinotoan na dumenggan. Alani i, ndang diloas Ibana nasida mangallang parbue ni hau i. Digabusi Sibolis do nasida tingki didok, ”Gabe doshon Debata hamu umboto na denggan dohot na roa.”

¹⁰ Si Adam dohot si Hawa do na manontuhon sipilliton ni nasida. Olo do nasida unduk tu Debata, manang ulok i do na ditangihon nasida? Hape, ndang unduk nasida tu Debata. Ditundalhon nasida do Jahowa jala mangihuthon Sibolis. Ndang dilinggomi Jahowa be nasida.—1 Mus. 3:6-13.

11. Boasa ndang dipasombu Jahowa dosa ni si Adam dohot si Hawa?

¹¹ Mardosa ma si Adam dohot si Hawa ala ndang unduk tu patik ni Debata. Ala ndang lomo roha ni Debata tu hajahaton, gabe musu ni Debata ma  nasida. Ndang tarpaidaida Jahowa hajahaton. (Hab. 1:13) Molo dipasombu Jahowa do dosa si Adam dohot si Hawa i, gabe sega ma sude na tinompaNa. Gabe sungkunsungkun do ra roha ni angka surusuruan dohot jolma, boi do pasauton ni Jahowa sangkapNa i manang na ndang. Alai sai marsihohot do Jahowa tu janjiNa; ndang diose Ibana janjiNa. (Ps. 119:142) Nang pe adong hak laho mamillit di si Adam dohot si Hawa, alai ingkon ditaon nasida do pangkorhon ni ulaon ni nasida. Gabe mate ma nasida jala mulak muse gabe tano.—1 Mus. 3:19.

12. Aha do na masa tu pinompar ni si Adam?

¹² Tingki dipangan si Adam dohot si Hawa parbue ni hau i, ndang gabe keluarga ni Jahowa be nasida. Dipalao ma nasida sian porlak Eden, jala ndang boi be nasida mulak tusi. (1 Mus. 3:23, 24) Dipasombu Jahowa ma nasida manaon hasusaan alani dosa. (Jaha 5 Musa 32:4, 5.) Ndang boi be denggan ditiru nasida sude pangalaho ni Jahowa. Ndang holan si Adam be na so marpangkirimon, dohot do pinomparna. Alani dosana, sude angka pinomparna pe gabe mardosa jala mate. (Rom 5:12) Dipamago si Adam do pangkirimon laho mangolu salelengna. Ala ndang tipak si Adam dohot si Hawa, pinomparna pe gabe ndang tipak. Dung diotootoi Sibolis asa mangalo si Adam dohot si Hawa tu Debata, marsitutu ma ibana muse mangotootoi sude jolma asa mangulahon na sarupa.—Joh. 8:44.

13. Aha do na dihalomohon Jahowa tu jolma?

¹³ Tongtong do dihaholongi Jahowa sude jolma. Nang pe mangalo si Adam dohot si Hawa tu Ibana, lomo do rohaNa maraleale tu jolma. Ndang lomo rohaNa mate jolma. (2 Ptr. 3:9) Alani i, dibahen Debata ma dalan asa boi muse jolma maraleale tu Ibana. Songon dia do Ibana mangulahon on? Taida ma.

14. (a) Hombar tu Johannes 3:16, aha do diulahon Debata laho paluahon jolma sian dosa dohot hamatean? (b) Sungkunsungkun aha do na laho taulas dohot angka halak?

¹⁴ Jaha Johannes 3:16. Godang do halak na tagokkon tu Borngin Parningotan mangantusi ayat on. Alai, songon dia do tobusan ni Jesus boi parohon hangoluan na salelengna? Caranta mangurupi godang halak mamboto alus ni sungkunsungkun on, i ma tingki manggokkon nasida tu Borngin Parningotan, tingki pajumpang di Borngin Parningotan, jala tingki manjumpangi nasida muse. Molo lam tangkas diantusi nasida taringot tu tobusan,  botoon ni nasida ma bagas ni holong ni Jahowa tu jolma dohot bisukNa. Aha do na laho tapaboa tu nasida taringot tu tobusan?

