1, 2. (a) Boasa ringkot marpihak tu Jahowa? (b) Aha do na laho taulas di parsiajaran on?

LOMO do rohanta tongtong marsihohot jala marpihak tu Jahowa. Denggan do i di hita. Alana, holan Jahowa do Debata pargogo na so hatudosan, na umbisuk, jala parholong! (Ps. 96:4-6) Alai, adong do naposo ni Jahowa na gabe ndang marpihak be tu Ibana.

² Di parsiajaran on, taulas ma taringot angka halak na manomba Jahowa alai tong diulahon na dihasogohon Debata. Sian pengalaman ni nasida, boi ma taparsiajari carana asa tongtong marsihohot tu Jahowa.

3. Boasa si Kain dipasingot Jahowa, jala aha do na didok tu ibana?

³ Taingot ma si Kain. Manomba Jahowa do ibana, alai ndang dijalo Jahowa peleanna. Boasa songon i? Alana, diboto Jahowa do adong sangkap na roa di roha ni si Kain. (1 Joh. 3:12) I do umbahen dipasingot Jahowa ibana, “Molo diula ho na denggan, minar ma bohim; alai ala diula  ho na jahat, mangonggop ma dosa i di pintu ni roham. Naeng rajaanna ma ho, alai taluhon ma i.” (1 Mus. 4:6, 7, Bibel siganup ari) Jadi tangkas do dipaboa Jahowa, molo marhamubaon si Kain jala marpihak tu Ibana, sai dongananNa do si Kain.

4. Aha do na diulahon si Kain nang pe nunga dipasingot?

⁴ Aut sugari marhamubaon si Kain, tontu dijalo Jahowa do peleanna. Alai, ndang olo ibana manangihon Debata. Gabe mardosa ma ibana ala holan mamingkirhon dirina sandiri. (Jak. 1:14, 15) Ra tingki dakdanak, ndang hea tarpingkir si Kain naeng mangalo Debata. Hape ujungna, mangalo Debata do ibana, ndang ditangihon sipasingot sian Jahowa, jala gabe dibunu ibana do anggina!

5. Angka sangkap na songon dia do na boi mambahen hita gabe ndang marpihak tu Jahowa?

⁵ Songon si Kain, adong do ra naung manomba Jahowa alai tong mangulahon na dihasogohon Jahowa. (Jud. 11) Ra, ringgas do ibana marbarita dohot marpungu. Alai tong do dipingkiri ibana taringot seks na so patut, naeng gabe ampunana sude, manang marsogo ni roha tu na asing. (1 Joh. 2:15-17; 3:15) Angka sangkap sisongon i ma na boi mambahen sasahalak mardosa. Ra, ndang adong na mamboto na di roha dohot di pingkiranta. Alai, molo Jahowa, diboto Ibana do i. Jala, diboto do molo ndang marpihak be hita tu Ibana.​—Jaha Jeremia 17:9, 10.

6. Songon dia do Jahowa mangurupi hita mambolongkon angka sangkap na roa?

⁶ Molo taulahon na sala, ndang pintor tadingkonon ni Jahowa hita. Molo mangulahon na sala pe hita, didok Jahowa do, “Mulak ma hamu tu ahu, asa mulak ahu tu hamu.” (Mal. 3:7) Jadi, diboto Jahowa do adong hahuranganta. Alai lomo do rohaNa asa marsihohot hita tu Ibana jala pasidingkon sangkap na roa. (Jes. 55:7) Molo taulahon i, marjanji do Jahowa laho mangurupi hita. Jala dilehon do gogo tu hita asa boi mambolongkon angka sangkap na roa.​—1 Mus. 4:7.

