1-3. (a) Aha do na boi mangurupi hita asa tongtong marsihohot di tingki parpudi on? (b) Aha do na laho taulas di parsiajaran on?

NDANG pola longang rohanta, ala godang halak saonari ndang olo manjangkon hata ni Debata. Alana hita saonari mangolu di tingki parpudi. Lam jahat do angka halak. Jala lam godang do nasida “songon duhutduhut”. (Ps. 92:8) Alani i, didok si Paulus do tu halak Kristen, “Dakdanak ma hamu taringot tu na roa, alai matoras ma hamu marparrohaon!” (1 Kor. 14:20) Jadi songon dia hita mangulahon i?

² Boi tadapot alusna di ayat tema sadarion na mandok, “Alai anggo halak na mangalului Jahowa [mangantusi] saluhutna i.” (Poda 28:5) Lapatanna, boi ma nasida mangantusi manang aha na dihaporluhon laho palashon roha ni Jahowa. Dipaboa do muse di Poda 2:6-9, dilehon Jahowa do bisuk tu angka halak na laho mangulahon na sintong. Alani i, gabe diantusi nasida ma “hatigoran  dohot uhum, ro di ruhut hasintongan, sandok pangalaho na denggan i tahe”.

³ Didapot si Noak, si Daniel, dohot si Job do bisuk sian Debata. (Hes. 14:14) Suang songon i ma naposo ni Debata saonari. Songon i do hamu? Didapot hamu do bisuk na sian Debata? Asa boi diantusi hamu saluhutna laho palashon roha ni Jahowa, ingkon tangkas do ditanda hamu Ibana. Di parsiajaran on, taulas ma (1) Songon dia si Noak, si Daniel, dohot si Job boi mananda Jahowa? (2) Songon dia nasida diurupi ala mananda Debata? (3) Songon dia hita maniru nasida laho patoguhon haporseaonta?

4. Songon dia do si Noak boi mananda Jahowa? Jala, songon dia ibana diurupi ala mananda Debata?

⁴ Songon dia do si Noak boi mananda Jahowa? Sian najolo, boi do angka halak mananda Jahowa marhite tolu cara. Na parjolo, marhite tompaanNa. Na paduahon, marhite angka halak na manomba Debata. Jala na patoluhon, marhite pengalaman ni nasida sandiri tingki mandapot pasupasu ala mangoloi Debata. (Jes. 48:18) Tingki diparrohahon si Noak angka tompaan, boi do diida ibana na tutu do adong Debata. Jala diboto ibana ma angka parange ni Debata. Alani i, diantusi ibana ma molo Jahowa pargogo na so hatudosan do. Jala holan Ibana do Debata na sintong. (Rom 1:20) Jadi, ndang holan porsea sambing ibana. Alai gabe boi do ibana patoguhon haporseaonna.

5. Songon dia si Noak marsiajar taringot sangkap ni Jahowa tu jolma?

⁵ Didok Bibel, “sian na tumangihon do ro haporseaon”. Lapatanna, haporseaon boi di dapot ala manangihon. (Rom 10:17) Ra, sian angka tondongna do si Noak mananda Jahowa. Songon bapakna si Lamek, sahalak naposo ni Debata do ibana. Jala ibana tubu andorang so mate dope si Adam. (Ida gombar di mula ni parsiajaran.) Songon i nang angka ompungna si Metusalah, dohot si Jared naung marujung ngolu tingki si Noak nunga marumur 366 taon. * (Luk. 3:36, 37) Ra, marhite nasida dohot tungganeboruna ma diantusi si Noak, na ditompa Jahowa do jolma asa marpinompari jala manomba Ibana. Diparsiajari do muse taringot si Adam dohot si Hawa na so mangoloi Jahowa, jala gabe mardosa. (1 Mus. 1:28; 3:16-19, 24) Las do rohana tu angka naung diparsiajari ibana i. Jala i ma na mangonjar rohana asa manomba Jahowa.​—1 Mus. 6:9.

6, 7. Songon dia pangkirimon ni si Noak boi patoguhon haporseaonna?

