1-3. (a) Boasa holong roha ni Jahowa tu si Salomo, jala pasu-pasu aha do na didapot? (b) Sungkun-sungkun aha do na laho taulas di parsiajaran on?

TINGKI poso dope, nunga gabe raja si Salomo. Sada tingki, disungkun Jahowa ma si Salomo marhite nipi. Didok, “Aha dipangido roham leanonku di ho?” Didok si Salomo ma, “Mansai poso dope ahu, na so umboto mangarajai. . . . Ala ni i, lehon ma di ahu habisuhon laho mangarajai bangsoM.” (1 Raj. 3:5-10, Bibel siganup ari) Ala “habisuhon” do na dipangido ibana, on patuduhon na serep do rohana. (2 Sam. 12:24) Las do roha ni Jahowa tu alus ni si Salomo i. Alani i, dilehon ma tu ibana “habisuhon dohot pangantusion”.​—1 Raj. 3:12, Bibel siganup ari.

² Ala marsihohot si Salomo, godang ma dapotna pasu-pasu. Jala las do rohana tingki disuru Debata ibana laho pajongjongkon bagas joro “di Goar ni Jahowa, Debata ni Israel”. (1 Raj. 8:20) Ala bisuk na dilehon Debata, gabe godang do halak na mananda ibana. Sude hata na didok ibana ro sian Debata. Jala disurat do i di tolu buku na adong di Bibel. Sada sian buku i, i ma buku Poda.

³ Di buku Poda, marratus hali do didok hata roha. Umpamana, di Poda 4:23 didok, “Sian saluhut sijagaon i, gumodang ma jaga roham.” Aha do lapatan ni hata “roha” di ayat on? Tadapot ma alusna di parsiajaran on. Alai adong muse dua sungkun-sungkun na asing. Umpamana, songon dia cara ni Sibolis manegai rohanta? Jala songon dia caranta manjaga roha? Ingkon taboto do alus ni sungkun-sungkun i asa boi hita tongtong setia tu Debata.

4-5. (a) Songon dia do Psalmen 51:8 mangurupi hita mamboto lapatan ni hata “roha”? (b) Songon dia do tudosan manjaga kesehatan mangurupi hita mangantusi manjaga roha?

⁴ Hata “roha” na didok di Poda 4:23, laho paboahon “roha di bagasan”. (Jaha Psalmen 51:8.) Jala boi do muse hata “roha” lapatanna, pingkiran, pangkilalaan, dohot sangkap ni roha. On patuduhon, ise do hita na sasintongna. Jala tarida do i sian parniulaonta.

⁵ Asa mura taantusi songon dia rohanta, tarimangi ma tudosan on. Na parjolo, molo naeng sehat hita, tontu tapillit do sipanganon na sehat jala ingkon jotjot do hita olahraga. Suang songon i ma, asa boi tongtong hita mangoloi Debata ingkon tajaha do Bibel dohot angka publikasinta. Jala ingkon tongtong do tapatudu haporseaonta tu Jahowa. Carana, taulahon ma aha na taparsiajari jala tabaritahon ma aha na tahaporseai. (Rom 10:8-10; Jak. 2:26) Na paduahon, nang pe sian luar songon na sehat hita idaon, hape olo do di bagasan nunga marsahit. Suang songon i ma, didok rohanta nunga togu haporseaonta ala tongtong marbarita dohot marpungu. Alai boi do tubu sangkap na roa di bagasan rohanta. (1 Kor. 10:12; Jak. 1:14, 15) Ingot ma, marsitutu do Sibolis laho manegai pingkiranta. Alai songon dia do carana laho mangulahon i? Jala songon dia do hita boi manjaga rohanta?

6. Aha do tujuan ni Sibolis, jala songon dia carana mangulahon i?

⁶ Lomo do roha ni Sibolis asa sarupa hita dohot ibana mangalo Jahowa. Jala dijujui ibana do asa taharingkothon dirinta sandiri. Nang pe ndang boi dipaksa Sibolis hita asa songon ibana, alai marsitutu do ibana mambahen marragam cara asa saut lomo ni rohana. Umpamana, dirajai Sibolis do angka halak na di portibi on. (1 Joh. 5:19) Lomo do roha ni Sibolis asa sega ‘hasomalanta na denggan’ manang ‘parangenta’ molo mardongan hita dohot angka halak di portibi on. (1 Kor. 15:33; surat na di toru.) Songon i  ma na masa tu Raja Salomo. Dioli ibana do godang angka borua na so manomba Jahowa. Alani i, gabe dirajai angka istrina i ma ibana. Ujungna gabe dao ma ibana sian Jahowa.​—1 Raj. 11:3.

