1. Akka aha do hasusaan na diadopi naposo ni Jahowa?

DI LIAT portibi on, godang do naposo ni Jahowa na mangadopi hasusaan na mambahen nasida marsak jala marlungun ni roha. Adong do di huriamuna na makkilala sisongon i? Adong piga-piga donganta na marsahit na posi manang marhabot ni roha ala mate halak na dihaholongi. Na asing, adong na marlungun ni roha ala dipecat keluargana manang sisolhotna. Jala adong do muse akka dongatta na susa alani bencana alam. Sude dongatta on, porlu dipatogu. Songon dia hita boi mangurupi nasida?

2. Boasa porlu si Paulus dipatogu?

² Jotjot do si Paulus mangadopi situasi na berbahaya. (2 Kor. 11:23-28) Ikkon martahan do ibana nang pe adong ‘suga di bagasan dagingna’. Ra, sahit do na didokna disi. (2 Kor. 12:7) Jala hea do ibana marmetmet ni roha alani si Demas. Rap saulaon hian do si Demas dohot si Paulus. Alai “ala dihaholongi ibana do portibi on”, gabe ditadikkon ma si Paulus. (2 Tim. 4:10) Halak Kristen na miniahan jala na barani do si Paulus. Alai sipata, porlu do ibana dipatogu akka dongan na asing. Alana, olo do sipata ibana marmetmet ni roha.​—Rom 9:1, 2.

3. Ise do na patoguhon jala na mangurupi si Paulus?

³ Songon dia do si Paulus dipatogu jala diurupi? Dipakke Jahowa do tondi parbadiana lao patoguhon si Paulus. (2 Kor. 4:7; Plp. 4:13) Asing ni i, dipatogu Jahowa do si Paulus marhite akka dongan sahaporseaon. Didok si Paulus do molo akka donganna na rap saulaon i sai ‘patoguhon rohana’. (Kol. 4:11) Dipaboa si Paulus do piga-piga goar ni nasida, songon si Aristarkus, si Tikikus, dohot si Markus. Dipatogu nasida do si Paulus jala diurupi asa boi toktong martahan. Akka parange aha do na dipatudu  nasida na tolu lao mangurupi na asing? Songon dia do hita boi maniru nasida lao patoguhon dongan na asing?

4. Aha do buktina si Aristarkus dongan na setia di si Paulus?

⁴ Si Aristarkus, i ma halak Makedonia na sian Tessalonik na toktong setia mandongani si Paulus. Parjolo sahali tajaha di Bibel taringot si Aristarkus, i ma di tikki pardalanan ni si Paulus na patoluhalihon gabe misionaris tu Epesus. Tikki rap dohot si Paulus, ro ma godang halak manakkup ibana. (Ul. 19:29) Dung malua sian penjara, dang olo si Aristarkus manadikkon si Paulus. Piga-piga bulan dukkon i, tikki di Junani, toktong do si Aristarkus mandongani si Paulus nang pe adong akka halak na naeng mambunu si Paulus. (Ul. 20:2-4) Hira-hira taon 58 M, diboan ma si Paulus tu Rom lao dipenjarahon jala dohot do si Aristarkus di tikki i. Jala rap martahan do nasida tikki naeng lonong kapal na ditoppang nasida. (Ul. 27:1, 2, 41) Dung sahat di Rom, hea do ibana rap dipenjarahon dohot si Paulus. (Kol. 4:10) Tontu, dipatogu do roha ni si Paulus alani donganna na setia i!

5. Hombar tu Poda 17:17, songon dia do hita boi gabe dongan na setia?

⁵ Songon si Aristarkus, boi do hita gabe dongan na setia. Dang holan di tikki sonang, alai dohot do di tikki mangadopi sitaonon. (Jaha Poda 17:17.) Nang pe nungnga salpu sitaonon ni nasida i, alai porlu dope nasida dipatogu. Dongatta na margoar si Frances, * mate bapakna ala marsahit kanker. Jala tolu bulan dukkon i, mate ma muse omakna alani sahit na sarupa. Didok, “Ninna rohakku, sitaonon na borat boi do mambahen hita leleng marlungun ni roha. Alai mandok mauliate do au tu akka dongan na setia. Diboto nasida do na lungun dope rohakku, nang pe naung leleng mate natua-tuakku.”

6. Aha do na diulahon dongan na setia?

⁶ Dongan na setia rade mangalehon  tikki dohot gogona lao mangurupi dongan na asing. Umpamana, sahalak dongatta na margoar si Peter marsahit na posi jala didok dokter dang leleng be ngoluna. Istrina si Kathryn mandok, “Adong suami-istri di hurianami na rade mamboan si Peter tu parubatan. Dung diboto nasida taringot sahit ni si Peter, didok nasida ma lao urupanna do hami. Jala sai adong do nasida lao mandongani hami tikki dihaporluhon.” Gabe dipatogu do rohatta ala adong dongan na burju na mangurupi hita mangadopi akka sitaonon!

