1. Songon na dipaboa di 3 Johannes 3, 4, aha do na mambahen las rohatta?

BAYAKKON ma, pasti las hian do roha ni si Johannes tikki dibege ibana toktong do setia akka halak na diurupi ibana mananda hasittongan. Godang do hasusaan ni nasida, jala marsitutu do si Johannes patoguhon haporseaon ni nasida. Nungnga songon anakna sandiri be nasida. Suang songon i ma, las hian do rohatta tikki ianakkotta dohot akka halak na taurupi mananda hasittongan mangalehon diri tu Jahowa jala toktong setia.​—Jaha 3 Johannes 3, 4.

2. Aha do tujuan ni tolu surat na dibahen si Johannes?

² Di taon 98 M, tading di Epesus do ra si Johannes manang di luat na jonok tusi. Pinda do ra ibana tusi dung dipalua sian pulo Patmos. Di tikki i, marhite tondi parbadia diurupi Jahowa do ibana mambahen tolu surat. Sian tolu surat i, dijujui ibana do halak Kristen asa toktong porsea tu Jesus jala toktong mangihutton hasittongan.

3. Sukkun-sukkun aha do na lao taulas?

³ Tikki i holan si Johannes nama apostel na mangolu, jala marsak do rohana ala adong akka halak na murtad na mangajarhon na so sittong tu huria. * (1 Joh. 2:18, 19, 26) Didok akka guru palsu i ditanda nasida do Debata, alai dang dioloi nasida paretta ni Jahowa. Saonari taulas ma taringot poda na dilehon si Johannes. Jala taalusi ma tolu sukkun-sukkun on: Aha do lapatanna mangihutton hasittongan? Aha do ambat-ambat na ikkon taadopi? Jala songon dia hita masiurupan dohot akka donganta asa toktong di hasittongan?

4. Songon na didok di 1 Johannes 2:3-6 dohot 2 Johannes 4, 6, aha do na ikkon taulahon asa boi mangihutton hasittongan?

⁴ Asa boi mangihutton hasittongan, ikkon taboto do hasittongan na adong di hata ni Debata, i ma Bibel. Asing ni i, ikkon ‘taoloi do paretta ni Jahowa’. (Jaha 1 Johannes 2:3-6; 2 Johannes 4, 6.) Sada cara hita mangoloi Jahowa, i ma marsitutu maniru Jesus. Alana Jesus do sitiruon na dumenggan taringot mangoloi Jahowa.​—Joh. 8:29; 1 Ptr. 2:21.

5. Aha do na ikkon tahaporseai?

⁵ Asa boi toktong mangihutton hasittongan, ikkon pos do rohatta Jahowa do Debata na sittong, jala sittong do sude isi ni Bibel. Asing ni i, ikkon pos do rohatta Jesus do Mesias na dijanjihon i. Godang do halak saonari na so porsea molo Jesus nungnga gabe Raja di Harajaon ni Debata. Nungnga dipasingot si Johannes hian, “godang angka panipu” na mangaliluhon akka halak na so pola togu haporseaonna tu Jahowa dohot Jesus. (2 Joh. 7-11) Didok si Johannes, “Ise do sipargabus i, ia so ibana na so mangakkui Jesus i Kristus?” (1 Joh. 2:22) Sada cara asa unang gabe dililuhon hita, i ma mamparsiajari Hata ni Debata. Holan marhite on do hita boi mananda Jahowa dohot Jesus. (Joh. 17:3) Jala holan on do carana paposson rohatta tu hasittongan.

6. Aha do na boi mambahen akka na poso dang be mangihutton hasittongan?

⁶ Ikkon manat do sude halak Kristen asa unang gabe dililuhon ajaran ni jolma. (1 Joh. 2:26) Akka na poso do na tarlumobi ikkon manat tu jorat on. Si Alexia, * sahalak donganta na sian Prancis na marumur 25 taon mandok, “Tikki sikkola dope au, marsiajar do au taringot ajaran evolusi dohot ajaran na asing. Di tikki i, songon na menarik do huhilala akka ajaran i. Gabe ganggu ma rohakku tu hasittongan. Alai huhilala sala do au molo holan ajaran di sikkola i na hutangihon, alai dang huparsiajari aha na diajarhon Bibel.” Jadi diparsiajari si Alexia ma bukku Kehidupan​—Bagaimana Asal Mulanya? Melalui Evolusi atau Penciptaan? Dung piga-piga minggu, dang ganggu be rohana. Didok si Alexia, “Gabe pos ma rohakku, tutu do Bibel i marisi hasittongan. Jala huboto ma molo huihutton prinsip ni Bibel gabe dame jala las ma rohakku.”

7. Aha do na ikkon diingot sude halak Kristen, jala boasa?

 ⁷ Ikkon manat do sude halak Kristen, na poso manang na matua, asa unang manomba Jahowa huhut mangulahon dosa. Didok si Johannes dang boi hita mangihutton hasittongan huhut mangulahon na rorang. (1 Joh. 1:6) Asa las roha ni Jahowa tu hita, taingot ma manang aha pe na taulahon diida Jahowa do i sude. Jadi nang pe dang adong halak na mangida aha na taulahon, alai diida Jahowa do i.​—Heb. 4:13.

