SIAN haposoonna, bapakku, i ma si Arthur, mangkaholongi Debata jala lomo rohana gabe parbarita na uli sian Metodis. Alai dung dijaha ibana buku na dilehon Angka Parsiajar Bibel jala marsaor dohot nasida, gabe muba ma pangantusionna. Taon 1914, tardidi ma bapakku tingki marumur 17 taon. Ndang sadia leleng, masa ma Porang Dunia I. Disuru ma ibana gabe tentara, alai ndang olo ibana. Dipenjarahon ma ibana saleleng sampulu taon di Penjara Kingston, di Ontario, Kanada. Dung kaluar sian penjara, merintis ma ibana.

Taon 1926, marhasohotan ma bapakku tu si Hazel Wilkinson. Ompung borungku sian omak nunga marsiajar Bibel taon 1908. Tubu ma ahu tanggal 24 April 1931. Ahu ma sipaidua sian opat gelleng ni omakku. Lomo do roha ni bapakku marsiajar Bibel, jala diajarhon do i tu hami. Manomba Jahowa ma na rumingkot di ngolunami. Jotjot do hami marbarita na uli sian jabu tu jabu.—Ul. 20:20.

Taon 1939, masa ma Porang Dunia II. Di taon na mangihut, diorai ma ulaon ni Sitindangi Ni Jahowa di Kanada. Angka dakdanak di singkola disuru manghormat bendera jala mangendehon lagu nasional. Somalna, dipaloas guru do ahu dohot ibotongku si Dorothy asa unang dohot mangulahon i. Alai sada tingki, dipaila guru i do ahu, jala didok ma ahu parbiar. Dung mulak singkola, direhei angka donganku ma ahu jala dionjar sampe madabu. Ndang metmet rohangku alani i, gariada on mangurupi ahu gabe oloan ”di Debata asa di jolma”.—Ul. 5:29.

Bulan Juli 1942, tingki marumur 11 taon, tardidi ma ahu di bak na dibahen di peternakan. Tingki libur singkola, dohot do ahu gabe perintis liburan, saonari didok perintis ekstra. Saleleng sataon, ahu dohot tolu donganta marbarita na uli tu angka panaba hau di Ontario utara.

Tanggal 1 Mei 1949, gabe perintis biasa ma ahu. Ditogihon do ahu mangurupi di kantor cabang Kanada di bagian konstruksi. Gabe keluarga Betel di Kanada ma ahu. Ditugashon ma ahu di bagian percetakan, jala huparsiajari ma cara mamangke mesin cetak. Saleleng pigapiga minggu, lembur do ahu laho mancetak risalah na mangulas taringot tu paraloan na diadopi Sitindangi Ni Jahowa di Kanada.

Di pudian ni ari, pinda ma ahu tu Departemen Dinas. Disuru ma ahu mewawancarai pigapiga perintis na marbarita di Quebec, inganan na godang masa paraloan. Sada sian nasida, i ma si Mary Zazula sian Edmonton, Alberta. Natuatuana anggota ni Gareja Ortodoks. Ala tongtong si Mary dohot ibotona marsiajar Bibel, dipalao ma nasida sian jabu. Tardidi ma nasida di bulan Juni 1951, jala onom bulan dungkon i, gabe perintis ma nasida. Tingki huwawancarai, boi ma huida mansai holong roha ni si Mary tu Jahowa. On ma na mambahen lomo rohangku tu ibana. Dung sia bulan, marhasohotan ma hami tanggal 30 Januari 1954. Saminggu dungkon i, dilatik ma hami mangulahon ulaon ni pengawas wilayah.  Dua taon dungkon i, gabe pengawas wilayah ma hami di Ontario utara.

Ala lam maju ulaon parbaritaon, porlu godang misionaris. Pos do rohanami, ala boi martahan di inganan na mansai ngali dohot di inganan na mohop na somalna godang rongit di Kanada, tontu hami pe boi martahan di inganan na asing. Dohot ma hami tu Singkola Gilead kelas ke-27, jala diwisuda bulan Juli 1956. Bulan November, ditugashon ma hami tu Brasil.

