Jahowa Mangalehon Gogo tu na Loja
Ayat Tahunan 2018: Dapotan gogo do muse angka halak na marhaposan tu Jahowa.—JES. 40:31.
1. Angka sitaonon aha do na ingkon taadopi? Alai, boasa las roha ni Jahowa molo marsihohot hita? (Ida gombar di mula ni parsiajaran.)
NDANG mura mangolu di tingkinta saonari. Alana, godang do sitaononta. Umpamana, godang do angka donganta na marungkil alani sahit na posi manang nunga matua. Na asing na naung matua ingkon mangurus keluarga na marsahit. Adong dope na marungkil mansari ngolungolu. Sipata ndang holan sada sitaononta. Boi do godang suda tingkinta, gogonta, dohot hepengta alani i sude. Alai, pos ma rohanta na laho urupan ni Jahowa do hita. Jala taboto do na laho padengganonNa do sude, songon naung dijanjihon Ibana tu hita. Molo porsea hita, gabe las ma rohaNa!
2. Songon dia do Jesaya 40:29 patoguhon hita? Alai, aha do pamingkirion na sala na ingkon tapasiding?
2 Sipata, olo do hita ndang tolap mangadopi sitaonon i. Alai taingot ma, ndang holan hita na mangadopi i. Songon i do pangkilalaan ni naposo ni Debata najolo. (1 Raj. 19:4; Job 7:7) Aha do na mangurupi nasida asa tongtong marsihohot? Marhaposan do nasida tu Jahowa. Didok Bibel, dilehon Debata do ”gogo tu na loja”. (Jes. 40:29) Alai, adong do pigapiga halak saonari mangkilala tumagon ma ndang pola hita mangulahon na dipangido Jahowa. Gabe ndang olo be nasida manjaha Bibel, marpungu, manang marbarita na uli. Ala dihilala nasida gabe lam borat do sitaononna ala mangulahon i. Tontu, on do na dihalomohon Sibolis.
3. (a) Songon dia asa unang gale hita alani Sibolis? (b) Aha do na laho taulas di parsiajaran on?
3 Diboto Sibolis do, molo sude tingkinta talehon laho mangulahon na dihalomohon Jahowa, boi mambahen hita lam togu. Alani i, ndang lomo rohana molo tongtong hita togu. Molo loja jala marsak hita, unang ma mandao sian Jahowa. Tapajonok ma dirinta tu Ibana. Didok Bibel, ”Pahotonna jala patoguonna do hamu.” (1 Ptr. 5:10; Jak. 4:8) Saonari taparsiajari ma sian Jesaya 40:26-31, na paboahon na tolap do Jahowa mangalehon gogo tu hita. Taulas ma dua situasi na boi mambahen hita gabe ndang ringgas be mangulahon na dihalomohon Jahowa. Jala taparsiajari ma songon dia hita mangulahon poda na sian Bibel asa boi hita tongtong marsihohot.
NA MARHAPOSAN TU JAHOWA DAPOTAN GOGO DO MUSE
4. Parsiajaran aha do na boi tadapot sian Jesaya 40:26?
Dilehon Jahowa do gogo tu angka na tongtong marsihohot
4 Jaha Jesaya 40:26. Ndang adong nanggo sada pe jolma na tolap mangetong sude bintang. Porsea do angka ilmuwan adong marratus miliar bintang di langit. Alai, dibahen jala diboto Jahowa do sude goar ni angka bintang i. Sian on, aha ma na boi taparsiajari taringot Jahowa? Gari bintang diparrohahon Jahowa do, tarlumobi ma hita! Alani holongta do, umbahen na lomo rohanta mangulahon na dipangido Ibana. (Ps. 19:2, 4, 15) Diboto Jahowa do sude taringot hita. Didok Bibel, ”Gari obuk saluhutna na di ulumuna i nunga dibilang.” (Mat. 10:30) Taingot ma, na ”diboto Jahowa do angka ari ni parlidang [manang halak na tigor] i”. (Ps. 37:18) Tangkas ma, diboto Jahowa do sude angka sitaononta. Jala, boi do lehononNa gogo tu angka na tongtong marsihohot.
