1. Somalna, aha do na tahalomohon?

MOLO sahalak na ditanda hamu ndang diingot goarmuna, boha do pangkilalaanmu? Tontu, lungun do rohamuna. Alana lomo do rohanta asa diargai halak. Alai ndang holan i. Lomo do rohanta asa diboto ise hita na sasintongna, dohot angka naung taulahon.​—4 Mus. 11:16; Job 31:6.

2, 3. Aha do na boi masa molo sai lomo rohanta dipasangap halak? (Ida gombar di mula ni parsiajaran.)

² Ala Sibolis do na mangarajai portibi on, dijujui do hita asa dipasangap. Jadi molo ndang manat hita, boi do gabe ginjang rohanta. Gabe ndang tapasangap be Jahowa, jala holan mangkaringkothon diri sandiri ma hita.​—Pgk. 4:11.

³ Di jaman ni Jesus, ginjang do roha ni angka pamimpin agama. I do alana didok Jesus tu siseanna, “Manat ma hamu tu angka siboto surat na mardalan-dalan  mamangke jubah, na lomo rohana dipasangap di jolo ni natorop jala na lomo rohana hundul di jolo di angka sinagoga dohot di inganan na sangap di parpestaan.” Didok ibana muse, “Jaloon ni nasida do panguhuman na umborat.” (Luk. 20:46, 47) Alai imbar do molo Jesus. Umpamana, diparrohahon jala dipuji ibana do sahalak ina na mabalu na mangalehon dua hepeng logam. Ra, ndang adong na mamparrohahon i. (Luk. 21:1-4) Gabe taboto ma, imbar do Jesus sian pamimpin agama. Jadi di parsiajaran on, taulas ma cara maniru Jahowa laho mangargai halak na asing.

4. Aha do hasangapon na dumenggan na boi tadapot, jala boasa?

⁴ Sian dia do hasangapon na dumenggan boi tadapot? Ndang alani hamoraon, timbo singkolana, manang tarbarita asa tadapot i. Taringot i didok si Paulus do, “Saonari nunga ditanda hamu Debata jala nunga ditanda Debata hamu. Alani i, boasa mulak hamu muse mangihuthon angka na so marguna na di portibi on jala olo hamu diparhatoban angka i?” (Gal. 4:9) Sada hasangapon di hita boi “ditanda Debata”, Parhuaso na Umgogo! Tangkas do ditanda Jahowa hita, dihaholongi, jala lomo do rohaNa asa marale-ale hita tu Ibana.​—Pjm. 12:13, 14.

5. Songon dia carana asa marale-ale tu Debata?

⁵ Ale-ale ni Jahowa do si Musa. Tingki didok ibana tu Jahowa, “Pabotohon ma tu ahu dalanmu.” Dialusi Jahowa ma didok, “Nang hata on na nidokmu ondeng, bahenonku do i, ala naung jumpangan asi ni roha ho maradophon Ahu, jala Ahu mananda ho pola ro di goar.” (2 Mus. 33:12-17) Ditanda Jahowa do ise dirinta. Alai songon dia do carana asa boi marale-ale tu Ibana? Ingkon tahaholongi jala talehon ma dirinta tu Ibana.​—Jaha 1 Korint 8:3.

6, 7. Aha do na mambahen gabe ndang marale-ale be hita tu Debata?

⁶ Ingkon tajaga do parale-aleonta tu Debata. Songon halak Kristen na parjolo di Galatia, hita pe unang ma “mangihuthon angka na so marguna”, songon hasangapon ni portibi on. (Gal. 4:9) Halak Kristen di Galatia nunga marale-ale tu Debata. Alai si Paulus mandok, piga-piga halak Kristen disi ‘mulak muse’ mangihuthon angka na so marguna i. Gabe hira-hira didok si Paulus ma tu nasida, ‘Boasa olo hamu mulak muse diparhatoban angka na so marguna i?’

⁷ Boi do hita gabe mangulahon sisongon i? Boi. Songon si Paulus, tingki hita parjolo sahali mananda Jahowa ndang be taharingkothon hasangapon ni portibi on. (Jaha Pilippi 3:7, 8.) Umpamana songon, singkola na timbo, karejo na jago, manang mangalului godang hepeng. Manang boi do hita gabe tarbarita ala jago hita marmusik manang marolahraga. (Heb. 11:24-27) Gabe tasolsoli do haputusan na tabahen i? Manang olo do tarimpu  dumenggan hian ngolungku molo huihuthon ulaon i? Molo songon i do pamingkirionta, boi do gabe taihuthon muse “angka na so marguna” i. *

8. Songon dia do caranta asa lam ditanda Jahowa?

⁸ Songon dia do carana asa lam ditanda Jahowa hita? Na parjolo, ingot ma, tongtong do Jahowa mananda angka halak na marsihohot tu Ibana. (Jaha Heber 6:10; 11:6) Mararga do nasida di Jahowa. Jala na so tigor do Ibana disi molo ndang disarihon angka naposoNa. Alana didok Bibel, “ditanda Jahowa do angka na di Ibana”. (2 Tim. 2:19) “Ditanda Jahowa do dalan ni angka na tigor roha i”. Jala diboto Ibana do paluahon naposoNa sian parjahat.​—Ps. 1:6; 2 Ptr. 2:9.

