1, 2. Songon dia do surirang ni Bibel taringot naposo ni Jahowa na lam martambatamba?

DI LIAT portibi on, adong organisasi na mangurupi halak mangkaholongi jala manomba Jahowa, i ma Sitindangi Ni Jahowa. Nang pe adong hagaleon dohot hahurangan ni nasida, alai ditogutogu Jahowa do nasida marhite tondi parbadia. Taida ma songon dia Jahowa mamasumasu nasida.

² Otik dope halak na manomba Jahowa di taon 1914. Alai, dipasupasu Jahowa do ulaon parbaritaon. Alani i, nunga marjuta halak marsiajar Bibel jala gabe SitindangiNa. Nunga dipaboa Jahowa hian taringot on. Didok Ibana, ”Na ummetmet i gabe saribu, jala na so piga gabe bangso na bolon. Ahu Jahowa mambahensa gira di tingkina i.” (Jes. 60:22) Nunga tangkas taida surirang on digohi. Naposo ni Jahowa nunga songon bangso na bolon. Godang do negara di liat portibi on na godang ni  pendudukna umotik sian godang ni Sitindangi Ni Jahowa.

3. Songon dia do naposo ni Debata patuduhon holong?

³ Saonari, diurupi Jahowa do naposoNa patoguhon holong tu na asing. ”Haholongon do Debata”, jala ditiru naposoNa do Ibana. (1 Joh. 4:8) Disuru Jesus do siihuthon ibana asa ”masihaholongan”. Didok ibana, ”Sian on ma tandaon ni halak saluhutna, hamu siseanku: Molo masihaholongan hamu.” (Joh. 13:34, 35) Di tingki naung salpu, nang pe godang negara marporang, naposo ni Jahowa patuduhon holong tu na asing. Umpamana, hirahira 55 juta halak mate tingki porang dunia paduahon. Alai, ndang adong sahalak pe na mate di parporangan i dibahen naposo ni Jahowa. (Jaha Mika 4:1, 3.) Ayat on mangurupi nasida ias ”sian sapata ni mudar ni saluhut” halak.​—Ul. 20:26.

4. Boasa ringkot mamboto taringot naposo ni Jahowa na lam martambatamba?

⁴ Lam martambatamba do naposo ni Debata nang pe godang hasusaan dibahen musu, i ma Sibolis. Sibolis do ”debata ni portibi on”. (2 Kor. 4:4) Sibolis do na marhuaso di organisasi politik dohot di media massa. Dipangke ibana do angka i laho mangambati ulaon marbarita na uli. Alai, ndang boi dipaso ibana ulaon on. Ala diboto Sibolis otik nama tingkina, marsitutu ma ibana mangambati hita manomba Jahowa.​—Pgk. 12:12.

5. Boasa sipata adong donganta na mambahen hansit rohanta? (Ida gombar di mula ni parsiajaran.)

⁵ Ringkot do di naposo ni Debata mangkaholongi Debata dohot donganna. Jesus mandok, ”Haholongi ma Jahowa Debatam sian nasa roham, sian nasa pingkiranmu dohot sian nasa gogom. I ma patik na umbalga jala patik na parjolo. Patik na paduahon, i ma: Haholongi ma donganmi doshon dirim.” (Mat. 22:35-39, Bibel siganup ari) Bibel paboahon, alani dosa ni si Adam do sude jolma mardosa. (Jaha Rom 5:12, 19.) Olo do adong sasahalak di huria na mambahen hansit rohanta. Songon dia do bahenonta? Tongtong do togu holongta tu Jahowa? Marsihohot do hita tu Ibana dohot tu naposoNa? Dipaboa do di Bibel, adong naposo ni Debata na hea mambahen hansit roha ni donganna. Taida ma parsiajaran aha na tadapot sian nasida.

6. Boasa ndang marhasil si Eli maminsang ianakhonna?

⁶ Umpamana, sintua ni malim do si Eli di Israel, alai dua anakna ndang mangoloi patik ni Jahowa. Bibel mandok, ”Ndang hasea pangalaho ni anak ni si Eli. Ndang dipardulihon nasida Jahowa.” (1 Sam. 2:12, Bibel siganup ari) Diboto si Eli do hajahaton ni anakna na dua i, alai ndang olo ibana maminsang. Ujungna, diuhum Jahowa ma si Eli dohot anakna na dua i.  Ndang diloas be pinompar ni si Eli gabe malim. (1 Sam. 3:10-14) Molo mangolu hita di tingki i, jala taboto dipasombu si Eli anakna mangulahon hajahaton, gabe gale do haporseaonta? Gabe gale do haporseaonta tu Jahowa jala ndang tasomba be Ibana?

