1-2. Aha do hasusaan na diadopi akka naposo ni Jahowa, jala aha do pengaruhna tu nasida?

RIMANGI ma tolu contoh on: Sahalak baoa na poso marsahit na posi na mambahen lam gale dagingna. Sahalak baoa na marumur hira-hira 50 taon di PHK jala dang dapotna dope karejo na baru. Sahalak dongatta borua naung matua dang boi be mangalehon godang tikki dohot gogona tu Jahowa.

² Molo sarupa situasi na diadopi hamu songon akka contoh nakkin, olo do gabe didok rohamu dang mararga be dirimuna. Jala boi do i mambahen hamu dang be marlas ni roha, dang mararga, jala olo do gabe sega parale-aleonmuna dohot na asing.

3. Songon dia Sibolis dohot akka na mangihuthon ibana marpikkir taringot hangoluan ni akka jolma?

³ Portibi on manggombarhon pikkiran ni Sibolis taringot hangoluan ni jolma. Jotjot do dibahen ibana halak marpikkir dang mararga be ngolu ni nasida. Didok Sibolis tu si Hawa, bebas do ibana mamillit lomo ni rohana molo dang mangoloi Debata. Hape takkas do diboto Sibolis, mate do si Hawa molo dang mangoloi Debata. Sibolis do na mangarajai perdagangan, politik, dohot agama palsu. I do alana, godang parbisnis, pamimpin politik dohot pamimpin agama dang mangargai ngolu ni akka jolma jala dang parduli tu pakkilalaan ni nasida.

4. Aha do na lao taulas di parsiajaran on?

 ⁴ Alai lomo do roha ni Jahowa asa taargai dirinta sandiri, jala diurupi Ibana do hita tikki mangadopi hasusaan na boi mambahen hita marmetmet ni roha. (Ps. 136:23; Rom 12:3) Di parsiajaran on, lao taulas ma songon dia Jahowa mangurupi hita di tolu situasi na mangihut: (1) Tikki marsahit, (2) tikki susa di parhepengon, dohot (3) ala lam matua na mambahen hita dang boi mangalehon godang tu Jahowa. Alai na parjolo, taulas ma boasa boi pos rohatta na mararga do hita di Jahowa.

5. Aha do na patuduhon na arga do jolma di Jahowa?

⁵ Nang pe sian orbuk hita ditoppa, alai dao do hita ummarga sian sajopput tano. (1 Mus. 2:7) Pikkirhon ma piga-piga alasanna boasa arga hita di Jahowa. Ditoppa Ibana do hita asa boi maniru akka parangena. (1 Mus. 1:27) Jala dibahen Jahowa do ummarga jolma sian sude toppaanna na adong di tano on. Jala boi do jolma mangarajai binatang na di tano on.​—Ps. 8:5-9.

6. Aha do muse na patuduhon mararga do jolma di Jahowa nang pe mardosa?

⁶ Nang pe mardosa si Adam, toktong do mararga akka jolma di Jahowa. I do alana dilehon Jahowa anakna, i ma Jesus lao manobus hita sian dosa. (1 Joh. 4:9, 10) Alani tobusan do umbahen dipahehe Jahowa akka “halak na burju dohot halak na jahat” na mate alani dosa ni si Adam. (Ul. 24:15) Bibel paboahon, arga do hita di Jahowa nang pe marsahit, pogos manang matua.​—Ul. 10:34, 35.

7. Aha do muse alasan na asing na boi paposhon rohatta na arga do hita di Jahowa?

⁷ Adong do muse alasan na asing na boi paposhon rohatta na patuduhon na arga do hita di Jahowa. Ibana do na manogu hita asa gabe naposona. Jala diparrohahon Ibana do songon dia hita tikki manjakkon barita na uli. (Joh. 6:44) Molo tapajonok tu Jahowa, pajonokonna do tu hita. (Jak. 4:8) Jala diajari Jahowa do hita, ala arga do hita di Ibana. Takkas do hita ditanda Jahowa jala diboto Ibana do aha na porlu tapauba di ngolutta. Asing ni i, dipissang Ibana do hita alani holongna. (Poda 3:11, 12) On ma na patuduhon na massai arga do hita di Jahowa!

