1-3. Aha do na so diulahon panurirang sian Juda i, jala aha do ujungna? (Ida gombar di mula ni parsiajaran.)

DIPAULI si Jeroboam do langgatan di Betel laho tu panombaon na so sintong. Disuru Jahowa sahalak panurirang sian Juda laho pasingothon si Jeroboam. Dioloi panurirang i do Jahowa jala dipasahat do sipasingot i. Muruk situtu ma raja i tu panurirang i, alai dilinggomi Jahowa do panurirang i.—1 Raj. 13:1-10.

² Didok Jahowa do asa unang mangan manang minum panurirang i di Israel jala mulak sian dalan na asing. Tingki mulak, pajumpang ma ibana dohot panurirang naung matua na margabus. Didok na matua i, adong tona sian Jahowa. Ditogihon ma ibana tu jabuna asa mangan dohot minum. Ndang unduk panurirang i tu Jahowa jala diihuthon ibana do na matua i. Ndang lomo roha ni Jahowa mangida ibana. Di dalan, disoro jala dipamate singa ma ibana.—1 Raj. 13:11-24

³ Ndang taboto boasa panurirang na matua i na ditangihon ibana. Alai taboto do, ibana ndang ”marpangalaho  haserepon” maradophon Jahowa. (Jaha Mika 6:8.) Di Bibel, mardalan raphon Jahowa, lapatanna porsea tu Jahowa, mangihuthon tudutuduNa, jala unduk tu Ibana. Diboto halak na serep marroha, porlu do ringgas martangiang. Molo unduk panurirang i, tontu sungkunonna do Jahowa manang naung muba do tudutuduNa. Sipata, olo do maol mamillit sipilliton, jala ndang apala tangkas taboto na dihalomohon Jahowa sian hita. Alai molo unduk hita, tapangido do pangurupion ni Jahowa asa boi tapasiding angka na sala.

4. Aha do na laho taparsiajari di artikel on?

⁴ Minggu naung salpu, nunga taparsiajari lapatan ni unduk marroha jala boasa i ringkot tu hita. Alai, songon dia do asa lam unduk rohanta? Jala aha do situasi na manguji unduk ni rohanta? Taulas ma tolu situasi.—Poda 11:2.

5, 6. Songon dia do si Barsilai patuduhon serep ni roha?

⁵ Tingki muba tanggung jawab, caranta mangadopi i patuduhon unduk do hita manang na ndang. Tatiru ma si Barsilai, aleale ni Raja Daud. Tingki marumur 80 taon si Barsilai, ditogihon si Daud ma ibana asa tading di jabu ni raja. Hak na sumurung do on, alai didok si Barsilai tumagon ma i dilehon tu si Kim Kana. Ra, anakna do si Kim Kana on.—2 Sam. 19:32-38.

⁶ Boasa ndang olo si Barsilai ditogihon si Daud? Na so olo do ibana manjalo tanggung jawab? Ndang songon i. Serep do roha ni si Barsilai. Diboto ibana, nunga muba situasina jala ingkon diangkui do hahuranganna. (Jaha Galatia 6:4, 5.) Songon si Barsilai, hita pe ingkon serep marroha. Unang ma tapatudos gogonta tu na asing manang holan mamingkirhon na tahalomohon. Talehon ma na dumenggan tu Jahowa. On ma na rumingkot sian hak na sumurung manang hasangapon. (Gal. 5:26) Molo serep rohanta, lomo ma rohanta rap saulaon dohot dongan sahaporseaon laho pasangaphon Jahowa jala mangurupi na asing.—1 Kor. 10:31.

7, 8. Songon dia do unduk ni roha mangurupi hita asa unang marhaposan tu diri sandiri?

⁷ Maol do tongtong unduk molo dilehon tanggung jawab manang hak na sumurung tu hita. Tatiru ma si Nehemia. Tingki dibege si Nehemia susa halak Jerusalem, dipangido ibana do asa diurupi Jahowa nasida. (Neh. 1:4, 11) Dialusi Jahowa do tangiang ni si Nehemia. Dibahen Raja Artasasta ma ibana gabe gubernur. Nang pe mamora jala marhuaso si Nehemia, ndang marhaposan tu diri sandiri ibana. Dipangido ibana do pangurupion ni Jahowa jala ringgas do ibana manjaha patikNa. (Neh. 8:1, 8, 9) Marhak do si Nehemia mangatur angka halak. Alai, ndang dipangke ibana i laho mangkaringkothon dirina manang gabe jungkat tu na asing.—Neh. 5:14-19.