7. Aha do na mambahen sega parale-aleon ni si Salomo tu Jahowa?

⁷ Taingot ma Raja Salomo. Tingki poso dope ibana, solhot do parale-aleonna tu Jahowa. Dibahen Jahowa do ibana gabe marbisuk, jala disuru do ibana paulihon bagas joro di Jerusalem. Alai dung leleng, sega do parale-aleonna tu Jahowa. (1 Raj. 3:12; 11:1, 2) Boasa? Di patik ni Debata, dipodai do angka raja asa “unang godang niolina, ai angka i do na mangela rohana sian Jahowa”. (5 Mus. 17:17, Bibel siganup ari) Hape, adong do 700 istrina jala 300 gundikna! (1 Raj. 11:3) Jadi, ndang diihuthon si Salomo patik i. Ala sian bangso na asing do godangan istrina i, gabe dohot do si Salomo manomba gana-ganaan. Jadi, mangalo patik ni Debata do si Salomo ala mangoli tu angka borua sian bangso na asing.​—5 Mus. 7:3, 4.

8. Aha do na diulahon si Salomo na mambahen hansit roha ni Jahowa?

 ⁸ Lam leleng ndang diihuthon si Salomo be patik ni Jahowa. Gabe diulahon ibana do na sala. Dipajongjong ibana do inganan pamelean tu gana-ganaan, i ma Astarte dohot Kamos. Jala, rap dohot angka istrina do ibana manomba angka gana-ganaan i. Asing ni i, dipajongjong ibana do inganan pamelean i di dolok na di jolo ni Jerusalem. Hape, nunga dibahen ibana bagas joro ni Jahowa disi! (1 Raj. 11:5-8; 2 Raj. 23:13) Ra dirimpu si Salomo, saleleng dilehon ibana pelean di bagas joro, ndang sala angka ulaonna i di adopan ni Jahowa.

9. Aha do na masa ala ndang ditangihon si Salomo sipasingot sian Debata?

⁹ Didok di Bibel, “tarrimas ma Jahowa mida raja Salomo, ala marbalik rohana sian Jahowa”. Sian on taboto, ndang lomo roha ni Jahowa mangida na mardosa. Alai sasintongna, marsitutu do Jahowa mangurupi si Salomo. Dipatuduhon Jahowa do diriNa “pola dua hali” tu si Salomo. “Nunga pola [didokkon] Ibana tu rajai taringot tu hata on, na so tupa ihuthononhon angka debata sileban; alai ndang diradoti ibana tona ni Jahowa.” Ujungna, gabe sogo ma roha ni Jahowa mangida si Salomo jala ndang diurupi Jahowa be ibana. Pamarentaon ni angka pinomparna pe ndang be mamarenta tu  saluhut bangso Israel. Jala gok do parsoalan ni nasida saleleng marratus taon.​—1 Raj. 11:9-13.

10. Aha do na boi manegai parale-aleonta tu Jahowa?

¹⁰ Molo mardongan hita tu angka halak na so mangargai uhum ni Debata, boi do i mambahen sega parale-aleonta tu Jahowa. Ra donganta di huria do nasida, alai ndang solhot nasida tu Jahowa. Manang, nasida keluarganta, tetangga, dongan sakarejo, dohot dongan sasingkola na so sisomba Jahowa. Jadi molo suda tingkinta marsaor dohot nasida, boi do i mambahen gabe ndang marale-ale be hita tu Jahowa.

11. Aha do na ingkon tapingkirhon tingki mamillit dongan?

¹¹ Jaha 1 Korint 15:33. Sasintongna, godang do halak na burju. Ra, adong do na so sisomba Jahowa ndang sai mangulahon na jahat. Ra, adong do halak sisongon i na ditanda hamu. Jadi, denggan do molo marsaor hita tu nasida? Pingkirhon ma: Songon dia do parale-aleonta tu Jahowa molo marsaor hita tu nasida? Gabe lam jonok do hita tu Jahowa? Aha do na umringkot di nasida? Aha do na jotjot dihatai nasida? Taringot pangkean do, hepeng, HP, manang hiburan? Jotjot do nasida paroa-roahon halak? Manang olo do nasida margait-gait na rorang? Jesus mandok, “nasa na adong di roha, i do hatahonon ni pamangan”. (Mat. 12:34) Jadi molo taboto gabe suda tingkinta marsaor dohot nasida, jala gabe sega parale-aleonta tu Jahowa, pintor tapaso ma!​—Poda 13:20.

