1, 2. (a) Songon dia do pangkilalaan ni angka donganta naung jonok tu Debata? (b) Sungkunsungkun aha do na laho taulas di parsiajaran on?

SAHALAK donganta borua di Kanada mandok, ala jonok ibana tu Debata gabe marlas ni roha do ibana. Jala gabe ummura ma ibana mangadopi parsoalan di ngoluna. Sahalak donganta na di Brasil nunga 23 taon marhasohotan, jala denggan do parsaripeonna. Ibana mandok, boi do dihilala nasida i, ala jonok do nasida tu Debata. Sahalak donganta di Filipina mandok, ala jonok ibana tu Debata gabe dame ma pingkiranna, jala boi ma ibana maraleale tu marragam halak na adong di huria.

² Godang do labana molo hita jonok tu Debata. Alani i, songon dia do carana asa boi hita jonok tu Debata jala marlas ni roha? Na parjolo, ingkon taantusi do aha na didok Bibel taringot halak na jonok tu Debata. I ma halak na diurupi tondi parbadia ni Debata. Jadi di parsiajaran on adong tolu sungkunsungkun na laho taulas: (1) Aha do lapatanna halak na jonok tu Debata? (2) Angka sitiruon  aha do na boi mangurupi hita asa jonok tu Debata? (3) Songon dia hita jonok tu Debata molo tatiru pingkiran ni Kristus?

3. Aha do na didok Bibel imbar ni halak na mangkaholongi portibi on dohot halak na jonok tu Debata?

³ Dijujui Apostel Paulus do hita asa jonok tu Debata. Alani i, dipaboa ibana do aha imbar ni halak na jonok tu Debata dohot halak na mangkaholongi portibi on. (Jaha 1 Korint 2:14-16.) Didok, halak na mangkaholongi portibi on ndang tarjalo nasida “Tondi ni Debata, ai haotoon do i di rohana; ndang tartandasa i.” Alai halak na jonok tu Debata, “saluhutna i didodo” jala adong do “roha ni Kristus” di nasida. Lapatanna, marsitutu do nasida maniru pingkiran ni Kristus. Aha do muse imbar ni halak na mangkaholongi portibi on dohot halak na jonok tu Debata?

4, 5. Sian dia taboto molo sasahalak mangkaholongi portibi on?

⁴ Diihuthon halak na mangkaholongi portibi on do angka pangalaho na roa saonari. Jala holan mangkaringkothon dirina sandiri do nasida. Si Paulus paboahon molo pangalaho ni nasida dos songon “tondi na mangula nuaeng di tongatonga ni angka jolma na so mangoloi Debata.” (Eps. 2:2, Bibel Siganup ari) Mura do nasida tarelaela laho mangihuthon pangalaho ni angka halak na diida nasida. Angka na denggan dihilala nasida, i do na diulahon. Jala ndang parduli nasida tu uhum ni Debata. Holan hepeng, pangkat, dohot dirina sandiri do na rumingkot.

⁵ Didok di Bibel, angka “parulaon ni daging” do na jotjot diulahon halak sisongon i. (Gal. 5:19-21) Di surat ni si Paulus na parjolo tu halak Kristen di Korint, dipaboa do angka na diulahon halak na mangkaholongi portibi on. Nasida ndang olo mardame, paimbarimbarhon halak, manjujui na asing asa mangalo, manguhumi, ndang unduk tu na manguluhon, jala mongkus. Halak na songon i mura do tarelaela laho mangulahon na sala. (Poda 7:21, 22) Si Judas mandok molo halak na mangkaholongi portibi on, boi gabe ndang mandapot panogunoguon sian Jahowa.​—Jud. 18, 19.

6. Sian dia taboto molo sasahalak jonok tu Debata?

⁶ Alai molo halak na jonok tu Debata rumingkot do di ibana paralealeon tu Debata. Diihuthon ibana do panogunoguon ni tondi parbadia. Jala marsitutu do ibana asa maniru Jahowa. (Eps. 5:1) Sai diparsiajari ibana do songon dia pamingkirion ni Jahowa jala diihuthon ibana do i. Solhot do ibana tu Debata. Diargai ibana do uhum ni Debata, jala diulahon do i di parngoluonna. (Ps. 119:33; 143:10) Ndang olo ibana mangulahon “parulaon ni daging” alai sai diulahon ibana do “parbue ni Tondi”. (Gal. 5:22, 23) Sahalak na mangkaringkothon ulaon panombaon tu Debata, i ma halak na jonok tu Debata.

