Najolo, tarimpu do tutu songon i ala na didok di Heber 12:16 (Bibel Siganup ari). Didok disi taringot si Esau “na neang roha” tu angka na badia jala mangalehon tu si Jakkob ‘hak siangkangan ala ni sada sipanganon’. Jadi saleleng on, na tarimpu do molo si Jakkob boi gabe ompu ni Messias ala nunga mandapot ‘hak siangkangan i’.​—Mat. 1:2, 16; Luk. 3:23, 34.

Alai, molo tasulingkiti isi ni Bibel, taboto ma ndang ingkon na siangkangan asa gabe ompu ni Messias. Taida ma pigapiga buktina:

Si Ruben do anak ni si Jakkob na siangkangan tubu ni si Lea. Jala si Josep do na siangkangan tubu ni si Rahel. Tingki diulahon si Ruben na rorang, gabe tu si Josep ma hak siangkangan i. (1 Mus. 29:31-35; 30:22-25; 35:22-26; 49:22-26; 1 Kron. 5:1, 2) Alai, ndang si Josep nang si Ruben na gabe ompu ni Messias. Na gabe ompu ni Messias, i ma si Juda. Hape, anak na paopathon do si Juda na ditubuhon si Lea.​—1 Mus. 49:10.

Di Lukas 3:32, disurat do disi lima ompu ni Messias. Na siangkangan do nasida sude. Umpamana, songon si Boas ama ni si Obed, si Obed ama ni si Isai.​—Rut 4:17, 20-22; 1 Kron. 2:10-12.

Alai molo si Daud anak si Isai, ndang siangkangan ibana. Siampudan do ibana sian ualu anak ni si Isai. Alai, si Daud do na gabe ompu ni Messias. (1 Sam. 16:10, 11; 17:12; Mat. 1:5, 6) Jala, anak ni si Daud, i ma si Salomo ndang na siangkangan. Hape dohot do ibana gabe ompu ni Messias.​—2 Sam. 3:2-5.

 Alai on ndang patuduhon na so pola ringkot gabe siangkangan. Umgodang do hasangapon na didapot anak na siangkangan sian angka anggina. Somalna, ibana do na gabe manguluhon keluarga manggantihon amana, jala umgodang do arta warisan na didapot ibana.​—1 Mus. 43:32; 5 Mus. 21:17; Jos. 17:1.

Alai, hak siangkangan i boi do gabe dilehon tu anak na asing. Tingki si Abraham palaohon si Ismael, dilehon ibana do hak siangkangan i tu si Isak. (1 Mus. 21:14-21; 22:2) Jala songon naung taulas nangkin, gabe tu si Josep do hak siangkangan ni si Ruben.

Jadi, aha do parsiajaran na tadapot sian hata ni Apostel Paulus na disurat di Heber 12:16? Disi didok, “Tung unang ma adong parmainan manang na ramun songon si Esau, na sumeahon sahala siangkangan ala ni sipanganon sada.”

Di ayat i, si Paulus ndang mangulas taringot ompu ni Messias. Alai, sipasingot tu halak Kristen do na dipaboa ibana disi. Didok ibana, “Patigor hamu ma sidalanan ni patmuna . . . asa unang adong na paholang dirina sian asi ni roha ni Debata.” Boi do i masa tu nasida molo mangulahon parmainanon nasida. (Heb. 12:12-16) Jala, gabe dos ma nasida songon si Esau, na so mangargai angka na badia, i ma hak siangkanganna holan alani giotgiot ni dagingna.

Hombar tu hasomalan ni angka halak tingki i, boi do ra si Esau gabe na mangalehon pelean tu Jahowa. (1 Mus. 8:20, 21; 12:7, 8; Job 1:4, 5) Alai, holan giotgiot ni dagingna do na diharingkothon ibana, umbahen gabe digadis ibana hak siangkangan i asa mandapot sipanganon. Ra, ndang olo si Esau mangkilala hasusaan na laho masa tu pinompar ni si Abraham, songon naung disurirangkon Jahowa. (1 Mus. 15:13) Asing ni i, dibuat si Esau do dua borua na so manomba Jahowa gabe dongan saripena. Gabe lungun do roha ni natuatuana alani i. On patuduhon, ndang adong pangargaionna tu Jahowa. (1 Mus. 26:34, 35) Alai molo si Jakkob, imbar do ibana sian si Esau. Dibuat ibana do borua na manomba Jahowa gabe dongan saripena! —1 Mus. 28:6, 7; 29:10-12, 18.

Sian angka ayat nangkin, aha do na taparsiajari taringot ompu ni Messias? Adong do na siangkangan, alai adong do na so siangkangan. Tangkas do on diantusi halak Jahudi jala porsea do nasida disi. Sian dia taboto? Alana, diangkui nasida do molo Kristus i marharoroan sian pinompar ni si Daud, anak siampudan ni si Isai.​—Mat. 22:42.