1-2. (a) Aha do na diida Jahowa tingki ro marjuta halak tu Borngin Parningotan? (Ida gambar di sampul.) (b) Aha na laho taulas di parsiajaran on?

TINGKI ro marjuta halak tu Borngin Parningotan ni Tuan, aha do na diida Jahowa? Diida Jahowa do sude na ro i ganup marsada-sada jala diboto do ise na ro ganup taon. Ra, adong do sian nasida na tongtong ro nang pe dianiaya. Na asing, nang pe ndang jotjot ro marpungu, alai ro do tu Borngin Parningotan. Alana ringkot do on didok roha ni nasida. Jala diida Jahowa do halak na parjolo sahali dope ro tu acara i. Ra, na lomo do roha ni nasida naeng mamboto songon dia acara i dibahen.

² Tontu, las do roha ni Jahowa mangida godang halak ro tu acara i. (Luk. 22:19) Ndang godang ni halak na ro na rumingkot di Jahowa. Alai na rumingkot di Ibana, i ma aha na mangonjar roha ni nasida ro tu acara i. Di parsiajaran on, taulas ma sungkun-sungkun na ringkot. Asing ni ro tu Borngin Parningotan, boasa muse ingkon ro hita marpungu ganup minggu?

3-4. (a) Boasa olo ro hita tu parpunguan? (b) Aha do na tapatudu molo ro hita tu parpunguan? (c) Songon na didok di 1 Korint 11:23-26, boasa ingkon ro hita tu Borngin Parningotan?

³ Alasan na mambahen hita ro tu parpunguan, i ma ala naeng manomba Jahowa. Jala molo ro tu parpunguan diajari Jahowa do hita disi. Molo halak na ginjang roha,  ndang lomo rohana diajari manang ise pe. (3 Joh. 9) Alai molo hita, lomo do rohanta mangihuthon tudu-tudu na dilehon Jahowa marhite organisasina.​—Jes. 30:20; Joh. 6:45.

⁴ Molo ro hita tu parpunguan, na patuduhon serep do rohanta, rade jala olo diajari. Jala ro pe hita tu Borngin Parningotan, ndang holan ala naeng mangoloi hata ni Jesus na mandok, “Tongtong ma ulahon on bahen parningotan di ahu.” Alai, alani serep ni rohanta do umbahen na ro hita tusi. (Jaha 1 Korint 11:23-26.) Tingki ro hita tu acara i, dipatogu do pangkirimonta jala gabe taingot ma songon dia holong ni Jahowa tu hita. Diboto Jahowa do ndang sae holan sahali sataon hita dipatogu. I do alana diparade Ibana parpunguan ganup minggu jala dijujui do hita asa ro marpungu. Molo serep rohanta tontu taoloi do i. I do alana, talehon do tingkinta persiapan jala ro marpungu.

5. Songon dia do halak na serep roha manjangkon gokkon sian Jahowa?

⁵ Ganup taon, godang do halak na serep roha olo manjangkon gokkon sian Jahowa jala olo diajari. (Jes. 50:4) Las do roha ni nasida tingki ro tu Borngin Parningotan jala gabe olo ma nasida ro marpungu. (Sak. 8:20-23) Tontu, las do rohanta sude diajari jala ditogu-togu Jahowa, ala Ibana do ‘pangurupi dohot sipalua’ di hita. (Ps. 40:18) Alai ndang adong gokkon sian manang ise pe, na boi mambahen las rohanta asing ni sian Jahowa dohot Jesus laho mangajari hita.​—Mat. 17:5; 18:20; 28:20.

6. Songon dia do serep ni roha mangurupi sahalak baoa ro tu Borngin Parningotan?

⁶ Ganup taon, marsitutu do hita manggokkon godang halak asa ro tu Borngin Parningotan. Godang do halak na serep roha mandapot laba ala olo ro tu acara i. Umpamana piga-piga taon naung salpu, adong sahalak baoa na manjalo gokkon tu Borngin Parningotan. Tingki dilehon donganta gokkon tu ibana, didok ndang boi ibana ro. Alai dung dapot tingkina Borngin Parningotan i, songgot do roha ni donganta on ala diida, ro do baoa i tu Bale Harajaon. Longang do roha ni baoa i ala godang do donganta manjalang ibana. Mulai sian i, gabe torus ma ibana ro marpungu. Holan tolu hali do ibana ndang ro marpungu di bagasan sataon. Boasa gabe olo baoa i tongtong ro marpungu? Ala olo do ibana manguba cara marpingkirna. Didok donganta na mangalehon gokkon i, “Halak na serep roha do baoa i.” Tontu na ditarik Jahowa do ibana asa gabe naposona. Jala saonari, nunga tardidi be baoa i.​—2 Sam. 22:28; John 6:44.

