1, 2. (a) Parsoalan aha do na rumingkot na mangkorhon tu sude jolma? (b) Boasa on ringkot di hita?

DI GODANGAN halak, hepeng do na rumingkot. On do na sai dipingkirhon jala diholsohon rohanasida. Marsitutu do nasida asa mandapot godang hepeng. Alai di halak na asing, na rumingkot, i ma keluarga, kesehatan, manang citacita.

² Sasintongna adong do parsoalan na rumingkot sian sudena i, i ma taringot mamparhatutu hak ni Jahowa laho mamarenta. Ala on do na rumingkot, ingkon talehon do rohanta tusi. Molo ndang manat, boi do ulaonta siganup ari manang sitaononta mambahen hita lupa tu parsoalan on. Molo marpihak hita tu hak ni Jahowa laho mamarenta, marhasil ma hita mangadopi sitaonon jala lam solhot tu Jahowa.

3. Aha do na didok Sibolis taringot pamarentaon ni Debata?

³ Dialo Sibolis do hak ni Jahowa laho mamarenta.  Lomo rohana asa didok jolma Jahowa i Pamarenta na jahat jala ndang marsangkap na denggan tu jolma. Didok Sibolis, martuaan do jolma molo mamarenta dirina sandiri. (1 Mus. 3:1-5) Didok muse, ndang adong jolma na tongtong marsihohot tu Debata. Molo susa do parngoluon ni sasahalak, tontu ndang angkuanna be Jahowa gabe Pamarenta. (Job 2:4, 5) Alani i, dilehon Jahowa do tingki asa tangkas diboto jolma songon dia parngoluon ni nasida molo ndang Debata na mamarenta.

4. Boasa parsoalan taringot hak ni Jahowa mamarenta ingkon dipaujung?

⁴ Diboto Jahowa do Sibolis margabus. Antong, boasa dipasombu Ibana Sibolis pararathon gabus on? Alana, mangkorhon do alus ni on tu saluhut na di surgo dohot di tano on. (Jaha Psalmen 83:19.) Ndang dijangkon si Adam dohot si Hawa pamarentaon ni Jahowa, jala godang do pinomparna mangihuthon nasida. On boi mambahen sasahalak mandok, sintong do Sibolis. Saleleng adong dope parsoalan on di pingkiran ni jolma dohot surusuruan, ndang tarpatupa dame dohot sada ni roha. Alai, molo nunga diparhatutu hak ni Jahowa mamarenta, marlas ni roha jala dame ma dihilala na mangihuthon pamarentaonNa.—Eps. 1:9, 10.

5. Boasa gabe mangkorhon parsoalan on tu hita?

⁵ Diparhatutu nama hak ni Debata mamarenta, jala diripashon ma pamarentaon ni Sibolis dohot jolma. Marhasil ma pamarentaon ni Debata marhite Harajaon ni Messias. Angka halak na tongtong marsihohot patuduhon, boi do jolma marsihohot jala marpihak tu pamarentaon ni Debata. (Jes. 45:23, 24) Lomo do rohanta tongtong marsihohot. Alani i, porlu taantusi boasa ringkot parsoalan on.

6. Sadia ringkot do mamparhatutu hak ni Jahowa mamarenta?

⁶ Rumingkot do mamparhatutu hak ni Jahowa mamarenta sian hasonanganta sandiri. Alai, ndang na gabe lupa Jahowa paluahon hita. Diparrohahon Ibana do hita. Sian dia on taboto?

7, 8. Aha do labana molo nunga diparhatutu hak ni Jahowa mamarenta?

⁷ Mansai dihaholongi Jahowa do sude jolma. Ala arga hita di Ibana, dilehon do anakNa mate humongkop hita asa boi hita mangolu salelengna. (Joh. 3:16; 1 Joh. 4:9) Molo ndang diingot Jahowa janjiNa taringot ari na naeng ro, tontu sintong do hata ni Sibolis dohot na mangihuthon ibana. Didok Sibolis, margabus do Jahowa jala  ditabunihon do angka na denggan sian jolma. Direhei angka parjahat do janji ni Jahowa marhite mandok, ”Didia do harorona, na pinarbagabaga i? Ai dung monding angka amanta, hot do saluhutna songon i, sian mula ni hasiangan on!” (2 Ptr. 3:3, 4) Tongtong do diingot Jahowa janjiNa. Molo nunga saut hak ni Jahowa laho mamarenta, paluaonNa do na unduk tu Ibana. (Jaha Jesaya 55:10, 11.) Marojahan tu holong do hak ni Jahowa mamarenta. Pos ma rohanta, sai dihaholongi jala arga do naposoNa na marsihohot.—2 Mus. 34:6.