12. (a) Aha do na Dipaboa Jahowa tu halak Israel dung kaluar nasida sian Misir? (b) Aha ma alus ni halak Israel?

¹² Adong na boi taparsiajari sian na masa tu halak Israel dung malua nasida sian Misir. Tingki marpungu nasida di jolo ni Dolok Sinai, dipatudu Jahowa ma huasoNa! Gabe mangkolom langit, adong sillam, dohot timus, jala dibege nasida ma ronggur songon soara ni sarune na mansai gogo. (2 Mus. 19:16-19) Jala didok Jahowa, holan Ibana do na ingkon disomba nasida. Jala marjanji do Ibana sai urupanNa do angka na mangkaholongi jala na unduk tu Ibana. (Jaha 2 Musa 20:1-6.) Jadi dipaboa Jahowa, sai dongananNa do halak Israel molo tongtong nasida marsihohot tu Ibana. Aut sugari dohot hamu disi, songon dia do pangkilalaanmu mambege hata ni Debata i? Ra, satolop do hamu dohot halak Israel na mandok, “Sude hata angka na pinaboa ni Jahowa, sai bahenonnami do.” (2 Mus. 24:3) Alai ndang leleng, adong na masa jala boi mambahen halak Israel gabe ndang marpihak be tu Jahowa. Aha ma i?

13. Situasi aha do na mambahen halak Israel gabe ndang mangasahon Jahowa?

¹³ Mabiar do halak Israel ala mangida huaso ni Jahowa. Ala mabiar nasida, gabe disuru ma si Musa tu Dolok Sinai asa mangkatai tu Jahowa. (2 Mus. 20:18-21) Ala ndang marnamulak si Musa tu parkemahan, gabe leleng do nasida paimahon ibana. Holsoan ma nasida di halongonan ala ndang adong na  manguluhon nasida. Boasa songon i? Ala holan mangasahon si Musa do nasida. Jadi didok nasida ma tu si Aron, “Ndang huboto hami manang na mahua si Musa, na manogihon hami haruar sian Misir. Ala ni i, bahen ma di hami sada debata, asa adong na manguluhon hami.”​—2 Mus. 32:1, 2, Bibel siganup ari.

14. Boasa sala pamingkirion ni halak Israel, jala songon dia Jahowa mangida i?

¹⁴ Diboto halak Israel do sala manomba gana-ganaan. (2 Mus. 20:3-5) Alai ndang sadia leleng, dibahen do anak lombu mas laho sombaon ni nasida! Nang pe nunga sala ulaon i, alai dirimpu nasida do marpihak dope Jahowa tu nasida. Jala didok si Aron do panombaon i “ari raya di Jahowa”. Songon dia ma Jahowa mangida i? Didok Jahowa ma tu si Musa, nunga marbalik roha ni nasida, jala ndang diihuthon be podaNa. Muruk situtu do Jahowa jala naeng ripashononNa do saluhut bangso i.​—2 Mus. 32:5-10.

15, 16. Songon dia si Musa dohot si Aron patuduhon na marpihak nasida tu Jahowa? (Ida gombar di mula ni parsiajaran.)

¹⁵ Ala asi do roha ni Jahowa, ndang jadi ripashononNa bangso i. Gariada, dipangido Jahowa do asa marpihak nasida tu Ibana. (2 Mus. 32:14) Jadi tingki diida si Musa halak Israel marsuraki, marende, jala manortor di jolo ni gana-ganaan i, pintor diropukhon si Musa do lombu mas i gabe orbuk. Didok ibana ma gogo, “Ro be ma tu ahu manang ise na mangalehon dirina tu Jahowa!” Dung i, “marpungu ma tu lambungna saluhut halak Lepi”.​—2 Mus. 32:17-20, 26.

