1. Aha do imbar ni na tahaporluhon dohot na tahalomohon?

NDANG pola godang na tahaporluhon asa tongtong mangolu. Na tahaporluhon, i ma sipanganon, pangkean, dohot jabu. Alai, ndang marnasae sude na tahalomohon. Dirimpu godang halak do dihaporluhon nasida sude na dihalomohon rohana.

2. Angka aha do na dihalomohon halak?

² Marimbar do na dihalomohon halak na tading di negara na pogos dohot halak na tading di negara maju. Di pigapiga inganan, lomo do roha ni halak asa adong handphonena, sepeda motorna, manang asa adong tanona. Alai di inganan na asing, halak mangkalomohon baju na arga, jabu na balga, dohot motor na arga. Ndang soal didia hita maringanan manang sadia godang hepengta, olo do ra tahalomohon angka barang na so tahaporluhon manang na so tartuhorta.

3. Aha do materialisme i?

³ Aha do materialisme i? I ma parange ni sasahalak na mangkaringkothon arta sian paralealeon tu Debata. Nang pe naung dapotna na dihaporluhon, alai sai dilului ibana do angka na asing. Boi do hita gabe materialistis nang pe saotik hepengta manang ndang boi tatuhor angka barang na arga, molo ndang taharingkothon be Harajaon ni Debata.​—Heb. 13:5.

4. Songon dia do Sibolis mamangke ”giotgiot ni roha ni mata”?

⁴ Lomo roha ni Sibolis asa porsea hita arta do na mambahen sonang ngolunta. Dipangke ibana do portibi on dohot ”giotgiot ni roha ni mata” laho mambahen hita mangalului godang arta. (1 Joh. 2:15-17; 1 Mus. 3:6; Poda 27:20) Jotjot do taida jala tabege iklan na manogihon hita manuhor barang na baru. Hea do hamu manuhor barang holan ala bagak idaon manang ala diida hamu di iklan? Dung dituhor hamu, diboto hamu ma na so dihaporluhon do barang i. Molo tatuhori angka barang na so tahaporluhon, susa ma ngolunta. Umpamana, ndang marhiras ni roha be hita manomba Jahowa, ndang adong be tingkinta marsiajar Bibel, paradehon parsiajaran di parpunguan, jala ndang laho be marbarita. Ingot ma hata ni apostel Johannes na mandok, ”Na laho salpu do portibi on rap dohot na pinarhagiotna.”

5. Aha do na boi masa tu halak na mamangke gogona mangalului godang arta?

⁵ Asa unang tapangke gogonta tu Jahowa, lomo do roha ni Sibolis mambahen hita mangalului godang hepeng. (Mat. 6:24) Molo holan arta dohot hepeng do na talului, ndang marlapatan be ngolunta. Gabe sai holsoan ma hita jala susa. Lam leleng, ndang marhaporseaon be hita tu Jahowa dohot tu HarajaonNa. (1 Tim. 6:9, 10; Pgk. 3:17) Didok Jesus, ”sude ragam ni sangkapsangkap ni roha” dos songon sugasuga na mamisat boni asa unang marparbue.​—Mrk. 4:14, 18, 19, Bibel siganup ari.

6. Parsiajaran aha do na tadapot sian si Baruk?

⁶ Ingot ma si Baruk, sekretaris ni si Jeremia. Tingki si Baruk mangalului ”angka hatimbulon” tu dirina, dipaingot Jahowa ma ibana na laho diripashon Jerusalem. Alai, marjanji do Jahowa paluahon si Baruk. (Jer. 45:1-5) Sasintongna, ndang porlu be si Baruk mamingkiri na asing. Alana, Jahowa ndang paluahon arta ni sasahalak. (Jer. 20:5) Hita mangolu di ari parpudi. Ndang tingkina be laho mangalului arta sagodanggodangna. Dung hasusaan bolon, nang pe arga angka artanta i, unang ma tahirim na boi dope i di hita.​—Poda 11:4; Mat. 24:21, 22; Luk. 12:15.

7. Aha do na laho taulas, jala boasa?

 ⁷ Songon dia do hita manarihon dirinta dohot keluarganta, alai tongtong patujolohon na rumingkot di ngolunta? Songon dia do hita pasidingkon materialisme? Aha do na mangurupi hita asa unang paholsohu taringot na tahaporluhon? Dilehon Jesus do poda na denggan tingki ibana marjamita di Dolok. (Mat. 6:19-21) Tajaha jala taulas ma Mateus 6:25-34. On mangurupi hita asa tongtong patujolohon Harajaon ni Debata.​—Luk. 12:31.

8, 9. (a) Boasa unang pola paholsohu hita taringot na tahaporluhon? (b) Aha do na diantusi Jesus taringot jolma dohot na dihaporluhon nasida?