9. Songon dia do Jahowa patuduhon molo Ibana mangurupi naposoNa?

⁹ Di sada tingki, dipatudu Jahowa do huasoNa laho mangurupi naposoNa. (2 Kron. 20:20, 29) Umpamana, rimangi ma songon dia Jahowa paluahon bangso Israel tingki dilelei tentara ni si Firaun nasida. (2 Mus 14:21-30; Ps. 106:9-11) Nang pe nunga 40 taon masa tanda halongangan i, alai tong dope diingot angka halak taringot i. (Jos. 2:9-11) Sian parsiajaran on taboto ma, na holong do roha ni Jahowa tu naposoNa jala diurupi do nasida. Tontu hita pe urupanNa do tingki ro Gog na sian Magog mangaroro hita. (Hes. 38:8-12) Di tingki i, las do rohanta ala diurupi Debata do hita, taboto ma ndang portibi on na mangurupi hita.

10. Aha do muse na tongtong ingkon taingot?

¹⁰ Na paduahon ingot ma, ra dipasu-pasu Jahowa do hita marhite cara di na so panagaman. Molo mangulahon na denggan sasahalak asa dipuji donganna, ndang be diupai Jahowa ibana. Boasa? Alana didok Jesus, tingki dipuji sasahalak gabe i do upana. (Jaha Mateus 6:1-5.) Alai, “mangida di na buni” do Jahowa tu halak na mangulahon na denggan, nang pe ndang adong halak na mamboto. Diparrohahon do nasida jala diupai. Sipata, Jahowa mangupai naposoNa di na so panagaman. Taulas ma piga-piga contoh.

11. Songon dia do Jahowa mamasu-masu si Maria?

¹¹ Dipillit Jahowa do si Maria asa gabe omak ni Jesus ala serep rohana. Tading di Nasaret do si Maria, sada kota na gelleng jala dao sian Jerusalem dohot bagas joro. (Jaha Lukas 1:26-33.) Boasa dipillit Jahowa  si Maria? Alana, didok suru-suruan na margoar si Gabriel tu si Maria, “Dihaholongi Debata do ho.” Jala boi taboto, sian pangkataionna tu si Elisabet, togu do parale-aleon ni si Maria tu Jahowa. (Luk. 1:46-55) Sai diparrohahon Jahowa do si Maria. Ala marsihohot do ibana tu Jahowa, balga do pasu-pasu na dapotna.

12, 13. Songon dia do Jesus dipasangap tingki tubu jala tingki diboan tu bagas joro?

¹² Tingki tubu Jesus, ndang dipaboa tu angka pejabat manang angka pamarenta di Jerusalem taringot i. Alai marhite suru-suruan, dipaboa Jahowa do tu angka parmahan na di adaran ni Betlehem barita hatutubu ni Jesus i. (Luk. 2:8-14) Dung i, diida angka parmahan i ma Jesus naung tubu. (Luk. 2:15-17) Ra, songgot do roha ni si Maria dohot si Josep mangida situasi i. Alai molo Sibolis, sogo do rohana tingki tubu Jesus. Alana, dibahen Sibolis do sada cara asa ro angka datu mangida Jesus. Gabe diboto angka halak na di Jerusalem ma taringot i. Parohon jea do on. (Mat. 2:3) Alana, gabe godang do dakdanak dipamate di tingki i.​—Mat. 2:16.

¹³ Di Patik ni si Musa, dung 40 ari tubu poso-poso, ingkon dibahen omakna do pelean tu Jahowa. Jadi, laho ma si Maria dohot si Josep tu bagas joro di Jerusalem, na daona hira-hira sia kilometer sian Betlehem. (Luk. 2:22-24) Di pardalanan, ra sungkun-sungkun do roha ni si Maria, Aha do na laho bahenon ni malim laho pasangaphon Jesus? Hape di na so panagaman, ndang malim na pasangaphon Jesus. Alai dipillit Jahowa do si Simeon i ma baoa na ‘sintong jala mangkabiari Debata’, dohot si Hanna panurirang borua na mabalu naung marumur 84 taon na manjangkon Jesus. Dipaboa nasida do Jesus i ma Messias manang Kristus na dijanjihon.​—Luk. 2:25-38.