¹⁶ Nang pe dohot si Aron mambahen anak lombu mas i, alai marpihak tu Jahowa do ibana dohot piga-piga halak Lepi. Sian on taboto, ndang olo nasida domu tu halak na so marpihak tu Jahowa. Haputusan na denggan do i. Alana gabe mate do marribu halak na manomba gana-ganaan i. Alai malua do nasida. Jala marjanji do Debata laho mamasu-masu nasida.​—2 Mus. 32:27-29.

17. Sipasingot aha do na disurat si Paulus tu hita taringot anak lombu mas?

¹⁷ Parsiajaran aha ma na tadapot sian i? Si Paulus mandok, “sipasingot ma i tu hita”, asa ‘unang tasomba gana-ganaan’. Didok ibana muse, “disurat do i gabe parsiajaran tu hita angka na mangolu di panutup ni jaman on. Manang ise na mandok, ‘Hot do ahu jongjong,’ manat ma ibana asa unang madabu.” (1 Kor. 10:6, 7, 11, 12) Lapatanna, nang pe sasahalak nunga manomba Jahowa, boi do gabe diulahon ibana na sala. Ra dirimpu ibana, marpihak dope Jahowa tu ibana. Jadi nang pe lomo roha ni sasahalak marale-ale jala marsihohot tu Jahowa,  ndang boi dope tadok Jahowa marpihak tu ibana.​—1 Kor. 10:1-5.

18. Aha do na mambahen hita gabe dao sian Jahowa, jala aha do ujungna?

¹⁸ Ala leleng do si Musa mulak sian Dolok Sinai, gabe marsak do halak Israel. Suang songon i ma hita. Ala songon na leleng do ro ajal ni portibi on, olo do gabe marsak hita. Gabe tarimpu ma leleng nai dope i masa, manang ndang saut be i. Jadi, holan mangulahon lomo ni rohanta ma hita, ndang taulahon be lomo ni roha ni Debata. Molo ndang manat hita, boi do gabe dao hita sian Jahowa. Jala gabe mangulahon dosa ma hita.

19. Aha do na ingkon tongtong taingot jala boasa?

¹⁹ Dipangido Jahowa do asa holan Ibana na tasomba. (2 Mus. 20:5) Boasa? Ala holong do rohaNa tu hita. Pingkirhon ma: Molo ndang taulahon na dihalomohon Jahowa, gabe na dihalomohon Sibolis do na taulahon. Jala boi do i parohon jea tu hita. Alani i didok si Paulus do, “Ndang boi hamu minum sian mangkuk ni Jahowa jala laos minum sian mangkuk ni suru-suruan na jahat. Ndang boi hamu rap mangan di “meja ni Jahowa” jala laos rap mangan di meja ni suru-suruan na jahat.”​—1 Kor. 10:21.

20. Nang pe taulahon na sala, songon dia do Jahowa patuduhon asi ni rohaNa?

²⁰ Dilehon Jahowa do tingki tu si Kain, si Salomo, dohot halak Israel asa marhamubaon. (Ul. 3:19) Tangkas ma, ndang pintor ditadingkon Jahowa naposoNa molo mangulahon na sala. Ingot ma si Aron. Disalpuhon do hasalaanna. Saonari pe, asa unang taulahon na sala, dilehon Jahowa do sipasingot tu hita. Dilehon do i marhite Bibel, angka sijahaonta, dohot angka dongan di huria. Jadi, gabe asi do rohaNa tu hita molo taihuthon sipasingotNa.

21. Aha do na ingkon taulahon tingki diela-ela?

²¹ Tingki patuduhon asi ni roha Jahowa, adong do na tinujuNa. (2 Kor. 6:1) Jadi, ala nunga marasi ni roha Ibana, ‘tapasiding ma pangalaho na so pasangaphon Debata dohot hisap-hisap ni portibi on’. (Jaha Titus 2:11-14.) Di tingkinta saonari, sai adong do na mangela-ela hita asa unang marpihak tu Jahowa. Alai marsitutu ma hita asa marpihak tu Jahowa. Jala taingot ma hata on, “Ingkon marhabiaran ho tu Jahowa, Debatam, ingkon Ibana oloanmu, jala marsitiopan roham di Ibana”!​—5 Mus. 10:20.