Di Brasil, marsiajar bahasa Portugis ma hami. Parjolo, diparsiajari hami ma hata laho mamungka pangkataion jala diapil hami ma hata laho mangalehon majalah. Dung i, marbarita ma hami jala pajumpang dohot sahalak borua na olo manjangkon. Molo adong na manjangkon, dipaboa hami ma ayat na paboahon pasupasu na laho lehonon ni Harajaon ni Debata. Hujahahon ma Pangungkapon 21:3, 4, jala tompu ma ahu pingsan! Alana, ndang somal ahu di inganan na pamohophu songon di inganan on. Sada ambatambat do on di ahu.

Inganan penugasannami goarna Campos. Saonari adong 15 huria disi! Alai tingki sahat hami di Campos, holan sada kelompok na metmet do disi dohot opat misionaris, i ma si Esther Tracy, si Ramona Bauer, si Luiza Schwarz, dohot si Lorraine Brookes (saonari si Wallen). Nasida tading di jabu ni misionaris. Manunsi abit do karejongku di jabu i dohot mangalului soban. Di tingki ari Senin borngin, dung sae mamparsiajari Menara Pengawal, modommodom ma si Mary di sofa. Mangkatahatai ma hami. Tingki jongjong si Mary, kaluar ma ulok sian bantalna! Tarsonggot ma hami sude, jala hupamate ma ulok i.

Dung sataon marsiajar bahasa Portugis, gabe pengawas wilayah ma hami di inganan na so adong listrik. Di tingkar do hami modom. Marhoda jala marsado do hami laho manopot angka huria. Sada tingki, markareta api ma hami tu sada kota di dolok, asa boi marbarita di inganan na so hea dope adong parbarita. Disewa hami ma disi kamar. Ditongos kantor cabang ma 800 majalah laho dipangke hami. Ndang mura mambuat majalah i, ala dao kantor pos sian inganannami.

Taon 1962, dibahen ma Singkola Pangkobasion tu Harajaon di pigapiga inganan di Brasil. Saleleng onom bulan, gabe instruktur ma ahu di angka singkola i. Umpamana, di Manaus, Belém, Fortaleza, Recife, dohot Salvador. Tingki di Manaus, ahu do na mangaradoti kebaktian distrik di gedung opera. Ala doras udan, ndang godang aek na ias laho diinum. Asing ni i, ndang adong be inganan ni angka donganta laho mangan di kebaktian i. Hupaboa ma taringot i tu sahalak komandan militer. Burju do ibana jala dilehon ma aek na ias tu hami saleleng kebaktian i. Disuru ma muse angka tentarana mambahen dua tenda na balga,  asa boi dipangke hami gabe dapur dohot inganan laho mangan.

Tingki i, marbarita ma si Mary tu daerah bisnis, alai ndang adong na olo manjangkon. Godang halak disi ro sian Portugal laho karejo di Brasil. Marmetmet ni roha do si Mary jala didok ma tu donganna, ”Ndang olo ahu molo disuru tading di Portugal.” Ndang sadia leleng, hujalo hami ma surat na mandok asa pinda hami tu Portugal, inganan na mangorai ulaon ni Sitindangi. Songgot do roha ni si Mary! Alai, dijangkon hami do tugas i jala pinda ma hami tu Portugal.

Bulan Agustus 1964, sahat ma hami di Lisbon, Portugal. Susa do angka donganta dibahen polisi disi. Alani i, ndang pintor dipaboa hami haroronami tu angka dongan. Mulana, disewa hami ma jabu. Alai dung kaluar visanami, disewa hami ma apartemen. Dung lima bulan, dihubungi hami ma angka dongan di kantor cabang Portugal. Mansai las do rohanami ala boi rap marpungu dohot angka dongan disi!

Ala diorai do ulaonta marbarita disi, ditutup ma Bale Harajaon. Gabe di jabu ni angka dongan ma hami marpungu. Jotjot do polisi ro mamerengmereng tu jabu i. Marratus angka donganta ditangkup jala disungkuni di kantor polisi. Disiksa jala dipaksa do nasida paboahon goar ni angka donganta baoa na manguluhon nasida. Asa aman, ndang dipangke angka donganta be goar ni nasida na sasintongna, alai dipangke ma goar na asing.