7. Aha do na dipangke Sibolis laho manegai pingkiranta, jala boasa ingkon manat hita mamillit hiburan?

⁷ Dipangke Sibolis do film dohot acara di TV laho manegai pingkiranta. Diboto ibana do, pingkiran, pangkilalaan dohot parniulaonta boi dipengaruhi marhite cerita dohot hiburan. Tingki mangajari Jesus, dipangke ibana do cerita asa hona tu roha ni angka halak na niajarhonna i. Umpamana, cerita taringot sahalak Samaria na burju dohot cerita anak na mago. (Mat. 13:34; Luk. 10:29-37; 15:11-32) Jala angka halak na mangihuthon Sibolis pe, boi do mamangke cerita laho manegai pingkiranta. Alai, ndang sude film manang hiburan manegai pingkiranta. Nang pe songon i, ingkon manat do hita mamillit film manang hiburan. Tasungkun ma dirinta, ‘Boi do film manang hiburan on mambahen ahu gabe mangulahon sangkap na roa?’ (Gal. 5:19-21; Eps. 2:1-3) Molo nunga diboto hamu hiburan i boi manegai pingkiranmuna, pintor pasiding ma i. Songon pasidingkon sahit na menular!

8. Songon dia natua-tua mangurupi manjaga roha ni ianakhonna?

⁸ Hamu natua-tua, tontu dijaga hamu do ianakhonmuna asa unang marsahit. Alani i, ingkon ias do dibahen hamu jabumuna jala ingkon dibolongkon hamu do angka na kotor na boi parohon sahit. Suang songon i ma, ingkon dijaga natua-tua do ianakhonna sian cara ni Sibolis na boi manegai roha ni nasida. Ingkon dijaga hamu do ianakhonmuna sian sitontonon, game, dohot internet na boi manegai pingkiran ni nasida. Alana,  martanggung jawab do natua-tua mangurupi ianakhonna asa marale-ale tu Jahowa. (Poda 1:8; Eps. 6:1, 4) Ingkon dibahen natua-tua do aturan di jabu na hombar tu prinsip ni Bibel. Paboa ma tu nasida aha na boi ditonton dohot na so boi, asa diboto nasida boasa dibahen hamu aturan sisongon i. (Mat. 5:37) Dung magodang, latik ma nasida manontuhon dia na denggan dohot na so denggan hombar tu pingkiran ni Debata. (Heb. 5:14) Ingot ma, jotjot do ianakhon maniru pangkataionmuna, tarlumobi maniru aha na diulahon hamu.​—5 Mus. 6:6, 7; Rom 2:21.

9. Aha do cara na dipangke Sibolis laho manegai rohanta jala boasa bahaya i?

⁹ Marsitutu do Sibolis manegai rohanta asa mangihuthon pingkiran ni angka halak di portibi on. (Kol. 2:8) Carana, dijujui ibana do angka halak asa mangkaringkothon arta di ngolu ni nasida. Hape ndang sude nasida boi gabe mamora jala boi do mambahen nasida gabe susa. Alana molo sai holan mangalului arta do nasida, olo do gabe marsahit, ndang solhot be tu keluarga, jala ndang marale-ale tu Debata. (1 Tim. 6:10) Tontu mandok mauliate do hita tu Jahowa ala dilehon bisuk tu hita, asa unang gabe arta na ringkot di hita.​—Pjm. 7:12; Luk. 12:15.

10, 11. (a) Asa boi tajaga rohanta, aha do na ingkon taulahon? (b) Najolo, aha do na ingkon diulahon sahalak panjaga jala boasa i dipatudos tu panggora ni rohanta?

¹⁰ Asa boi denggan tajaga rohanta, ingkon taboto do aha na boi manegai rohanta jala ingkon hatop do i tapasiding. Hata “jaga” na disurat di Poda 4:23 paingothon hita taringot tugas ni sahalak panjaga. Alana, di tingki ni si Salomo, sahalak panjaga ingkon jongjong do di tembok ni kota. Molo adong bahaya na ro, pintor hatop do dipaboa ibana. Tudosan on, mangurupi hita asa mamboto aha na ingkon taulahon asa taboto pasidingkon aha na boi manegai rohanta.

¹¹ Di tingki najolo, sahalak panjaga tembok ni kota ingkon kerjasama do dohot na manjaga gerbang kota. (2 Sam. 18:24-26) Molo ro musu, ingkon dipastihon nasida do naung ditutup gerbang. (Neh. 7:1-3) Panggora ni roha naung dilatik Bibel, * dos do songon panjaga ni tembok i. Dipaingot do hita molo adong bahaya sian Sibolis na boi manegai pingkiran dohot rohanta. Alani i, tingki dipaingot panggora ni rohanta hita, tatangihon ma jala pintor pasiding ma na boi manegai rohanta.

12-13. Songon dia do rohanta boi tarela-ela, jala aha ma na ingkon taulahon?

¹² Pingkirhon ma sada contoh songon dia asa boi tajaga rohanta sian angka pingkiran ni Sibolis. Didok Jahowa tu hita “unang ma hea dihatai hamu taringot tu seks na so patut, angka ulaon na ramun, dohot hahisapon”. (Eps. 5:3) Alai songon dia do molo angka dongan di parkarejoan manang di singkola mangkatai taringot seks na so patut? Ra, olo do tarela-ela rohanta asa mambege pangkataion ni nasida manang mangida gambar na rorang na dibagihon nasida.  Songon sahalak panjaga, panggora ni rohanta pintor paingothon hita. (Rom 2:15) Alani i tingki masa sisongon i, pintor tapasiding ma i. Tahatai ma na asing manang tatadingkon ma nasida. Alana nunga taboto, ingkon “tapasiding pangalaho na so pasangaphon Debata dohot hisap-hisap ni portibi on”.​—Tit. 2:12.