8. Aha do pengaruh ni hata na disurat di Psalmen 18:28-30 tu caratta mangadopi hasusaan?

⁸ Nang pe adong piga-piga halak na so mangargai Raja Daud, alai toktong do dihaholongi jala diurupi Jahowa ibana. Ala mamboto taringot i, gabe boi ma si Daud martahan. (2 Sam. 16:5-7) Tikki marmetmet ni roha hita manang susa, boi do diurupi Jahowa hita mangadopi i. (Jaha Psalmen 18:28-30.) Molo didongani Jahowa, dang adong manang ise pe na boi mangambati hita marlas ni roha manomba Ibana. (Rom 8:31) Saonari, taulas ma tolu situasi na mambahen hita porlu mangarimangi songon dia Jahowa makkaholongi jala mangargai hita.

9. Aha do pengaruh ni sahit tu pakkilalaanta?

⁹ Sahit boi mambahen hita marlungun ni roha jala didok rohatta dang marguna be hita di na asing. Ra, maila do hita tikki diboto halak na asing hita marsahit  manang ala ikkon diurupi nasida. Nang pe dang diboto halak na marsahit hita, olo do gabe marsak hita ala dang boi be mangulahon aha na somal taulahon. Di tikki sisongon i, boi do Jahowa patoguhon hita. Songon dia carana?

10. Hombar tu Poda 12:25, aha do na boi mangurupi hita tikki marsahit?

¹⁰ Tikki marsahit hita, “hata na denggan” boi patoguhon rohatta. (Jaha Poda 12:25.) Di Bibel, dipaboa Jahowa do akka hata na denggan na paingothon hita na arga do hita di Ibana nang pe marsahit. (Ps. 31:20; 41:4) Molo marulak-ulak tajaha Bibel, urupan ni Jahowa do hita pasidikkon arsak ni roha alani sahit.

11. Songon dia Jahowa mangurupi sahalak dongatta?

¹¹ Parrohahon ma pengalaman ni si Jorge. Poso dope ibana, alai marsahit na posi do ibana na mambahen lam gale dagingna. Didok si Jorge, “Dang hurimpu songon on sahithu. Alani sahitton, gabe maila do au ala sai diberengi akka halak. Ala lam posi sahithu, dang huboto songon dia ngolukkon haduan. Lungun hian ma rohakku, jala martangiang ma au tu Jahowa asa diurupi.” Songon dia Jahowa mangurupi ibana? Didok si Jorge muse, “Ala hatop au loja, hujaha ma holan piga-piga ayat sian bukku Psalmen na patuduhon songon dia Jahowa manarihon naposona. Marulak-ulak do hujaha akka ayat i ganup ari, jala gabe dipatogu do rohakku. Ujungna didok akka halak ma, gabe dipatogu do roha ni nasida ala diida nasida sai las do rohakku. Gabe huboto ma, naung dialusi Jahowa do tangiakku! Diurupi Ibana do au asa mangargai dirikku. Gabe sai  huingot ma na didok Bibel, na arga do au di Jahowa nang pe marsahit.”

12. Tikki marsahit, aha do na boi diulahon hamu asa diurupi Jahowa?

¹² Tikki marsahit hamu, pos ma rohamu na diantusi Jahowa do songon dia pakkilalaanmuna. Pangido ma tu Ibana asa diurupi hamu pasidikkon arsak ni roha. Lului ma akka ayat ni Bibel na boi patoguhon rohamuna. Rimangi ma akka ayat na patuduhon songon dia Jahowa mangargai akka naposona. Molo diulahon hamu i, idaonmuna ma na burju do Jahowa tu sude naposona na setia.​—Ps. 84:12.

13. Songon dia do pakkilalaan ni kepala keluarga molo di PHK?

¹³ Lomo do roha ni sude kepala keluarga asa boi paradehon na dihaporluhon keluargana. Alai adong do dongatta na di PHK nang pe dang mangulahon na sala di parkarejoan. Marsitutu do ibana mangalului karejo na asing alai dang dapotna. Tikki masa sisongon i, ra olo do sipata didok rohana dang mararga be dirina. Songon dia ibana boi diurupi molo toktong mangingot janji ni Jahowa?

14. Boasa ikkon dipasaut Jahowa janjina?

¹⁴ Sai dipasaut Jahowa do akka janjina. (Jos. 21:45; 23:14) Adong do piga-piga alasan boasa ikkon dipasaut Jahowa sude janjina. Na parjolo, ala naeng pabadiahon goarna. Nungnga marjanji Jahowa lao manarihon akka naposona. Jala diboto Ibana do, ikkon pasautonna do janjina i. (Ps. 31:2-4) Asing ni i, diboto Jahowa do molo dang disarihon Ibana naposona, tontu gabe metmet do roha ni nasida. Marjanji do Jahowa lao  paradehon akka na porlu tu hita asa boi toktong mangolu jala toktong manomba Ibana. Jala dang adong na boi mangambati Ibana lao pasautton janjina i!​—Mat. 6:30-33; 24:45.

