1-3. (a) Tingki sadihari do Psalmen 147 disurat? (b) Aha do na boi taparsiajari sian buku Psalmen 147?

JOTJOT do tapuji sasahalak ala denggan hata manang ulaonna. Tarlumobi ma tu Debata Jahowa, taronjar do rohanta laho mamuji Ibana! Tingki taida tompaanNa, tarida ma Ibana pargogo na so hatudosan. Dilehon do anakNa laho manobus hita, na patuduhon holongNa na mansai balga.

² Tingki tajaha Psalmen 147, taboto ma na lomo do roha ni panurat psalmen mamuji Jahowa. Jala dijujui do na asing asa mamuji Debata raphon ibana.—Jaha Psalmen 147:1, 7, 12.

³ Ndang taboto ise do na manurat Psalmen 147. Alai di tingki hamumulak ni bangso Israel tu Jerusalem do ra ibana mangolu, dungkon dipalua Jahowa nasida sian Babel. (Ps. 147:2) Jala dipuji panurat psalmen do Jahowa ala diloas muse nasida manomba Ibana di hutanasida. Aha do muse na mambahen panurat psalmen mamuji Jahowa?  Godang do alana. Aha ma i? Boasa hita boi dohot mandok ”Halleluya!” manang puji ma Jahowa?—Ps. 147:1.

4. Tingki dipalua Raja Sirus halak Israel, songon dia do pangkilalaan ni nasida? Jala boasa?

⁴ Boi do dapot rohamuna songon dia pangkilalaan ni halak Israel tingki tartaban di Babel? Direhei angka halak do nasida, jala didok ma, ”Endehon hamu ma di hami sada ende sian Sion.” Alai ndang lomo be roha ni halak Jahudi marende, ai nunga dilengsehon Jerusalem, huta hasurungan ni nasida. (Ps. 137:1-3, 6) Gabe marmetmet ni roha do nasida jala porlu diapuli. Songon na disurirangkon, urupan ni Jahowa do bangsoNa marhite Raja Sirus sian Persia na manaluhon Babel. Didok si Sirus do, ”Ibana [Debata] marsuru ahu pajongjong di Ibana sada joro di Jerusalem. . . . Manang ise nuaeng sian hamu, sian bangsona, sai didongani Jahowa, Debatana, ma ibana asa nangkok!” (2 Kron. 36:23) Tontu tarapul do halak Israel na di Babel alani hata on!

5. Hombar tu na nidok ni panurat psalmen, songon dia do Jahowa maradophon halak na marsak?

⁵ Diapuli Jahowa do bangso Israel. Diparrohahon do nasida ganup marsadasada. Suang songon i ma tu hita saonari. Panurat psalmen mandok, molo Debata ”pasabam angka parroha bojok, jala dililiti angka bugangnasida [manang, lukanasida] i”. (Ps. 147:3) Tingki marsahit manang marsak, pos ma rohanta na sarihonon ni Jahowa do hita. Sihol do rohaNa laho mangapuli jala pamalumhon hansit ni rohanta. (Ps. 34:19; Jes. 57:15) Dilehon do tu hita bisuk dohot gogo asa boi manaon hasusaan.—Jak. 1:5.

6. Parsiajaran aha do na tadapot sian Psalmen 147:4? (Ida gombar di mula ni parsiajaran.)

⁶ Dung i, diida panurat psalmen ma langit, jala didok ma boi do Jahowa ”umbilang torop ni angka bintang” jala ”dijou do goarnasida sudena”. (Ps. 147:4) Boi do diida panurat psalmen angka bintang, alai ndang taretong ibana angka bintang i. Angka ilmuwan paboahon, marmilliar do bintang di sada galaksi. Jala, martriliun do godang ni galaksi! Ndang habilangan ni jolma angka bintang, alai Jahowa Sipanompa boi do. Diboto Ibana do saluhut taringot angka bintang jala dibahen do goarna. (1 Kor. 15:41) Ala diboto Jahowa do taringot angka bintang, tontu hamu pe ditanda Ibana do. Sai na diboto Ibana do manang didia pe hamu, pangkilalaanmu, dohot na porlu di hamu!

7, 8. (a) Aha do na patuduhon na diantusi Jahowa pangkilalaanta? (b) Paboa ma sada pengalaman na patuduhon asi ni roha ni Jahowa?

⁷ Diboto Jahowa do aha na laho masa, jala boi do urupanNa hamu tingki marsitaonon. (Jaha Psalmen 147:5.) Ra didok rohamu borat do sitaonon na  diadopi hamu jala ndang tolap hamu manaon i. Diboto Debata do sadia godang na boi tataon ai ”diingot do orbuk hita”. (Ps. 103:14) Ala jolma na mardosa dope hita, olo do jotjot mulahulak taulahon sada hasalaan, gabe marmetmet ni roha ma hita alani i. Olo do manolsoli hita alani pangkataion, giotgiot na sala, manang roha na mangiburu. Ndang hea dihilala Jahowa sisongon i. Alai, boi do diantusi Ibana pangkilalaanta.—Jes. 40:28.