⁸ Songon si Nehemia, molo tadapot hak na sumurung, tongtong ma unduk rohanta. Nang pe godang pengalamanta, unang ma marhaposan tu diri  sandiri. Songon dia do sasahalak gabe marhaposan tu diri sandiri? Ra, sahalak sintua ndang jolo martangiang tingki laho pasaehon parsoalan di huria. Manang, olo do ra adong donganta jolo mamillit sipilliton, baru pe martangiang asa dipasupasu Jahowa na pinillitna i. Halak na unduk, ndang olo marhaposan tu diri sandiri nang pe nunga jotjot ibana mangulahon sadasada ulaon. Diingot ibana, ndang dos ibana songon Jahowa. (Jaha Poda 3:5, 6.) Saonari, godang do halak mangkaringkothon diri sandiri jala lomo rohana asa dumenggan sian na asing. Alai, naposo ni Jahowa ndang songon i. Ndang didok rohanta dumenggan hita sian na asing, di keluarganta manang di huria. Taingot ma na ingkon taulahon, jala rap saulaon ma dohot dongan sahaporseaonta.—1 Tim. 3:15.

9, 10. Songon dia do unduk ni roha mangurupi hita tingki direhei?

⁹ Hansit do rohanta molo direhei halak hita. On ma na masa tu si Hanna. Nang pe mansai holong roha ni tungganedolina tu ibana, alai ndang dihilala si Hanna las ni roha. Si Pininna, imbangna, sai mangarehei ibana. Lomo  do rohana marianakhon, alai ndang boi. Sada tingki, mansai lungun situtu ma rohana, dung i laho ma ibana martangiang tu bagas ni Jahowa. Diida si Eli ma si Hanna tumatangis jala dirimpu si Eli ma na mabuk ibana! Sasintongna, boi do gabe hansit rohana. Alai, lambok do ibana mangalusi si Eli. Martangiang ma si Hanna tu Jahowa, jala on patuduhon haporseaon dohot holongna tu Jahowa.—1 Sam. 1:5-7, 12-16; 2:1-10.

¹⁰ Unduk ni roha mangurupi hita ’manaluhon hajahaton marhite na denggan’. (Rom 12:21) Gok hajahaton do portibi on saonari. Alani i, unang ma songgot rohanta molo direhei hita. Nang pe on boi do mambahen hita gabe muruk, alai taorom ma dirinta. (Ps. 37:1) Humansit do muse molo adong parsoalan dohot dongan sahaporseaon. Molo masa i, tatiru ma Jesus. Bibel mandok, ”Ndang manginsahi Ibana, di na hona insak.” Alai, ”dipasahat [Jesus] do tu Panguhum sitigor roha i”. (1 Ptr. 2:23) Serep do roha ni Jesus jala diboto ibana, holan Jahowa do na marhak manguhumi angka halak na so tigor. (Rom 12:19) Hita pe, lomo do rohanta serep marroha jala unang ma tabaloshon hajahaton alo ni hajahaton.—1 Ptr. 3:8, 9.

11, 12. (a) Songon dia do hita tongtong marserep ni roha tingki dipuji? (b) Songon dia do hita patuduhon serep ni roha marhite pangkean dohot parniulaonta?

 ¹¹ Serep ni rohanta pe diuji do tingki adong halak na asing mamuji hita. Jotjot do si Ester dipuji. Ibana ma sada sian angka borua na umbagak di Persia. Saleleng sataon, diparade do tu ibana angka ubat na mambahen uli, raphon angka borua na marsiadu asa dihalomohon roha ni raja. Alai, si Ester do na dipillit gabe ratu. On ndang mambahen si Ester gabe mangkaringkothon diri sandiri. Tongtong do ibana burju, pantun, jala serep marroha.—Est. 2:9, 12, 15, 17.

¹² Molo unduk hita, tontu pangkean dohot parniulaonta patuduhon molo hita mangargai halak na asing songon dirinta. Unang ma hita mangkalomohon hasangapon, alani i ringkot do ”martondi na lambok jala na dame”. (Jaha 1 Petrus 3:3, 4; Jer. 9:22, 23) Pangkilalaanta taringot dirinta sandiri, tarida sian pangkataion dohot parniulaonta. Umpamana, olo do ra tabahen halak gabe marpingkir molo hita sumurung alani donganta, parniulaonta, dohot parbinotoanta. Manang, tabahen asa dirimpu angka halak naung taulahon na ringkot sian gogonta sandiri, hape adong do halak na asing na mangurupi. Pingkirhon ma Jesus. Tontu dipasangap do ibana ala marbisuk. Alai, jotjot do dienet Jesus Hata ni Debata. Ndang olo ibana dipasangap. Lomo rohana asa Jahowa na dipasangap.—Joh. 8:28.

13, 14. Songon dia do serep ni roha mangurupi hita denggan mamillit sipilliton?

