1, 2. Songon dia do godang halak mangida karejo ni nasida?

MOLO pandapot ni halak, sian karejona do taboto sasahalak i sangap manang na ndang. Di pigapiga hasomalan, laho mananda sasahalak, jotjot do disungkun, ”Aha do karejom?”

² Tingki dipatorang di Bibel taringot sasahalak, sipata dipaboa do karejo ni sasahalak i. Umpamana, ”si Mateus, sijalobeo”, ”si Simon sipauli hulingkuling”, dohot ”si Lukas, pangubati na hinaholongan”. (Mat. 10:3; Ul. 10:6; Kol. 4:14, Bibel siganup ari) Asing ni i, dipaboa Bibel do muse ulaon ni halak na marhobas tu Jahowa. Umpamana Raja Daud, panurirang Elisa, dohot apostel Paulus. Diargai nasida do ulaon na dilehon Jahowa. Hita pe, taargai ma ulaonta di organisasi ni Jahowa.

3. Boasa angka na umtua porlu mangalatik na poso? (Ida gombar di mula ni parsiajaran.)

³ Las do rohanta manomba Jahowa jala denggan do taulahon tanggung jawabta. Las do rohanta mangulahon  ulaonta jala hirim rohanta asa taulahon i saleleng tolap dope gogonta. Alai dung lam matua, ndang boi be godang taulahon songon di tingki haposoon. (Pjm. 1:4) Ambatambat do on di naposo ni Jahowa. Saonari, lam maju do ulaon parbaritaon jala dipangke organisasi ni Jahowa do teknologi na baru laho pasahathon barita na uli tu godang halak. Sipata, maol do di angka na umtua marsiajar cara na baru laho mangulahon ulaon on. (Luk. 5:39) Lam suda do gogo ni sasahalak dung lam matua. (Poda 20:29) Alani i, las do roha mangida angka na umtua mangalatik na poso asa mandapot tanggung jawab di organisasi ni Jahowa.—Jaha Psalmen 71:18.

4. Boasa maol di angka na umtua laho mangalehon tanggung jawab? (Ida kotak ” Boasa Maol Mangalehon Tanggung Jawab tu na Asing”.)

⁴ Maol do di angka naung leleng mandapot hak na sumurung mangalehon tanggung jawab tu na poso. On boi mambahen nasida marmetmet ni roha, ala mansai dihaholongi tanggung jawab i. Ra, lungun do rohanasida tingki mangalehon tanggung jawab i tu na asing. Ra dipingkirhon nasida, molo ndang ditogutogu nasida angka baoa i, ndang boi denggan i diulahon. Olo do didok nasida, ndang adong tingki laho mangalatik na asing. Baoa na poso porlu sabar tingki ndang dilehon dope gumodang tanggung jawab.

5. Sungkunsungkun aha do na laho taulas di artikel on?

⁵ Boasa na umtua porlu mangurupi na poso mandapot gumodang tanggung jawab? Songon dia do nasida mangulahon on? (2 Tim. 2:2) Boasa ingkon denggan pamingkirion ni angka na poso tingki rap saulaon dohot na umtua, naung marpengalaman jala marsiajar sian nasida? Asa taboto alusna, taida ma songon dia Raja Daud mangurupi anakna manguluhon ulaon na mansai ringkot.

6. Aha do na laho diulahon Raja Daud? Aha do na dipaboa Jahowa tu ibana?

⁶ Leleng do si Daud dianiaya jala ingkon marpindapinda. Dung gabe raja, sonang do ngoluna. Didok ma tu si Natan, ”Ida ma, ia ahu maringan di bagasan jabu na sian hau Ares, ia poti parpadanan ni Jahowa hape jongjong di tongatonga ni rimberimbe.” Lomo roha ni si Daud paulihon bagas joro tu Jahowa. Didok si Natan ma, ”Nasa na sinangkap ni roham di bagasan, i ma patupa, ai Debata do donganmu!” Alai, ndang i na dihalomohon Jahowa. Disuru Jahowa ma si Natan mandok tu si Daud, ”Ndang jadi anggo ho pajongjong di Ahu sada bagas bahen ingananku.” Nunga marjanji Jahowa tu si Daud na sai dongananNa ibana. Alai, songon naung dipaboa tu ibana, anakna do na laho pajongjongkon bagas joro. Songon dia do pangkilalaan ni si Daud?—1 Kron. 17:1-4, 8, 11, 12; 29:1.