⁸ Jaha Mateus 6:25. Diboto Jesus do na holsoan angka siseanna taringot sipanganon, siinumon, dohot pangkean. Alani i, tingki marjamita di Dolok, didok Jesus ma, ”Unang holsohon hamu hosamuna.” Diurupi Jesus do nasida mangantusi boasa ndang porlu holsoan taringot na dihaporluhon. Diboto Jesus, molo paholsohu nasida taringot na dihaporluhon, gabe lupa ma nasida na rumingkot di ngoluna. Diparrohahon Jesus do angka siseanna. Tingki marjamita, opat hali ma Jesus paingothon nasida.​—Mat. 6:27, 28, 31, 34.

⁹ Alai, boasa didok Jesus unang pola paholsohu hita taringot sipanganon, siinumon, dohot pangkean? Na so tahaporluhon do sipanganon dohot pangkean? Porlu do i! Ndang sala holsoan tingki ndang adong hepengta manuhor i. Diboto Jesus do i. Diboto ibana do na dihaporluhon jolma. Diboto ibana do lam susa ngolu ni angka siseanna ”di angka tingki parpudi” on. (2 Tim. 3:1) Sasintongna, godang do halak na maol mangalului karejo jala lam arga angka situhoron. Di inganan na asing, godang jolma na pogos jala ndang adong sipanganonna. Alai diboto Jesus, rumingkot do ”hosa sian sipanganon” jala rumingkot do ”daging sian parabiton”.

10. Tingki diajari Jesus angka siseanna martangiang, aha do didok ibana na rumingkot di ngolunta?

¹⁰ Nunga diajarhon Jesus tu angka siseanna asa manangiangkon na dihaporluhon nasida tu Debata. Songon on ma tangiang i, ”Lehon ma di hami sadari on hangoluan siap ari!” (Mat. 6:11) Di tingki na asing, diajari ma nasida muse, ’Lehon ma di hami sipanganon sadari on.’ (Luk. 11:3) Alai lapatan ni on, ndang ingkon sai tapingkiri angka na tahaporluhon. Dipaboa Jesus, rumingkot do  manangiangkon Harajaon ni Debata sian manangiangkon na tahaporluhon. (Mat. 6:10; Luk. 11:2) Asa unang paholsohu siseanna, dipaingot jala dipapos Jesus roha ni nasida na diparrohahon Debata do nasida.

11, 12. Aha do na taparsiajari sian cara ni Jahowa manarihon angka pidong? (Ida gombar di mula ni parsiajaran.)

¹¹ Jaha Mateus 6:26. Ingkon taida do ”pidong angka na martongatonga langit”. Nang pe gelleng, gogo do pidong mangan. Molo sarupa balga ni pidong dohot jolma, umgodang do na niallangna sian jolma. Pidong mangallang buah, eme, serangga, dohot gilokgilok. Alai, ndang porlu nasida manuan sipanganonna. Diparade Jahowa do na dihaporluhon nasida. (Ps. 147:9) Alai, ndang pintor diparade Debata sipanganon i di jolo ni pidong i. Ingkon nasida do na mangalului sipanganonna.

¹² Pos do roha ni Jesus, molo disarihon Jahowa angka pidong, jolma pe sarihononNa do. ^[1] (Ida catatan.) (1 Ptr. 5:6, 7) Songon pidong, ingkon karejo do hita asa adong sipanganon dohot hepeng. Unang ma gabe malas hita. Pasupasuon ni Jahowa do ulaonta. Tingki ndang adong hepengta manuhor sipanganon, diparade Jahowa do na tahaporluhon. Umpamana, olo do ra angka donganta mangalehon na porlu di hita. Diparade Jahowa do inganan ni angka pidong. Ditompa Jahowa do nasida boi mambahen asarna, jala diparade do na porlu tu nasida laho mambahen i. Diurupi Jahowa do hita asa boi paradehon ingananta.

13. Aha do na patuduhon ummarga hita sian angka pidong?

¹³ Dung dipaingot Jesus angka siseanna na disarihon Jahowa do angka pidong, didok ma, ”Dao do ummarga hamu sian angka amporik [pidong].” (Bandingkon tu Lukas 12:6, 7, Bibel siganup ari) Tingki didok hata on, ra na diingot Jesus, mate pe ibana ndang na humongkop pidong manang binatang. Alai, Jesus mate humongkop jolma asa mangolu salelengna.​—Mat. 20:28.

14. Aha do na so boi taulahon molo holsoan?

¹⁴ Jaha Mateus 6:27. Aha do lapatan ni hata ni Jesus, tingki didok ibana ndang boi tatambai umurta molo holsoan hita? Lapatanna, ndang gabe tamba umurta molo paholsohu hita. Molo paholsohu, gabe marsahit jala mate ma hita.

15, 16. (a) Aha do na taparsiajari sian cara ni Jahowa manarihon angka bunga di ladang? (Ida gombar di mula ni parsiajaran.) (b) Sungkunsungkun aha do na ingkon tarimangi, jala boasa?