⁶ Tontu gabe dipatogu do haporseaon  ni si Noak ala diboto lapatan ni goarna, i ma “Hadameon” manang “Pangapulion”, na patuduhon adong do pangkirirmon. (1 Mus. 5:29) Ditogutogu Jahowa do si Lamek asa paboahon taringot si Noak, “On ma mangapul hita di ulaonta dohot di haloloja ni tanganta di tano on, na hona toru ni Jahowa.” Alani i, boi togu haporseaon ni si Noak ala marpangkirimon do ibana. Porsea do ibana na laho padengganon ni Debata do sasudena. Songon si Abel dohot si Henok, porsea do si Noak na laho dilisathon “pinompar” i nama ulu ni ulok i.​—1 Mus. 3:15.

⁷ Sasintongna ndang pola tangkas diantusi si Noak taringot janji ni Jahowa na disurat 1 Musa 3:15. Alai, diantusi ibana sada pangkirimon do i. Janji i do na dibaritahon si Henok tu angka halak, i ma na laho ripashonon ni Jahowa do angka parjahat. (Jud. 14, 15) Tontu on saut tingki ro Armagedon. Jadi, on do muse na patoguhon haporseaon dohot pangkirimon ni si Noak!

8. Songon dia parbinotoan taringot Debata boi mangurupi si Noak?

⁸ Songon dia parbinotoan taringot Debata boi mangurupi si Noak? Ala diparsiajari ibana taringot Jahowa, gabe togu ma haporseaonna jala dapotna ma bisuk na sian Debata. I do na mangurupi ibana tarlumobi asa unang mangulahon na di hasogohon Debata. Lomo do roha ni si Noak maraleale tu Debata, jadi ndang olo ibana maraleale tu na so olo manomba Jahowa. Angka halak di tingki i, nunga diotootoi angka begu. Lomo do roha ni nasida mangida huaso ni angka begu, jala manomba sisongon i. (1 Mus. 6:1-4, 9) Asing ni i, diboto si Noak do, holan jolma do na dipangido Debata asa marpinompari jala manggohi tano on. (1 Mus. 1:27, 28) Jadi, diboto si Noak ma sala do angka begu ala mambuat angka borua jala marianakhon. Ianakhon ni nasida pe umgogo jala umbalga sian anak ni jolma. Alani i, dipaboa Jahowa ma tu si Noak, bahenonNa ma aek na sumar laho mangaripashon angka parjahat. Ala togu do haporseaon ni si Noak, dibahen ibana ma parau jala malua ma ibana dohot keluargana.​—Heb. 11:7.

9, 10. Songon dia hita boi marhaporseaon songon si Noak?

⁹ Songon dia hita boi marhaporseaon songon si Noak? Ringkot do molo marsitutu hita mamparsiajari Bibel, jala tahalomohon ma aha na taparsiajari i. Dung i, ingkon taulahon ma na dumenggan di ngolunta, hombar tu naung taparsiajari. (1 Ptr. 1:13-15) Alani i, boi ma haporseaonta dohot bisuk na sian Debata mangondingi hita sian Sibolis dohot portibi on. (2 Kor. 2:11) Alana, nunga godang halak saonari mangkalomohon na jahat dohot na  rorang. (1 Joh. 2:15, 16) Ndang parduli be nasida naung jonok nama ajal ni portibi on. Alani i, molo ndang togu haporseaonta boi do gabe dohot hita marpingkir songon i. Ingot ma hea do dipatudos Jesus tingkinta songon tingki ni si Noak. Dipasingot ibana do asa unang hita gabe manimbil jala manadingkon Debata.​—Jaha Mateus 24:36-39.

¹⁰ Rimangi ma sungkunsungkun on: ‘Tarida do sian parngoluonku na hutanda Jahowa? Huulahon do na diajarhon Jahowa, jala hujujui do na asing asa mangulahon i?’ Alusmuna sian sungkunsungkun on mangurupi hamu mamboto, na tutu do hamu mangihuthon Debata, songon na diulahon si Noak.

11. (a) Aha do na boi taboto taringot natuatua ni si Daniel? (b) Parange na dia do na laho ditiru hamu sian si Daniel?