7. Songon dia do si Daud maradophon tudutudu sian Jahowa?

⁷ Mansai lomo do roha ni si Daud pajongjongkon bagas joro tu Jahowa.  Olo do ra jut rohana. Alai, las do rohana mangurupi si Salomo manguluhon ulaon on. Diurupi si Daud do ibana mangatur parkarejo jala papunguhon bosi, tombaga, perak, mas, dohot hau. Ndang marsak ibana mamingkirhon ise na dipuji alani ulaon on. Alana di pudian ni ari, didok halak ma i bagas joro ni si Salomo. Didok tu si Salomo, ”On pe, ale anaha, sai na donganan ni Jahowa do ho, jala tumpahanna ho mardohar, asa paulionmu joro ni Jahowa, Debatam, songon naung pinarbagabagana hian taringot tu ho.”—1 Kron. 22:11, 14-16.

8. Boasa didok roha ni si Daud ndang rade dope si Salomo laho paulihon bagas joro? Alai aha do na diulahon si Daud?

⁸ Jaha 1 Kronika 22:5. Ra, didok roha ni si Daud ndang rade dope si Salomo manguluhon ulaon na ringkot on. Bagas joro i ”ingkon balga situtu bahenon”, hape si Salomo ”bajar dope” jala ndang marpengalaman. Alai diboto si Daud, urupan ni Jahowa do si Salomo mangulahon ulaon na sumurung on. Alani i, marsitutu do si Daud mangurupi si Salomo asa boi manguluhon ulaon on.

9. Songon dia do asa las roha ni angka baoa na umtua mangalehon tanggung jawab tu na asing? Bahen ma tudosan.

⁹ Tingki mangalehon tanggung jawab tu na poso, unang ma metmet roha ni na umtua. Ulaon na mansai ringkot saonari, i ma ulaon ni Jahowa. Molo dilatik angka na poso mandalanhon tanggung jawab, boi ma denggan i diulahon. Pingkirhon ma on. Tingki dakdanak, ra hea do diida hamu natuatuamuna mamboan  mobil. Dung lam magodang, diajari ma hamu. Molo nunga dapot tingkina, boi ma hamu mandapot SIM jala boi mamboan mobil. Nang pe songon i, sai dilehon do tudutudu tu hamu. Sipata, marganti ma hamu mamboan mobil. Alai ala lam matua natuatuamuna, hamu ma na jotjot mamboan mobil. Gabe jut do rohana? Ndang. Las do rohana ala olo hamu mamboan ibana marmobil. Suang songon i, las do roha ni na umtua mangida na poso naung dilatik gabe rade mandalanhon tanggung jawab di organisasi ni Jahowa.

10. Songon dia do pangkilalaan ni si Musa taringot mandapot hasangapon dohot huaso?

¹⁰ Unang ma mangiburu hita tingki adong donganta na asing mandapot tanggung jawab. Tatiru ma songon si Musa, tingki diida ibana pigapiga halak Israel na gabe songon panurirang. (Jaha 4 Musa 11:24-29.) Ala naeng dipaso si Josua nasida, didok si Musa, ”Tung tama ma ho mangiburu mandingkani ahu? Anggiat nian dipangido rohangku sandok bangso ni Jahowa manurirangi, jala dibasabasahon Jahowa Tondina songgop tu atasnasida.” Diboto si Musa, Jahowa do na manguluhon nasida. Ndang olo si Musa pasangaphon dirina sandiri, alai lomo do rohana asa sude naposo ni Jahowa mandapot tanggung jawab. Songon dia molo hita? Las do rohanta tingki adong donganta mandapot tanggung jawab di organisasi ni Jahowa?

11. Aha do na didok sahalak donganta baoa taringot mangalehon tanggung jawab tu na asing?

¹¹ Godang donganta baoa na marhiras ni roha mandalanhon tanggung jawab saleleng martaontaon jala nunga mangalatik baoa na poso mandapot tanggung jawab. Umpamana, donganta na margoar si Peter. Saleleng 74 taon di bagasan dinas sepenuh waktu, 35 taon ma ibana karejo di kantor cabang di Eropa. Nunga leleng ibana gabe pengawas Departemen Dinas. Dilehon ma tanggung jawab on tu si Paul, baoa na poso na dilatik si Peter. Jut do roha ni si Peter? Ndang. Didok, ”Las do rohangku ala adong angka baoa na rade manjalo jala denggan mandalanhon tanggung jawab.”

12. Aha do na boi taparsiajari sian si Rehabeam?

¹² Tingki anak ni si Salomo gabe raja, i ma si Rehabeam, disungkun ibana ma baoa na umtua taringot songon dia mandalanhon tanggung jawabna na baru. Alai, ndang dijangkon ibana poda sian nasida! Diihuthon do poda sian dongan satorbangna. Gabe masa ma jea. (2 Kron. 10:6-11, 19) Aha do na taparsiajari? Marbisuk do hita molo tapangido poda sian angka na umtua dohot naung marpengalaman. Ingkon ringgas ma angka na poso mangulahon ulaon naung somal diulahon. Sian ias ni rohana ma mangargai pandapot ni na umtua, jala unang ma dirimpu rohanasida ndang boi ulahononna i.

