1, 2. Saonari on, boasa tongtong adong halak na pogos?

NDANG TIGOR jala jahat do sistem ekonomi saonari on. Umpamana, maol do angka na poso mandapot karejo. Godang do halak pinda tu negara na maju. Alai nang pe maju negara i, godang do angka na pogos disi. Di liat portibi on, lam mamora do halak na mamora jala lam pogos do halak na pogos. Pigapiga hatorangan paboahon, dos do hamoraon ni 1 porsen halak na mamora, dohot hamoraon na dipapungu sian 99 porsen halak na asing. Tangkas ma, mansai godang do hepeng ni pigapiga halak, alai marmilliar halak mansai pogos do. Diboto Jesus do on tingki didok, ”Tongtong do adong na pogos di tongatongamuna.” (Mrk. 14:7) Boasa boi songon i?

² Diboto Jesus do holan Harajaon ni Debata do na boi paubahon sistem ekonomi di portibi on. Didok di Bibel Sibolis do na mangarajai ”partigatiga” manang sistem ekonomi, sistem politik, dohot agama na adong di portibi on. (Pgk. 18:3) Boi do naposo ni Debata papulikkon diri sian politik dohot agama na so sintong. Alai, godang do naposo ni Debata na so boi papulikkon diri sian sistem ekonomi na dirajai Sibolis.

3. Sungkunsungkun aha do na laho taulas?

 ³ Porlu do tapareso pamingkirionta maradophon sistem ekonomi. Laho mangulahon i, tasungkun ma dirinta: ’Songon dia do ahu mamangke arta na patuduhon na marsihohot ahu tu Debata? Songon dia do asa unang pagodangku tingkingku mangalului hamoraon di portibi on? Pengalaman aha do na patuduhon molo naposo ni Debata tongtong mangasahon Ibana?’

4, 5. (a) Aha do na masa tu siramoti arta di tudosan ni Jesus i? (b) Aha do na didok Jesus asa diulahon siseanna?

⁴ Jaha Lukas 16:1-9. Manat ma tarimangi tudosan ni Jesus taringot siramoti arta na geduk manang na so tigor. Ala ditudu ibana pasudahon arta, naeng dipaso tuanna ma ibana sian karejona i. * Alai marbisuk do siramoti arta i. Andorang so manadingkon karejona, mardongan do ibana tu angka halak na boi mangurupi ibana. Dipaboa Jesus pe tudosan on, ndang na laho manjujui siseanna mangulahon na so sintong, songon na diulahon godangan halak saonari. Alai, ala adong do parsiajaran na mansai ringkot sian tudosan on.

⁵ Diboto Jesus, godang do siseanna mangadopi hasusaan dos songon na masa tu siramoti arta i. Alani i, didok Jesus ma tu siseanna, ”Lului hamu ma di hamu aleale marhitehite Mammon [manang, hamoraon] na geduk i.” Boasa songon i? Asa dung suda hamoraon i, rade ma aleale i, i ma Jahowa dohot Jesus ’manjangkon hita tu bagasan angka parmianan [salelengna] sogot’. Aha do na taparsiajari sian on?

6. Sian dia do taboto molo sistem partigatigaan sisaonari on ndang sangkap ni Debata?

⁶ Nang pe ndang dipatorang Jesus boasa didok ibana hamoraon i ”na geduk”, tangkas do dipaboa di Bibel ndang sangkap ni Debata sistem partigatigaan sisaonari on. Umpamana, tingki di porlak Eden ndang martuhor jala buas do Jahowa mangalehon lobi sian na dihaporluhon si Adam dohot si Hawa. (1 Mus. 2:15, 16) Dung i, tingki dilehon Debata tondi parbadia tu angka na miniahan, ”rap nampunasa do nasida di sude angka arta na adong”. (Ul. 4:32, Bibel siganup ari) Didok panurirang Jesaya, ro nama tingkina sude jolma mangkilala las ni roha ala dapotan na denggan sian tano on. (Jes. 25:6-9; 65:21, 22) Alai andorang so ro dope ari i, ingkon marbisuk do sisean ni Jesus. Ingkon mansari do nasida, alai huhut palashon roha ni Debata.