¹¹ Songon dia si Daniel mananda Jahowa? Tontu diajari natuatuana do ibana asa mangkaholongi Jahowa dohot HataNa. Jadi, diulahon si Daniel do i saleleng ngoluna. Dung matua pe, marsitutu do ibana mamparsiajari hata ni Debata. (Dan. 9:1, 2) Alani i, tangkas do ditanda ibana Jahowa. Diboto ibana do taringot aha naung dibahen Jahowa tu halak Israel. Boi do taida sian tangiangna na disurat di Daniel 9:3-19. Jaha jala rimangi ma tangiangna i. Dung i, sungkun ma dirimuna, ‘Sian tangiangna on, aha do na boi huparsiajari taringot si Daniel?’

12-14. (a) Songon dia si Daniel patuduhon bisuk na sian Debata? (b) Pasupasu aha do na didapot si Daniel ala marsihohot jala barani?

¹² Songon dia parbinotoan taringot Debata boi mangurupi si Daniel? Tingki i ndang mura di halak Jahudi laho manomba Debata di kota Babel. Dipaboa Jahowa do tu nasida, “Usahahon hamu ma na denggan di angka kota na Hubahen inganan habuanganmuna.” (Jer. 29:7, Bibel Siganup ari) Hape, nunga diparentahon Ibana nasida asa mangulahon panombaon holan tu Ibana. (2 Mus. 34:14) Songon dia si Daniel boi mangulahon angka parenta i? Ala diurupi bisuk na sian Debata, gabe diboto si Daniel ma ingkon jumolo do unduk tu Debata. Marratus taon dungkon i, diajarhon Jesus do na sarupa.​—Luk. 20:25.

¹³ Sada tingki, hea do dibahen raja uhum asa unang adong na martangiang tu manang ise pe asing ni tu raja. Saleleng 30 ari ma marlangku uhum i. (Jaha Daniel 6:8-11.) Ra, boi do didok si Daniel, ‘Holan 30 ari do, ndang pola boha i.’ Alai, rumingkot do di ibana manomba Jahowa sian mangihuthon uhum ni jolma. Jala sasintongna boi do ibana martabuni laho martangiang. Alai, nunga somal diida halak ibana martangiang ganup ari. Jadi nang pe diorai, tongtong do ibana martangiang nang pe diida halak. Alana molo martabuni do, gabe dirimpu halak ma na so manomba Jahowa be ibana.

¹⁴ Dipasupasu do ibana ala marsihohot jala barani. Marhite tanda halongangan, diondingi do ibana asa unang dibunu angka singa. Alani i, gabe taronjar  do roha ni godang halak na di Madai Persia laho mananda Jahowa!​—Daniel 6:26-28.

15. Songon dia hita boi maniru haporseaon ni si Daniel?

¹⁵ Songon dia hita boi maniru haporseaon ni si Daniel? Tajaha ma Bibel, jala ingkon taantusi. Unang ma holan tajaha sambing. (Mat. 13:23) Ingkon taboto do aha na dihalomohon Jahowa. Alani i, porlu hita mangarimangi aha na tajaha. Asing ni i, jotjot ma martangiang tarlumobi tingki susa hita. Pos ma rohanta, lehonon ni Jahowa do bisuk dohot gogo molo tapangido.​—Jak. 1:5.

16, 17. Songon dia do si Job boi mananda Jahowa?

¹⁶ Songon dia do si Job boi mananda Jahowa? Ndang halak Israel si Job. Alai martondong dope si Job  dohot si Abraham, si Isak, dohot si Jakkob. Diajari Jahowa do nasida taringot Ibana, dohot sangkapNa. Alani i, si Job pe diboto do taringot hasintongan i. (Job 23:12) Didok si Job do tu Jahowa, “Holan sian hata ni halak hian do hubege taringot tu Ho.” (Job 42:5, Bibel Siganup ari) Jala Jahowa mandok, dipaboa si Job do tu angka halak taringot Ibana.​—Job 42:7, 8.

¹⁷ Diboto Si Job do muse taringot parange ni Jahowa marhite angka tompaanNa. (Job 12:7-9, 13) Dipangke Jahowa dohot si Elihu do angka tompaan laho mangajarhon tu si Job, na mansai metmet do jolma di adopan ni Debata. (Job 37:14; 38:1-4) Hata ni Debata mambahen si Job marserep ni roha. Jala didok ibana, “Nuaeng pe asa huboto, tung guru dokmu do luhutna, jala ndang hasundatan sangkap ni roham nanggo sada.” Didok do muse, “Husolsoli dagingku hundul di bagasan orbuk dohot sirabun.”​—Job 42:2, 6.

