Sungkunsungkun sian na Manjaha
Aha do lapatan ni dua hau (tungkot) na dipasada na disurat di Hesekiel bindu 37?
Marhite si Hesekiel, disurirangkon Jahowa do na laho pasadaonna sude halak Israel jala mulak tu Tano Parjanjian. Digohi do muse surirang on di tingki parpudi, pasadaon ni Debata ma sude naposoNa gabe sada punguan.
Didok Jahowa tu si Hesekiel asa disurat di tungkot na sada, ”Di Juda dohot di angka anak ni Israel, angka donganna i!” Disurat muse di tungkot na sada nai, ”Di si Josep, hau [tungkot] ni Epraim ro di sandok pinompar ni Israel, angka donganna i!” Dipadomu ma tungkot na dua i, gabe ”sada hau [tungkot]” di tangan ni si Hesekiel.—Hes. 37:15-17.
Aha do lapatan ni marga ”Epraim”? Marga Epraim, i ma marga na sumurung sian sampulu marga na adong di harajaon ni Israel di utara. Si Jerobeam sian marga Epraim do na parjolo gabe raja di harajaon i. (5 Mus. 33:13, 17; 1 Raj. 11:26) Marga Epraim, i ma pomparan ni si Josep. (4 Mus. 1:32, 33) Mandapot pasupasu na sumurung do si Josep sian amana si Jakkob. Jadi boi ma didok, ”hau [tungkot] ni Epraim” manggombarhon sampulu marga harajaon ni Israel di utara. Di taon 740 SM, andorang so disurirangkon si Hesekiel on, nunga talu harajaon ni Israel di utara dibahen halak Assur. Ditaban ma nasida jala diparhatoban. (2 Raj. 17:6) Alai, ditaluhon halak Babel ma muse halak Assur. Tingki disurat surirang taringot dua tungkot on, nunga marserak halak Israel di Babel.
Di taon 607 SM, ditaluhon halak Babel ma dua marga harajaon ni Israel di selatan jala ditaban ma nasida tu Babel. Ra, diboan nasida do muse sude halak na tading di harajaon ni Israel di utara. Raja ni harajaon ni Israel di selatan, i ma sian marga Juda. Angka malim (marga Lepi) pe tading di Juda, ala nasida marhobas di bagas joro di Jerusalem. (2 Kron. 11:13, 14; 34:30) Boi ma didok, tungkot ”sian Juda” manggombarhon dua marga harajaon ni Israel di selatan.
Nandigan do dua tungkot on dipasada? Dipasada ma i di taon 537 SM, tingki mulak dua marga i tu Jerusalem laho pajongjongkon bagas joro muse. Dipasada ma bangso Israel. Boi ma nasida muse rap manomba Jahowa. (Hes. 37:21, 22) Dipaboa do surirang on tu si Jesaya dohot tu si Jeremia.—Jes. 11:12, 13; Jer. 31:1, 6, 31.
Aha do na didok surirang ni si Hesekiel taringot panombaon na sintong? Bahenon ni Debata ma sude naposoNa gabe ”sada”. (Hes. 37:18, 19) Digohi do surirang on di tingki parpudi? Digohi ma surirang on di taon 1919. Andorang so taon i, marsitutu do Sibolis mambahen asa unang marsada naposo ni Debata. Alai sian taon 1919, lam dipasada ma naposo ni Debata.
Di tingki i, godang do naposo ni Debata na mangkirim mangolu tu surgo raphon Jesus. (Pgk. 20:6) Didok ma nasida songon tungkot ni Juda. Alai, adong do pigapiga na mangkirim mangolu salelengna di tano on. Lam leleng, lam torop do nasida. (Sak. 8:23) Nasida ma na didok songon tungkot ni si Josep.
Dua punguan on rap manomba Jahowa. Sada do Raja ni nasida, i ma Jesus Kristus. Di surirang ni si Hesekiel, didok do Jesus songon ”si Daud naposongki”. (Hes. 37:24, 25) Ditangiangkon Jesus ma angka siseanna jala didok, ”Asa sada nasida saluhutna; songon Ho, ale Amang, di bagasan Ahu jala Ahu di bagasan Ho.” * (Joh. 17:20, 21) Didok Jesus muse, punguan na metmet na miniahan, gabe ”sada punguan” dohot ”birubirungku na asing”. Sada do parmahan na diihuthon nasida. (Joh. 10:16) Songon na didok Jesus, sude naposo ni Jahowa na mangkirim tu surgo dohot na mangkirim di tano on nunga dipasada!
^ par. 10 Tingki dipaboa Jesus tanda ajal ni hasiangan on, dibahen do tudosan. Parrohahon ma na nidok ni Jesus taringot ”naposo haposan jala na marroha”, i ma punguan na metmet sian na miniahan, na mangaradoti naposo ni Jahowa. (Mat. 24:45-47) Dibahen do muse tudosan taringot sude punguan na miniahan. (Mat. 25:1-30) Dipaboa do muse, taringot punguan na mangkirim mangolu salelengna di tano on, na mangurupi punguan na miniahan. (Mat. 25:31-46) Surirang ni si Hesekiel na digohi di tingkinta on, parjolo ma on digohi tu halak na miniahan. Nang pe sampulu marga ni Israel ndang manggombarhon halak na mangkirim mangolu di tano on, alai dua tungkot na dipasada di surirang on, manggombarhon punguan na miniahan dohot birubiru na asing na dipasada manomba Jahowa.