14. Songon dia do Jahowa mamasu-masu si Maria?

 ¹⁴ Sai dipasu-pasu Jahowa do si Maria ala rade ibana pagodang-godangkon dohot manjaga Jesus. Sian dia do i taboto? Dibahen Debata do asa disurat taringot si Maria di Bibel. Ra, ndang dohot ibana raphon Jesus tingki marbarita saleleng tolu satonga taon di tano on. Asing ni i, ala nunga mabalu, ra ingkon tading di Nasaret do ibana. Jadi ndang dapotna angka pengalaman na denggan songon na dihilala angka sisean na asing. Alai, diida si Maria do Jesus tingki mate. (Joh. 19:26) Dung i, tingki dilehon Debata tondi parbadia tu angka sisean di ari Pentakosta, dohot do si Maria disi. (Ul. 1:13, 14) Ra, sahalak na miniahan do si Maria. Molo songon i, tontu dohot do ibana mamarenta raphon Jesus salelengna di surgo. Pasu-pasu na sumurung do on di si Maria ala marsihohot ibana!

15. Tingki di tano on Jesus, songon dia do Jahowa mangalehon hasangapon tu ibana?

¹⁵ Ndang lomo roha ni Jesus dipasangap angka pamimpin agama manang parpolitik. Alai hea do tolu hali Jahowa mangkatai sian surgo laho patuduhon holongNa tu Jesus. Tontu, on patoguhon roha ni Jesus! Umpamana, dung tardidi Jesus di Sunge Jordan, didok Jahowa ma, “On do Anakku, haholonganki, halomoan ni rohangku do ibana.” (Mat. 3:17) Asing ni Jesus, ra holan si Johannes Pandidi do na mambege hata i. Dung i hira-hira sataon andorang so mate Jesus, tolu apostelna mambege soara ni Jahowa na mandok taringot Jesus, “On do Anakku, haholonganki, halomoan ni rohangku do ibana. Tangihon ma ibana.” (Mat. 17:5) Dung i muse, piga-piga ari andorang so mate Jesus, mangkatai ma Jahowa sian surgo tu ibana.​—Joh. 12:28.

16, 17. Songon dia do Jahowa mangalehon hasangapon tu Jesus di na so panagaman?

 ¹⁶ Diboto Jesus do na laho jouon ni halak do ibana sahalak pangarehe, jala parmatena pe ndang denggan. Alai, tongtong do ditangiangkon ibana asa saut lomo ni roha ni Debata. (Mat. 26:39, 42) “Sabar do ibana manaon na hansit di hau partinaonan i, jala ndang maila.” Alana, rumingkot do di ibana hasangapon sian Amana, ndang sian portibi on. (Heb. 12:2) Songon dia do Jahowa mangalehon hasangapon tu Jesus?

¹⁷ Tingki di tano on Jesus, dipangido ibana do tu Debata asa dilehon hasangapon tu ibana dos songon hasangaponna tingki di surgo. (Joh. 17:5) Di Bibel, ndang hea dipaboa molo Jesus mangido lobi sian i. Nang pe nunga diulahon ibana lomo ni roha ni Debata di tano on, alai ndang dipangido rohana asa sumurung dibahen tu ibana. Alai di na so panagaman ni rohana, dungkon dipahehe ibana, dilehon Jahowa do tu ibana “inganan na tumimbo” di surgo. Dibahen Jahowa do ibana boi tongtong mangolu, jala ndang adong dope na hea mandapot pasu-pasu sisongon i! * (Plp. 2:9; 1 Tim. 6:16) Tontu, pasu-pasu na mansai arga do on di Jesus ala marsihohot ibana!

18. Aha do na boi mangurupi hita asa tongtong mangkaringkothon hasangapon sian Jahowa?

¹⁸ Aha do na boi mangurupi hita asa tongtong mangkaringkothon hasangapon sian Jahowa? Tongtong ma taingot, sai dipasu-pasu Jahowa do angka naposoNa na marsihohot, jala dilehon do i marhite cara na so panagaman. Rimangi ma pasu-pasu na laho lehonon ni Jahowa tu hita di ari na naeng ro! Alai saonari, tongtong ma hita marsihohot nang pe godang sitaononta. Jala ingot ma, na laho salpu sitaonon i sude dohot hasangapon na di portibi on. (1 Joh. 2:17) Ndang dihalupahon Jahowa na tabahen dohot holong naung tapatudu, ala tigor do Ibana. (Heb. 6:10) Jala, pasu-pasuonNa ma hita, ra marhite na so hea tapingkirhon hian!