⁸ Nang pe rumingkot hak ni Jahowa laho mamarenta, alai ndang lupa Jahowa laho paluahon hita. Diparrohahon do hita. Alani i, tongtong ma taingot aha na rumingkot jala marsihohot tu pamarentaon ni Jahowa.

9. Aha do na didok Sibolis taringot si Job? (Ida gombar di mula ni parsiajaran.)

⁹ Ringkot do pangantusion na sintong taringot hak ni Jahowa mamarenta. Boi do tajaha taringot on di buku Job, sada sian angka buku di Bibel na parjolo disurat. Didok Sibolis, molo borat sitaonon ni si Job, tontu ndang jangkononna be Debata. Dipangido Sibolis do asa Debata na mangunjuni si Job. Alai, ndang olo Jahowa mangulahon i. Dipaloas do Sibolis mangunjuni si Job. Didok Jahowa, ”Sahat tu tanganmu ma nasa na di ibana.” (Jaha Job 1:7-12.) Dung i, agoan arta dohot angka naposona ma si Job. Mate ma sampulu ianakhonna. Dibahen Sibolis ma hira na Debata na mangulahon on. (Job 1:13-19) Dung i, dibahen Sibolis ma si Job marsahit na posi na dihagigihon halak. (Job 2:7) Na mambahen si Job lam susa, i ma hata ni tungganeboru dohot tolu donganna na mambahen hansit rohana jala marmetmet ni roha.—Job 2:9; 3:11; 16:2.

10. (a) Songon dia do si Job patuduhon na marsihohot ibana tu Debata? (b) Boasa si Job porlu dipasingot?

¹⁰ Tutu do hata ni Sibolis i? Ndang. Nang pe borat sitaonon ni si Job, marhaposan tu Jahowa do ibana. (Job 27:5) Alai, lupa do si Job tu na rumingkot, jala dirina do na diharingkothon. Sai didok do ndang sala ibana. Didok roha ni si Job, ingkon botoonna do boasa marsitaonon ibana. (Job 7:20; 13:24) Tontu taantusi do pangkilalaanna. Alai, diboto Jahowa do nunga sala pangantusion ni si Job, jala dipasingot ma ibana. Songon dia do Jahowa pasingothon ibana?

11, 12. Aha na diulahon Jahowa asa diboto si Job na sala do pangantusionna? Songon dia do si Job maradophon i?

¹¹ Di buku Job bindu 38 sahat tu 41, disurat do hata ni Jahowa tu si Job. Ndang dipatorang Jahowa boasa marsitaonon si Job. Alai, lomo rohaNa mangurupi si Job mangantusi na metmet situtu do jolma martimbangkon Debata. Didok Jahowa tu si Job, adong parsoalan na rumingkot sian sitaonon ni si Job sandiri. (Jaha Job 38:18-21.) Hata ni Jahowa paubahon pangantusion ni si Job.

 ¹² Na so pardenggan basa do Jahowa tingki mangkatai tu si Job di sitaononna? Ndang songon i. Diantusi jala diargai si Job do poda ni Jahowa. Didok si Job, ”Jora ma ahu jala husolsoli dagingku hundul di bagasan orbuk dohot sirabun.” (Job 42:1-6) Dung i, adong ma sahalak baoa na margoar si Elihu na mangurupi si Job paubahon pangantusionna. (Job 32:5-10) Dung ditangihon si Job poda na sian Jahowa jala dipauba pangantusionna, dipaloas Jahowa do na asing mamboto na las rohaNa mangida si Job.—Job 42:7, 8.

13. Dung salpu pangunjunan i, songon dia do poda ni Jahowa mangurupi si Job?

¹³ Dung salpu pangunjunan na masa tu si Job, adong do laba na didapot si Job sian poda ni Jahowa. ”Gumodang dipasupasu Jahowa si Job di ujungna sian na di mulana.” Dung i, ”tubu muse pitu anakna dohot tolu boruna”. (Job 42:12-14) Nang pe dihaholongi si Job ianakhonna on, alai masihol do ibana tu ianakhonna naung mate i. Jala muse, ndang tarhalupahon ibana pangunjunan na masa tu dirina dohot tu keluargana. Autsugari pe diboto si Job boasa marsitaonon ibana, tontu sungkunsungkun do rohana boasa dipaloas Debata sitaonon i masa tu dirina. Molo ganggu roha ni si Job, ingotonna ma na nidok ni Jahowa. On ma na mangapuli rohana jala mangurupi ibana marpangantusion na sintong.—Ps. 94:19.