¹⁵ Jaha Mateus 6:28-30. Las do rohanta mamangke baju na bagak, tarlumobi tingki marbarita, marpungu, manang ro tu kebaktian. Alai, porlu do holsoan hita alani ”parabiton”? Dipaingot Jesus do muse angka siseanna taringot cara ni Jahowa manarihon tompaanNa. Dipangke Jesus do tudosan ”bungabunga na di ladang”. ”Bungabunga” na didok disi sarupa tu angka bunga na bagak,  songon tulip. Mansai bagak do bunga on nang pe ndang mangulahon manang aha. Jesus mandok, ”Gari si Salomo, uju di bungaran ni hasangaponna i ibana, gari so mamangke songon bungabunga” on.

¹⁶ Rimangi ma hata ni Jesus na mandok, ”Molo songon i diparulosi Debata duhutduhut [bunga] na di ladang i . . . , lam hamu ma, lam so parulosanna! Oe hamu siotik haporseaon!” Disarihon Debata do hita! Alai, porlu do marhaporseaon na togu. (Mat. 8:26; 14:31; 16:8; 17:20) Ingkon porsea do sisean ni Jesus na sarihonon ni Debata nasida. Songon dia do hita? Porsea do na sarihonon ni Debata hita?

17. Aha do na boi manegai paralealeonta tu Jahowa?

¹⁷ Jaha Mateus 6:31, 32. Godang do halak na so manomba Jahowa mangkaringkothon arta. Molo taulahon songon i, sega ma paralealeonta tu Jahowa. Taboto, dihaholongi Jahowa do hita. Pos ma rohanta, molo taharingkothon HarajaonNa di ngolunta, lehononNa do sude na tahaporluhon. Paralealeonta tu Jahowa do na palashon rohanta, jala on mangurupi hita asa mangkasabamhon ”sipanganon dohot parabiton” na adong di hita.​—1 Tim. 6:6-8.

18. Aha do na diboto Jahowa taringot dirinta ganup marsadasada, jala aha do na laho bahenonNa tu hita?

¹⁸ Jaha Mateus 6:33. Molo taharingkothon Harajaon ni Debata, dilehon Jahowa do sude na tahaporluhon. Dipatorang Jesus do boasa pos rohanta tu janji i. Didok ibana, ”Diboto Amamuna na di banua ginjang i do, naung ringkot angka i di hamu.” Umbotoan do Jahowa tu na tahaporluhon sian hita. (Plp. 4:19) Diboto Jahowa do na tahaporluhon sipanganon dohot pangkean. Diboto Ibana do porlu jabu laho ingananta. Dilehon Jahowa do angka na porlu di hita.

19. Boasa ndang porlu hita holsoan tu ari na naeng ro?

¹⁹ Jaha Mateus 6:34. Dipaboa Jesus muse tu siseanna, ’Unang ma holsoan hamu.’ Dilehon Jahowa do na tahaporluhon ganup ari. Unang ma maholsohu hita taringot ari na naeng ro. Molo paholsohu, gabe mangasahon dirinta ma hita, jala on manegai paralealeonta tu Jahowa. Alani i, ingkon marhaposan tu Jahowa ma hita.​—Poda 3:5, 6; Plp. 4:6, 7.

20. (a) Aha do na tinujumuna di ulaon marbarita? (b) Aha do na laho ulahononmu asa gumodang tingkimu di ulaon marbarita?

²⁰ Marisuang do molo sai talului godang hepeng, hape ndang talehon  be nasa gogonta tu Jahowa! Ingkon na dumenggan do talehon tu Jahowa. Umpamana, olo do hamu pinda tu huria na mangkaporluhon penyiar? Olo do hamu merintis? Molo nunga merintis, olo do hamu mangihuthon Singkola tu Parbaritaon Harajaon? Olo do hamu pigapiga ari mangurupi di Betel manang di kantor penerjemahan? Olo do hamu gabe relawan ni Rancang Bangun Setempat, jala mangurupi pajongjongkon Bale Harajaon? Rimangi ma songon dia bahenonmu asa mangalehon gumodang tingki dohot gogo tu ulaon Harajaon. Kotak ” Cara laho Mangalehon Gumodang Tingki” mangalehon tudutudu tu hita. Martangiang ma asa diurupi Jahowa hamu mamillit ulaonmuna. Dung i, ulahon ma.

21. Aha do na mangurupi hita asa lam jonok tu Jahowa?

 ²¹ Diajarhon Jesus do tu hita asa mangkaringkothon Harajaon ni Debata. Molo taulahon songon i, ndang paholsohu be hita tu na tahaporluhon. Lam jonok ma hita tu Jahowa ala disarihon Ibana do hita. Taorom ma dirinta asa unang sai tatuhori angka na so porlu di hita. Molo tahasabamhon na adong di hita, boi ma hita tongtong marsihohot tu Jahowa, jala tadapot ma ”ngolu na tutu” naung dijanjihon tu hita.​—1 Tim. 6:19.