1. Aha do na ingkon diulahon na poso? Jala aha do na boi mangurupi nasida asa unang mabiar? (Ida gombar di mula ni parsiajaran.)

Satolop do ra hamu angka naposo mandok, andorang so mardalani, ingkon ditontuhon do dalan na dia na laho didalani. Suang songon i ma di hangoluan on, tingki poso ingkon dipillit do dia na laho diulahon. Sahalak na poso na margoar si Heather mandok, ”Mabiar do ahu mamingkirhon i. Alana sian saonari, ingkon tapillit do na laho taulahon.” Molo songon i do pangkilalaanmu, ingot ma hata ni Jahowa na mandok, ”Unang ho mabiar, ai ahu do donganmu! Unang [holsoan] ho, ai ahu do Debatam: Ahu margogoihon ho huhut mangurupi ho.”—Jes. 41:10.

2. Sian dia do diboto hamu, na lomo roha ni Jahowa asa marlas ni roha hamu?

² Dijujui Jahowa do hamu asa marbisuk mamillit na laho ulahononmu di ari na naeng ro. (Pjm. 12:1;  Mat. 6:20) Disarihon do hamu jala lomo do rohaNa asa marlas ni roha hamu. Tangkas do on taida, tabege jala tahilala sian angka tompaanNa. Diajari do hamu asa denggan parngoluonmu. Jadi, tingki adong na so manangihon podaNa, ndang lomo rohaNa. Jahowa mandok, ”Na so huhalomohon dipillit hamu . . . ida ma, marlas ni roha do sogot anggo angka naposongku, alai anggo hamu ingkon tarurak [manang, maila] do. Ida ma, marolopolop sogot anggo angka naposongku sian sonang ni rohana.” (Jes. 65:12-14) Parohon sangap tu Jahowa do molo marbisuk hita mamillit na denggan di ngolunta.—Poda 27:11.

3. Aha do na ingkon ulahononmu asa marlas ni roha?

³ Aha do na ingkon ulahononmu asa marlas ni roha? Ingkon ditanda hamu do Jahowa jala ulahon lomo ni rohaNa. Alana, i do na tinuju ni Jahowa tingki manompa jolma. (Ps. 128:1; Mat. 5:3) Molo binatang holan mangan, minum, dohot maranak. Alai, lomo do roha ni Jahowa asa marlas ni roha jala martujuan ngolunta. ”Debata Parholongroha”, Debata na Martua, do Jahowa jala ”tumiru rupana” do jolma ditompa. (2 Kor. 13:11; 1 Tim. 1:11; 1 Mus. 1:27) Dapotmu ma las ni roha molo ditiru hamu holong ni Debata. Bibel mandok, ”Martuaan do na mangalehon sian na manjalo!” (Ul. 20:35) Hea do dihilala hamu songon i? Ringkot do i taulahon. Lomo do roha ni Jahowa molo dipatudu hamu holong tu dongan jolma dohot tu Ibana.—Jaha Mateus 22:36-39.

4, 5. Aha do na palashon roha ni Jesus?

⁴ Sitiruon do Jesus di hamu angka na poso. Marmeami jala marlas ni roha do Jesus tingki dakdanak. Songon na didok di Bibel, adong do tingkina ”mengkel” jala adong do tingkina ”manortor”. (Pjm. 3:4) Maraleale do Jesus tu Jahowa marhite mamparsiajari hataNa. Tingki marumur 12 taon, longang do angka guru na di bagas joro alani hapistaran dohot ”angka alusna”.—Luk. 2:42, 46, 47.

⁵ Dung magodang, las do roha ni Jesus mangulahon na pinangido ni Debata. Disuru do ibana ”mamboan barita na uli tu angka na pogos” jala ”tu angka na mapitung asa marnida”. (Luk. 4:18, 19) Di Psalmen 40:9 dipaboa do pangkilalaan ni Jesus na mandok, ”Dipangido rohangku do patupahon lomo ni roham, ale Debatangku.” Las do roha ni Jesus mangajari angka halak taringot Amana. (Jaha Lukas 10:21.) Dung marbarita tu sahalak borua, didok Jesus ma tu siseanna, ”Sipanganon do i di Ahu, na mangulahon lomo ni roha ni na marsuru Ahu dohot paujungkon ulaonna.” (Joh. 4:31-34) Marlas ni roha do Jesus ala patuduhon  holong tu Debata dohot tu na asing. Molo diulahon hamu songon i, marlas ni roha ma hamu.

6. Aha do labana molo dipaboa hamu tu angka dongan taringot citacitamuna?

⁶ Godang do angka donganta na merintis sian haposoonna, jala dapot nasida do las ni roha. Boi do dihatai hamu tu nasida taringot citacitamuna. Dipaboa do di Bibel, ’Sai na sundat do angka sangkap molo soada pamodai, alai molo torop pamodai, sai marhasil ma.’ (Poda 15:22) Ra paboaon ni nasida ma tu hamu, molo merintis, dapotmuna ma pangajarion na marlaba tu ngolumuna. Godang do na diparsiajari Jesus sian Amana tingki di surgo. Jala tingki di tano on pe, tongtong do ibana marsiajar. Marlas ni roha do ibana tingki marbarita na uli jala tongtong marsihohot. (Jaha Jesaya 50:4; Heb. 5:8; 12:2) Taida ma songon dia mangalehon sude tingki laho marhobas tu Jahowa boi parohon las ni roha.