14. Aha do na taparsiajari sian pengalaman ni si Job?

¹⁴ Molo tarimangi na masa tu si Job, on mangurupi hita paubahon pamingkirionta jala mangapuli rohanta. Buku Job, i ma hata ni Jahowa ”bahen poda di hita . . . asa marpangkirimon hita binahen ni habengeton dohot pangapulon na di bagasan Surat i”. (Rom 15:4) On mangajari hita asa unang paholsohu  alani sitaononta. Alana, holso ni roha boi mambahen hita ndang mamingkirhon taringot hak ni Jahowa laho mamarenta. Songon si Job, marpihak ma hita tu Jahowa marhite marsihohot tu Ibana nang pe susa di parngoluon.

15. Molo nunga salpu sitaononta, aha do labana molo tongtong marsihohot?

¹⁵ Tarapul do rohanta mamboto pengalaman ni si Job. Gabe taboto, ndang ala na muruk Jahowa umbahen na ro pangunjunan tu hita. Molo masa pangunjunan, tapatudu ma na marpihak hita tu Jahowa. (Poda 27:11) Molo tongtong marsihohot, las ma roha ni Jahowa, jala lam togu ma pangkirimonta. (Jaha Rom 5:3-5.) Pengalaman ni si Job patuduhon ”parasiroha bolon do Tuhan i jala partalup ni roha”. (Jak. 5:11) Molo marpihak tu Jahowa, pasupasuonNa ma hita. On mangurupi hita asa sabar jala marsihohot ”mardongan las ni roha”.—Kol. 1:11.

16. Boasa porlu tapaingot dirinta taringot ringkot ni mamparhatutu hak ni Jahowa mamarenta?

¹⁶ Tutu, molo marsitaonon hita, boi do gabe maol mamingkirhon taringot mamparhatutu hak ni Jahowa mamarenta. Boi do gabe lam borat sitaonon i molo sai tapingkiri. Alani i, sitaonon aha pe na taadopi, tapaingot ma dirinta taringot ringkot ni mamparhatutu hak ni Jahowa mamarenta.

17. Molo ringgas di ulaon partondion, songon dia do on mangurupi hita manjumolohon na rumingkot?

¹⁷ Molo ringgas di ulaon partondion, boi do hita mangingot aha na rumingkot. Umpamana, donganta borua na margoar si Renee marsahit stroke dohot kanker. Tingki di rumah sakit, marbarita ma ibana tu angka parkarejo  disi, tu pasien na asing, dohot angka na ro. Tingki marsahit dua satonga minggu di rumah sakit, boi do ibana marbarita disi saleleng 80 jom. Nang pe diboto si Renee na naeng mate ibana, alai ndang hea dihalupahon ibana na rumingkot. Alana, marpihak tu Jahowa mambahen dame pangkilalaanna.

18. Sian pengalaman ni si Jennifer, aha do na taparsiajari taringot mamparhatutu hak ni Jahowa mamarenta?

¹⁸ Nang pe ganup ari mangadopi sitaonon, boi do hita marpihak tu Jahowa. Umpamana, donganta si Jennifer paimahon pesawat di bandara saleleng tolu ari. Ala sai sundat do pesawat na laho dalanna mulak, loja ma dihilala ibana, lungunlungunan, jala marsak. Alai, martangiang ma si Jennifer asa diurupi Jahowa ibana marbarita na uli tu angka halak na paimahon di bandara i. Ujungna, marbarita ma ibana tu godang halak jala godang do sijahaon na disarhon ibana. Didok si Jennifer, ”Huhilala, nang pe adong sitaonon, dipasupasu jala dipatogu Jahowa do ahu ala ndang marisuang ulaonku laho paboahon goarNa.”

19. Aha do na patuduhon sasahalak i mangulahon panombaon na sintong?

¹⁹ Holan naposo ni Jahowa do na mangantusi ringkot ni hak ni Jahowa mamarenta. Pangantusion on patuduhon ise do angka halak na mangulahon panombaon na sintong. Alani i, tongtong ma hita marpihak tu Jahowa.

20. Songon dia do pangkilalaan ni Jahowa molo marpihak hita tu Ibana?

²⁰ Diparrohahon jala diargai Jahowa do sude na taulahon laho marpihak tu Ibana, huhut marsitutu jala marsihohot tingki mangadopi sitaonon. (Ps. 18:26) Artikel na mangihut patorangkon boasa porlu marpihak tu Jahowa jala songon dia carana asa lam denggan mangulahon i.