⁸ Hea do dihilala hamu pangurupion ni Jahowa tingki ro pangunjunan? (Jes. 41:10, 13) Hea do masa sisongon i tu perintis na margoar si Kyoko. Dung ditugashon tu daerah na baru, marmetmet ni roha ma ibana. Alai songon dia do si Kyoko mamboto na diantusi Jahowa hasusaanna? Di huria na baru, godang do angka dongan na mamboto songon dia pangkilalaanna. Hira na didok Jahowa ma tu Ibana, ”Holong do rohangku tu ho, ndang ala perintis ho, alai ala borungku do ho jala dilehon ho do ngolum tu ahu. Lomo do rohangku asa marlas ni roha ho gabe SitindangiKu!” Songon dia do Jahowa patuduhon tu hamu na so ”habilangan parbinotoanNa i”?

9, 10. Pangurupion aha ma na rumingkot na dilehon Jahowa? Paboa ma sada pengalaman.

⁹ Tahaporluhon do sipanganon, abit dohot jabu. Alani i, olo do hita holsoan taringot aha na naeng tapangan. Alai, dibahen Jahowa do tano on asa boi paradehon sipanganon tu sude na mangolu. Gari ”angka anak ni pidong sigak” dilehon do mangan, tarlumobi ma hita. (Jaha Psalmen 147:8, 9.) Pos ma rohanta na lehonon ni Jahowa do sude na tahaporluhon.—Ps. 37:25.

¹⁰ Na rumingkot, dilehon Jahowa do angka na porlu di partondionta. Jala dilehon do tu hita ”dame ni Debata na sumurung sian saluhut roha”. (Plp. 4:6, 7) Dihilala donganta si Mutsuo dohot tungganeboruna do pangurupion ni Jahowa, tingki ro tsunami di Jepang taon 2011. Asa unang mate, manjangkit ma nasida tu tarup ni jabu. Maup ma sude angka arta ni nasida. Marborngin di lante dua ma nasida, jala ngali do disi. Manogot na i, dilului nasida ma angka na boi patoguhon nasida. Holan Buku Kegiatan Saksi-Saksi Yehuwa 2006 ma dapot nasida. Tingki dibungka nasida buku i, diida ma halaman na marjudul ”Tsunami Terdahsyat yang Pernah Dicatat”. Dijaha nasida ma taringot gempa di Sumatra taon 2004, i ma gempa na umbalga na hea masa. Tangis ma si Mutsuo dohot tungganeboruna tingki manjaha pengalaman ni angka dongan na disurat disi. Dihilala nasida ma na dilehon Jahowa do angka na porlu laho patoguhon nasida. Asing ni i, disarihon Jahowa do nasida marhite angka dongan sian luat na asing di Jepang. Dilehon do sipanganon dohot pangkean. Alai na mambahen lam togu nasida, i ma tingki ro dongan na sian Organisasi ni Jahowa tu hurianasida. Si Mutsuo mandok, ”Boi do huhilala na jonok Jahowa tu hami, jala disarihon do hami. Tarapul do roha alani i!” Na parjolo, dilehon Jahowa do na porlu tu partondionta, dung pe i lehononNa ma na asing.

11. Aha do na porlu taulahon asa diurupi Jahowa?

¹¹ ”Dilehon Jahowa do haluaon tu na lambok roha”. Dihaholongi Jahowa do hita jala sai rade do Ibana mangurupi hita. (Ps. 147:6a, Terjemahan Dunia Baru) Songon dia do asa marlaba pangurupionNa tu hita? Ingkon togu do paralealeonta tu Ibana. Alani i, ingkon unduk do rohanta. (Sep. 2:3) Halak na unduk roha mangasahon Jahowa na laho manalpuhon sude hajahaton dohot sitaonon. Lomo do roha ni Jahowa tu halak sisongon i.

12, 13. (a) Asa marlaba pangurupion ni Jahowa, aha do na ingkon tapasiding? (b) Ise do na dihalomohon Jahowa?

¹² ’Dipatungki tu tano do ianggo angka parjahat i’ bahenon ni Debata. (Ps. 147:6b) Ndang lomo rohanta masa i tu  hita! Lomo do rohanta asa tongtong dipatudu Jahowa holongNa tu hita. Alani i, tahagigihon ma na dihagigihon Ibana. (Ps. 97:10) Ingkon tahagigihon do ulaon na rorang. Lapatanna, ingkon tapasiding do angka na boi mangelaela hita laho mangulahon i, songon pornografi. (Ps. 119:37; Mat. 5:28) Ra maol do mangulahon i, alai molo marsitutu hita, pasupasuon ni Jahowa ma hita.

