1, 2. Aha do na diadopi sahalak donganta, jala aha do na diulahon ibana laho mangadopi i?

TINGKI poso dope nunga tardidi si Robert. Alai, ndang ringkot hasintongan i di ibana. Didok ibana, “Memang ndang hea huulahon na sala, alai manomba Debata holan ulaon sambing do di ahu. Diida halak hira na togu do paralealeonku tu Debata. Tongtong do ahu marpungu, jala merintis ekstra do ahu sahalisahali. Alai, hira na adong do na hurang bah.”

² Dung pe marhasohotan, baru ma diboto si Robert aha na hurang. Hea ma ibana dohot tungganeboruna mambahen kuis taringot Bibel. Molo tungganeboruna, jago do mangalusi sude sungkunsungkun taringot Bibel. Alai molo si Robert, godang do na so boi dialusi ibana. Gabe maila ma ibana. Didok ibana, “Hira na so adong do parbinotoanku. Gabe hupingkiri ma, ‘Asa boi ahu denggan manguluhon keluargangku, ingkon muba do ahu.’” Jadi muba ma ibana. Didok do, “Ringgas ma huparsiajari Bibel. Lam leleng, gabe lam godang ma  parbinotoanku. Jala na rumingkot, gabe lam solhot ma paralealeonku tu Jahowa.”

3. (a) Aha do na boi taparsiajari sian pengalaman ni si Robert? (b) Aha do na laho taulas?

³ Adong do parsiajaran na denggan na boi dapotta sian si Robert. Ra, hita pe songon i do. Adong do parbinotoanta taringot Bibel. Tongtong do hita marpungu dohot marbarita. Alai sudena i, ndang boi dope mambahen hita jonok tu Debata. Manang nunga marsitutu hita asa lam solhot paralealeonta tu Debata. Alai tingki tapareso dirinta, adong dope na porlu tapadenggan. (Plp. 3:16) Di parsiajaran on, taulas ma tolu sungkunsungkun. (1) Aha do na boi mangurupi hita mamboto sadia bagas do paralealeonta tu Jahowa? (2) Songon dia asa lam jonok hita tu Debata? (3) Songon dia paralealeonta mangurupi hita ganup ari?

4. Tu ise do marlangku poda na disurat di Epesus 4:23, 24?

⁴ Tingki tapillit laho manomba Debata jala tardidi, olo do hita mambahen hamubaon di ngolunta. Alai ndang sae sahat disi. Didok do di Bibel, “Paimbaru hamu ma dirimuna di bagasan tondi ni rohamuna!” (Eps. 4:23, 24) Ala jolma na mardosa hita, porlu dope hita mambahen hamubaon. Nang pe nunga martaontaon hita manomba Jahowa, porlu dope hita patoguhon paralealeonta tu Ibana.​—Plp. 3:12, 13.

5. Sungkunsungkun aha do na boi mangurupi hita mamboto sadia bagas paralealeonta tu Jahowa?

⁵ Sude hita na poso nang na matua, porlu do mamareso diri. Alani i, tasungkun ma dirinta, ‘Lam jonok do ahu tu Debata? Nunga hutiru Jesus? Sian parniulaonku di parpunguan, tarida do nunga jonok ahu tu Debata? Sian pangkataionku ganup ari, tarida do Jahowa na rumingkot di ngolungku? Sian caraku marsiajar, caraku margaya jala marpangkean, dohot pangkilalaanku tingki dipasingot, tarida do na jonok ahu tu Debata? Aha do na huulahon molo dielaela mangulahon na sala? Nunga gabe halak Kristen na denggan be ahu?’ (Eps. 4:13) Sungkunsungkun on boi mangurupi hita mamboto sadia bagas do paralealeonta tu Jahowa.

6. Ise do na mangurupi hita mamboto na jonok do hita tu Debata?

⁶ Sipata, porlu do halak na asing mangurupi hita mamboto sadia bagas do paralealeonta tu Debata. Dipaboa si Paulus do, molo halak na so jonok tu Debata, ndang mangantusi molo ulaonna i dihasogohon Debata. Alai halak na jonok tu Debata diantusi do songon dia pangkilalaan ni Debata. Jala diantusi ibana, ndang lomo roha  ni Jahowa molo hita holan mangkaholongi dirinta sandiri. (1 Kor. 2:14-16; 3:1-3) Angka sintua na maniru Jesus, diparrohahon nasida do angka dongan na songon i, jala rade do nasida mangurupi. Alani i molo diurupi sintua hita, tajangkon do jala olo do muba hita? Molo taulahon i, on patuduhon na olo do hita asa lam jonok muse tu Jahowa.​—Pjm. 7:5, 9.

7. Sian dia taboto ndang cukup holan mamboto isi ni Bibel asa boi jonok tu Debata?

⁷ Ndang cukup holan mamboto isi ni Bibel asa boi jonok tu Debata. Songon raja Salomo, godang do parbinotoanna taringot Jahowa. Jala angka podana pe disurat do di Bibel. Alai di pudian ni ari, gabe lam dao do ibana sian Jahowa, jala ndang be togu haporseaonna. (1 Raj. 5:9, 10; 11:4-6) Jadi, aha do muse na tahaporluhon asing ni mangantusi isi ni Bibel? Ingkon tongtong do tapatogu haporseaonta. (Kol. 2:6, 7) Songon dia carana?