¹³ Porlu do serep marroha tingki mamillit sipilliton manang tingki adong halak mambahen sipilliton na mangkorhon tu hita. Tingki si Paulus di Kaesarea, lomo rohana laho tu Jerusalem pasaehon ulaon na dilehon Jahowa. Didok si Agabus tu si Paulus, molo laho ibana, ditangkup jala olo do gabe dibunu. Diorai nasida ma si Paulus asa unang laho. Alai, laho do si Paulus. Na marhaposan tu diri sandiri do ibana? Ndang songon i. Serep do rohana jala porsea tu Jahowa. Angka donganta na di Kaesarea pe serep marroha. Dipaloas do si Paulus laho.—Ul. 21:10-14.

¹⁴ Serep ni roha mangurupi hita mamillit sipilliton na denggan nang pe ndang taboto aha na boi masa. Ra, lomo do rohanta merintis. Alai, songon dia do molo marsahit hita? Songon dia molo marsahit natuatuanta jala porlu pangurupion? Aha do na laho taulahon molo lam matua? Nang pe nunga tatangiangkon jala tapingkiri, ndang boi taalusi sude sungkunsungkun on. (Pjm. 8:16, 17) Alai molo porsea hita tu Jahowa, taangkui ma hahuranganta. Tapingkirhon ma aha na masa, tapangido poda, jala na rumingkot, martangiang ma mangido pangurupion. Dung i, ringkot do mangihuthon tudutudu sian tondi parbadia. (Jaha Parjamita 11:4-6.) Boi do Jahowa mamasumasu na tapillit, jala boi do diurupi hita manguba na laho tapillit.—Poda 16:3, 9.

15. Songon dia do mangarimangi taringot Jahowa mangurupi hita asa unduk?

¹⁵ Songon dia do asa lam unduk hita? Adong opat cara. Na parjolo, porlu mangarimangi taringot Jahowa, jala mamingkirhon songon dia Ibana sasintongna. Molo tapatudos dirinta tu Jahowa, taboto ma, mansai metmet do hita jala otik parbinotoanta. (Jes. 8:13) Ingot ma, Debata Natumimbul do na tasomba, ndang jolma manang surusuruan. Mangarimangi on mangurupi hita paundukkon diri ”tutoru ni tangan ni Debata na gogo i”.—1 Ptr. 5:6.

16. Songon dia do mangarimangi holong ni Debata mangurupi hita asa unduk?

¹⁶ Cara na paduahon, i ma mangarimangi sadia balga holong ni Jahowa tu hita. Dipatudos si Paulus do huria tu ruas ni dagingta. Arga do sude ruas ni dagingta. (1 Kor. 12:23, 24) Dos songon i, arga do hita sude di Jahowa. Ndang dipatudostudos Ibana hita tu na asing, jala sai dihaholongi do hita nang pe jotjot hita sala. Lumbang ma pangkilalaanta ala taboto na dihaholongi Jahowa do hita.

17. Songon dia do hita mandapot laba molo taida angka na denggan sian halak na asing?

¹⁷ Na patoluhon, lam unduk do hita molo angka na denggan na taida sian halak na asing, songon na binahen ni Jahowa. Asa unang mangkaringkothon diri manang mangatur na asing, tumagon ma tapangido poda sian nasida jala las ma rohanta manjangkon poda ni nasida. (Poda 13:10) Las do rohanta tingki dongan sahaporseaonta mandapot hak na sumurung. Mandok mauliate do hita tu Jahowa ala dijangkon do hita laho manomba Ibana.—1 Ptr. 5:9.

18. Songon dia do mangalatik panggora ni roha mangurupi hita lam unduk?

¹⁸ Na paopathon, lam unduk ma hita molo tapangke prinsip sian Bibel laho mangalatik panggora ni rohanta. Angka prinsip on mangajari hita taringot pangkilalaan dohot pamingkirion ni Jahowa. Molo taihuthon pamingkirion ni Jahowa, boi ma hita mamillit sipilliton na palashon rohaNa. Huhut marsiajar, martangiang, jala mangulahon na taparsiajari, on mambahen lam denggan panggora ni rohanta. (1 Tim. 1:5) Marsiajar ma mangkaringkothon halak na asing. Molo taulahon on, marjanji do Jahowa mangalatik hita asa lam unduk.—1 Ptr. 5:10.

19. Aha do na mangurupi hita asa marserep ni roha salelengna?

¹⁹ Diingot hamu dope panurirang sian Juda na taulas di mula ni artikel on? Ala ndang unduk, mago ma hangoluan dohot paralealeonna tu Jahowa. Boi do hita tongtong unduk nang pe sipata maol mangulahon i. Sitiruon sian godang naposo ni Jahowa, patuduhon boi do hita mangulahon i. Lam leleng hita manomba Jahowa, lam marhaposan ma hita tu Ibana. (Poda 8:13) Manang aha pe na masa di ngolunta, boi do hita mardalan raphon Jahowa. On ma hak na sumurung di hita. Alani i, taulahon ma sian nasa gogonta asa tongtong serep marroha jala mardalan raphon Jahowa salelengna.