7. Dosa na balga aha do na diulahon si Daud, jala songon dia do dibahen Debata tu ibana?

⁷ Godang do parange ni si Daud na denggan na mambahen ibana dihaholongi Jahowa. (1 Sam. 13:13, 14; Ul. 13:22) Alai, hea do si Daud mangulahon na sala. Dilangkup ibana do si Batseba tingki di parporangan si Uria, tungganedolina. Gabegabean ma si Batseba. Ndang olo si Daud diboto halak na diulahonna i. Disuru ibana ma si Uria mulak tu jabuna. Didok roha ni si Daud, molo mulak si Uria tu jabuna, dohonon ni halak ma posoposo i anak ni si Uria. Alai, ndang olo si Uria mulak tu jabuna. Alani i, diatur si Daud ma asa mate si Uria di parporangan. Ala diulahon si Daud dosa na balga i, godang ma hasusaan na masa tu keluargana. (2 Sam. 12:9-12) Nang pe songon i, dipatudu Jahowa do asi ni rohaNa tu si Daud. Diboto Jahowa do na olo si Daud mangulahon na sintong. (1 Raj. 9:4) Molo mangolu hita di tingki i, songon dia do pangkilalaanta mangida si Daud? Ndang tasomba be Jahowa?

8. (a) Songon dia do si Petrus lupa tu hatana? (b) Nang pe mangulahon na sala si Petrus, boasa tongtong ibana gabe apostel?

⁸ Sitiruon na asing, i ma si Petrus.  Dipillit Jesus do si Petrus gabe apostel. Alai, hea do si Petrus mangulahon na sala. Umpamana, didok si Petrus ndang tadingkononna Jesus nang pe donganna na asing manadingkon ibana. (Mrk. 14:27-31, 50) Alai, tingki Jesus ditangkup, ditadingkon sude apostel i do Jesus jala dohot do si Petrus. Dung i, tolu hali ma si Petrus mandok na so ditanda ibana Jesus. (Mrk. 14:53, 54, 66-72) Alai manolsoli do roha ni si Petrus. Alani i, marpamuati ma Jahowa jala tongtong do ibana gabe apostel. Molo mangolu hita di tingki i, jala taboto aha na diulahon si Petrus, tongtong dope hita marpos ni roha tu Jahowa?

9. Boasa pos rohanta na tongtong Jahowa mangulahon na sintong?

⁹ Sian angka tudosan on, taboto ma adong do naposo ni Jahowa na hea mangulahon na sala na mambahen gale haporseaon ni na asing. Aha do ulahononmu molo masa on tu hamu? Tasalahon do Jahowa dohot organisasiNa jala ndang ro tu parpunguan? Manang, taingot do Jahowa marasi ni roha jala dipaima Ibana sasahalak marhamubaon? Alai, adong do halak na so olo marhamubaon nang pe mangulahon dosa. Pos do rohamu na diboto Jahowa i, jala padengganonNa di tingkina? Patuduhonon ni Jahowa do na dumenggan. Pos do rohanta na tongtong Jahowa mangulahon na sintong?

10. Tingki si Judas Iskariot dohot si Petrus mangulahon na sala, aha do na diulahon Jesus?

¹⁰ Dipaboa do di Bibel taringot halak na tongtong marsihohot tu Jahowa nang pe na di humaliangna mangulahon na sala. Jesus ma sitiruon na dumenggan. Dung martangiang saborngin manipat, dipillit Jesus ma 12 apostelna. Sada sian apostel i, i ma si Judas Iskariot manjehehon ibana. Dung i, apostel Petrus mandok ndang ditanda ibana Jesus. (Luk. 6:12-16; 22:2-6, 31, 32) Molo adong na mambahen jut rohana, ndang disalahon Jesus angka siseanna manang Jahowa. Alai, tongtong do Jesus jonok tu Jahowa. Ujungna, dipahehe Jahowa ma ibana jala dibahen gabe Raja di HarajaonNa di surgo.​—Mat. 28:7, 18-20.

11. Surirang aha do na adong di Bibel taringot naposo ni Jahowa di tingkinta on?

¹¹ Sitiruon na dipatudu Jesus mangajari hita marsihohot tu Jahowa dohot tu organisasiNa. Nunga taida, diramoti Jahowa do naposoNa di tingki naung salpu sahat ro di ujungna. Diurupi do nasida marbarita na uli di liat portibi on, jala holan angka naposoNa do na mangulahon i. Marsada do naposoNa jala marlas ni roha alani hasintongan na diajarhon ni Jahowa.  Nunga didok Jahowa hian, ”Ida ma, marolopolop sogot anggo angka naposongku sian sonang ni rohana.”​—Jes. 65:14.

