1-2. (a) Songon dia do pangkilalaan ni donganta si Yoshiko tu hata na disurat di Jesaya 41:10 (b) Tu ise do marlaba hata on?

SAHALAK donganta na margoar si Yoshiko, mandapot kabar na so denggan. Didok dokter, holan piga-piga bulan nai nama ibana mangolu. Nang pe songon i, ndang marsak ibana. Sai diingot ibana do ayat favoritna di Jesaya 41:10. (Jaha.) Didok di ayat i, songon na ditiop Jahowa do tanganna. * Alani i, gabe tarapul do rohana jala pos do rohana tu Jahowa. Hita pe, molo mangadopi hasusaan boi do ayat on patoguhon rohanta. Asa lam taantusi lapatan ni ayat on, taulas ma boasa didok Jahowa songon i tu si Jesaya.

² Mulana, disuru Jahowa do si Jesaya manurat hata on laho mangapuli halak Jahudi tingki gabe tahanan ni halak Babel. Ndang holan tu halak Jahudi hata on marlaba. Alai marlaba do i sahat tu hita saonari. (Jes. 40:8; Rom 15:4) Alana saonari hita mangolu ‘di tingki hasusaan di ari parpudi’. Jala lam susa do na laho taadopi. Alani i, buku Jesaya on boi do patoguhon rohanta.​—2 Tim. 3:1.

3. (a) Aha do janji na dipaboa di Jesaya 41:10? (b) Boasa ringkot taingot janji ni Jahowa i?

³ Jesaya 41:10 dipillit gabe ayat tahunan 2019. Di ayat i, adong dipaboa tolu janji ni Jahowa tu hita. Janjina i ma, (1) sai donganan ni Jahowa do hita, (2) Ibana do Debatanta, jala (3) sai urupanna do hita. Janjina on, boi patoguhon haporseaonta. Alani i, ringkot do taingot janjina * on. Alana, songon si Yoshiko, sude do hita mangadopi  hasusaan. Adong do donganta na diorai manang na dianiaya pamarenta. Jala situasi ni portibi on pe mambahen hita susa. Saonari taulas ma angka janjina i.

4. (a) Aha do hata na parjolo na didok Jahowa laho paposhon rohanta? (Ida surat na di toru.) (b) Sian dia do taboto na balga do holong ni Jahowa tu hita? (c) Songon dia do pangkilalaanmuna tu hata ni Jahowa i?

⁴ Hata na parjolo didok Jahowa laho paposhon rohanta i ma, “Unang ho mabiar, ai ahu do donganmu.” * Na patuduhon na didongani Jahowa hita, i ma marhite mangkaholongi jala manarihon hita. Taboto ma muse balga ni holong ni Jahowa tu hita tingki didok Ibana, “Mansai arga do hamu di Ahu jala ala Huhaholongi hamu gabe Hulehon hasangapon di hamu.” (Jes. 43:4, Bibel siganup ari) Ndang adong na boi mangambati Jahowa patuduhon holongna tu naposona jala setia do Ibana tu hita. (Jes. 54:10) Alani holong ni Jahowa dohot parale-aleonta tu Ibana mambahen hita gabe barani. Sai diramoti do hita songon Ibana mangaramoti si Abraham. Didok Jahowa do tu si Abraham, “Unang ho mabiar Abram. Ondinganku do ho sian parmaraan.”​—1 Mus. 15:1, Bibel siganup ari.

5-6. (a) Sian dia do taboto lomo roha ni Jahowa mangurupi hita tingki mangadopi sitaonon? (b) Parsiajaran aha do na boi tadapot sian pengalaman ni si Yoshiko?

⁵ Taboto, parduli do Jahowa tu hita. Jala diurupi do hita tingki mangadopi hasusaan. Marjanji do Ibana tu hita jala didok, “Molo bolusonmuna aek na bagas, dongananKu do hamu, ndang aupon ni batangaek hamu. Molo bolusonmuna api, ndang tutungonna hamu, ndang mosok hamu bahenon ni api i.” (Jes. 43: 2, Bibel siganup ari) Aha do lapatan ni hata on?

⁶ Tingki mangadopi sitaonon, ndang didok Jahowa pintor pasidingonna i sian hita. Alai, ndang dipaloas Ibana sitaononta na songon “batangaek” manang sunge na boi mambahen hita gabe maup. Manang hasusaan na songon “api” na boi mambahen marsak na  ujungna mambahen hita ndang manomba Jahowa. Marjanji do Jahowa sai dongananna jala urupanna do hita asa boi ‘mamolus’ angka sitaonon. Songon dia carana? Diurupi do hita asa tongtong setia jala unang mabiar nang pe ingkon mate. (Jes. 41:13) Songon i ma na dihilala si Yoshiko. Didok boruna do, “Dipujihon hami do omaknami. Tangkas do diida hami na dilehon Jahowa dame ni roha tu ibana. Sahat tu na laho mate, sai marbarita do omaknami tu angka perawat dohot pasien na asing. Jala dipaboa do taringot Jahowa dohot janjina.” Aha do na boi taparsiajari sian si Yoshiko? Molo pos rohanta tu janji ni Jahowa na mandok, “Ahu do donganmu,” gabe barani ma hita jala tongtong togu tingki mangadopi sitaonon.