8, 9. (a) Aha do na mangurupi hita asa lam togu haporseaonta? (b) Aha do na tinujunta tingki mamparsiajari jala mangarimangi Hata ni Debata? (Ida gombar di mula ni parsiajaran.)

⁸ Dipatogu si Paulus do halak Kristen di abad na parjolo asa manulingkiti “parsiajaran na umbagas”. (Heb. 6:1, Bibel Siganup ari) Songon dia hita mangulahon poda i saonari? Sada cara na ringkot, i ma mamparsiajari buku Tongtong ma di Bagasan Holong ni Roha ni Debata. On boi mangurupi hita asa mangulahon prinsip ni Bibel ganup ari. Molo nunga diparsiajari hamu buku on, parsiajari ma muse angka sijahaon na asing na boi patoguhon haporseaonmuna. (Kol. 1:23) Jala tarimangi ma angka na taparsiajari, dung i pangido ma tu Jahowa asa diurupi hita mangulahon i.

⁹ Aha do na tinujunta tingki mamparsiajari jala mangarimangi hata ni Debata? I ma asa taronjar rohanta laho unduk jala palashon roha ni Jahowa. (Ps. 40:9; 119:97) Jala, porlu do hita pasidingkon sude na boi mangambati hita pajonokkon diri tu Debata.​—Tit. 2:11, 12.

10. Aha do na porlu di bahen angka na poso asa boi lam jonok tu Debata?

 ¹⁰ Hamu angka na poso, adong do citacitamuna di partondion? Adong sahalak donganta na marhobas di Betel na jotjot mangkatai tu angka na poso naung tardidi di kebaktian. Disungkun ma citacita ni nasida. Diboto ibana ma godang do angka na poso naung mamingkirhon asa mangalehon tingki tu Jahowa. Adong na naeng merintis. Adong muse na naeng pinda tu inganan na mangkaporluhon parbarita. Alai, pigapiga na poso ndang boi mangalusi sungkunsungkun i. Jadi na so dipingkirhon nasida do citacita ni nasida? Hamu angka na poso sungkun ma dirimuna, ‘Alani natuatuangku do gabe olo ahu dohot marpungu jala marbarita? Manang, tutu do togu paralealeonku tu Debata?’ Tutu, sude do hita na poso nang na matua ingkon mambahen citacita di partondion. Citacita i boi mambahen hita lam jonok tu Debata.​—Pjm. 12:1, 13.

11. (a) Aha do muse na tahaporluhon asa gabe halak na jonok tu Debata? (b) Sitiruan ni ise do na sian Bibel na ingkon tatiru?

¹¹ Dung taboto aha na ingkon tapadenggan sian dirinta, pintor tapadenggan ma. Mansai ringkot do on, ala mangkorhon do on tu ngolunta. (Rom 8:6-8) Ndang dipangido Jahowa hita asa pas hian maniru Jesus. Alai, dilehon Ibana do tondi parbadia asa mangurupi hita mambahen hamubaon. Jadi, ingkon porlu do hita marsitutu.  Donganta si John Barr, na hea dohot mangaradoti Organisasi, paboahon taringot Lukas 13:24. Didok ibana, “Godang halak na so marhasil masuk tu dalan i, ala ndang marsitutu nasida asa tongtong togu.” Tatiru ma si Jakkob. Marsitutu do ibana tingki marsiranggut dohot surusuruan asa mandapot pasupasu. (1 Mus. 32:26-28) Ra, tabo do tahilala mamparsiajari Bibel, alai memang ndang hira na manjaha buku carita hita. Jadi, porlu do marsitutu hita mangalului arta na arga na adong di Bibel, asa boi mangurupi hita.

12, 13. (a) Aha do na mangurupi hita mangulahon songon na didok di Pilippi 2:5? (b) Aha do na boi taulahon asa lam denggan paralealeonta tu Debata? (Ida ma kotak “ Asa Lam Denggan Paralealeonta tu Debata”.)

¹² Molo marsitutu hita asa lam jonok tu Debata, tontu diurupi tondi parbadia do hita. Lam leleng gabe boi ma tatiru pingkiran ni Jesus. (Plp. 2:5) Alana, tondi parbadia boi mangurupi hita pasidingkon giotgiot na sala. Jala mangurupi hita asa lam denggan marparange. (Gal. 5:16, 22, 23) Molo saleleng on hita holan mamingkirhon hasonangan dohot arta, unang ma metmet rohanta. Tongtong ma pangido tondi parbadia ni Jahowa, asa diurupi hita mangkaringkothon na dumenggan. (Luk. 11:13) Taingot ma Apostel Petrus. Ndang sai tongtong boi ditiru ibana pingkiran ni Jesus. (Mat. 16:22, 23; Luk. 22:34, 54-62; Gal. 2:11-14) Alai, sai marsitutu do ibana, jala rade do Jahowa mangurupi. Lam leleng, gabe boi ma ibana maniru pingkiran ni Kristus. Hita pe boi do songon i.

