DI ari Rabu manogot tanggal 24 Januari 2018, las do roha ni keluarga Betel na di Amerika Serikat dohot na di Kanada mambege, tingki adong pengumuman molo donganta si Kenneth Cook, Jr., nunga dilantik gabe anggota Punguan na Mangaradoti Organisasi.

Donganta si Cook tubu jala magodang di Pennsylvania, Amerika Serikat. Tingki naeng tamat SMA do ibana mananda hasintongan, sian dongan sakalasna. Tardidi ma ibana tanggal 7 Juni 1980. Merintis biasa ma ibana tanggal 1 September 1982. Dung dua taon ibana merintis, digokkon ma ibana tu Betel. Tanggal 12 Oktober 1984, mulai ma ibana karejo di Betel di Wallkill, New York.

Taon 1996, marhasohotan ma ibana dohot si Jamie. Jala dohot ma si Jamie karejo di Betel Wallkill. Saleleng 25 taon ma donganta si Cook karejo di Betel di bagian Percetakan dohot Kantor Betel. Di bulan Desember taon 2009, dipapinda ma donganta si Cook dohot istrina tu Pusat Pendidikan Menara Pengawal di Patterson, New York. Disi, donganta si Cook karejo di bagian Departemen Korespondensi. Ndang sadia leleng dung mulak nasida tu Wallkill, dipapinda ma muse nasida tu Brooklyn na di New York di bulan April 2016. Lima bulan dungkon i, dipindahon ma muse nasida tu kantor pusat sedunia di Warwick, New York. Jala di bulan Januari 2017, dilantik ma ibana gabe asisten Panitia Penulisan sian Punguan na Mangaradoti.