7-8. Hombar tu Kolosse 4:7-9, songon dia si Tikikus gabe dongan na boi dihaporseai?

⁷ Si Tikikus, i ma halak Kristen na sian provinsi Asia. Dongan ni si Paulus do ibana na boi dihaporseai. (Ul. 20:4) Hira-hira taon 55 M, dibahen si Paulus ma pengaturan asa papunguhon hepeng lao mangurupi halak Kristen di Judea. Ra, si Tikikus do na mangulahon tugas na rikkot i. (2 Kor. 8:18-20) Dung i, tikki parjolo sahali si Paulus dipenjarahon di Rom, si Tikikus ma na mamboan surat ni si Paulus na patoguhon akka dongan di huria di Asia.​—Kol. 4:7-9.

⁸ Toktong do si Tikikus gabe dongan na boi dihaporseai si Paulus. (Tit. 3:12) Di tikki i, dang godang na boi dihaporseai songon si Tikikus. Hira-hira taon 65 M, tikki dipenjarahon si Paulus na paduahalihon, dibahen ibana ma surat na mandok, godang akka dongan di provinsi Asia dang olo be marsaor dohot ibana ala mabiar tu akka musu. (2 Tim. 1:15) Alai, toktong do si Tikikus boi dihaporseai jala dilehon do muse tu ibana tugas na baru. (2 Tim. 4:12) Tontu massai arga do di si Paulus dongan na burju songon si Tikikus.

9. Songon dia hita boi maniru si Tikikus?

⁹ Boi do tatiru si Tikikus gabe dongan na boi dihaporseai. Umpamana, unang ma holan marjanji lao mangurupi akka dongan. Ikkon adong do na taulahon lao mangurupi nasida. (Mat. 5:37; Luk. 16:10) Tikki diboto akka dongan na rade  hita mangurupi, gabe togu do roha ni nasida. Sahalak dongatta borua mandok, “Gabe dame do pakkilalaanmuna ala mamboto ro do akka dongan lao mangurupi di tikki na dijanjihon nasida.”

10. Hombar tu Poda 18:24, ise do na boi patoguhon rohatta tikki mangadopi hasusaan manang marmetmet ni roha?

¹⁰ Jotjot do halak na mangadopi hasusaan manang na marmetmet ni roha mangalului dongan na boi dihaporseai lao patoguhon roha ni nasida. (Jaha Poda 18:24.) Si Bijay na marmetmet ni roha ala dipecat anakna mandok, “Porlu do hupaboa pakkilalaanku tu sasahalak na boi huhaporseai.” Si Carlos, gabe dang adong be hak istimewana di huria ala mangulahon na sala. Didok ibana, “Ikkon hupaboa do pakkilalaanku tu sasahalak na olo manangihon jala dang manguhumi au.” Dihilala ibana, akka sintua do na boi mangurupi ibana lao mangadopi hasusaanna i. Jala gabe dipatogu do rohana ala dang olo sintua i paboahon tu na asing aha na diceritahon ibana.

11. Songon dia hita boi gabe dongan na boi dihaporseai?

¹¹ Asa boi gabe dongan na boi dihaporseai, ikkon toktong ma tapatudu hasabaron. Songon si Zhanna na ditadikkon suamina, dipatogu do rohana dung paboahon pakkilalaanna tu donganna. Didok ibana ma, “Sabar do nasida manangihon au nang pe marulak-ulak hata na hudok tu nasida.” Hamu pe, boi do gabe dongan na boi dihaporseai molo sabar manangihon.

12. Ise do si Markus, jala songon dia ibana rade mangurupi na asing?

¹² Si Markus, i ma halak Jahudi Kristen na sian Jerusalem. Keluargana do si Barnabas, i ma sahalak misionaris na ditanda godang halak. (Kol. 4:10) Sian keluarga na mamora do si Markus, alai dang hamoraon na diharikkotton ibana di ngoluna. Saleleng ngoluna, rade jala las do rohana mangurupi na asing. Umpamana, jotjot do ibana mangurupi apostel Paulus dohot apostel Petrus asa boi mangulahon tanggung jawab ni nasida. Ra, diparade si Markus do sipanganon ni nasida, inganan lao tading, dohot na asing. (Ul. 13:2-5; 1 Ptr. 5:13) Dipaboa si Paulus do molo si Markus i ‘dongan saulaon tu Harajaon ni Debata’ jala na sai patoguhon rohana.​—Kol. 4:10, 11.

13. Songon dia 2 Timoteus 4:11 patuduhon na diargai si Paulus do akka naung diulahon si Markus?

¹³ Togu do parale-aleon ni si Paulus dohot si Markus. Umpamana, hira-hira taon 65 M dipenjarahon do si Paulus di Rom. Dibahen ibana ma surat na paduahalihon tu si Timoteus. Di surat i, dipangido si Paulus do asa ro si Timoteus tu Rom jala mamboan si Markus rap dohot ibana. (2 Tim. 4:11) Diargai si Paulus do akka naung diulahon si Markus tu ibana. Alani i, dipangido ma asa didongani si Markus ibana andorang so mate. Ra, diparade si Markus do sipanganon manang akka alat lao manurat songon gulungan dohot tinta. Gabe dipatogu ma roha ni si Paulus. Boi ma ibana martahan sahat tu na diuhum mate.