8. Aha do na so boi taihutton?

⁸ Unang ma taihutton pandangan ni halak di portibi on taringot dosa. Didok si Johannes, “Molo tadok, ‘Ndang mardosa hita,’ na manipu dirinta do hita disi.” (1 Joh. 1:8) Akka halak na murtad di jaman ni si Johannes mandok, boi do sasahalak mangulahon dosa jala toktong marale-ale tu Debata. Songon i do tong pandapot ni akka halak di tikkinta saonari. Godang halak mandok porsea do nasida tu Debata, alai dang setuju nasida tu prinsip ni Jahowa taringot dosa, tarlumobi taringot seks. Didok nasida sasittongna dang sala aha na dihagigihon Jahowa i, hita sandiri do na manottuhon aha na lao taulahon.

9. Aha do labana molo toktong diihutton akka na poso prinsip ni Bibel?

⁹ Olo do ra maol dihilala akka na poso asa dang mangihutton pandapot ni dongan sikkola manang dongan karejona taringot seks na so patut. I do na dihilala donganta si Aleksandar. Didok ibana, “Adong piga-piga borua di sikkolakku na menggoda au asa mangulahon seks dohot nasida. Jadi tikki hutolak ajakan ni nasida i, didok nasida ma na homo do au.” Olo do ra songon i situasi na diadopi hamu. Alai molo toktong diihutton hamu prinsip ni Bibel, boi ma dijaga hamu harga dirimuna, jala dang gabe manolsoli hamu. Boi ma hamu toktong sehat, jala boi toktong denggan parale-aleonmuna tu Jahowa. Di joloan ni ari pe,  tikki digoda muse hamu lao mangulahon na sala, gabe ummura ma hamu mangulahon na sittong. Jala ingot ma, Sibolis do na mangajarhon pandapot na sala taringot seks. Jadi molo dang diihutton hamu pandapot ni halak na di portibi on, marhasil do hamu ‘manaluhon Sibolis’.​—1 Joh. 2:14.

10. Songon na didok di 1 Johannes 1:9, aha do na ikkon taulahon asa ias panggora ni rohatta lao manomba Jahowa?

¹⁰ Taboto do holan Jahowa do na marhak manottuhon aha na so boi taulahon. Jala marsitutu do hita asa unang mangulahon dosa. Alai molo nungnga taulahon dosa, ikkon martangiang do hita mangakku sala tu Jahowa. (Jaha 1 Johannes 1:9.) Jala molo taulahon dosa na balga, tapangido ma pangurupion sian akka sintua, alana nasida do na dilantik Jahowa lao mangurupi hita. (Jak. 5:14-16) Alai unang ma hita sai torus manolsoli dosa na hea taulahon di tikki naung salpu. Boasa? Ala nungnga dilehon Jahowa tobusan ni Jesus lao manesa dosatta. Molo nungnga marhamubaon hita, ikkon pos do rohatta nungnga disalpuhon Jahowa hasalaatta i. Jadi bahenon ni Jahowa do ias panggora ni rohatta lao manomba ibana.​—1 Joh. 2:1, 2, 12; 3:19, 20.

11. Songon dia caratta manjaga pikkiratta sian ajaran ni halak na murtad?

¹¹ Unang ma taihutton ajaran ni akka halak na murtad. Sian jaman ni halak Kristen di abad na parjolo, sai marsitutu do Sibolis lao mambahen gale haporseaon ni halak Kristen. Alani i, ikkon boi do taboto dia na sittong jala dia do na so sittong. * Olo do ra dipakke akka musutta Internet manang media sosial lao mambahen gale haporseaotta tu Jahowa dohot holongta tu akka dongan. Alai unang ma porsea tu akka gabus i alana sian Sibolis do i!​—1 Joh. 4:1, 6; Pgk. 12:9.

12. Boasa ikkon tapabagas haporseaotta tu akka naung taparsiajari?

 ¹² Asa boi hita pasidikkon jorat ni Sibolis, ikkon tapabagas do haporseaotta tu Jesus. Ikkon pos do rohatta tu cara ni Jahowa mamakke Jesus lao mangulahon lomo ni rohana. Jala ikkon pos do rohatta tu akka halak naung dipillit Jahowa lao manguluhon organisasina saonari. (Mat. 24:45-47) Boi ma lam bagas haporseaotta molo ringgas hita marsiajar Bibel. Dung i boi ma lam bagas haporseaotta, songon hau na lam bagas akarna masuk tu tano. I do tong na ditaringoti si Paulus tikki dibahen ibana surat tu halak Kristen di Kolosse. Didok ibana, ‘Ala nunga dijalo hamu Kristus Jesus Tuan i, tongtong ma hamu marpangalaho songon ibana. Ingkon marurat, togu, jala dipajongjong di ginjang ni Kristus i ma haporseaonmuna.’ (Kol. 2:6, 7) Molo marsitutu hita patoguhon haporseaotta, dang boi Sibolis dohot akka halak di portibi on mambahen hita dang be mangihutton hasittongan.​—2 Joh. 8, 9.