5. Boasa pos rohanta na boi do Jahowa mangalehon gogo tu hita?
5 Jaha Jesaya 40:28. Sian Jahowa do sasudena mandapot gogo. Rimangi ma taringot mataniari. Sahalak panurat buku taringot ilmu pengetahuan na margoar David Bodanis mandok molo sadetik tenaga ni mataniari, dos do i tu marmiliar tenaga ni bom atom na mapultak. Ilmuwan na asing mandok, holan sadetik tenaga ni mataniari boi mangalehon tenaga listrik na cukup tu sude jolma saleleng 200.000 taon! Gari Jahowa boi mangalehon gogo tu mataniari, tarlumobi ma tu hita. Boi do Ibana mangalehon gogo tu hita tingki mangadopi sitaonon.
6. Boasa lambok auga na sian Jesus, jala aha pangkorhonna tu hita?
6 Jaha Jesaya 40:29. Mangulahon lomo ni roha ni Jahowa boi mambahen las rohanta. Didok Jesus do tu angka siseanna, ”Jangkon hamu ma augangku.” Jala didok do muse, ”Asa dapotan hasonangan tondimuna. Ai lambok do augangku jala neang do dohot na hupaporsanhon.” (Mat. 11:28-30) Toho do i! Sipata, olo do nunga loja manang marsak hita tingki naeng laho marpungu manang marbarita na uli. Alai dung mulak hita sian i, gabe marlas ni roha jala boi ma hita lam gogo mangadopi angka sitaononta. Tontu, on patuduhon na lambok do auga na sian Jesus.
7. Paboa ma sada pengalaman na patuduhon tutu do na didok di Mateus 11:28-30.
7 Adong sahalak donganta borua na marungkil manaon sahitna na posi. Sipata, maol do ibana mangihuthon acara na di parpunguan. Sada tingki, ro ma ibana tu parpunguan nang pe maol do i di ibana. Didok ibana, ”Jamita di tingki i mangulas taringot tu angka na marmetmet ni roha. Mansai lambok do i dipasahat jala boi mangapuli rohangku, gabe ro ma ilungku tingki i. On pasingothon ahu na mansai ringkot do parpunguan di ahu.” Las do rohana nang pe ndang mura di ibana asa ro tu parpunguan!
8, 9. Aha do lapatanna tingki didok si Paulus, ”Ai jumpa gale ahu, disi do ahu margogo”?
8 Jaha Jesaya 40:30. Ringkot do taingot, nang pe malo hita, ndang godang na boi taulahon. Taboto, malo do apostel Paulus. Alai ndang boi ulahononna sude na dihalomohon rohana. Sada tingki martangiang ma ibana taringot pangkilalaanna. Dialusi Jahowa ma, ”Ai di hagaleon do sun timbul hagogoon.” Diantusi ibana do boasa didok Jahowa songon i. Jala didok ibana ma, ”Ai jumpa gale ahu, disi do ahu margogo.” (2 Kor. 12:7-10) Aha do lapatan ni i?
9 Diboto si Paulus do, ndang boi sude diulahon ibana. Dihaporluhon ibana do pangurupion na mansai balga sian na asing. Tondi parbadia ni Debata boi mangalehon gogo tingki gale ibana. Gabe boi ma ibana mangulahon angka na so tolap hian diulahon ibana. Songon i ma nang hita. Tingki dilehon Jahowa tu hita tondi parbadia, gabe togu ma hita!
10. Songon dia do Jahowa mangurupi si Daud mangadopi sitaononna?
10 Jotjot do si Daud mangkilala songon dia tondi parbadia ni Debata mangurupi ibana asa togu. Marhite sada ende, dipaboa ibana do, ”Ai mardonganhon Ho tartondong ahu do parduan ni parangan, jala mangasahon Debatangku tartimbung ahu do parik [manang tembok] na timbo.” (Ps. 18:30) Ndang boi tajangkit tembok na timbo. Suang songon i ma, ndang sude parsoalan boi tapasae sandiri. Ingkon diurupi Jahowa do hita.
11. Songon dia do tondi parbadia mangurupi hita mangadopi sitaononta?
11 Jaha Jesaya 40:31. Sasintongna, ndang boi leleng habang angka lali. Boi pe angka lali habang timbo jala marjomjom ndang marna loja, ndang alani gogona sandiri. Alai, ala diurupi gelombang udara hangat do. Taingot ma angka lali i, tingki adong sitaononta na borat. Tapangido ma tu Jahowa pangurupion asa dipargogoi hita marhite ”pangondian i, i ma Tondi Parbadia”. (Joh. 14:26) Boi do tapangido tu Jahowa asa dilehon tu hita tondi parbadia ganup tingki. Mansai ringkot do mangido pangurupion sian Jahowa, tarlumobi tingki hita marsoal dohot angka donganta di huria. Alai boasa boi masa parsoalan sisongon i?