12. Songon dia do hita maradophon hasalaan ni dongan?

¹² Las do rohanta ala ditogutogu jala diurupi Jahowa hita mangulahon na denggan. Alai, halak na dirajai Sibolis, ndang marlas ni roha jala ndang marpangkirimon. Alani i, ndang marbisuk hita molo tatadingkon Jahowa dohot organisasiNa holan alani hasalaan ni sasahalak di huria! Ingkon tongtong do hita marsihohot tu Jahowa jala mangihuthon tudutuduNa. Ringkot do taparsiajari songon dia hita maradophon hasalaan ni dongan.

13, 14. (a) Boasa ingkon sabar hita maradophon donganta na asing? (b) Janji aha do na ringkot taingot?

¹³ Songon dia do bahenonta molo hansit rohanta dibahen dongan na asing? Bibel paingothon hita, ”Unang muramura muruk, ai halak na oto do molo holan na muruk.” (Pjm. 7:9, Bibel siganup ari) Sude do hita mardosa jala hea sala. Alani i, ndang tagamon donganta na asing ndang hea mandok manang mangulahon na sala. Alai, molo songon i do na tahirim, mago ma las ni roha. Jala, boi gale haporseaonta manang gabe manadingkon organisasi ni Jahowa. Dung i, mago ma pangkirimonta mangolu di tano na imbaru.

¹⁴ Aha do na boi mangurupi hita asa tongtong marlas ni roha nang pe adong na mambahen hansit rohanta? Taingot ma janji ni Jahowa, ”Ai ida ma, ahu ma manompa langit na imbaru dohot tano na imbaru, jala ndang be ingoton angka na parjolo i manang tarsunggul tu roha.” (Jes. 65:17; 2 Ptr. 3:13) Lehonon ni Jahowa do tu hita pasupasuNa molo tongtong hita marsihohot tu Ibana.

15. Aha do didok Jesus na ingkon taulahon tingki adong sala ni donganta tu hita?

¹⁵ Saonari, ndang mangolu dope hita di tano na imbaru. Molo adong na mambahen hansit rohanta, tarimangi ma lomo ni roha ni Jahowa. Umpamana, Jesus mandok, ”Ai ia disesa hamu sala ni halak na dompak hamu, sesaon ni Amamuna na di banua ginjang i do dohot dosamuna.” Tingki didokkon si Petrus ingkon pitu hali sesaon dosa ni donganna, didok Jesus ma, ”Ndada pitu hali dohononku tu ho, tung sintap pitupulu hali pitu do!” Jesus mangajarhon tu hita asa sai rade manalpuhon hasalaan ni dongan na asing.​—Mat. 6:14, 15; 18:21, 22.

16. Sitiruon aha do na dilehon si Josep tu hita?

 ¹⁶ Tatiru ma na binahen ni si Josep tingki adong na mambahen hansit rohanta. Si Josep dohot sada anggina, i ma anak ni si Jakkob sian si Rahel. Adong do sampulu nai anak ni si Jakkob, alai umholong do rohana tu si Josep sian anakna na asing. Alani i, mangiburu ma angka anak ni si Jakkob tu si Josep. Ala sogo roha ni nasida, digadis ma si Josep gabe hatoban di Mesir. Dung martaontaon, lomo roha ni raja ni Mesir mangida ulaon ni si Josep, jala dibahen ma ibana gabe wakilna. Di pudian ni ari, ro ma hahaanggi ni si Josep tu Mesir manuhor sipanganon. Ditanda si Josep do nasida. Diuji si Josep ma angka hahana i, jala diida ibana ma nunga muba nasida. Ala nunga muba nasida, dipatandahon ma dirina jala dipapos roha ni nasida. Didok ma, ”Unang mabiar hamu, ahu ma marmuduhon hamu dohot anakkonmuna i.”​—1 Mus. 50:21.

17. Aha do bahenonmu molo adong donganmu mangulahon na sala?

¹⁷ Ingot ma, molo na asing boi sala, hamu pe boi do sala. Molo diboto hamu hansit roha ni donganmu, ihuthon ma poda ni Bibel. Mangido sala ma hamu jala mardame. (Jaha Mateus 5:23, 24.) Molo tapangido asa disalpuhon hasalaanta, hita pe ingkon rade manalpuhon hasalaan. Kolosse 3:13, Bibel siganup ari mandok, ”Marsabar ni roha ma hamu sama hamu, masiampunan ma hamu, molo adong na marsogo ni roha na sada tu na sada nai. Ingkon masisesaan dosa do hamu sama hamu songon Tuhan i na manesa dosamuna.” Molo tahaholongi donganta, ndang sai taingot hasalaanna. (1 Kor. 13:5) Molo tasalpuhon hasalaan ni donganta, salpuhonon ni Jahowa do hasalaanta. Molo adong sala ni donganta, tapatudu ma asi ni roha songon Jahowa na marasi ni roha tu hita.​—Jaha Psalmen 103:12-14.