15. (a) Aha do hasusaan na diadopi halak Kristen di abad na parjolo? (b) Songon dia do Psalmen 37:18, 19 boi paposson rohatta?

¹⁵ Molo taingot alasan ni Jahowa pasautton janjina, boi ma pos rohatta lao urupanna do hita tikki susa di parhepengon. Pikkirhon ma contoh sian halak Kristen di abad na parjolo. Di tikki i, masa ma penganiayaan tu huria na di Jerusalem. On mambahen ‘gabe marserak sude sisean i’. (Ul. 8:1) Alani i, gabe susa ma nasida di parhepengon. Ikkon ditadikkon nasida do jabu dohot karejo ni nasida. Alai, dang ditadikkon Jahowa nasida jala toktong do nasida marlas ni roha. (Ul. 8:4; Heb. 13:5, 6; Jak. 1:2, 3) Molo diurupi Jahowa do nasida, tontu hita pe urupanna do.​—Jaha Psalmen 37:18, 19.

16. Aha do na mambahen hita gabe makkilala dang mararga be hita di Jahowa?

¹⁶ Ala naung matua, olo do sipata tahilala holan saotik nama na boi talehon tu Jahowa. Songon i ma na dihilala Raja Daud dung matua ibana. (Ps. 71:9) Songon dia Jahowa mangurupi hita?

17. Aha do na boi taparsiajari sian pengalaman ni si Jheri?

¹⁷ Pikkirhon ma pengalaman ni sahalak dongatta borua na margoar si Jheri. Digokkon ma ibana asa dohot tu pelatihan lao mangarawat Bale Harajaon. Alai mabiar do ibana dohot. Didok ibana, “Nungnga matua au, mabalu, jala dang adong keterampilan na boi hulehon tu  Jahowa. Huhilala, dang marguna au.” Di borngin andorang so pelatihan i, martangiang ma ibana tu Jahowa. Marsogotna i, dung sahat ibana di Bale Harajaon, tong dope dang pos rohana. Saleleng pelatihan i, sahalak dongatta baoa paboahon di jamitana molo keterampilan na rumikkot, i ma rade diajari Jahowa. Didok si Jheri ma, “Ninna rohakku ma, ‘adong do keterampilan i di au!’ Gabe tangis ma au, huboto ma na dialusi Jahowa do tangiakku. Dipapos Ibana do rohakku. Adong do hape na arga na boi hulehon tu Ibana jala rade do Ibana mangajari au!” Tikki diingot si Jheri i muse, didok ibana ma, “Tikki ro au tu pelatihan i, mabiar, marsak, jala dang pos rohakku. Alai dung sae pelatihan i, gabe dipatogu do au jala mararga do huhilala dirikku!”

18. Songon dia Bibel patuduhon na toktong do hita mararga di Jahowa nang pe naung matua?

¹⁸ Nang pe naung matua, pos ma rohatta toktong do dipakke Jahowa hita lao mangulahon lomo ni rohana. (Ps. 92:13-16) Diajarhon Jesus do tu hita, na arga do di Jahowa sude na taulahon lao manomba Ibana, nang pe didok rohatta dang godang na boi taulahon. (Luk. 21:2-4) Alani i, pikkirhon ma akka aha na boi diulahon hamu. Umpamana, marbarita na uli, manangiakkon akka dongan, jala patoguhon na asing asa toktong setia. Dipakke Jahowa do hamu lao gabe dongan saulaonna dang alani sadia godang na boi taulahon. Alai, ala rade do hita mangoloi Ibana.​—1 Kor. 3:5-9.

19. Aha do janji na boi paposhon rohatta na disurat di Rom 8:38, 39?

¹⁹ Massai las do rohatta ala manomba Jahowa, i ma Debata na mangargai akka naposona! Ditoppa Ibana do hita lao mangulahon lomo ni rohana, jala i do na mambahen hita marlas ni roha. (Pgk. 4:11) Nang pe didok roha ni akka halak di portibi on dang mararga hita, alai arga do hita di Jahowa. (Heb. 11:16, 38) Tikki marmetmet ni roha hita alani sahit, susa di parhepengon, manang ala naung matua, taingot ma, sudena i dang boi manirang hita sian holong ni Debata.​—Jaha Rom 8:38, 39.