1. Aha do na mambahen ngolunta imbar sian tingki najolo?

DIPAPUNGU Jahowa do saonari godang halak ”sian nasa bangso, marga dohot houm dohot hata”. Alai, ndang holan i na dipaboa Bibel. Nasida gabe ”bangso na bolon” jala lobi sian ualu juta halak na marlas ni roha na ”mangoloi Ibana arian dohot borngin”. (Pgk. 7:9, 15; Jes. 60:22) Mansai godang do na mangkaholongi Debata dohot mangkaholongi angka donganna. Jala on ma na mambahen ngolunta saonari imbar sian tingki najolo.

2. Holong na songon dia do na so dihalomohon ni Debata? (Ida gombar di mula ni parsiajaran.)

² Dipaboa Bibel do songon dia parngoluonta saonari. Angka halak na so mangkaholongi Jahowa, patuduhon holong na so denggan, i ma na holan mangkaringkothon diri ni nasida. Jala dipaboa apostel Paulus do, molo nasida ”mangkaholongi dirina, impolan di perak” dohot ”holongan di hisap ni daging asa di Debata”. (2 Tim. 3:1-4) On ma holong na  mangkaringkothon diri sandiri, jala na so dihalomohon Debata. Sasahalak na mangkaringkothon diri ndang boi marlas ni roha. Gariada gabe lam susa do parngoluon di portibi on.

3. Aha do na laho taulas di parsiajaran on, jala boasa?

³ Boi do parohon jea molo mangkaringkothon diri, jala nunga somal on di angka halak. Alani i, dipasingot si Paulus ma asa ’dipasiding’ angka halak na holan mangkaholongi dirina. (2 Tim. 3:5) Alai, sai jotjot do hita pajumpang dohot halak sisongon i. Alani i, songon dia do caranta laho mangalinggomi dirinta sian nasida? Saonari, taulas ma imbar ni holong na dihalomohon Jahowa, dohot holong na dipaboa di 2 Timoteus 3:2-4. Jala, songon dia hita boi mamareso dirinta sandiri huhut patuduhon holong na sasintongna.

4. Sala do mangkaholongi dirinta sandiri?

⁴ Didok si Paulus, ”Ai mangkaholongi dirina ma jolma disi.” Aha ma lapatan ni i? Na gabe sala do mangkaholongi dirinta? Ndang sala i. Ala songon i do hita ditompa Jahowa. Didok Jesus do, ”Haholonganmu do donganmi songon dirim!” (Mrk. 12:31) Buktina, ndang boi tahaholongi donganta molo ndang tahaholongi parjolo dirinta sandiri. Dipaboa Bibel do muse, ”Haholongan ni angka baoa pardihutana be, songon dagingna sandiri. Na mangkaholongi pardihutana, dirina do hinaholonganna disi. Ndang dung dihosomi jolma dagingna, diparmudumudu do jala dipainuinu.” (Eps. 5:28, 29) Tangkas ma, on patuduhon na ingkon tahaholongi do dirinta sandiri.

5. Songon dia do molo halak na paholonghu tu dirina sandiri?

⁵ Alai, holong na so denggan do na dipaboa di 2 Timoteus 3:2. I ma holong na mangkaringkothon diri. Halak na paholonghu tu dirina sandiri, holan dirina sandiri do na dipingkiri ibana. (Jaha Rom 12:3.) Ndang parduli be ibana tu halak na asing. Molo adong na sala, pintor halak na asing do na ditudu ibana mangulahonsa. Sasintongna, ndang marlas ni roha nasida disi.