7. Aha do poda na dilehon Jesus di Lukas 16:10-13?

⁷ Jaha Lukas 16:10-13. Di tudosan ni Jesus, dilului siramoti arta i do aleale asa boi parohon laba tu dirina. Alai, ndang lomo roha ni Jesus molo maraleale hita tu Jahowa dohot tu ibana,  holan alani na mangkaringkothon diri. Lomo do rohana asa taantusi, caranta mamangke hamoraon na geduk boi patuduhon na marsihohot do hita tu Debata manang na ndang. Songon dia carana?

8, 9. Paboa ma angka pengalaman ni angka dongan na marsihohot mamangke ”hamoraon na geduk”.

⁸ Sada cara laho patuduhon na marsihohot hita mamangke hamoraon, i ma molo talehon sumbangan tu ulaon marbarita di liat portibi on songon na disurirangkon Jesus. (Mat. 24:14) Sahalak dakdanak di India ringgas pamasukkon hepeng logam tu celenganna. Ndang dituhor ibana be meammeamna. Dung gok celenganna i, disumbangkon ma hepeng i tu ulaon marbarita. Adong do muse donganta baoa di India nampunasa kobun kalapa. Dilehon ibana do godang kalapa tu kantor penerjemahan bahasa Malayalam. Ala dihaporluhon angka dongan disi do kalapa i, didok rohana dumenggan do mangalehon kalapa sian hepeng. On ma na didok marbisuk. Angka donganta na di Junani pe mangalehon miak jetun, keju, dohot sipanganon na asing tu keluarga Betel.

⁹ Dilehon donganta na asing do tano dohot bangunanna di Sri Lanka gabe inganan parpunguan dohot kebaktian, jala gabe inganan ni angka dongan na dohot tu dinas sepenuh waktu. Sasintongna, rugi do ibana di parhepengon. Alai, gabe pangurupion na balga do on di angka parbarita na disi, tarlumobi angka dongan na pogos. Di inganan na mangorai ulaonta marbarita, dilehon angka donganta do jabuna gabe Bale Harajaon. On mambahen angka perintis dohot dongan na so marhepeng boi mandapot inganan parpunguan na so margarar.

10. Aha do laba na tadapot molo marbasa ni roha?

¹⁰ Angka pengalaman on patuduhon na ”haposan” do naposo ni Debata ”di na ummotik”. (Luk. 16:10) Dipangke nasida do hamoraon i asa parohon laba tu na asing. Songon dia do pangkilalaan ni nasida tingki mangulahon i? Tontu, las situtu roha nasida ala diboto molo marbasa ni roha, dapot nasida ma hamoraon na ”tutu” di surgo. (Luk. 16:11) Sahalak donganta borua na ringgas mangalehon sumbangan tu ulaon Harajaon paboahon, gabe adong do na muba sian parangena. Ibana mandok, ”Lam marbasa ni roha ahu, lam burju ma ahu maradophon halak na asing. Gabe lam sabar, rade manalpuhon hasalaan, rade manjalo poda, jala ndang mura muruk.” Godang do na mangkilala, molo marbasa ni roha  boi parohon laba tu dirina sandiri.—Ps. 112:5; Poda 22:9.

11. (a) Boasa marbasa ni roha patuduhon na marbisuk do hita? (b) Aha do laba ni sumbanganta i? (Ida gombar di mula ni parsiajaran.)