13. Songon dia do na poso boi rap saulaon dohot na umtua?

¹³ Sada tingki, dilehon do tanggung jawab tu na poso laho mangaradoti ulaon ni na umtua, angka baoa naung marpengalaman. Marbisuk do nasida molo marsiajar sian na umtua. Di parsiajaran on nunga taulas taringot si Paul na manggantihon si Peter gabe pengawas ni sada ulaon di Betel. Didok ibana, ”Hujalo do poda ni si Peter, jala boi ma hujujui na asing asa mangulahon na sarupa.”

14. Aha do na boi taparsiajari sian si Timoteus dohot si Paulus tingki rap saulaon nasida?

¹⁴ Umposo do si Timoteus sian si Paulus, alai rap saulaon do nasida saleleng martaontaon. (Jaha Pilippi 2:20-22.) Didok si Paulus tu halak Korint, ”Husuru tu hamu Timoteus, anakkonku, haholongan jala haposan ni rohangku marhitehite Tuhan i, asa ibana paingot hamu di angka dalanku na marhitehite Kristus Jesus, hombar tu na huajarhon di nasa huria.” (1 Kor. 4:17) Tangkas ma taida, si Paulus dohot si Timoteus rap saulaon jala masiurupan. Diajari si Paulus do si Timoteus taringot angka dalanna marhite Jesus Kristus, jala dijangkon si Timoteus do i. Mansai holong do roha ni si Paulus tu si Timoteus, jala pos rohana na denggan do diparrohahon angka dongan di Korint. Angka sintua boi do maniru si Paulus tingki mangalatik baoa di huria.

15. Songon dia do Rom 12:3-5 mangurupi hita tingki adong situasi na muba?

¹⁵ Hita mangolu di tingki parpudi. Lam tu majuna do organisasi ni Jahowa di portibi on. Lapatanna, sai adong do na muba. Hamubaon on mangkorhon tu dirinta jala ndang sai mura mangadopi i. On boi taadopi molo serep rohanta jala mangkaringkothon Harajaon ni Debata sian na mangkaringkothon diri sandiri. Molo taulahon on, tongtong ma hita marsada. Didok si Paulus tu halak Kristen di Rom, ”Hupaingot ma ganup hamu:  Unang ma torbang rajumi hamu dirimu, lobi sian na patut.” Didok muse, songon ruas ni dagingta na marasingasing ulaonna, songon i ma ganup halak di huria marasingasing do tanggung jawabna.—Rom 12:3-5.

16. Aha do na ingkon diulahon ganup halak Kristen asa manjaga hadameon jala marsada ni roha di organisasi ni Jahowa?

¹⁶ Diharingkothon naposo ni Jahowa do Harajaon ni Debata jala diulahon nasida do na pinangido ni Debata. Boi do baoa na umtua mangalatik na poso. Tingki manjalo tanggung jawab, ingkon pantun jala serep do roha ni na poso. Diargai tungganedoli do pangurupion ni tungganeboruna tingki adong situasi na muba. Ditiru angka borua ma si Priskilla na mangurupi tungganedolina, si Akuila.—Ul. 18:2.

17. Tu ulaon na dia do diajari Jesus angka siseanna?

¹⁷ Dilehon Jesus do sitiruon laho mangalatik na asing. Diboto Jesus, ingkon adong do na manguduti ulaonna. Diboto ibana do ndang tipak angka siseanna. Alai pos do rohana, umbalga do ulaon ni siseanna sian naung diulahon ibana. (Joh. 14:12) Denggan do diajari Jesus nasida, jala tolap do nasida marbarita na uli manang didia pe.—Kol. 1:23.

18. Ulaon aha do na laho taulahon di ari na naeng ro? Ulaon aha do na taulahon saonari?

¹⁸ Dung mate Jesus, dipahehe Jahowa ma ibana, dilehon ma godang ulaon jala ibana mangaradoti sude ”nasa harajaon dohot huaso, nang hagogoon dohot hamuliaon”. (Eps. 1:19-21) Molo marsihohot hita sahat tu na mate, boi do paheheon ni Jahowa hita jala lehononNa do tu hita godang ulaon di tano na imbaru. Saonari, sude hita martanggung jawab laho marbarita na uli jala mambahen sisean. Ndang soal poso dope manang nunga matua, ingkon ”marsitutu ma hamu mangula ulaon ni Tuhan i”.—1 Kor. 15:58, Bibel siganup ari.