7. Aha do na didok Bibel taringot halak na jonok tu Debata?

⁷ Didok Jesus, marlas ni roha do  halak na jonok tu Debata. Songon didok Lukas 11:28, “Martua ma angka na umbege hata ni Debata jala na umpeopsa!” Jala dipaboa do di Rom 8:6, adong pangkorhonna tu parngoluonta molo taihuthon pamingkirion ni Debata. Didok, “Ai hamatean do harohaon ni daging, alai hangoluan jala hadameon do anggo harohaon ni Tondi.” Jadi molo jonok hita tu Debata, gabe dame ma pangkilalaanta, maraleale tu Debata, jala dapotta ma pangkirimon mangolu salelengna.

8. Boasa ndang mura gabe sahalak na tongtong jonok tu Debata?

⁸ Alai, saonari hita mangolu di portibi na jahat. Godang do halak saonari ndang mangihuthon pamingkirion ni Debata. Jadi porlu do hita manjaga pamingkirionta. Molo ndang taihuthon pamingkirion ni Jahowa, gabe pamingkirion ni portibi on ma na taihuthon. Songon dia asa unang gabe songon i hita? Songon dia carana asa tongtong hita jonok tu Debata?

9. (a) Aha do na boi mangurupi hita asa jonok tu Debata? (b) Sitiruon taringot ise do na laho taulas?

⁹ Sahalak dakdanak porlu marsiajar jala mangihuthon sitiruon sian natuatuana. Suang songon i ma hita. Tatiru ma angka halak na jonok tu Debata asa boi hita songon nasida. Asing ni i, porlu do taboto songon dia asa unang gabe mangkaholongi portibi on. (1 Kor. 3:1-4) Di Bibel adong do sitiruon na denggan, jala adong do na so porlu taihuthon. Taida ma sitiruon na denggan sian si Jakkob, si Maria dohot Jesus.

10. Aha do buktina molo si Jakkob halak na jonok tu Debata?

 ¹⁰ Dos songon hita, godang do parsoalan na diadopi si Jakkob. Si Esau abangna sandiri naeng mambunu ibana. Jala diotootoi simatua dolina do ibana. Alai, tongtong do ibana marhaporseaon tu janji ni Jahowa na dipaboa tu ompungna si Abraham. Diboto ibana do dipangke Jahowa do keluargana laho manggohi janjiNa. Alani i, denggan do diurus ibana sude keluargana. (1 Mus. 28:10-15) Jala, ndang olo ibana mangihuthon pangalaho ni angka halak di humaliangna. Tongtong do diingot ibana janji ni Jahowa. Umpamana, tingki marsangkap si Esau laho mambunu ibana, martangiang do ibana tu Jahowa. Didok ma, “Ingot ma padanMu tu ahu, na bahenonmu na denggan tu ahu, na lehononmu di ahu pinompar na so habilangan toropna, songon torop ni pasir na di topi laut.” (1 Mus. 32:6-12, Bibel Siganup ari) Jadi togu do haporseaon ni Si Jakkob tu Jahowa. Tarida do i sian parngoluonna.

11. Aha do buktina si Maria halak na jonok tu Debata?

¹¹ Saonari taulas ma taringot si Maria. Ala jonok do si Maria tu Debata, dipillit ma ibana gabe omak ni Jesus. Sian dia do i taboto? Tajaha ma taringot aha na didok si Maria tu si Sakaria dohot si Elisabet. (Jaha Lukas 1:46-55.) Sian hatana i, tarida do dihaholongi ibana Hata ni Debata jala tangkas do diantusi. (1 Mus. 30:13; 1 Sam. 2:1-10; Mal. 3:12) Alani i, nang pe nunga marhasohotan ibana dohot si Josep ndang mangulahon seks nasida sahat tu tubu Jesus. Alana, rumingkot do di nasida mangulahon sangkap ni  Debata, sian apala giotgiot ni nasida sandiri. (Mat. 1:25) Jala diparrohahon ibana do aha na masa tu Jesus sahat tu na magodang. Jala ditangihon ibana do na dihatahon Jesus. ‘Dipeop ibana do sude na masa i di bagasan rohana.’ (Luk. 2:51) Tangkas ma lomo do rohana mamboto janji ni Debata taringot Messias. Olo do hamu maniru si Maria? Jala olo do hamu mangulahon na dipangido Debata tu hamu?

12. (a) Songon dia Jesus maniru Bapakna? (b) Songon dia hita maniru Jesus? (Ida gombar di mula ni parsiajaran.)

¹² Jesus ma sitiruon na dumenggan taringot halak na jonok tu Debata. Tingki mangolu ibana di tano on, sai diihuthon ibana do Bapakna. Pingkiranna, pangkilalaanna, dohot ulaonna dos songon Jahowa. Sai diulahon ibana do sangkap ni Debata, jala diargai do uhumNa. (Joh. 8:29; 14:9; 15:10) Sian dia do i taboto? Taida ma na disurathon si Jesaya taringot asi ni roha ni Jahowa, dohot na disurat si Markus taringot pangkilalaan ni Jesus. (Jaha Jesaya 63:9; Markus 6:34.) Olo do hita maniru Jesus na tongtong patuduhon asi ni roha jala mangurupi na asing? Songon Jesus, marsitutu do hita marbarita na uli dohot mangajari halak? (Luk. 4:43) Halak na jonok tu Debata, lomo do rohana patuduhon asi ni roha jala mangurupi na asing.