15. Aha do imbar ni Jesus dohot si Adam?

¹⁵ Disuru Jahowa do Jesus laho mangalehon ngoluna gabe tobusan. Ingkon marsihohot do ibana tu Jahowa jala rade mangalehon ngoluna humongkop jolma. (Rom 5:17-19) Dipapinda Jahowa ma ngolu ni Jesus sian surgo tu tano on. (Joh. 1:14) Alani i, gabe jolma na tipak ma Jesus, dos songon si Adam andorang so mardosa. Alai ndang songon si Adam, diihuthon Jesus do aturan na dibahen Jahowa. Nang pe mansai hansit sitaononna, ndang hea ibana mangalo patik ni Debata.

16. Boasa tobusan i silehonlehon na arga?

¹⁶ Ala dilehon Jesus hangoluanna na tipak, boi ma malua jolma sian dosa dohot hamatean. Tipak do hangoluan ni Jesus songon hangoluan ni si Adam. Alai, marsihohot jala dioloi ibana do Debata. (1 Tim. 2:6) Mate do ibana humongkop hita, jala marhite tobusanna, boi ma sude jolma mangolu salelengna. (Mat. 20:28) Marhite tobusan, diparade Jahowa dalan laho pasauthon sangkapNa.—2 Kor. 1:19, 20.

17. Aha do na dipasaut marhite tobusan?

¹⁷ Mansai arga do tobusan i di Jahowa. (1 Ptr. 1:19) Mansai arga do hita di Jahowa, alani i ma dilehon Ibana  anakNa mate humongkop hita. (1 Joh. 4:9, 10) Boi ma tadok, Jesus do ama di hita, ndang si Adam. (1 Kor. 15:45) Ndang holan hangoluan na salelengna na tadapot marhite Jesus, alai boi ma hita gabe keluarga ni Debata. Marhite tobusan, gabe tipak ma jolma jala jangkonon ni Jahowa ma nasida gabe keluargaNa. Rimangi ma songon dia las ni rohanta haduan tingki sude jolma na marsihohot tu Ibana boi gabe tipak! Ujungna, angka na di surgo dohot di tano on dipasada gabe sada keluarga. Hita sude gabe anak ni Debata.—Rom 8:21.

18. Andigan do Jahowa gabe ”saluhut di bagasan saluhut”?

¹⁸ Nang pe si Adam dohot si Hawa mangalo tu Jahowa, alai tongtong do dihaholongi Jahowa angka jolma jala diparade do tobusan. Nang pe mardosa hita, ndang boi Sibolis mangambati hita laho marsihohot tu Jahowa. Marhite tobusan, diurupi Jahowa ma hita asa boi gabe tigor di adopanNa. Rimangi ma songon dia ngolunta tingki sude ”na marnida Anak i jala porsea di Ibana” gabe mandapaot hangoluan salelenglelengna. (Joh. 6:40) Dipasaut Jahowa ma sangkapNa jala diurupi ma hita gabe tipak. Dung i, gabe ”saluhut di bagasan saluhut” ma Jahowa.—1 Kor. 15:28.

19. (a) Alani las ni rohanta tu tobusan ni Jesus, aha do na ingkon taulahon? (Ida kotak ” Talului ma Halak na Olo Manjangkon”.) (b) Aha do na laho taulas di artikel na mangihut?

¹⁹ Las ni rohanta alani tobusan ni Jesus mangonjar hita paboahon tu halak na asing taringot tu silehonlehon na mansai arga on. Ingkon botoon ni sude halak do, na dilehon Jahowa hangoluan salelenglelengna tu sude jolma marhite tobusan ni Jesus. Alai adong dope laba na asing na tadapot. On boi patuduhon ndang tutu na didok Sibolis tingki di porlak Eden. Taulas ma muse di artikel na mangihut.