Bukti patuduhon molo Jesus gabe Sintua ni Malim tikki tardidi ibana taon 29 M. Sian dia taboto? Tikki tardidi Jesus, dilehon ibana do dirina lao mangulahon “lomo ni roha ni Debata”. Lapatanna, dilehon ibana do ngoluna gabe tobusan. (Gal. 1:4; Heb. 10:5-10) Dipatudos do lomo ni roha ni Debata i songon langgatan. Tikki dilehon Jesus ngoluna, songon na dilehon ibana do dirina di atas ni langgatan i. Jadi, nungnga adong langgatan i mulai sian tardidi Jesus. Ala langgatan bagian na penting do di bagas joro, berarti bagas joro i pe nungnga adong tikki tardidi Jesus. Bagas joro i manggombarhon, sude na binahen ni Jahowa asa boi hita manomba ibana marhite tobusan ni Jesus.​—Mat. 3:16, 17; Heb. 5:4-6.

Ala nungnga adong bagas joro ni Jahowa, porlu do tong adong sintua ni malim. Alani i, dimiahi Jahowa do Jesus gabe sintua ni malim “marhite tondi parbadia dohot huasona”. (Ul. 10:37, 38; Mrk. 1:9-11) Alai, sian dia taboto nungnga dimiahi Jesus gabe Sintua ni Malim andorang so mate jala dipahehe ibana? Boi do taboto alusna sian contoh ni si Aron dohot sintua ni malim na asing di tikki najolo.

Hombar tu Patik ni si Musa, holan sintua ni malim do na boi masuk tu Inganan na Mansai Badia di tabernakel, songon i do tong di bagas joro. Dibahen do disi sada tire na gabe batas Inganan na Mansai Badia dohot Inganan na Badia. Holan di Ari Pardamean do sintua ni malim boi masuk mamolus tire i. (Heb. 9:1-3, 6, 7) Najolo, si Aron dohot akka pinomparna ikkon jolo dimiahi do gabe Sintua ni Malim, andorang so masuk “mamolus tire” tu Inganan na Mansai Badia. Songon i ma nang Jesus. Ikkon jolo dimiahi do ibana gabe Sintua ni Malim andorang so mate jala “mamolus tire i, i ma dagingna i”. (Heb. 10:20) Alani i didok si Paulus, masuk do Jesus gabe “sintua ni malim” tu “kemah na umbalga jala na dumenggan, na so pinajongjong ni jolma”, i ma “surgo”.​—Heb. 9:11, 24.

Andigan do mulai marlakku parjanjian baru i? Adong tolu tahap na ikkon diulahon. Na parjolo, nakkok do Jesus tu surgo. Na paduahon, dipelehon ibana ma ngoluna tu Debata gabe tobusan. Na patoluhon, dijalo Jahowa ma tobusan ni Jesus i. Molo nungnga diulahon tolu tahap i, mulai ma marlakku parjanjian baru i.

Dang dipaboa di Bibel andigan do dijalo Jahowa tobusan ni Jesus. Jadi dang boi taboto andigan pastina parjanjian baru i marlakku. Alai taboto do Jesus nakkok tu surgo sappulu ari andorang so ari Pentakosta. (Ul. 1:3) Saleleng di tikki i ma, dilehon Jesus tobusanna tu Jahowa jala dijalo Jahowa do i. (Heb. 9:12) Boi do takkas tarida buktina sian aha na masa di ari Pentakosta taon 33 M. (Ul. 2:1-4, 32, 33) Takkas ma molo parjanjian baru i nungnga marlakku di tikki i.

Kesimpulanna, mulai ma marlakku parjanjian baru i dung dijalo Jahowa tobusan ni Jesus. Jala Jesus ma na gabe Sintua ni Malim dohot Parhitean ni Parjanjian i.​—Heb. 7:25; 8:1-3, 6; 9:13-15.