DI 1 Musa bindu 22, disuru Debata do si Abraham laho tu inganan na dao laho mangalehon pelean. Didok, ”Dibuat si Abraham ma soban tu pelean situtungon i diampehon ma tu si Isak, anakna i. Alai ibana do maniop api dohot raut sada, jadi rap mardalan ma nasida na dua.”—1 Mus. 22:6.

Ndang adong dipatorang di Bibel songon dia halak najolo mambahen api. Alani i, na dipagalak si Abraham dohot si Isak do api, dung i diboan saleleng di pardalanan? Sahalak komentator mandok, ndang boi diboan api i ”saleleng di pardalanan”. Ra, diparade si Abraham dohot si Isak do angka na porlu laho pagalakkon api.

Alai na asing mandok, maol do mambahen api di tingki i. Olo do ra angka halak mambahen api sian batu bara naung gabe gara, ra batu bara i dijalo sian hombar jabuna. Godang panulingkit porsea, andorang so laho, dibuat si Abraham ma batu bara naung gabe gara. Dibahen ibana ma i tu sada inganan, ra sian hudon tano na martali sian rante, jala ditioptiop ma i saleleng di pardalanan. (Jes. 30:14) Tingki laho pagalakkon api, dibuat ibana ma batu bara i jala dibahen ma soban tusi.