6. Aha do na tadapot molo tahaholongi Debata?

⁶ Pigapiga panulingkit Bibel mandok boasa parange mangkaringkothon diri na parjolo sahali didok si Paulus, i ma ala parange on boi gabe parohon parange na roa na asing. Alai molo tahaholongi Debata, gabe denggan ma parangenta. Angka parange i, i ma las ni roha, dame dohot lambas ni roha, hasabaron, habasaon, haburjuon, hasatiaon, halambohon ni roha, jala boi mangarajai diri. (Gal. 5:22, 23) Songon na didok panurat psalmen, ”Martua ma bangso na mardebatahon Jahowa!” (Ps. 144:15) Ala Debata na marlas ni roha do Jahowa, tontu naposoNa pe marlas ni roha do. Imbar do naposoNa sian halak na asing na holan mangkaringkothon diri. Jala las do  roha ni nasida ala mangurupi na asing.​—Ul. 20:35.

7. Sungkunsungkun aha do na boi mangurupi hita mamboto sadia bagas holongta tu Debata?

⁷ Songon dia hita patuduhon, na umbalga do holongta tu Debata sian tu dirinta sandiri? Tarimangi poda on: ”Unang ma mardingkandingkan manang marhasangapon na rumar; alai sian toruk ni rohamuna be ma rajumi hamu donganmuna sumurung sian dirimuna! Unang ma na ringkot di hamu be matahon hamu, dohot ma na di dongan!” (Plp. 2:3, 4) Alani i, tasungkun dirinta sandiri, ’Huulahon do sipasingot on? Marsitutu do ahu mangulahon na dihalomohon Debata? Hulului do cara laho mangurupi angka dongan dohot angka halak tingki marbarita?’ Ndang mura mangalehon tingki dohot gogonta laho mangulahon i. Ra ingkon marsitutu do hita, manang ingkon olo do hita ala manadingkon aha na tahalomohon. Molo taulahon i, gabe las ma rohanta ala mamboto las do roha ni Debata mangida hita.

8. Aha do na diulahon pigapiga donganta ala mangkaholongi Jahowa?

⁸ Pigapiga donganta rade manadingkon karejo na denggan asa boi mangalehon sude tingkina tu Jahowa. On ma cara ni nasida laho patuduhon holong tu Jahowa. Songon donganta si Ericka, na gabe sahalak dokter huhut merintis. Ibana dohot tungganedolina nunga marbarita tu pigapiga negara. Didok ibana, ’Godang do dapotnami pengalaman ala mangurupi di luat na marbahasa na asing. Jala gabe godang ma alealenami. I ma hamoraon di ngolunami.’ Tongtong dope ibana gabe sahalak dokter. Alai gumodang do tingki dohot gogona dipangke laho mangajari angka halak  taringot Jahowa, jala mangurupi angka dongan. Didok ibana ma, ”on do na parohon las ni roha na sasintongna”.

9. Boasa halak na holongan di hepeng ndang marlas ni roha?

⁹ Dipaboa si Paulus do taringot halak ”impolan di perak”. Pigapiga taon naung salpu di Irlandia, marbarita ma sahalak perintis tu sahalak baoa. Dihatai nasida ma taringot Debata. Alai pintor dibungka baoa i ma dompetna, jala dipatudu ma hepengna. Pintor didok ibana ma, ”On do debatangku!” Godang do halak na songon i nang pe ndang hea diangkui nasida. Dihaholongi nasida do hepeng dohot arta. Alai dipasingot do di Bibel: ”Manang ise na holong roha di perak, ndang olo marnamahap di perak, jala manang ise na holong roha di hamoraon ndang tagamon gabe parsaulianna.” (Pjm. 5:9) Halak na mangkaholongi hepeng, ndang marnapuas dihilala nasida. Suda do tingki dohot gogo ni nasida laho papunguhon i. Gabe marsak do nasida alani i.​—1 Tim. 6:9, 10.