¹³ Ndang tolap hita molo holan mangasahon dirinta sandiri. Ingkon Jahowa do na tapangasahon. Molo tapangasahon dirinta manang halak na asing, las do roha ni Jahowa? Ndang, ”ndang lomo roha [ni Jahowa] mida hagogoon ni hoda” jala ”ndang lomo rohana mida haehae ni baoa”. (Ps. 147:10) Alani i, tu Jahowa ma tapangido pangurupion. Martangiang ma hita asa boi malua sian hagaleonta. Ndang marnaloja Jahowa manangihon tangiang sisongon i. ”Dihalomohon roha ni Jahowa do tahe angka na mangkabiari Ibana, angka na mangkalungunhon asi ni rohana.” (Ps. 147:11) Alani asi ni rohaNa dohot holongNa, sai na urupanNa do hita laho mangalo giotgiot na sala.

14. Pos ni roha songon dia do na adong di panurat psalmen?

¹⁴ Dipapos Jahowa do rohanta. Sai na urupanNa do hita tingki marsitaonon. Tingki halak Israel mulak tu Jerusalem, dirimangi panurat psalmen do songon dia Jahowa mangurupi nasida. Didok ma di endena, ’Ai Ibana patogu angka ransang ni harbanganmu, Ibana mamasumasu angka anakmu di parsitongaanmi. Ibana mambahen dame parbalohanmu.’ (Ps. 147:13, 14) Hata na mandok dipatogu Jahowa harbangan ni huta i, mambahen dame pangkilalaan ni panurat psalmen. Gabe pos ma rohana sai na linggoman ni Jahowa do angka naposoNa.

15-17. (a) Songon dia do pangkilalaanta tingki marsitaonon, jala songon dia do hata ni Jahowa mangurupi hita? (b) Paboa ma sada pengalaman na patuduhon hata ni Jahowa ”doras marlojong” laho mangurupi hita.

¹⁵ Olo do ra hamu holsoan alani  sitaonon, alai boi do lehonon ni Jahowa bisuk tu hamu laho mangadopi i. Didok panurat psalmen do Debata ”manongos bagabagana tu tano on, mansai doras marlojong hatana i”. Dungkon i, ditaringoti ibana ma angka nambur, salju dohot ambolas (udan es). Jala didok ma, ”Ise ma manahan jongjong maradophon ngalina?” Didok ibana ma muse, Jahowa ”manongos hatana, gabe malala angka i”. (Ps. 147:15-18) Diboto Debata do saluhutna, sude do boi ulahononNa, Ibana do na mangatur haroro ni ambolas, jala boi do urupanNa hita mangadopi sitaonon.

¹⁶ Saonari, ditogutogu Jahowa do hita marhite Bibel. Panurat psalmen paboahon ’doras marlojong hataNa’ laho mangurupi hita. Dipatogu Jahowa do hita di dalan dohot di tingki na pas. Rimangi ma laba na tadapot sian Bibel, sian sijahaon na diparade ”naposo haposan jala na marroha”, JW Broadcasting, jw.org, angka sintua, dohot angka dongan sahaporseaon. (Mat. 24:45) Hea do dihilala hamu pangurupion ni Jahowa di ngolumuna?

¹⁷ Dihilala donganta si Simone do pangurupion na sian Bibel. Hea do ibana marmetmet ni roha, jala didok rohana ndang lomo roha ni Jahowa tu ibana. Alai di tingki sisongon i, martangiang ma ibana mangido pangurupion ni Jahowa. Jala tongtong do marsiajar Bibel ibana. Ibana mandok, ”Sai diurupi jala dipatogu Jahowa do ahu.” On ma na mangurupi ibana gabe ndang be marmetmet ni roha.

18. Boasa tadok jonok do Jahowa tu hita, jala aha do na mangonjar rohanta mandok ”Puji ma Jahowa”?

¹⁸ Diboto panurat psalmen do naung dipillit Jahowa bangso Israel na parjolo gabe bangso na tarpillit sian angka bangso na asing. Holan tu bangso Israel do dilehon Debata ”hatana” dohot ”patikna”. (Jaha Psalmen 147:19, 20.) Saonari, mandapot hasangapon do hita ala boi dohot pabadiahon goarNa. Mandok mauliate do hita ala tatanda Ibana. HataNa boi manogunogu hita jala mangurupi hita asa maraleale tu Ibana. Songon na disurat di Psalmen 147, godang do na mangonjar rohanta laho mamuji Jahowa jala manjujui na asing mandok, ”Puji ma Jahowa”!