7. Sian na taparsiajari di parpunguan dohot na tajaha di Bibel, songon dia do i mangurupi hita marserep ni roha?

⁷ Na taparsiajari di parpunguan dohot na tajaha di Bibel, boi mangurupi hita asa marserep ni roha. Di minggu-minggu andorang so Borngin Parningotan, jotjot do diulas di parpunguan taringot sitiruon sian Jesus dohot serep ni rohana. Dipatudu ibana do serep ni rohana i marhite mangalehon ngoluna gabe tobusan tu hita. Piga-piga ari andorang so ari Parningotan i, dijujui do hita asa tajaha Bibel taringot na masa andorang so mate Jesus dohot dungkon dipahehe ibana. Molo taulahon i, gabe lam taargai ma tobusan i. Gabe taronjar ma rohanta laho maniru serep ni rohana jala mangulahon lomo ni roha ni Jahowa nang pe mangadopi hasusaan.​—Luk. 22:41, 42.

8. Songon dia Jesus patuduhon habaranion?

⁸ Hita pe boi do maniru habaranion ni Jesus. Rimangi ma habaranion na dipatudu Jesus andorang so mate ibana. Diboto ibana do na laho ro musu mangarehei, mamungkul jala mambunu ibana. (Mat. 20:17-19) Alani i, tingki di Getsemane didok ibana do tu angka siseanna, “Hehe ma hamu, laho ma hita. Ida ma! Nunga ro na manjehehon ahu.” (Mat. 26:36, 46) On patuduhon ndang mabiar Jesus mate. Tingki ro sarombongan tentara laho manangkup ibana, barani do Jesus patandahon dirina na ibana do Jesus. Alai didok ma tu angka tentara i asa dipaloas angka siseanna laho. (Joh. 18:3-8) Tutu ma, halak na barani do Jesus! Saonari pe marsitutu do angka na miniahan dohot biru-biru na asing maniru habaranion ni Jesus. Songon dia carana?

9. (a) Asa boi tongtong marpungu, boasa ingkon barani hita? (b) Molo barani hita, aha do labana tu angka donganta dipenjara?

⁹ Nang pe susa situasi na taadopi, ingkon barani do hita asa boi tongtong ro marpungu. Alana adong do angka donganta na tongtong ro marpungu nang pe marhabot ni roha, marmetmet ni roha manang marsahit. Na asing, tongtong do barani ro marpungu, nang pe diorai keluarga manang pamarenta. Molo barani hita, adong do labana tu angka donganta na di penjara. (Heb. 13:3) Alana molo dibege nasida tongtong hita setia, nang pe mangadopi hasusaan, nasida pe boi ma lam togu, barani jala setia. Songon i do na dihilala si Paulus. Tingki dipenjarahon ibana di Rom, las do rohana mambege ala tongtong angka donganta manomba Jahowa. (Plp. 1:3-5, 12-14) Ra andorang so kaluar manang dung kaluar sian penjara, di tongos ibana do surat tu halak Heber. Dijujui ibana do nasida asa ‘tongtong mangkaholongi dongan sahaporseaon’ jala asa unang manadingkon parpunguan.​—Heb. 10:24, 25; 13:1.

10-11. (a) Ise do na ingkon tagokkon tu Borngin Parningotan? (b) Songon na didok di Epesus 1:7, boasa ingkon taulahon i?

¹⁰ Molo tagokkon angka keluarganta, dongan sakarejo, dohot hombar jabunta tu Borngin Parningotan, na patuduhon habaranion do hita disi. Boasa ingkon tagokkon nasida? Lomo rohanta asa diboto nasida na boi do nasida mandapot laba sian “asi ni roha ni” Jahowa marhite tobusan. (Jaha Epesus 1:7; Pgk. 22:17) Jala, na patuduhon hamauliateon do hita tu Jahowa dohot tu Jesus alani sude naung dibahen nasida tu hita.