12, 13. (a) Boasa boi adong parsoalanta dohot angka dongan? (b) Aha do na boi taboto taringot Jahowa sian pengalaman ni si Josep?
12 Ala jolma na mardosa dope hita, olo do hita marsoal dohot angka dongan. Sipata, boi do hansit rohanta alani hata manang pambahenan ni donganta. Manang hita pe boi do mambahen hansit roha ni dongan. Nang pe maol mangadopi parsoalan sisongon i, boi do tongtong tapatudu na marsihohot hita tu Jahowa. Songon dia carana? Tongtong ma hita rap saulaon dohot angka dongan. Jala tatiru ma Jahowa, na mangkaholongi nasida nang pe mardosa.
Ndang ditadingkon Jahowa si Josep, songon i nang hamu (Ida paragraf 13)
13 Dipaloas Jahowa do angka sitaonon na masa tu naposoNa. Taingot ma si Josep. Ala mangiburu hahana tu ibana, digadis ma ibana laho gabe hatoban. Laos diboan ma ibana tu Misir. (1 Mus. 37:28) Tangkas do diboto Jahowa aha na diadopi si Josep. Jala lungun do rohaNa mangida sitaonon ni alealeNa on. Alai, dipaloas Jahowa dope i masa tu ibana. Dung i, ditudu muse ibana laho memperkosa tungganeboru ni si Potifar. Ujungna, gabe dipamasuk ma ibana tu penjara. Nang pe dipaloas Jahowa masa i sude, alai ndang na hea ditadingkon Jahowa ibana. Sian dia taboto i? Didok Bibel, ”Didongani Jahowa ibana, jala ditumpak manjadi na niulana i.”—1 Mus. 39:21-23.
14. Aha do labana molo ndang muruk hita?
14 Sitiruon na asing, i ma si Daud aleale ni Jahowa. Ndang godang halak Ps. 37:8) Na maniru Jahowa do hita molo tapadao rimas, manang ndang muruk. Songon Jahowa, olo do Ibana manalpuhon dosanta. ”Ndang dibahen tu hita hombar tu angka dosanta”. (Ps. 103:10) Adong do labana molo ndang muruk hita. Alai, molo muruk do hita, boi do gabe darah tinggion, sesak napas ma hita, jala muramura ma hansit butuha. Jala molo muruk hita, ndang denggan caranta marpingkir. Olo do gabe hansit roha ni halak alani hatanta manang pambahenanta. Didok Bibel, ”Ngolu tu pamatang do roha halambohon.” (Poda 14:30) Alani i, ingkon lambok ma hita. Molo songon i, aha do na boi taulahon molo hansit rohanta dibahen donganta? Jala songon dia do caranta asa boi mardame? Tapangke ma poda na sian Bibel asa marbisuk.
na marsitaonon songon si Daud. Nang pe songon i, ndang gabe marrimas ibana. Didok si Daud, ”Otapi rimas jala tadingkon mohopmohop; unang sai hamohophon tu roham, ai laho tu najat do i.” (TINGKI HANSIT ROHANTA DIBAHEN DONGANTA
15, 16. Aha do na ingkon taulahon molo hansit rohanta dibahen donganta?
15 Jaha Epesus 4:26. Ndang pola longang hita molo adong halak na so sisomba Jahowa mambahen na so denggan tu hita. Alai, molo adong donganta manang keluarganta na mambahen na hurang denggan tu hita, gabe jut ma rohanta. Gabe sai taingotingot do i? Gabe sogo do rohanta mida ibana saleleng martaontaon? Manang, pintor taihuthon do poda na sian Bibel? Lam leleng hita ndang masipangkulingan dohot nasida, gabe lam maol ma hita mardame dohot nasida.