¹¹ Hita pe boi do marbisuk molo tapangke artanta laho mangurupi na asing di ulaon marbarita. Nang pe hita ndang dohot tu dinas sepenuh waktu manang pinda tu inganan na mangkaporluhon pangurupion, alai boi do hita mangurupi na asing. (Poda 19:17) Umpamana, marlaba do sumbangan na talehon laho mambahen buku jala mangurupi ulaon marbarita di inganan na mansai pogos, na godang halak naeng mananda hasintongan. Songon di negara Kongo, Madagaskar, dohot Rwanda, arga situtu do Bibel. Sipata, dos do arga ni sada Bibel tu gaji saminggu manang sabulan. Saleleng martaontaon, ingkon dipillit angka donganta do laho manuhor sipanganon tu keluargana manang manuhor Bibel. Alai saonari, ala nunga adong sumbangan jala denggan do dipangke, boi ma organisasi ni Jahowa manerjemahon jala manongos Bibel na so pola margarar tu ganup keluarga dohot angka parsiajar Bibel. (Jaha 2 Korint 8:13-15.) Gabe boi ma halak na mangalehon dohot na manjalo maraleale tu Jahowa.

12. Songon dia do si Abraham patuduhon haporseaonna tu Debata?

¹² Boi do hita gabe aleale ni Jahowa molo ndang pagodanghu tingkinta mangalului arta di portibi on jala talului hamoraon na ”tutu”. On ma na diulahon si Abraham. Dioloi ibana do Jahowa jala ditadingkon do huta Ur na gok arta. Rade do ibana tading di kemah ala lomo rohana maraleale tu Jahowa. (Heb. 11:8-10) Sai Debata do na dipangasahon ibana, ndang arta. (1 Mus. 14:22, 23) Dijujui Jesus do hita asa maniru haporseaon sisongon i. Sada tingki, didok Jesus ma tu sahalak baoa na mamora, ”Molo naeng sun denggan ho, laho ma ho manggadis artami, parlehon tu angka na pogos, asa mararta ho di banua ginjang; dung i ro ma ho mangihuthon Ahu!” (Mat. 19:21) Ndang songon haporseaon ni si Abraham haporseaon ni baoa i. Alai, adong do halak na asing na marhaporseaon tu Debata.

13. (a) Aha do poda ni si Paulus tu si Timoteus? (b) Saonari, songon dia do hita mangulahon poda ni si Paulus?

¹³ Sahalak na marhaporseaon do si Timoteus. Didok si Paulus do ibana ”parangan na denggan di Kristus Jesus”. Laos didok ma, ”Ndang olo alit parporang tu angka ulaon pandaraman [manang, partigatigaan], asa halomoan ibana di na marsuru ibana.” (2 Tim. 2:3, 4) Angka sisean ni Jesus dohot angka dongan na mangalehon sude tingkina tu Jahowa, marsitutu  do mangulahon poda i. Ndang tarelaela nasida alani iklan di portibi na ahut on. Diingot nasida do prinsip on, ”Ingkon mangadop [do] parutang tu baoa parutangan.” (Poda 22:7) Lomo do roha ni Sibolis asa suda tingkinta mangalului arta. Adong do na marutang asa boi marjabu, manuhor mobil, marsingkola, manang marhasohotan. Molo ndang manat, boi do gabe tarutang hita saleleng martaontaon. Na marbisuk do hita molo ndang pagodanghu barang na tatuhor, ndang marutang jala ndang pasudahon godang hepeng. Molo taulahon on, gumodang ma tingkinta marhobas tu Debata jala ndang gabe hatoban ni sistem partigatigaan ni portibi on be hita.—1 Tim. 6:10.

14. Aha do na ingkon taulahon? Paboa ma pengalaman.

¹⁴ Ingkon tajumolohon do Harajaon ni Debata asa unang tarelaela tu sistem partigatigaan ni portibi on. Ala, lomo roha ni donganta dohot tungganeboruna mangalehon sude tingkina tu Jahowa, digadis ma bisnisna na balga, kapalna, dohot angka artana. Dung i, gabe relawan ma nasida di ulaon pajongjongkon kantor pusat di Warwick, New York. Las situtu do roha ni nasida ala boi karejo di Betel raphon boru dohot helana. Asing ni i, boi ma nasida rap karejo dohot natuatua ni nasida saleleng pigapiga minggu di Warwick. Donganta borua na merintis di Kolorado, AS, karejo saleleng pigapiga ari di bank. Ala las situtu roha ni bosna mangida karejona, dijujui ma ibana asa ganup ari karejo disi jala dilehon ma gajina tolu hali lompit. Molo dijalo ibana karejo i, otik ma tingkina marbarita. Alani i, ndang dijalo ibana karejo i. On ma pigapiga pengalaman na patuduhon pangurupion ni donganta di ulaon marbarita. Molo tajumolohon Harajaon ni Debata, on patuduhon na ummarga do di hita paralealeon tu Jahowa dohot tu hamoraon na sasintongna sian arta di portibi on.

