1, 2. (a) Aha do na dipangido Jesus tingki martangiang dohot angka siseanna? (b) Boasa dipasingot Jesus angka siseanna asa marsada?

DI TINGKI borngin na parpudi dohot angka siseanna, ditaringoti Jesus do asa boi nasida marsada. Tingki martangiang pe Jesus dohot nasida, ditangiangkon ibana do i asa boi nasida marsada, songon ibana marsada dohot Amana. (Jaha Johannes 17:20, 21.) Molo marsada nasida, on patuduhon na tutu do Jahowa na manuru Jesus asa ro tu tano on. Gabe boi ma ditanda halak nasida sisean ni Jesus alani holong ni nasida. Jala holong i do na mambahen nasida marsada.​—Joh. 13:34, 35.

² Di borngin i, jotjot do dihatai Jesus asa marsada nasida. Alana diparrohahon ibana, ndang boi dope nasida marsada. Umpamana, marsoal do muse nasida taringot “ise na umsangap”. (Luk. 22:24-27; Mrk. 9:33, 34) Asing ni i, hea do si Jakobus dohot si Johannes mangido asa dilehon tu nasida inganan na umsangap di lambung ni Jesus molo dung di surgo.​—Mrk. 10:35-40.

3. Aha do na mambahen angka sisean ni Jesus ndang marsada, jala sungkun-sungkun aha do na laho taulas?

 ³ Lomo dope roha ni nasida asa gabe na umsangap. I do na mambahen angka siseanna ndang boi dope marsada. Alai, ndang holan i. Di jaman ni Jesus, tarbagi do angka halak ala ndang lomo roha ni nasida mangida halak na so sian hutana. Alani i, porlu do nasida pasidingkon pamingkirion sisongon i. Di parsiajaran on, taulas ma sungkun-sungkun on: Aha do na diulahon Jesus tingki dipaimbar-imbar ibana? Songon dia Jesus mangurupi angka siseanna asa marsada jala ndang mardingkan? Songon dia hita boi maniru Jesus?

4. Sian dia taboto molo Jesus hea dipaimbar-imbar?

⁴ Jesus pe hea do dipaimbar-imbar. Tingki dipaboa si Pilippus tu si Natanael nga pajumpang ibana dohot Messias, didok si Natanael do, “Tarbahen ma na denggan ro sian Nasaret?” (Joh. 1:46) Diboto ibana do ra surirang di Mika 5:1 na mandok, Messias tubu di Betlehem. Alai dihilala ibana hira na so cocok do Messias tubu di huta i. Asing ni i, leas do roha ni angka pejabat di Judea mangida Jesus, ala sian Galilea ibana. (Joh. 7:52) Jala dihilala halak Judea, umjago do nasida sian halak Galilea. Adong do halak Jahudi na manjou Jesus halak Samaria. (Joh. 8:48) Sian bangso na asing do halak Samaria, jala imbar do agama ni nasida sian halak Jahudi. Alani i, ndang olo halak Judea dohot halak Galilea marsaor tu nasida.​—Joh. 4:9.

5. Songon dia do angka sisean ni Jesus dipaimbar-imbar?

⁵ Angka pemimpin agama Jahudi pe ndang mangargai angka sisean ni Jesus. Didok halak Parise do nasida halak na “diburai”. (Joh. 7:47-49) Leas do halak Parise mangida halak na so singkola di singkola agama Jahudi, dohot angka na so mangihuthon hasomalan ni nasida. (Ul. 4:13) Dipaimbar-imbar do Jesus dohot angka siseanna. Alana di tingki i dibanggahon angka halak do agama, jabatan, dohot suku ni nasida be. Jala boi do gabe songon i pamingkirion ni angka siseanna. Jadi asa tongtong marsada, ingkon diuba nasida do pamingkirionna i.

6. Aha do buktina molo hita pe olo do sipata paimbar-imbarhon halak?

⁶ Saonari on, godang do halak na lomo rohana paimbar-imbarhon. Adong do ra halak na paimbar-imbarhon hita. Manang, hita pe olo do ra paimbar-imbarhon halak na asing. Sahalak donganta perintis di Australia mandok, “Sogo do rohangku mangida halak kulit putih. Alana sian najolo, gabe susa do dibahen nasida halak Aborigin, i ma suku asli Australia.” Lam sogo do roha ni donganta on ala ibana pe hea do dipaimbar-imbar. Ninna sahalak donganta sian Kanada muse, “Huhilala, umjago do halak na marhata Prancis sian na marhata Inggris.”