10. Aha do na didok Bibel taringot hamoraon dohot hapogoson?

¹⁰ Tutu, porlu do hepeng. Boi do i mangurupi hita. (Pjm. 7:12) Alai boi do hita martua nang pe holan mandapot na tahaporluhon? Boi! (Jaha Parjamita 5:11.) Songon na disurat si Agur anak ni si Jake, ”Hapogoson manang hamoraon unang lehon tu ahu; sai loas ma panganonku bohal tinurpukkonmi tu ahu.” Taantusi do boasa ndang olo ibana gabe pogos. Didok ibana boi do i gabe mangonjar rohana asa manangko. Jala ndang parohon sangap tu goar ni Debata. Alai boasa ibana tong ndang olo gabe mamora? Didok ibana, ”Asa unang tung huporso Ho, dung butong ahu, gabe dohononku maon: Ise do Jahowa?” (Poda 30:8, 9) Ra, ditanda hamu do pigapiga halak na mardebatahon hamoraon.

11. Aha do didok Jesus taringot hepeng?

¹¹ Sahalak na mangkaholongi hepeng ndang boi pasonangkon roha ni Jahowa. Didok Jesus, ”Ndang haoloan sada halak dua induk! Sai hosomanna do na sada, haholonganna do na sada nari; hombaranna do na sada, toisanna do na sada nari. Ndang haoloan hamu Debata rap dohot Mammon!” Jala didok do muse, ”Unang papungupungu hamu arta di hamu di tano on, di na targagat tasik dohot ngitngit, di na tarhali jala tartangko panangko i!”​—Mat. 6:19, 20, 24.

12. Molo ndang taharingkothon hamoraon, songon dia do i mangurupi hita mangalehon tingkinta tu Jahowa? Paboa ma sada pengalaman.

¹² Godang do naposo ni Jahowa na so mangkaringkothon hamoraon. Alani i, gabe boi ma nasida mangalehon godang tingkina tu Jahowa, jala marlas ni roha ma nasida. Songon donganta si Jack na tading di Amerika. Saleleng martaontaon, holan na marsak do ibana di jabu alani karejona. Alai didok ibana, ”Merintis do tungganeborungku jala sai jotjot do las rohana.” Jala didok tungganeboruna do muse, ”Molo ahu, burju hian do boshu!” Ujungna, digadis ibana ma jabuna na balga, jala ditadingkon ibana ma bisnisna. Merintis ma ibana dohot tungganeboruna. Dipaboa ibana, ”Ndang mura manadingkon jabu na  bagak i.” Didok ibana do muse, ”Alai, saonari nunga gabe sahalak perintis ahu, jala nunga karejo hami tu Bos na sarupa, i ma Jahowa.”

13. Aha do na mangurupi hita mamboto songon dia do pamingkirionta tu hepeng?

¹³ Porlu do tapareso caranta mangida hepeng. Boi do tasungkun dirinta sandiri, ’Sian parngoluonku, tarida do na satolop ahu tu na didok Bibel taringot hepeng? Hepeng do na umringkot di ngolungku? Na ummarga do di ahu arta sian sasudena? Pos do rohangku, lehonon ni Jahowa do sude na huhaporluhon?’ Pos ma rohanta, ndang ditadingkon Jahowa halak na marhaposan tu Ibana!​—Mat. 6:33.

14. Sala do molo marsonangsonang?

¹⁴ Dipaboa Bibel do, molo di tingki parpudi godang halak na ”holongan di hisap ni daging”. Taboto do, ndang sala molo marhepeng, jala marsonangsonang. Pigapiga halak porsea, ndang boi hita marsonangsonang. Alai sasintongna, ndang songon i na dipangido Jahowa tu hita. Didok Bibel do, ”Torushon ma, allang ma sipanganonmu jala marlas ni roha ma ho; inum ma anggurmu jala pasonangsonang ma.”​—Pjm. 9:7, Bibel siganup ari.

15. Aha do lapatanna holongan ”di hisap ni daging”?

¹⁵ Didok do di 2 Timoteus 3:4, godang halak na holongan tu hasonangan jala manadingkon Debata. Molo taparrohahon, ndang didok di ayat i umbalga holongna tu hasonangan sian holongna tu Debata. Alai, na didok disi holongan di hisap ni daging ”asa” di Debata. Sahalak pakar mandok, ayat on patuduhon ndang adong apala saotik be holong nasida tu Debata. Sada pasingot na mansai ringkot do on tu angka halak na holongan tu hasonangan. Bibel manggombarhon, i ma angka halak na sai mamingkiri hamoraon ngolu na marsonangsonang.​—Luk. 8:14.