7. Aha do na mambahen angka na poso marlas ni roha tingki mangurupi halak marsiajar Bibel?

⁷ Disuru Jesus do hita ’mamodai saluhut bangso’ manang mambahen sisean jala mangajari angka halak. (Mat. 28:19, 20) Molo on do na laho ulahononmu, dapotmu ma las ni roha. Songon karejo na asing, porlu do tingki asa lam malo. Si Timothy, na merintis sian haposoonna mandok, ”Las do rohangku mangalehon sude tingkingku tu Jahowa, alana on ma cara patuduhon holong tu Ibana. Mulana, ndang adong parsiajar Bibelhu. Dung pinda, pintor dapothu do pigapiga parsiajar Bibel di bagasan sabulan. Sada sian nasida nunga dohot marpungu. Dung dohot tu Singkola Alkitab tu Saudara Lajang saleleng dua bulan, ditugashon ma ahu tu inganan na asing. Disi, huurupi ma opat parsiajar Bibel. Las do rohangku mangajari angka halak huhut mangida cara ni tondi parbadia paubahon nasida.” *—1 Tes. 2:19.

8. Aha do na diulahon pigapiga na poso asa boi marbarita na uli tu gumodang halak?

⁸ Pigapiga na poso mamparsiajari bahasa na asing. Songon si Jacob sian Amerika Utara mandok, ”Tingki marumur pitu taon, godang do dongan sakalashu halak Vietnam. Lomo do rohangku paboahon taringot Jahowa tu nasida. Alani i, huparsiajari ma bahasa nasida. Carana, hubandingkon ma Joujou Paboahon bahasa Inggris dohot bahasa Vietnam. Asing ni i, mardongan do ahu dohot angka dongan di huria bahasa Vietnam na di luatnami. Dung marumur 18 taon merintis ma ahu. Dung i, dohot ma ahu tu Singkola Alkitab tu Saudara Lajang, na mangurupi ahu gabe lam malo merintis. Ditugashon ma ahu tu kelompok bahasa Vietnam jala holan sahalakku do sintua disi. Longang do roha ni angka halak Vietnam ala huparsiajari bahasa ni nasida. Jotjot do ahu ditogihon  tu jabunasida jala marsiajar Bibel ma nasida. Pigapiga sian nasida nunga mambahen hamajuon asa boi tardidi.”—Bandingkon Ul. 2:7, 8.

9. Aha do labana mangajari halak marsiajar Bibel?

⁹ Mangajari halak marsiajar Bibel mambahen hamu mamboto cara marpangalaho na denggan, asa unang gabe parila jala asa marbisuk. (Poda 21:5; 2 Tim. 2:24) Na rumingkot, boi ma hamu patuduhon haporseaonmu sian Bibel tu angka halak, jala boi rap saulaon dohot Jahowa.—1 Kor. 3:9.

10. Nang pe di ingananmuna ndang apala godang halak na olo marsiajar Bibel, songon dia do hamu tongtong marlas ni roha?

¹⁰ Boi do hamu marlas ni roha nang pe di ingananmuna ndang apala godang halak na olo marsiajar. Nang pe holan sahalak donganta na mandapot parsiajar Bibel, dohot do hita marlas ni roha disi. Alana, sude do hita dohot di ulaon i. Saleleng sia taon ma Si Brandon merintis di inganan na holan saotik na manjangkon. Didok ibana ma, ”Lomo do rohangku marbarita na uli, ala i do na pinangido ni Jahowa. Pintor merintis do ahu disi tammat singkola. Las do rohangku patoguhon angka na poso di huria jala mangida nasida mambahen hamajuon di partondion. Dung dohot tu Singkola Alkitab tu Saudara Lajang, ditugashon ma ahu tu inganan na baru. Disi, ndang adong parsiajar Bibelhu na patuduhon hamajuon asa tardidi. Alai adong do parsiajar Bibel ni angka dongan na patuduhon hamajuon. Las do rohangku ala mangalehon sude tingkingku tu Jahowa.”—Pjm. 11:6.

11. Angka aha do ulaon partondion na boi diulahon na poso laho marhobas tu Jahowa?

¹¹ Godang do na boi ulahononmu laho marhobas di Jahowa. Umpamana, godang do na poso dohot tu ulaon pajongjongkon bangunan ni Organisasi. Dihaporluhon do marratus Bale Harajaon na baru. Dapotmu ma las ni roha molo dohot mangurupi disi, ala pasangaphon Jahowa do i. Hilalaonmu ma las ni roha rap karejo dohot angka dongan. Boi ma diparsiajari hamu cara karejo na denggan, jala songon dia asa mardos ni roha dohot dongan na manguluhon ulaon i.