7. Aha do na dibahen Jesus nang pe godang halak paimbar-imbarhon halak na asing?

⁷ Sian jaman ni Jesus sahat tu saonari, dipaimbar-imbar do angka halak.  Songon dia do pangkilalaan ni Jesus taringot i? Na parjolo, ndang olo ibana dohot paimbar-imbarhon. Ndang mardingkan ibana. Marbarita na uli do ibana tu na mora dohot tu na pogos, tu halak Parise dohot Samaria. Gariada, tu sijalo pajak dohot pardosa pe, marbarita na uli do ibana. Na paduahon, diajari ibana do angka siseanna asa unang pintor curiga tu halak manang paimbar-imbarhon. Jala ibana pe gabe sitiruon do tu nasida.

8. Prinsip na dia do na mambahen hita ingkon marsada?

⁸ Prinsip na dia do na mambahen hita ingkon marsada? Didok Jesus do tu angka siseanna, “Marhaha maranggi do hamu sude.” (Jaha Mateus 23:8, 9.) Asing ni i, ala pinompar ni si Adam do hita sude, jadi marhaha maranggi do hita. (Ul. 17:26) Jala, didok Jesus do molo sude siseanna marhaha maranggi, ala sude do nasida nunga mananda Jahowa. (Mat. 12:50) Alani holong dohot haporseaon, gabe marsada ma nasida jala gabe anggota keluarga ni Debata. I do alana, tingki ditongos angka apostel surat tu huria, dijou do nasida ‘angka dongan’.​—Rom 1:13; 1 Ptr. 2:17; 1 Joh. 3:13.

9, 10. (a) Boasa ndang boi didok halak Jahudi suku ni nasida na umjago? (b) Songon dia Jesus mangajarhon asa unang leas mangida suku na asing? (Ida gombar di mula ni parsiajaran.)

⁹ Dung dipaboa Jesus na marhaha maranggi do sude siseanna, dipaingot ibana do nasida asa marserep ni roha. (Jaha Mateus 23:11, 12.) Songon naung taulas, najolo gabe tarbagi do angka apostel ala adong dope ginjang ni roha di nasida. Jala di tingki ni Jesus pe, godang halak Jahudi na marpingkir umjago do suku ni nasida, manang ala pinompar ni si Abraham nasida. Alai, didok si Johannes Pandidi tu nasida, “Angka batu on pe boi do bahenon ni Debata gabe pinompar ni si Abraham.”​—Luk. 3:8.

¹⁰ Jesus mandok, sala do molo sasahalak marpingkir umjago do suku ni nasida. Tangkas do on dipaboa tingki ro angka siboto surat manungkun tu ibana, “Ise do sasintongna donganku jolma?” Laho mangalusi sungkun-sungkun i, dibahen Jesus ma sada carita. Adong ma sahalak Jahudi na dipungkuli panamun jala peak ma di dalan. Adong do piga-piga halak Jahudi na lewat, alai ndang adong na olo mangurupi ibana. Hape adong ma halak Samaria na marasi ni roha tu ibana, gabe diurupi ma ibana. Di ujung ni carita i, dipaboa Jesus do asa ditiru nasida halak Samaria i. (Luk. 10:25-37) Sian carita i, Jesus paboahon songon dia do lapatanna mangkaholongi sude halak.

11. Boasa angka sisean ni Jesus ndang boi mardingkan, jala songon dia ibana mangajari nasida asa mangantusi i?

¹¹ Andorang so tu surgo Jesus, disuru ibana do angka siseanna asa marbarita “di saluhut luat di Judea, di Samaria, sahat tu ujung ni tano on”. (Ul. 1:8) Disuru Jesus pe diulahon on, asa unang ginjang do roha ni nasida jala paimbar-imbarhon. Jotjot do Jesus paboahon parange na denggan sian na so halak  Jahudi, asa rade nasida laho marbarita tu saluhut bangso. Dipuji ibana do sahalak perwira tentara ni Rom na togu haporseaonna. (Mat. 8:5-10) Di Nasaret, dipaboa Jesus do songon dia Jahowa mangurupi angka na so halak Jahudi. Umpamana, sahalak ina na mabalu sian Sarpat dohot si Naaman, halak Siria na hona kusta. (Luk. 4:25-27) Jala marbarita do Jesus tu sahalak borua Samaria. Gariada, marborngin do ibana dua ari di Samaria,ala lomo roha ni angka halak disi manangihon ibana.​—Joh. 4:21-24, 40.