15. Hamoraon aha do na parohon las ni roha situtu?

¹⁵ Ndang arta na godang na mambahen lomo roha ni Jahowa mangida hita. Halak na ”mamora di angka ulaon na denggan” do na dipasupasu Jahowa. (Jaha 1 Timoteus 6:17-19.) Umpamana, sahalak donganta na margoar si Lucia mamboto, dihaporluhon do pangurupion di Albania. * Alani i taon 1993, pinda ma ibana sian Italia tu Albania. Ndang adong karejona disi, alai pos do rohana paradeon ni Jahowa do na porlu di ibana. Diparsiajari ibana ma bahasa Albania, jala diurupi ibana ma lobi sian 60 halak mangalehon diri tu Jahowa. Ra, ndang sai songon i na tadapot tingki marbarita. Alai, manang aha pe na taulahon laho mangurupi halak maraleale tu Jahowa, i do na gabe arta salelengna di hita.—Mat. 6:20.

16. (a) Aha do na laho masa tu sistem ekonomi sisaonari on? (b) Songon dia do hita mamangke artanta?

¹⁶ Tangkas do dipaboa Jesus na laho  salpu sistem ekonomi saonari on. Jesus mandok, ”ia dung suda” hamoraon i, ndang didok molo ”dung suda i”. (Luk. 16:9) Di tingki parpudi on, godang do angka bank na tumpur jala krisis moneter di pigapiga negara. Lam tu porsukna do situasi tu joloan ni ari on. Salpu nama sistem politik, agama, dohot ekonomi di pamarentaon ni Sibolis. Si Hesekiel dohot si Sepania manurat, ndang mararga be angka mas dohot perak di tingki i. (Hes. 7:19; Sep. 1:18) Rimangi ma, tingki laho mate hita taboto ma nunga mago hape hamoraonta na sasintongna i ala mangalului hamoraon na geduk di portibi on. Songon dia do pangkilalaanmu molo masa songon i? Ra sarupa do pangkilalaanta songon baoa na marsitutu karejo asa godang hepengna, alai di pudian ni ari diboto ma ndang mararga be hepengna i. (Poda 18:11) Na laho suda do hamoraon di portibi on. Alani i, tapangke ma artanta laho maraleale tu na di surgo. Alana, na taulahon tu Jahowa dohot tu HarajaonNa do na parohon las ni roha na sasintongna.

17, 18. Aha do na tahirim asa digohi?

¹⁷ Dung ro Harajaon ni Debata, ndang adong be na marutang manang manewa. Godang ma sipanganon, ndang porlu be kaluar hepengta laho tu dokter manang laho manuhor ubat. Las ma roha ni naposo ni Jahowa mandapot angka na denggan sian tano on. Dipangke nasida ma mas, perak dohot permata asa bagak idaon, ndang asa mamora. Godang ma hau, batu, dohot bosi na denggan laho paulihon jabu na bagak. Rade do angka donganta mangurupi hita nang pe ndang digaji. Marsipaleanan angka na denggan ma naposo ni Jahowa.

¹⁸ On ma pigapiga pasupasu na laho tahilala di ari na naeng ro. Marlas ni roha situtu ma naposo ni Jahowa tingki dibege nasida hata ni Jesus na mandok, ”Ro ma hamu, angka na pinasupasu ni Damang, tean hamu ma harajaon i, na pinature di hamu sian haoojak ni tano on!”—Mat. 25:34.