16 Songon dia do molo ndang boi talupahon pambahenan ni donganta i? Aha do na boi tabahen asa mardame? Na parjolo, martangiang ma tu Jahowa, asa diurupi hamu boi denggan mangkatai dohot donganta i. Ingot ma, aleale ni Jahowa do tong ibana. (Ps. 25:14) Burju do Jahowa tu angka alealeNa, ala holong Ibana tu nasida. Lomo do rohaNa asa hita mangulahon na sarupa. (Poda 15:23; Mat. 7:12; Kol. 4:6) Na paduahon, pingkirhon ma aha na laho dohononmuna tu donganta i. Unang pintor dirimpu hamu na lomo rohana mambahen hansit rohamuna. Ra, ndang apala tangkas diboto hamu situasina. Ingkon rade do hamu mangangkui salamuna. Manang, boi do dohononmu songon on, ”Ra ahu do na pasensitiphu tingki i ate . . . ” Molo nunga dibahen hamu songon i alai ndang boi dope mardame, ulangkon ma torus. Tangiangkon ma donganta i. Pangido ma tu Jahowa asa dipasupasu ibana, jala asa boi hamu mangida angka na denggan sian ibana. Tontu las do roha ni Jahowa mida hita marsitutu asa mardame dohot donganta i.
MARSAK ALANI MANGINGOT HASALAANTA DI TINGKI NAUNG SALPU
17. Songon dia Jahowa mangurupi hita nang pe hea hita mangulahon dosa? Boasa ingkon tajangkon pangurupionna i?
17 Adong do halak na hea mangulahon dosa na balga di tingki naung Ps. 32:3-5) Molo hea do hamu mangulahon dosa na balga, rade do Jahowa manalpuhon hasalaanmuna. Lomo do rohana mangurupi hita asa boi muse maraleale tu Ibana. Alai, ingkon tajangkon do pangurupionNa marhite angka sintua. (Poda 24:16; Jak. 5:13-15) Mangkorhon do i tu pangkirimonmuna taringot hangoluan salelenglelengna. Alani i, pintor taulahon ma i! Alai, songon dia ma molo tong dope marsak hita nang pe nunga leleng dosanta i disalpuhon?
salpu. On mambahen ibana ndang marlas ni roha jala ndang patut be manomba Jahowa. Songon Raja Daud, marsitutu do ibana pasidingkon pangkilalaan sisongon on. Jala didok ibana do, ”Ai saleleng huhasiphon dosangku reung do holiholingku, dibahen anggukku ganup ari. Ai sai didondoni tanganmu do ahu arian dohot borngin.” Alai, barani do ibana mangulahon na dipangido Jahowa tu angka naposoNa. Didok ibana ma, ”Jadi hupabotohon ma tu Ho dosangku jala ndang huhungkupi salangku.” (18. Songon dia do sitiruon sian si Paulus mangurupi halak na marmetmet ni roha?
18 Hea do apostel Paulus marmetmet ni roha alani hasalaanna di tingki naung salpu. Didok ibana ma, ”Ai ahu do na ummetmet sian angka apostel; na so tama do ahu nian goaron apostel.” Alai, didok ibana do muse, ”Alai na di ahu nuaeng, sian asi ni roha ni Debata do, umbahen na dapot.” (1 Kor. 15: 9, 10) Tangkas do diboto Jahowa, jolma na mardosa do si Paulus. Alai dijangkon Jahowa do si Paulus nang pe songon i ibana. Jala lomo do rohaNa asa pos roha ni si Paulus taringot i. Molo tutu do disolsoli hamu dosamuna i jala diangkui hamu di adopan ni Jahowa manang tu sintua, tontu salpuhonon ni Jahowa do i. Pos ma rohamuna nunga disalpuhon Jahowa hasalaanmuna i!—Jes. 55:6, 7.
19. Aha do ayat tahunanta saleleng taon 2018 on, jala boasa on pas tu hita saonari?
19 Ala nunga jonok nama ujung ni hasiangan on, tontu lam godang do sitaononta. Alai, ingkon tongtong do taingot molo Jahowa ”balik mangalehon gogo tu na loja, jala dipargogoi situtu angka na so margellok”. Jala boi do Ibana mangalehon sude na tahaporluhon asa boi tongtong hita manomba Ibana. (Jes. 40:29; Ps. 55:23; 68:20) Saleleng taon 2018 on, sai dipasingot ma hita tu parsiajaran on tingki marpungu. Jala taida ma ayat tahunanta: Dapotan gogo do muse angka halak na marhaposan tu Jahowa.—Jes. 40:31.