12, 13. (a) Boha do pangkilalaan ni angka sisean ni Jesus tingki mangida ibana mangajari borua sian Samaria? (Ida gombar di mula ni parsiajaran.) (b) Sian dia taboto ndang diantusi si Jakobus dohot si Johannes dope na diajarhon Jesus i?

¹² Ndang mura di angka apostel asa unang paimbar-imbarhon. Songgot do roha ni nasida tingki mangida Jesus mangajari sahalak borua Samaria. (Joh. 4:9, 27) Ra, alana di tingki i ndang olo angka pamimpin agama Jahudi mangkatai tu borua di jolo ni na torop. Tarlumobi ma tu borua Samaria na so hasea i. Jadi tingki mangkatai Jesus tu borua i, ditogihon siseanna do ibana asa mangan. Alai, umringkot do di ibana mangkatai dohot borua i. Alana, lomo do roha ni Amana asa marbarita ibana, tarmasuk ma tu borua Samaria on.​—Joh. 4:31-34.

¹³ Ndang diantusi si Jakobus dohot si Johannes parsiajaran na ringkot i. Tingki ro angka sisean dohot Jesus tu Samaria, dilului nasida ma inganan laho marborngin. Alai ndang diloas halak Samaria nasida marborngin disi. Pintor muruk situtu ma si Jakobus dohot si Johannes. Jala dijujui nasida do asa dibahen Jesus ro api sian surgo laho manutung huta i. Alai dipasingot Jesus do nasida. (Luk. 9:51-56) Ra, molo di huta ni nasida di Galilea dibahen songon i, ndang sampe songon i muruk ni nasida. Jadi, ala olo dope nasida paimbar-imbarhon umbahen na muruk nasida. Alai di tingki na asing, marbarita ma si Johannes tu halak Samaria, jala godang do na manangihon ibana. Gabe maila do ibana ala hea muruk ibana najolo.​—Ul. 8:14, 25.

14. Parsoalan aha do na dipasae angka apostel?

¹⁴ Ndang sadia leleng dung ari Pentakoste 33 M, adong ma parsoalan di huria alani paimbar-imbarhon. Tingki dibagihon angka dongan sipanganon tu angka na mabalu, ndang disarihon nasida na marhata Junani. (Ul. 6:1) Ra, on boi masa ala asing do bahasa ni nasida. Jadi pintor hatop ma angka apostel pasaehon parsoalan on. Dipillit nasida ma pitu baoa na marbisuk laho mambagihon sipanganon i. Jala goar ni halak Junani do goar ni nasida. Ra, on do na mambahen pos roha ni angka ina na mabalu i.

15. Songon dia si Petrus ndang mardingkan? (Ida gombar di mula ni parsiajaran.)

¹⁵ Di taon 36 M, mulai ma marbarita angka sisean ni Jesus tu sude bangso. Najolo, holan tu halak Jahudi do si Petrus marbarita. Alai dipaboa Debata ma molo halak Kristen ndang boi  mardingkan, jadi marbarita do si Petrus tu si Kornelius, sahalak tentara Rom. (Jaha Ulaon ni Apostel 10:28, 34, 35.) Dung i, olo do si Petrus rap mangan dohot angka dongan na so halak Jahudi. Alai dung piga-piga taon tingki di Antiokia, ndang olo be ibana rap mangan dohot nasida. (Gal. 2:11-14) Dipasingot si Paulus ma si Petrus, jala olo do si Petrus manjalo sipasingot i. Boi ma taida i sian surat ni si Petrus tu angka dongan na halak Jahudi dohot na so halak Jahudi di Asia. Di suratna i, didok ibana mansai ringkot do mangkaholongi sude angka donganta.​—1 Ptr. 1:1; 2:17.