¹³ Dipaboa si Petrus do pigapiga parange na boi mangurupi hita. I ma mangarajai diri, marhabengeton, mangkaholongi angka dongan, dohot angka parange na asing. (Jaha 2 Petrus 1:5-8.) Ingkon marsitutu do hita mangulahon i. Jadi boi ma tarimangi sungkunsungkun on ganup ari, ‘Parange na dia do na ingkon huulahon saonari asa jonok tu Debata?’

14. Aha pangkorhonna tu ngolunta molo jonok hita tu Debata?

¹⁴ Molo tatiru pingkiran ni Kristus, tarida do i sian parniulaonta di parkarejoan, di singkola, sian pangkataionta dohot tingki hita mambahen haputusan ganup ari. Molo jonok hita tu Jahowa, ndang olo hita mangulahon na boi manegai paralealeonta tu Ibana. Alani i, tingki dielaela hita, ndang olo hita mangulahon na sala. Jadi andorang so tabahen haputusan, tasungkun ma dirinta: ‘Prinsip Bibel dia do na boi mangurupi ahu? Aha do na diulahon Jesus molo mangadopi situasi na songon on? Las do roha ni Jahowa tu haputusan na hubahen?’ Ingkon tapasomal do laho mamingkiri i. Saonari taulas ma pigapiga situasi na taadopi. Sian ganup situasi on, taida ma prinsip Bibel na dia ma na boi mangurupi hita mambahen haputusan na denggan.

15, 16. Molo tatiru pingkiran ni Kristus, songon dia do hita mambahen haputusan tingki (a) mamillit dongan saripe? (b) mamillit dongan?

¹⁵ Mamillit dongan saripe. Prinsipna boi taida di 2 Korint 6:14, 15. (Jaha.) Tangkas do dipaboa si Paulus, ndang sarupa pingkiran ni halak na jonok tu Debata tu halak na holan mangkaholongi hasonangan. Songon dia prinsip on boi mangurupi hamu tingki mamillit dongan saripe?

 ¹⁶ Mamillit dongan. Prinsipna di 1 Korint 15:33. (Jaha.) Sahalak na jonok tu Debata, ndang olo mardongan tu halak na boi mambahen gale haporseaonna. Boi do tapangke prinsip on di pigapiga situasi na asing. Umpamana, tingki mamangke jejaring sosial manang internet. Manang tingki mamillit dongan laho margame di Internet.

17-19. Molo jonok hita tu Debata, songon dia i mangurupi hita (a) pasidingkon ulaon na so patoguhon paralealeonta tu Debata? (b) mambahen citacita? (c) tingki marsoal dohot donganta?

¹⁷ Angka ulaon na mangambati paralealeon tu Debata. Taida ma prinsipna sian Heber 6:1. (Jaha.) Angka “ulaon hamatean” i ma angka ulaon na so patoguhon paralealeonta tu Debata. Ingkon tapasiding do i. Sipasingot taringot ulaon hamatean i boi mangurupi hita mangalusi sungkunsungkun on: ‘Mangkorhon na denggan do ulaon on? Ingkon dohot do ahu tu bisnis sisongon on? Boasa ndang porlu ahu parsidohot tu kelompok na naeng padengganhon portibi on?’

¹⁸ Citacita. Di Jamita ni Jesus di Dolok, dipaboa ibana do sada poda na denggan na boi taihuthon tingki mamillit citacita. (Mat. 6:33) Sahalak na jonok tu Debata mangkaringkothon HarajaonNa di ngoluna. Prinsip on boi mangurupi hita laho mangalusi sungkunsungkun on: ‘Ingkon kuliah do ahu dung tammat singkola? Ingkon hudapot do karejo na jago?’

¹⁹ Marsoal dohot donganta. Poda ni si Paulus tu halak Rom mangurupi hita tingki marsoal dohot donganta. (Rom 12:18) Molo tatiru Kristus, marsitutu ma hita “dame maradophon halak saluhutna”. Songon dia do hita maradophon donganta tingki marsoal? Mura do hita manjalo pandapot ni halak? Ditanda angka halak do hita sahalak na olo mardame?​—Jak. 3:18.

20. Boasa ingkon marsitutu hita asa lam jonok tu Debata?

²⁰ Angka naung taulas nangkin, patuduhon songon dia prinsip ni Bibel mangurupi hita mambahen haputusan. Jala, sian haputusan i, tarida do na diurupi tondi parbadia hita. Molo jonok do hita tu Debata, marlas ni roha ma hita jala martua ma ngolunta. Si Robert na dipaboa nangkin mandok, “Dung hupatogu paralealeonku tu Jahowa, gabe lam denggan ma ahu manguluhon keluargangku. Mansai las do rohangku.” Molo marsitutu hita asa lam jonok tu Debata, tadapot do pangkorhon na denggan sian i. Martua ma ngolunta, jala di ari na naeng ro tadapot ma “ngolu na tutu” i.​—1 Tim. 6:19.