¹³ Ingkon barani do hita pasidingkon pingkiran dohot ulaon ni angka dongan na sala. Molo marsitutu hita mangulahon i, pos ma rohanta diida Jahowa do i. Jala lehononna do gogo dohot bisuk asa boi tapasiding pingkiran sisongon i. (2 Kron. 16:9; Jes. 40:29; Jak. 1:5) Alai aha do cara na asing asa boi tajaga rohanta?

14-15. (a) Boasa ingkon tabungka rohanta, jala songon dia hita mangulahon i? (b) Songon dia do Poda 4:20-22 mangurupi hita asa mandapot godang laba sian panjahaion Bibel? (Ida kotak “ Cara Mangarimangi”.)

¹⁴ Asa boi tajaga rohanta ndang sae holan pasidingkon angka na roa. Alai ingkon tapamasuk do angka na denggan tu rohanta. Songon tudosan ni tembok kota, molo ro musu ingkon ditutup do gerbang ni kota i. Alai molo adong na ro mamboan sipanganon, ingkon dibungka do gerbang i. Alana molo sai ditutup do gerbang i boi do gabe kelaparan angka halak disi. Suang songon i ma hita, ingkon tabungka do rohanta ganup ari laho mangihuthon pingkiran ni Debata.

¹⁵ Bibel marisi pingkiran ni Jahowa. Alani i molo jotjot tajaha Bibel, na tapaloas do Jahowa manogu-nogu rohanta, pingkiran dohot parniulaonta. Alai songon dia carana asa tadapot godang laba sian panjahaion Bibel? Parjolo sahali ingkon martangiang do hamu. Songon sahalak donganta borua mandok, “Andorang so manjaha Bibel, martangiang do ahu asa diurupi ‘mangida halongangan’ sian Hata ni Debata.” (Ps. 119:18) Ingkon tarimangi do aha na tajaha. Molo martangiang, tajaha Hatana jala tarimangi, gabe boi ma Hata ni Debata adong ‘di tongatonga ni rohanta’. Jala gabe lomo ma rohanta mangihuthon pingkiran ni Jahowa.​—Jaha Poda 4:20-22; Ps. 119:97.

16. Aha do labana manonton JW Broadcasting?

¹⁶ Cara na asing asa boi taihuthon pingkiran ni Debata, i ma manonton angka video na adong di JW Broadcasting^®. Donganta naung mardongan saripe mandok, “Songon na dialusi Jahowa do tangiangnami marhite acara bulanan na adong di JW Broadcasting! Tingki lungun rohanami, gabe dipatogu jala diapuli do hami dung manonton acara i. Diputar hami ma angka ende na adong disi tingki mangalompa, paiashon jabu dohot tingki minum teh.” Acara on boi mangurupi hita manjaga rohanta. Diajari do hita asa maniru pingkiran ni Jahowa jala pasidingkon pingkiran ni Sibolis.

17-18. (a) Aha do labana molo taihuthon poda ni Jahowa songon na dipaboa 1 Rajaraja 8:61? (b) Aha do na boi taparsiajari sian pengalaman ni Raja Hiskia? (c) Songon tangiang ni si Daud na disurat di Psalmen 139:23, 24, aha do na boi tatangiangkon?

¹⁷ Gabe lam togu do haporseaonta, molo tahilala laba ni mangulahon na denggan. (Jak. 1:2, 3) Las do rohanta ala tabahen las roha ni Jahowa. Gabe didok Ibana ma hita anakna. Jala lam marsitutu do hita mambahen las rohana. (Poda 27:11) Alani i tingki diela-ela hita,  i ma tingkina tapatudu na tasomba do Jahowa sian nasa rohanta. (Ps. 119:113) Unduk ma hita tu parentana jala taulahon ma lomo ni rohana, laho patuduhon holongta tu Jahowa.​—Jaha 1 Rajaraja 8:61.

¹⁸ Ala ndang sempurna, jotjot do tabahen na sala. Molo taulahon na sala, aha do na ingkon taingot? Ingot ma pengalaman ni Raja Hiskia. Nang pe hea diulahon ibana na sala, alai muba do ibana jala disalpuhon Jahowa do hasalaanna i. Tongtong do disomba ibana Jahowa ‘sian nasa roha’. (Jes. 38:3-6, Bibel siganup ari; 2 Kron. 29:1, 2; 32:25, 26) Alani i, tapasiding ma angka na boi mambahen sega rohanta. Martangiang ma hita asa dilehon “habisuhon”. (1 Raj. 3:9, Bibel siganup ari; jaha Psalmen 139:23, 24.) Jala tajaga ma rohanta asa boi tongtong hita setia tu Jahowa.