16. Songon dia do pandapot ni angka halak taringot halak Kristen na parjolo?

¹⁶ Sian sitiruon na dibahen Jesus, diparsiajari angka apostel ma cara mangkaholongi “sude jolma”. (Joh. 12:32; 1 Tim. 4:10) Boi do nasida muba nang pe godang tingki na dihaporluhon. Ala marsihaholongan, ditanda do angka halak Kristen na parjolo sisean ni Jesus. Hira-hira di taon 200, sahalak panurat na margoar Tertullian manurat pandapot ni angka halak taringot halak Kristen. Didok, “Marsihaholongan do nasida sude.” Jala na asing mandok, “Sai masiurupan do nasida, nang pe ingkon mate.” Ala rade do angka halak Kristen ‘marpangalaho na imbaru’, gabe ditiru nasida ma Debata na so mardingkan tu sude halak.​—Kol. 3:10, 11.

17. Songon dia carana asa unang paimbar-imbarhon? Paboa ma pengalaman.

¹⁷ Tutu, ndang boi pintor muba hita asa unang paimbar-imbarhon halak. Sahalak donganta borua na di Prancis paboahon, maol do di ibana mangulahon i. Didok ibana, “Diajari Jahowa do ahu cara mangkaholongi, masiurupan,  jala mangkaholongi sude halak. Alai, ingkon marsitutu do ahu asa unang paimbar-imbarhon halak, jala ndang mura i. Jadi, sai jotjot do hutangiangkon taringot i.” Sahalak donganta borua di Spanyol paboahon, sipata olo dope ro tu pingkiranna laho paimbar-imbarhon halak. Didok ibana, “Boi do ahu gabe ndang paimbar-imbarhon halak be. Alai ingkon tongtong do marsitutu ahu. Mauliate ma hudok tu Jahowa. Las do rohangku boi marsada dohot angka dongan.” Ingkon tajaga do rohanta. Songon angka donganta i, ingkon marsitutu do hita asa unang paimbar-imbarhon.

18, 19. (a) Boasa ingkon tajangkon sude halak? (b) Songon dia carana mangulahon i?

¹⁸ Taingot ma, ndang tatanda dope Debata najolo. (Eps. 2:12) Alai alani holongNa, ditogu Jahowa do hita asa jonok tu Ibana. (Hos. 11:4; Joh. 6:44) Jala dijangkon Jesus do hita. Diurupi ibana do hita asa boi gabe keluarga ni Debata. (Jaha Rom 15:7.) Nang pe nunga mardosa hita, alai dijangkon Jahowa dohot Jesus do hita. Jadi ingkon tajangkon ma muse sude halak!

¹⁹ Nunga lam jonok be ajal ni portibi on. Lam tarbagi do halak, lam godang na paimbar-imbarhon jala mangkasogohon na asing. (Gal. 5:19-21; 2 Tim. 3:13) Alani i, hita angka naposo ni Jahowa, porlu do talului “habisuhon na sian ginjang i”. Boi do i mangurupi hita asa unang mardingkan jala tongtong mardame. (Jak. 3:17, 18) Las do rohanta mardongan dohot angka halak sian negara na asing. Taparsiajari do hasomalan ni nasida, jala adong do na marsiajar bahasa ni nasida. Molo taulahon on, gabe tadapot ma dame “doshon batang aek” dohot hatigoran “doshon galumbang ni laut”.​—Jes. 48:17, 18.

20. Aha do na taulahon molo masihaholongan?

²⁰ Dung marsiajar Bibel, sahalak donganta di Australia mandok, lam leleng gabe ndang olo be ibana paimbar-imbarhon. Dihilala ibana, holong do na mambahen ibana boi muba. Gabe diantusi donganta na marhata Prancis nangkin ma, molo ndang tangkas dope tatanda sasahalak, olo do sipata sogo do rohanta tu ibana. Jala diboto ibana do, “parange ni halak ndang ditontuhon sian huta hatubuanna”. Jala ujungna marhasohotan do ibana tu donganta borua na marhata Inggris! Angka pengalaman on patuduhon, boi do holong mangurupi hita asa unang paimbar-imbarhon halak. Jala, holong i boi mambahen hita tongtong togu jala marsada.​—Kol. 3:14.