7-8. (a) Aha do hata na paduahon na didok Jahowa muse, jala aha do lapatan ni hata i? (b) Boasa didok Jahowa tu halak Jahudi na di Babel ‘unang ganggu rohamu’? (c) Boasa hata na didok di Jesaya 46:3, 4 boi mangurupi naposona asa unang mabiar?

⁷ Hata na paduahon na didok Jahowa i ma, ‘Unang ganggu rohamu, ai ahu do Debatam.’ Aha do lapatan ni unang ganggu rohamu? Molo di bahasa aslina lapatan ni “ganggu” i ma, “sai mangida tu pudi ala dirimpu adong bahaya manang adong sasahalak na laho mambahen na jahat sian pudi”. Manang “mabiar tu sasahalak na marsangkap laho mambahen na jahat”.

⁸ Boasa didok Jahowa tu halak Jahudi na laho ditaban di Babel ‘unang ganggu rohamu’? Alana dung naeng 70 taon nasida ditaban di Babel, ro nama halak Madai-Persia laho mamorangi Babel. Diboto Jahowa do, on boi mambahen angka halak na di Babel gabe mabiar. Hape na dipangke Jahowa do halak Madai-Persia laho paluahon nasida sian Babel. (Jes. 41:2-4) Di tingki i, molo diboto halak Babel dohot bangso na asing na laho ro musu mamorangi nasida, masipatoguan do nasida asa tongtong barani. Dibahen nasida do muse angka gana-ganaan. Ala dirimpu nasida, boi do i mangurupi nasida. (Jes. 41:5-7) Alai, dipapos Jahowa do roha ni halak Jahudi di tingki i. Didok Ibana, ‘Anggo ho ale Israel naposongki [unang songon bangso na asing] . . . Unang ganggu rohamu, ai ahu do Debatam.’ (Jes. 41:8-10) Parrohahon ma hata ni Jahowa na mandok, “Ahu do Debatam.” On paposhon roha ni naposona molo Jahowa ndang mangalupahon nasida. Tongtong do Ibana Debata ni nasida jala tongtong do nasida naposona. Didok Ibana do muse, “Ahu do mangompa . . . jala ahu paluahon.” Tontu hata on, patoguhon naposona do tingki i.​—Jaha Jesaya 46:3, 4.

9-10. Boasa ndang pola mabiar hita? Paboa ma sada contoh.

⁹ Ala lam susa do situasi ni portibi on, lam godang do halak na holsoan. Hita pe dohot do holsoan. Alai ala didok Jahowa, “Ahu do Debatam,” gabe ndang mabiar be hita. Boasa hata on boi mangurupi hita asa unang mabiar?

¹⁰ Taulas ma sada contoh. Adong ma dua halak penumpang ni pesawat na margoar si Jim dohot si Ben. Ala gogo alogo, gabe goyang ma pesawat ni nasida. Pintor didokkon pilot ma, “Pagomos hamu sabuk pengamanmuna. Adong saotik gangguan.” Gabe mabiar  ma si Jim. Alai didok pilot i do muse, “Ahu do pilotna, na mangkataion. Aman do sude. Unang pola mabiar hamu.” Alai didok si Jim ma, “Boha do aman songon on?” Alai diida ibana, ndang mabiar si Ben. Didok ma tu si Ben, “Ndang mabiar ho?” Mengkel suping ma si Ben jala didok ma, “Daong! Tangkas do hutanda pilotna i. Bapakku do i! Pos do rohangku tu bapakku. Aut sugari ditanda ho bapakki jala diboto ho na malo ibana mamboan pesawat, pasti ho pe ndang mabiar.”

11. Aha do parsiajaran na tadapot sian contoh taringot dua penumpang ni pesawat i?

¹¹ Sian contoh i, tadapot ma parsiajaran na ringkot. Songon si Ben, tangkas do tatanda ise Jahowa. Taboto do, sai urupan ni Jahowa do hita tingki mangadopi sitaonon di ari parpudi on. (Jes. 35:4) Dos songon si Ben, pos ma rohanta tu Jahowa jala unang mabiar. (Jes. 30:15) Alani i, ingkon tapaboa do tu na asing boasa boi pos rohanta tu Debata. Molo tapaboa i, nasida pe boi ma marpos ni roha tu Jahowa na laho urupanna do nasida tingki mangadopi hasusaan.

12. (a) Aha do hata na patoluhon na didok Jahowa? (b) Hata na mandok “tangan” ni Jahowa, paingothon hita taringot aha?