12. Pasupasu aha do muse na boi dapotmuna molo merintis?

¹² Si Kevin mandok, ”Sian mulai dakdanak, marcitacita do ahu mangalehon sude tingkingku tu Jahowa. Merintis ma ahu tingki marumur 19 taon. Asa boi tongtong merintis, karejo ma ahu dohot donganta gabe tungkang. Huparsiajari ma mamasang tarup ni  jabu, jandela, dohot pintu. Dung i, saleleng dua taon dohot ma ahu paulihon Bale Harajaon dohot jabu ni angka dongan na hona mara. Tingki hubege na dihaporluhon do angka relawan pembangunan di Afrika Selatan, huisi ma formulir jala dohot ma ahu tusi. Marpindapinda do ahu saleleng di Afrika. Ala sajabu dohot angka dongan, rap karejo, jala rap marsiajar Bibel gabe solhot ma hami. Las do roha rap marbarita dohot angka dongan ganup minggu. Ndang hurimpu songon on las ni rohangku ala citacita na hupillit tingki dakdanak.”

13. Boasa las roha ni angka na poso na mangurupi di Betel?

¹³ Saonari, pigapiga perintis nunga mangurupi di Betel jala parohon las ni roha do ulaon on. Alana, pasangaphon Jahowa do sude ulaon disi. Di Betel, dipatupa do Bibel dohot angka buku na mangurupi halak mananda hasintongan. Si Dustin na mangurupi di Betel mandok, ”Tingki marumur sia taon, marcitacita do ahu asa mangalehon sude tingkingku tu Jahowa. Merintis ma ahu dung tammat singkola. Dung sada satonga taon, ditogihon ma ahu tu Betel.  Disi, huparsiajari ma cara mamangke masin cetak dohot komputer. Las do rohangku mangurupi dison, ala boi mambege hamajuon ulaon marbarita di liat portibi on. Jala sude na diulahon dison mangurupi halak maraleale tu Jahowa.”

14. Aha do na boi diulahon hamu asa rade mangalehon sude tingkimuna tu Jahowa?

¹⁴ Songon dia do hamu asa boi paradehon diri? Asa boi mangalehon na dumenggan tu Jahowa, ingkon tapatudu do parange na denggan. Taratur ma marsiajar jala mangarimangi Bibel, jala patudu ma haporseaonmu di parpunguan. Saleleng marsingkola, marlatik ma hamu asa lam malo marbarita. Parrohahon ma na asing, jala marbisuk ma manungkun jala manangihon alus ni nasida. Rade ma mangurupi di huria, songon paiashon jala paturehon Bale Harajaon. Las do roha ni Jahowa tu halak na serep marroha jala rade mangurupi. (Jaha Psalmen 110:3; Ul. 6:1-3) Ditogihon si Paulus do si Timoteus gabe misionaris, ala ”denggan do baritana dihatindangkon angka dongan”.—Ul. 16:1-5.

15. Aha do na boi ulahononmu asa boi karejo huhut merintis?

¹⁵ Pigapiga perintis mangkaporluhon parkarejoan. (Ul. 18:2, 3) Ra, boi do hamu kursus asa boi mangalului karejo huhut merintis. Taringoti ma i tu pengawas wilayah dohot tu perintis na asing, jala pangido ma poda sian nasida. Songon na didok di Bibel, ’Tu Jahowa ma pasahat angka pambahenanmu, asa saut angka sangkap ni roham.’—Poda 16:3; 20:18.

16. Songon dia do merintis boi mangurupi hamu mangulahon tanggung jawab na asing?

¹⁶ Pos ma roham, lomo do roha ni Jahowa asa marlas ni roha hamu. (Jaha 1 Timoteus 6:18, 19.) Mangalehon sude tingkinta tu Jahowa mangurupi hita gabe halak na matoras di partondion. Jala godang do na mandok, molo merintis di tingki haposoon, boi ma marhasil di parsaripeon ni nasida. Jotjot do halak na merintis andorang so marhasohotan gabe rap merintis dohot dongan saripena.—Rom 16:3, 4.

17, 18. Songon dia do cara mamillit na laho taulahon di ngolunta?

¹⁷ Psalmen 20:5 mandok, ”Sai dilehon [Jahowa] ma tu ho [na pinangido ni] roham, jala dipasaut nasa sangkapmi.” Huhut dirimangi hamu na laho sipillitonmu, pingkiri ma aha do lomo ni roham. Rimangi ma, aha do na diulahon Jahowa saonari jala aha do na boi ulahononmu asa boi dohot disi. Dung i, pillit ma na palashon rohaNa.

¹⁸ Molo dilehon hamu ngolumu laho marhobas di Jahowa, dapotmu ma las ni roha, jala gabe ’dihalomohon Jahowa, jadi lehononna ma tu hamu na pinangido ni roham’.—Ps. 37:4.