16, 17. Sitiruan aha do na dibahen Jesus tu hita taringot marsonangsonang?

¹⁶ Ndang sala molo marsonangsonang, songon na hea diulahon Jesus. Laho do ibana tu ”Pesta kawin” dohot ”pesta na balga”. (Joh. 2:1-10; Luk. 5:29, Bibel siganup ari.) Tingki di pesta kawin i, ndang cukup anggurna. Jadi, dibahen Jesus ma tanda halongangan, i ma mambahen aek gabe anggur. Di pesta na asing, adong angka halak na sogo mangida Jesus mangan dohot minum. Alai, dialusi Jesus do, ndang sala hita molo marsonangsonang.​—Luk. 7:33-36.

¹⁷ Alai, ndang na didok Jesus hasonangan i do na rumingkot. Jahowa do na rumingkot di ngoluna, jala marsitutu do ibana mangurupi angka halak. Rade do ibana mangalehon ngoluna laho paluahon saluhut jolma. Dipaboa Jesus do tu angka halak na mangihuthon ibana, ”Martua ma hamu, molo diinsahi halak hamu manang  dipaburuburu manang dipatubutubu ragam ni hata na roa, na so tutu, dompak hamu ala ni Ahu! Las ma rohamuna jala marolopolop, ai godang do umpamuna di banua ginjang i, ai songon i do dipaburuburu angka panurirang na jumolo sian hamu.”​—Mat. 5:11, 12.

18. Sungkunsungkun aha do na mangurupi hita mamboto sadia ringkot do hasonangan di hita?

¹⁸ Aha do na mangurupi hita mamboto sadia ringkot do hasonangan di hita? Boi ma tarimangi, ’Na rumingkot do di ahu marsonangsonang sian marpungu manang marbarita? Olo do ahu manadingkon angka na huhalomohon, asa boi ahu mangalehon gumodang tingki tu Debata? Hurimangi do pangkilalaan ni Jahowa tingki mamillit hiburan?’ Angka na taboto sala, ingkon tapasiding ma. Songon i nang angka na tahilala ndang dihalomohon Debata. Molo taulahon i, na pasonangkon roha ni Jahowa do hita, jala tutu do na tahaholongi Ibana.​—Jaha Mateus 22:37, 38.

19. Angka ise do na sasintongna na so boi marlas ni roha?

¹⁹ Sibolis do na mambahen jolma susa saleleng 6.000 taon. Saonari on, godangan do halak na holan mangkaringkothon diri sandiri, hepeng dohot hasonangan. Holan na ringkot di nasida sandiri do na dipingkiri nasida. Alai sasintongna ndang marlas ni roha nasida! Imbar do songon didok di Bibel, ”Martua ma manang ise, na mambahen Debata ni si Jakkob pangurupina, marpangkirimon ibana di Jahowa Debatana!”​—Ps. 146:5.

20. Songon dia holong tu Debata boi mambahen hamu marlas ni roha?

²⁰ Mansai holong do naposo ni Jahowa tu Ibana. Lam tamba do ganup taon angka halak na mananda jala mangkaholongi Ibana. On patuduhon molo Harajaon ni Debata nunga mamarenta. Jala lehononNa ma pasupasu na umgodang di ari na naeng ro! Molo taulahon aha na dipangido Jahowa, gabe las ma rohaNa tu hita. Jala dapotta ma las ni roha na sasintongna, sahat tu saleleng ni lelengna! Di parsiajaran na mangihut, taulas ma pigapiga parange na roa alani mangkaringkothon diri. Jala, songon dia i marimbar tu parange na denggan na dipatudu angka naposo ni Debata.