18, 19. Songon dia do si Job patuduhon na tangkas do ditanda ibana Jahowa?

¹⁸ Songon dia parbinotoan taringot Jahowa mangurupi si Job? Tangkas do diantusi si Job poda ni Debata. Ala mananda Jahowa, taronjar do rohana mangulahon na sintong. Umpamana, diboto si Job molo tutu do hita mangkaholongi Debata, ingkon tahaholongi do dongan jolma. (Job 6:14) Burju do ibana maradophon halak na mora nang na pogos, dos songon keluargana sandiri. Didok si Job, “Nda laos Sitompa ahu di bagasan butuha ni dainang, manjadihon nang ibana?” (Job 31:13-22) Ndang ginjang rohana nang pe mamora, jala diparsangapi halak ibana. Ndang hea ibana marpingkir ibana na umtimbo sian na asing. Imbar do parangena sian angka halak na mamora jala na sangap saonari on.

¹⁹ Rumingkot do di si Job paralealeonna tu Jahowa sian angka arta. Diboto ibana do molo hamoraon i boi mambahen ibana mansoadahon “Debata na di ginjang i”. (Jaha Job 31:24-28.) Diboto ibana do molo baoa dohot borua na marhasohotan nunga marpadan di adopan ni Jahowa. Alani i, marjanji do ibana di bagas rohana, asa unang mangida boruboru na asing jala marsangkap na roa. (Job 31:1) Sada sitiruon na denggan do on. Alana, di tingki i boi dope sahalak baoa mangalap pigapiga borua gabe tungganeboruna. Sasintongna boi do ibana mambuat boruboru na asing asa gabe tungganeboruna muse. Alai, tontu diboto ibana do, di mulana dihalomohon Jahowa do asa sada baoa marhasohotan holan tu sada borua. Jadi, i ma na diulahon si Job. * (1 Mus. 2:18, 24) Dung 1.600 taon, dipaboa Jesus ma molo seks holan boi diulahon sahalak baoa tu sada borua na gabe dongan saripena.​—Mat. 5:28; 19:4, 5.

20. Songon dia parbinotoanta taringot Jahowa boi mangurupi hita mamillit dongan dohot hiburan?

²⁰ Songon dia do hita maniru haporseaon ni si Job? Ingkon denggan do tatanda Jahowa, jala tapangke  ma parbinotoan i di parngoluonta. Umpamana, Bibel mandok, dihasogohon Jahowa do “na mangkaholongi hajahaton”. Jala, dipasingot do hita asa unang marsaor dohot angka panipu. (Jaha Psalmen 11:5; 26:4.) Tasungkun ma dirinta, ‘Sian dua ayat on aha do na huparsiajari taringot Jahowa? Huharingkothon do i di ngolungku? Songon dia parsiajaran on boi mangurupi ahu tingki mamillit dongan dohot hiburan?’ Sian alusmuna, boi do tarida sadia bagas do hamu mananda Jahowa. Ndang olo hita tarelaela mangihuthon portibi on. Jadi porlu do talatik dirinta asa boi manontuhon dia na denggan dohot na roa.​—Heb. 5:14; Eps. 5:15.

21. Aha do na boi mangurupi hita mangantusi sude na dihaporluhon laho palashon roha ni Jahowa?

²¹ Marsitutu do si Noak, si Daniel dohot si Job mananda Jahowa. Alani i, diurupi do nasida asa mangantusi saluhutna na dihaporluhon laho palashon rohaNa. Pengalaman ni nasida patuduhon martua do halak na mangihuthon hata ni Jahowa. (Ps. 1:1-3) Jadi, tasungkun ma dirinta, ‘Tangkas do hutanda Jahowa songon si Noak, si Daniel dohot si Job?’ Sasintongna, umgodang na boi taboto taringot Jahowa sian nasida. Ala saonari nunga adong Bibel lengkap na boi mangurupi hita. (Poda 4:18) Alani i, marsitutu ma mamparsiajari Bibel jala rimangi ma. Martangiang ma asa dilehon tondi parbadia tu hita. Molo songon i, ndang tarelaela portibi na jahat on be hita. Gariada, bisuk na sian Debata mangurupi hita ganup ari, jala lam jonok ma hita tu Jahowa.​—Poda 2:4-7.