¹² Saonari taulas ma hata na patoluhon na didok Jahowa, “Ahu margogoihon ho huhut mangurupi ho.” Dipaboa si Jesaya do songon dia Jahowa patoguhon naposona. Didok ibana, “Marhuaso do ro Tuhan Jahowa, jala tanganna gumomgom ibana.” (Jes. 40:10) Di Bibel, hata “tangan” jotjot do dipangke laho manggombarhon hagogoon. Hata na mandok “tanganna gumomgom”, paingothon hita Jahowa do Raja na marhuaso. Mulai sian najolo,  dipangke Jahowa do gogona laho mangurupi angka naposona. Sahat tu saonari pe dipangke Jahowa do gogona laho mangurupi angka halak na porsea tu Ibana.​—5 Mus. 1:30, 31; Jes. 43:10.

13. (a) Tingki sadihari do diingot Jahowa janjina tu hita? (b) Aha do janji na didok Jahowa na mangurupi hita asa unang mabiar?

¹³ Tingki susa hita dibahen musu, diingot Jahowa do janjina na mandok, “Ahu margogoihon ho.” Alana di piga-piga negara adong do na mangorai ulaonta marbarita dohot na mangalarang organisasinta. Alai unang ma mabiar hita alani i. Alana marjanji do Jahowa na lehononna do tu hita gogo asa unang mabiar. Didok Ibana, “Tung so adong sinjata na mampan tu ho.” (Jes. 54:17, Bibel siganup ari) Alani i adong do tolu na ingkon taingot. Aha ma i?

14. Boasa ndang songgot be rohanta molo dibahen angka halak na susa tu hita?

¹⁴ Na parjolo, molo gabe sisean ni Jesus, ingkon dihasogohon angka halak do hita. (Mat. 10:22) Jala nunga didok Jesus hian, na laho susa do dibahen muse angka siseanna di ari parpudi. (Mat. 24:9; Joh. 15:20) Na paduahon, di surirang ni si Jesaya pe nunga dipaboa, ndang holan di hasogohon musu hita. Alai dibahen nasida do muse godang cara laho mangalo hita. Umpamana, didok nasida do angka hata na so tutu taringot hita manang gabe disiksa hita. (Mat. 5:11) Dipaloas Jahowa do on masa tu hita. (Eps. 6:12; Pgk. 12:17) Nang pe songon i, boasa ndang pola mabiar hita?

15-16. (a) Aha do hata na patoluhon na ingkon taingot, jala songon dia Jesaya 25:4, 5 paboahon i? (b) Aha do na didok Jesaya 41:11, 12 taringot na laho masa tu halak na mambahen hita susa?

¹⁵ Na patoluhon, tongtong ma taingot hata ni Jahowa na mandok, “tung so adong sinjata na mampan” manang marhasil mangalo hita. Songon tembok na  mangalinggomi hita sian udan haba-haba, songon i ma Jahowa mangalinggomi hita. (Jaha Jesaya 25:4, 5.) Aha pe na dibahen musu laho mangalo hita, ndang laho boi nasida marhasil.​—Jes. 65:17.

¹⁶ Dipaboa Jahowa do aha na laho masa tu halak na mambahen hita susa. On mambahen hita asa lam porsea tu Ibana. (Jaha Jesaya 41:11, 12.) Songon dia pe cara ni nasida manang sinjata aha pe na dipangke mangalo hita, ndang boi nasida marhasil. Alani i, angka na mangalo naposo ni Debata ingkon talu jala dipaila.

17-18. (a) Songon dia do carana asa lam marpos ni roha hita tu Jahowa? Paboa ma sada contoh. (b) Aha do labana molo tarimangi ayat tahunan 2019?

¹⁷ Holan marhite manjaha Bibel huhut mangarimangi, boi ma lam tatanda Jahowa. Jala lam pos ma rohanta tu Ibana. Alana dipaboa do di Bibel songon dia Jahowa mangurupi naposona najolo. Alani i, boi ma pos rohanta sai linggoman ni Jahowa do hita.

¹⁸ Bayangkon ma tudosan na dipangke si Jesaya laho manggombarhon songon dia Jahowa mangalinggomi hita. Didok si Jesaya, “Dipapungu do angka birubiruNa jala diboan do nasida di bagasan abinganNa.” (Jes. 40:11, Bibel siganup ari) Dipatudos do Jahowa songon sahalak parmahan, hita dipatudos songon biru-biruna. Molo dung tahilala songon dia tangan ni Jahowa mangalinggomi hita, gabe ndang mabiar be hita. Dipillit naposo haposan do Jesaya 41:10 gabe ayat tahunan 2019, laho mangurupi hita asa unang holsoan tingki mangadopi hasusaan. Didok, ‘Unang ma ganggu rohamu, ahu do Debatam.’ Rimangi ma hata na patoguhon on. On mangurupi hita asa tongtong togu tingki mangadopi hasusaan na laho masa.