13, 14. (a) Aha do na boi taparsiajari sian halak na jonok tu Debata saonari? (b) Caritahon ma sada pengalaman.

¹³ Saonari godang do angka donganta na jonok tu Debata, jala marsitutu maniru Kristus. Ringgas do nasida marbarita, manamue, jala patuduhon asi ni roha. Marsitutu do nasida asa lam denggan parangena, jala mangulahon songon na dihalomohon Jahowa. Songon pengalaman ni donganta si Rachel na tading di Brasil. Didok ibana, “Najolo, lomo do rohangku maniru gaya pangkean ni halak saonari. Alai dung marsiajar Bibel, marhamubaon ma ahu asa boi jonok tu Debata. Tontu ndang mura mangulahon i, alai saonari las do rohangku. Jala hudapot do ngolu na sasintongna.”

¹⁴ Asing do muse na diadopi donganta si Reylene na tading di Filipina. Nang pe ibana nunga leleng di hasintongan, alai suda do tingkina marsingkola na satimbotimbona asa dapot karejo na denggan. Ujungna, gabe ndang diharingkothon be citacitana di partondion. Didok ibana, “Gabe hupingkiri ma adong do na hurang di ngolungku, jala rumingkot do i sian karejongku.” Alai, muba do si Reylene jala diharingkothon ibana ma laho mangalehon godang tingki tu Jahowa. Saonari, gabe dihilala ibana ma na tutu do Mateus 6:33, 34. Jala didok ibana ma, “Pos do rohangku, sai disarihon Jahowa do ahu.” Ra, adong do angka donganta di huria na mangulahon na sarupa. Tontu, gabe taronjar ma rohanta laho maniru haporseaon ni nasida.​—1 Kor. 11:1; 2 Tes. 3:7.

15, 16. (a) Aha do na porlu taulahon asa maniru Kristus? (b) Songon dia hita maniru pingkiran ni Jesus?

¹⁵ Songon dia hita maniru Kristus? 1 Korint 2:16 mandok, porlu do hita  marroha songon “roha ni Kristus.” Jala Pilippi 2:5 paingothon hita asa “songon parrohaon ni Kristus Jesus ma parrohaonmuna!” Alani i, porlu do hita maniru pingkiran, pangkilalaan, dohot ulaon ni Kristus. Molo Jesus, rumingkot do paralealeonna tu Debata sian na asing. Jadi molo tatiru Jesus, sasintongna na maniru Jahowa do hita. Jadi ringkot do maniru pingkiran ni Jesus.

¹⁶ Saonari, songon dia hita maniru pingkiran ni Jesus? Najolo diida angka siseanna do ibana mambahen tanda halongangan, mangajari jala manarihon angka halak. Jala, diida nasida do songon dia Jahowa manogunogu pamingkirionna. Didok nasida, “Hami do mangkatindangkon saluhut pambahenanna i.” (Ul. 10:39) saonari, ndang boi be taida Jesus. Alai, adong do buku Mateus, Markus, Lukas dohot Johannes na manurat tangkas taringot Jesus. Tajaha jala tarimangi ma i. On boi mangurupi hita asa mangihuthon “bogas ni patna” jala marroha songon ibana—1 Ptr. 2:21; 4:1.

17. Aha do labana molo tatiru pingkiran ni Kristus?

¹⁷ Aha do laba na tadapot ala maniru pingkiran ni Kristus? Songon sipanganon na boi mambahen hita margogo, suang songon i ma pingkiran ni Kristus mambahen hita lam jonok tu Debata. Lam leleng, taantusi do hirahira aha do na laho diulahon Jesus molo mangadopi situasi songon na taadopi. On boi mangurupi hita mambahen haputusan na denggan na palashon roha ni Debata. Gabe ias ma panggora ni rohanta. Alani i, ringkot do molo hita maniru Jesus Kristus.​—Rom 13:14.

18. Aha do naung taparsiajari taringot halak na jonok tu Debata?

¹⁸ Di parsiajaran on, nunga taantusi aha do lapatanna halak na jonok tu Debata. Taparsiajari do angka sitiruon na denggan taringot i, jala songon dia asa maniru pingkiran ni Kristus. On boi mangurupi hita gabe maraleale tu Debata. Alai adong do na asing na porlu taparsiajari. Umpamana, songon dia hita mamboto na togu do paralealeonta tu Debata? Songon dia do asa lam togu paralealeonta tu Debata? Jala aha do pangkorhonna di parngoluonta? Taulas ma on di parsiajaran na mangihut.