Songon dia Cara Marsiajar Bibel Asa Lam Denggan jala Dihalomohon Rohamuna

PANGOLU

ADONG do tugas na mansai borat na dilehon Jahowa tu si Josua. Ingkon diuluhon ibana do bangso Israel sahat tu Tano na Dijanjihon. Alani i, dipatogu jala dipapos Jahowa ma ibana. Jadi didok Jahowa, ‘barani ma jala marsihohot’. Asa boi ibana mambahen haputusan na denggan jala marhasil, ingkon dijaha jala diulahon do Patik ni Jahowa.—Jos. 1:7, 8.

Ala hita mangolu “di ari parpudi” godang do hasusaan na taadopi. (2 Tim. 3:1) Jadi taingot ma poda na dilehon Jahowa tu si Josua asa boi marhasil. Alani i, ingkon taparsiajari ma Bibel ganup ari asa boi mangurupi hita tingki mambahen haputusan na denggan.

Ra adong do sian hita na so mamboto cara na denggan laho marsiajar. Manang ndang lomo rohanta marsiajar. Alai, ringkot do parsiajaran Bibel taulahon. Molo diihuthon hamu saran na di kotak “ Coba ma Angka Cara On”, lam lomo ma rohamuna marsiajar Bibel, jala lam tu dengganna marsiajar.

Didok panurat psalmen, “Sai panonohon ma tu ahu dalan balobung ni angka tonami, ai lomo do rohangku disi.” (Ps. 119:35) Jadi boi do gabe lomo rohamuna marsiajar Bibel. Jala dapotmuna ma angka parsiajaran na arga molo tongtong hamu marsiajar.

Nang pe ndang manguluhon sada bangso hamu songon si Josua, alai hamu pe tong do mangadopi hasusaan. Alani i, parsiajari jala ulahon ma parenta ni Debata. Gabe boi ma hamu mambahen haputusan na denggan jala marhasil.

COBA MA ANGKA CARA ON

Martangiang ma parjolo. Bibel marisi pingkiran ni Jahowa do. Jala, isina marlaba do i tu hamu. Jadi, tingki naeng manjaha Bibel, pangido ma tu Jahowa asa diurupi hamu mangantusi, mangingot, jala mamangke parsiajaran i laho mambahen haputusan na denggan di ngolumuna.—Esr. 7:10.
Bahen ma sungkun-sungkun tingki hamu manjaha Bibel manang sijahaonta. Umpamana, sian na hujaha on, ‘aha do na boi huparsiajari taringot Jahowa? Adong do haitan ni na hujaha on tu tema ni Bibel? Songon dia do parsiajaran on boi hupangke laho mangurupi na asing?’
Rimangi ma na diparsiajari hamu. Dung manjaha, so ma satongkin laho mangarimangi na dijaha hamu. Sungkun ma dirimuna: ‘Dung hujaha on songon dia do pangkilalaanku? Boasa songon i pangkilalaanku? Adong do hubungan ni na hujaha i tu na masa di ahu di tingki naung salpu, saonari, manang tu ahu di ari na naeng ro? Songon dia do na huparsiajari on boi huulahon di ngolungku?’ (Job 23:5; Ps. 49:4) Pingkirhon ma, boasa dilehon Jahowa tudu-tudu i tu naposoNa. Jala, aha do na boi masa molo ndang diihuthon tudu-tudu i.—5 Mus. 32:28, 29.
Bayangkon ma tingki manjaha hamu. Umpamana, bayangkon ma tingki si Josep digadis tu halak Ismael. (1 Mus. 37:18-28) Aha do na boi di bayangkon hamu molo hamu adong disi? Boi do di bayangkon hamu na dipingkirhon dohot na di hilala nasida? Dung di bayangkon hamu situasi i, gabe godang ma dapotmuna parsiajaran na arga.
Pangke ma angka alat na diparade organisasi laho marsiajar. Boi ma diparsiajari hamu cara mamangke angka alat i sian internet manang tercetak. Molo ndang diboto hamu songon dia carana, sungkun ma angka dongan na di huria. Piga-piga angka alat i, i ma Indeks Publikasi Menara Pengawal manang Tudutudu na Dipangke Sitindangi Ni Jahowa Laho Marsiajar asa diurupi hamu mangalului sada topik naung hea diulas, dohot hatorangan taringot angka ayat. Jala, boi do dipangke hamu Tudutudu Laho Mangantusi Hata ni Debata. Adong do dipaboa disi taringot peta, angka na masa, satuan berat, dohot na asing.
Bahen ma kesimpulan. On boi mangurupi hamu mangingot aha na diparsiajari. Jala, dumenggan do molo dipaboa hamu parsiajaran i tu na asing manang tingki marbarita na uli. Molo diulahon hamu songon i, gabe diingot hamu ma parsiajaran i. Jala na asing pe dapotan laba ma sian parsiajaranmuna i.