14-15. Sian Mateus 7:12, aha do na boi taparsiajari taringot mangurupi na asing?

¹⁴ Jaha Mateus 7:12. Massai taargai do akka halak na rade mangurupi hita tikki taadopi sitaonon na borat! Si Ryan na mate bapakna alani kecelakaan mandok, “Tikki marsitaonon, gabe maol do  taulahon akka na somal taulahon ganup ari. Alani i, gabe dipatogu do rohatta tikki adong sasahalak na rade mangurupi nang pe otik.”

¹⁵ Molo manat hamu mamparrohahon akka dongan, gabe boi ma diboto hamu aha na boi diulahon lao mangurupi nasida. Umpamana, songon pengalaman ni si Peter dohot si Kathryn naung dipaboa nakkin. Adong sada donganta borua na marjanji lao mangurupi nasida manaruhon tu inganan parubatan. Ala so boi be si Peter dohot si Kathryn manupir, dibahen donganta borua i ma jadwal asa boi akka dongan di huria manaruhon nasida tu inganan parubatan. Aha ma hasilna? Didok si Kathryn, “Songon na diangkat ma boban na borat sian tanggurungnami.” Ingot ma, boi do hamu patoguhon na asing nang pe dang godang na boi diulahon hamu.

16. Sian contoh ni si Markus, aha do na boi taparsiajari taringot patoguhon roha ni akka dongan?

¹⁶ Si Markus, i ma halak Kristen na ringgas di abad na parjolo. Adong do tugas na rikkot na dilehon Jahowa tu ibana, dohot ma i manurat Injil na mamangke goarna. Nang pe songon i, dilehon ibana do tikkina lao patoguhon roha ni si Paulus. Alani i, lomo do roha ni si Paulus tikki diurupi si Markus ibana. Tikki mate oppung boru ni si Angela ala dibunu, diargai ibana do akka dongan na rade patoguhon rohana. Didok, “Lomo do roha ni akka dongan mangurupi, jala mura do nasida dijonoki. Huparrohahon, sai rade do nasida mangurupi manang andigan pe.” Alani i, tasukkun ma dirinta, ‘Ditanda do au sahalak na rade patoguhon roha ni akka dongan?’

17. Molo tarimangi 2 Korint 1:3, 4, songon dia i boi mangonjar rohatta lao patoguhon roha ni akka dongan?

¹⁷ Sasittongna, dang maol lao patoguhon roha ni akka dongan. Ra, boi do tadok hata na hea dilehon akka dongan lao  patoguhon rohatta. Songon si Nino na marujung ngolu ompung boruna. Didok ibana, “Boi do Jahowa mamakke hita lao patoguhon roha ni akka dongan molo rade hita mangulahon i.” (Jaha 2 Korint 1:3, 4.) Si Frances na dipaboa nakkin mandok, “Tutu do hata na disurat di 2 Korint 1:4. Boi do tapakke hata na patoguhon rohatta lao patoguhon roha ni akka dongan.”

18. (a) Ra, aha do na mambahen sasahalak mabiar lao mangurupi akka dongan? (b) Songon dia hita boi marhasil patoguhon akka dongan? Bahen ma contoh.

¹⁸ Ikkon talului do cara lao mangurupi akka dongan nang pe hira na mabiar hita mangulahon i. Ra, mabiar hita ala dang taboto aha na lao tadok manang taulahon lao mangapuli akka dongan. Sahalak sintua na margoar si Paul mangingot songon dia akka dongan marsitutu patoguhon rohana dung mate bapakna. Didok ibana, “Huboto do, dang mura di nasida lao manjonoki au. Dang diboto nasida aha na lao didok. Alai huargai do na lomo roha ni nasida lao patoguhon jala mangurupi au.” Suang songon i ma na dihilala si Tajon dung masa gempa bumi. Didok ibana, “Sasittongna dang pola huingot akka hata na patoguhon sian akka dongan. Alai huingot do songon dia nasida manarihon au.” Boi do hita marhasil patoguhon akka dongan molo tapatudu na parduli hita tu nasida.

19. Boasa ikkon marsitutu hamu lao patoguhon roha ni akka dongan?

¹⁹ Ala lao salpu do portibi on, lam jahat ma akka halak jala lam susa ma parngoluonta. (2 Tim. 3:13) Asing ni i, porlu do hita dipatogu ala jolma na so sempurna hita na jotjot mangulahon hasalaan. Boi do si Paulus toktong setia sahat tu na mate ala adong akka dongan sahaporseaon na patoguhon rohana. Anggiat ma hita setia songon si Aristarkus, boi dihaporseai songon si Tikikus, jala rade mangurupi songon si Markus. Molo taulahon i, boi ma hita mangurupi akka dongan asa toktong setia manomba Jahowa.​—1 Tes. 3:2, 3.