¹¹ Tingki rap marpungu hita dohot angka dongan, na patudu habaranion do hita disi. Alai, adong dope parange na asing umbahen na ro hita marpungu, songon parange na dipatudu Debata dohot Anakna.

12. (a) Boasa molo ro hita marpungu, boi lam patoguhon holongta tu Jahowa dohot Jesus? (b) Songon dia 2 Korint 5:14, 15 manjujui hita asa maniru Jesus?

¹² Alani holongta do tu Jahowa dohot tu Jesus umbahen na ro hita marpungu. Angka na taparsiajari di parpunguan, mambahen hita lam mangkaholongi Jahowa dohot Jesus. Alana disi dipaingot do hita tu angka aha naung dibahen nasida tu hita. (Rom 5:8) Tarlumobi di Borngin Parningotan i, dipaingot do hita songon dia balga ni holong ni nasida tu hita dohot tu halak na so mamboto aha do tobusan i. Tontu mandok mauliate do hita alani tobusan i, alani i tatiru ma Jesus. (Jaha 2 Korint 5:14, 15.) Asing ni i, gabe taronjar do rohanta mamuji Jahowa na mangalehon tobusan i. Sada cara laho mamuji Jahowa, i ma marhite mangalehon komentar di parpunguan.

13. Songon dia caranta patuduhon holongta tu Jahowa dohot Jesus?

¹³ Laho patuduhon holongta tu Jahowa dohot Jesus, ingkon olo do hita berkorban. Songon dia pe situasi na taadopi, ingkon tabahen do pengorbanan asa boi ro marpungu. Ra, godang do huria na mambahen jam parpunguan dung mulak halak karejo. Hape, ra nunga loja hita. Jala adong dope muse parpunguan di ujung ni minggu. Hape, halak na asing istirahat do di tingki i. Tontu diparrohahon Jahowa do pengorbanan na tabahen i. Na holong do rohanta tu Jahowa, molo olo hita mambahen pengorbanan.​—Mrk. 12:41-44.

14. Songon dia do Jesus mambahen contoh na dumenggan taringot patuduhon pengorbanan?

¹⁴ Dibahen Jesus do contoh na dumenggan taringot mambahen pengorbanan. Asing ni rade mangalehon ngoluna, dipingkirhon Jesus do muse angka na ringkot di siseanna. Umpamana, nang pe nunga loja, dilehon ibana do tingkina laho patoguhon jala mangajari angka siseanna. (Luk. 22:39-46) Sai dipingkirhon ibana do aha na boi dilehon tu halak na asing. (Mat. 20:28) Alani i, molo songon holong ni Jesus do holongta tu Jahowa dohot tu angka dongan, tontu marsitutu do hita ro tu Borngin Parningotan dohot tu parpunguan.

15. Ise do na tarlumobi na ingkon taurupi?

 ¹⁵ Nunga gabe sada keluarga hita sude. Tontu las do rohanta manggokkon godang halak asa rap dohot hita, tarlumobi ma angka “dongan sahaporseaon” naung leleng ndang marpungu dohot marbarita. (Gal. 6:10) Na holong do rohanta tu nasida molo tatogihon asa ro muse marpungu, tarlumobi tu Borngin Parningotan. Dos songon Jahowa dohot Jesus, tontu las do rohanta molo mulak muse nasida tu Jahowa, i ma Ama jala Parmahan na parholong.​—Mat. 18:14.

16. (a) Songon dia do carana asa masipatoguan dohot angka donganta, jala aha do labana ro marpungu? (b) Boasa on tingki na denggan di taon on laho mangingot hata ni Jesus na disurat di Johannes 3:16?

¹⁶ Di minggu na naeng ro, tagokkon ma godang halak asa ro tu Borngin Parningotan di ari Jumat botari, 19 April 2019. (Ida kotak “ Olo do Hamu Manggokkon Angka Halak?”) Ala nunga lam jonok ajal ni portibi on, ingkon tongtong do hita ro marpungu asa tongtong hita marserep ni roha, barani jala mangkaholongi. Sai tapatogu ma angka dongan marhite tongtong ro marpungu. (1 Tes. 5:8-11) Ala dihaholongi Jahowa dohot Jesus do hita, tapatudu ma holongta tu nasida sian nasa rohanta!​—Jaha Johannes 3:16.