Marsitutu do hami mangurupi angka donganta disi mandapot angka sijahaon, asa boi nasida tongtong marsihohot. Diketik si Mary ma Menara Pengawal dohot buku na asing. Dung i distensil, asa boi dilehon tu angka donganta.

Bulan Juni 1966, adong ma kasus pengadilan di Lisbon. Adong 49 angka donganta sian Huria Feijó na didok mambahen parpunguan na so adong izinna. Laho mangurupi nasida, hubahen ma diringku tarsongon pengacara na patuduhon sala do angka donganta i. Alai, tarboto do i, jala gabe sundat ma rencananami. Dipenjarahon ma donganta na 49 halak i. Adong na 45 ari dipenjara manang lobi, na asing sahat tu lima satonga bulan. Alai, gabe dihatindangkon do hasintongan disi. Saleleng di pengadilan, dienet pengacaranami do hata ni si Gamaliel sian Bibel. (Ul. 5:33-39) Disiarhon do kasus pengadilan on di berita. Las situtu do rohanami ala olo pengacaranami i marsiajar Bibel jala ro tu parpunguan.

Bulan Desember 1966, ditugashon ma ahu gabe pengawas di kantor cabang, jala mangurupi di bagian hukum. Godang do cara na dibahen hami asa boi bebas Sitindangi Ni Jahowa di Portugal, jala  resmi secara hukum. (Plp. 1:7) Ujungna, tanggal 18 Desember 1974, ndang diorai be Sitindangi Ni Jahowa di Portugal. Ro ma donganta si Nathan Knorr dohot si Frederick Franz sian kantor pusat tu Portugal. Dibahen hami ma kebaktian di Oporto dohot di Lisbon, jala adong 46.870 halak na ro.

Dibahen Jahowa ma asa sahat barita na uli tu halak na marbahasa Portugis di godang pulo. Umpamana, di pulo Azores, Cape Verde, Madeira, São Tomé dohot Príncipe. Ala lam tamba Sitindangi di inganan on, porlu do kantor cabang na balga. Dung sae kantor cabang i dipajongjong, ro ma Donganta si Milton Henschel pasahathon jamita penahbisan, tanggal 23 April 1988. Adong do 45.522 donganta na ro, dohot ma i 20 misionaris di Portugal jala angka na hea gabe misionaris disi.

Saleleng martaontaon, ditiru hami do angka donganta na marsihohot. Umpamana, tingki rap ahu dohot Donganta si Theodore Jaracz di kunjungan hamba zona, adong parsiajaran na ringkot sian i. Adong masalah di kantor cabang na dijumpangi hami, jala nunga diurupi Panitia Cabang nasida. Lungun do roha ni donganta disi, ala ndang godang na boi diulahon nasida. Dipatogu Donganta si Jaracz ma roha ni nasida jala didok, ”Paloas ma tondi parbadia mangurupi hita.” Huingot do na didok Donganta si Franz pigapiga taon naung salpu, tingki laho hami tu Brooklyn. Tingki dipangido hami poda sian ibana, didok ma, ”Hudok ma tu hamu: Tongtong ma hita marsihohot tu organisasi ni Jahowa, nang pe maol. Ringgas ma mangulahon parenta ni Jesus laho pasahathon barita taringot tu Harajaon ni Debata!”

Las do rohanami mangulahon i. Godang pengalaman na denggan tingki manopot angka dongan sian sada kantor cabang tu kantor cabang na asing. Las do rohanami pajumpang dohot dongan sian marragam umur. Dipatogu hami do rohanasida, na diargai Jahowa do panombaon ni nasida. Dijujui hami do nasida asa marsihohot.

Saonari, nunga marumur 80 taon lobi hami. Marsahitsahit do si Mary. (2 Kor. 12:9) Adong muse ambatambat na asing na diadopi hami. Alai, ndang gabe marmetmet ni roha hami, gariada gabe lam togu do haporseaonnami tu Jahowa. Molo diingot hami songon dia pangkobasionnami najolo, pos rohanami dipasupasu Jahowa do hami marhite asi ni rohaNa. *—Ida Surat na di Toru.