MOLO tajaha buku Mateus, didok disi, ”Dung i dibongoti Jesus ma bagas joro ni Debata, dipabali ma sian i saluhut angka na manggadisi dohot na manuhori disi, ditunggalingkon do meja ni angka situngkari hepeng ro di bangku ni angka sigadis darapati. Laos didok ma tu nasida: ”Bagas partangiangan do goar ni bagashu” ninna Surat i; alai gabe liang ni pandobo do i dibahen hamu!”—Mat. 21:12, 13.

Sejarah patuduhon, ndang denggan pambahenan ni partigatiga di bagas joro tu panuhor, ala arga situtu do tigatiga ni nasida. Umpamana, mura do arga ni darapati. I do alana, darapati ma na dituhor angka na pogos bahen pelean ni nasida. Alai, hombar tu angka surat ni halak Jahudi najolo, di abad na parjolo, ingkon sadinar mas do dilehon sasahalak laho manuhor dua darapati. Dos do sadinar mas tu gaji ni parkarejo saleleng 25 ari. Ala arga situtu do arga ni darapati, ndang boi be na pogos manuhor i. (3 Mus. 1:14; 5:7; 12:6-8) Muruk situtu do Rabi Simeon anak ni si Gamaliel alani situasi on. Gabe diorui ibana ma godang ni pelean na ingkon dilehon halak Jahudi. Jala di tingki i, gabe lam mura ma arga ni dua darapati, na argana saparsaratus dinar mas.

Songon naung taboto, mangahut do angka partigatiga di bagas joro maradophon angka panuhor. I do alana didok Jesus nasida ”pandobo”.