13. Boasa dang pola songgot be rohatta molo dihasogohon portibi on hita?

¹³ Dang songgot be rohatta molo dihasogohon portibi on hita. (1 Joh. 3:13) Didok si Johannes, “Di bagasan huaso ni Sibolis do saluhut portibi on.” (1 Joh. 5:19) Jala ala nungnga lam jonok ujung ni portibi on, muruk situtu do Sibolis. (Pgk. 12:12) Lomo do rohana asa taulahon seks na so patut, jala marsitutu do ibana mangaliluhon hita marhite ajaran ni halak na murtad. Asing ni i, marsitutu do ibana lao menganiaya hita. Ala diboto Sibolis otik nai nama tikkina, marsitutu do ibana lao mangorai ulaotta marbarita manang lao mambahen gale haporseaotta. Jadi dang songgot be rohatta molo diorai ulaotta marbarita di piga-piga negara. Nang pe songon i, toktong do setia akka donganta di luat i. On patuduhon manang aha pe cara na dibahen Sibolis, boi do hita toktong setia tu Jahowa!

14. Aha do sada cara hita boi mangurupi akka dongan asa toktong di hasittongan?

¹⁴ Molo tapatudu asi ni roha tu akka dongan, na taurupi do nasida asa toktong di hasittongan. (1 Joh. 3:10, 11, 16-18) Ikkon masihaholongan do hita, dang holan tikki denggan situasina, alai dohot do tikki adong hasusaan. Contohna, adong do diboto hamu dongan na porlu diapuli manang diurupi ala mate halak na dihaholongi ibana? Manang, adong do dibege hamu akka dongan na godang habis artana alani bencana alam jala porlu diurupi pajongjongkon jabu manang Bale Harajaon ni nasida? Molo holong rohatta jala marasi ni roha hita tu akka dongan, tarida do i dang holan sian hata, alai dohot do sian parniulaotta.

15. Songon na disurat di 1 Johannes 4:7, 8, aha do na ikkon taulahon?

¹⁵ Na tatiru do Jahowa molo masihaholongan hita dohot akka dongan. (Jaha 1 Johannes 4:7, 8.) Sada cara hita patuduhon holong, i ma rade manalpuhon hasalaan ni akka donganta. Contohna, adong do ra sahalak dongan na mambahen haccit rohamu alai ujungna mangakku sala. Tapatudu do holong tu ibana molo rade hita manalpuhon hasalaanna jala dang taingot-ingot be i. (Kol. 3:13) On ma na diadopi sahalak donganta na margoar si Aldo. Hea do jut rohana tikki adong dongan na mandok na so denggan taringot sukuna. Didok si Aldo, “Sai martangiang do au tu Jahowa asa unang sogo rohakku tu donganta on.” Alai adong muse na diulahon si Aldo. Ditogihon ibana do donganna i asa rap marbarita. Tikki marbarita nasida, dipaboa si Aldo ma jut hian do rohana alani hata ni donganta on.  Didok si Aldo muse, “Tikki dibege donganta on songon dia pakkilalaanku, mangakku sala do ibana. Sian nada ni soarana, boi ma huida na manolsoli do ibana alani hatana i. Gabe boi ma hami marale-ale muse jala dang huingot-ingot hami be i.”

16-17. Aha do na ikkon taulahon?

¹⁶ Massai holong do roha ni si Johannes tu akka donganna. Jala lomo do rohana asa togu haporseaon ni nasida. Takkas ma i tarida sian poda na dilehon ibana di tolu suratna. Songon si Johannes, akka donganta na miniahan pe holong do rohana tu hita. Massai las do rohatta ala nasida na dipillit Jahowa lao mamaretta rap dohot Jesus!​—1 Joh. 2:27.

¹⁷ Anggiat ma sai taingot poda naung taulas di parsiajaran on. Marsitutu ma hita asa toktong mangihutton hasittongan jala mangoloi Jahowa di parngoluotta. Ringgas ma hita marsiajar Bibel, jala pos ma rohatta tu aha na diajarhon di Bibel. Pos ma rohatta tu Jesus. Unang ma porsea tu ajaran ni jolma dohot ajaran ni halak na murtad. Unang ma hita manomba Jahowa huhut mangulahon dosa. Molo digoda hita lao mangulahon na sala, toktong ma taihutton prinsip ni Bibel. Tapatogu do akka donganta molo rade hita manalpuhon hasalaan ni nasida jala rade mangurupi tikki dihaporluhon. Molo taulahon i, manang aha pe hasusaan na taadopi, boi ma hita toktong mangihutton hasittongan.