Anak ni si Salomo do si Rehabeam on. Nunga 40 taon si Salomo gabe raja di Israel. (1 Raj. 11:42) Dung mate ibana, ingkon laho do si Rehabeam tu Sikem asa gabe raja. (2 Kron. 10:1) Ditanda godang halak do si Salomo alani bisukna. Jadi, ingkon songon amana i do ibana pasaehon parsoalan. Alani i, mabiar do ibana gabe raja?

Gabe marsak do halak Israel jala disuru ma utusan tu si Rehabeam laho paboahon, “Mansai dokdok do tanggungannami dibahen amangmu. Molo dipaneang ho tanggungannami jala ndang pola mamborathon tu hami, olo ma hami parentaonmu.”​—2 Kron. 10:3, 4, Bibel siganup ari.

Maol do si Rehabeam mambahen haputusan. Molo dioloi ibana pangidoan ni halak Israel, moru ma hamoraonna. Alai molo ndang dioloi, gabe mangalo ma nasida. Jadi, boha ma bahenonna? Parjolo, disungkun ibana do angka natua-tua na hea mangurupi bapana. Disuru nasida do ibana mangoloi halak Israel. Alai dung mangkatai si Rehabeam dohot angka dongan saumuranna, gabe jungkat do ibana tu halak. Didok ibana ma tu halak Israel, ”Umborat sian i dope sibahenonku. Molo dilinsing damang hamu dohot linsinglinsing, alai bahenonku ma mangalinsing hamu linsinglinsing na marsugasuga.”​—2 Kron. 10:6-14, Bibel siganup ari.

Aha ma parsiajaranna tu hita? Saonari, godang do donganta na matua naung leleng manomba Jahowa, na boi mangurupi hita mambahen haputusan na denggan. Jadi, marbisuk ma hamu jala tangihon ma nasida.​—Job 12:12.

Dipapungu si Rehabeam ma tentarana laho marporang tu sampulu marga na mangalo nasida. Alai, disuru Jahowa ma panurirang Semaya  laho mandok tu nasida, “Unang ma laho hamu marporang mangalo angka hahaanggimuna halak Israel, mulak be ma tu jabuna. Ai Ahu sandiri do mambahen umbahen na masa i.”​—1 Raj. 12:21-24, Bibel siganup ari. *

Mura do si Rehabeam mangoloi Jahowa? Boha ma annon pandapot ni halak taringot ibana? Nunga dipaboa ibana, laho uhumonna do nasida mamangke “linsinglinsing na marsugasuga”. Hape, ndang adong dibahen ibana manang aha pe tu angka na mangalo i! (Bandingkon 2 Kronika 13:7.) Manang aha pe annon pandapot ni halak taringot ibana, alai ‘ditangihon nasida do hata ni Jahowa, laho ma nasida mulak hombar tu hata ni Jahowa’.

Parsiajaranna tu hita: Marbisuk do hita molo taoloi Debata, nang pe adong na mangalesengi hita. Sai dipasu-pasu Debata do hita molo unduk tu Ibana.​—5 Mus. 28:2.

Ala unduk si Rehabeam, pasu-pasu aha do dapotna? Tongtong do ibana gabe raja di Juda dohot di Benjamin. Dipajongjong do kota-kota na baru, jala dibahen do piga-piga kota gabe lam togu. (2 Kron. 11:5-12) Alai na rumingkot, dioloi ibana do parenta ni Jahowa. Alani i, ro ma piga-piga halak sian harajaon sampulu marga i mangurupi ibana mangulahon panombaon na sintong. Alana, nunga manomba gana-ganaan be godangan halak disi. (2 Kron. 11:16, 17) Jadi saleleng unduk si Rehabeam tu parenta ni Jahowa, hot do harajaonna.

Dung gabe hot harajaon ni si Rehabeam, manimbil do ibana. Ndang dioloi ibana be parenta ni Jahowa jala gabe manomba gana-ganaan do ibana! Boasa songon i? Ala halak Amon do omakna? (1 Raj. 14:21) Ndang taboto. Alai gabe godang do halak Israel na manomba gana-ganaan. Jadi, nang pe nunga hot dibahen si Rehabeam angka kota di Juda, dipaloas Jahowa do Raja Sisak sian Misir manaluhon angka kota i!​—1 Raj. 14:22-24; 2 Kron. 12:1-4.

Lam borat do situasi na diadopi si Rehabeam tingki si Sisak dohot tentarana mangaroro Jerusalem. Alai, disuru Jahowa ma panurirang Semaya mangalehon sipasingot tu si Rehabeam dohot angka pamimpin di kota i. Didok ma, “Nunga ditadingkon hamu Ahu, dibahen i Ahu pe nunga hupasahat hamu tu bagasan tangan ni si Sisak.” Ditangihon si Rehabeam do? I do! Didok di Bibel, “Jadi dipaunduk angka [pamimpin] ni halak Israel dohot rajai ma rohanasida angka ninna ma: Bonar do Jahowa!” Alani i, dipalua Jahowa ma si Rehabeam, jala ndang talu be Jerusalem.​—2 Kron. 12:5-7, 12.

Dungkon i, tongtong do si Rehabeam mamarenta di Juda. Andorang so mate, dipillit ibana ma si Abia manggantihon ibana gabe raja. Jala, diparade ibana do angka arta tu ianakhonna asa unang mangalo nasida tu si Abia. (2 Kron. 11:21-23) Jadi, umbisuk do si Rehabeam martimbangkon tingki poso dope ibana.

Nang pe hea diulahon ibana na denggan, alai didok di Bibel, “Diulahon rajai ma hajahaton.” Boasa? Alana, “ndang marsihohot rohana . . . mangalului Jahowa”. Gabe ndang lomo roha ni Jahowa tu ibana.​—2 Kron. 12:14.

Aha do na taparsiajari sian si Rehabeam? Sipata, dioloi ibana do Jahowa jala adong do na denggan na binahenna tu naposo ni Jahowa. Alai, ndang solhot parale-aleonna tu Jahowa. Alani i, gabe ndang taronjar rohana naeng palashon roha ni Jahowa. Dung i, gabe mangulahon na jahat ma ibana jala manomba gana-ganaan. Ra, sungkun-sungkun do rohanta: ‘Tingki dioloi ibana sipasingot sian Jahowa, sian ias ni rohana do i? Manang, ala na disuru halak do?’ (2 Kron. 11:3, 4; 12:6) Ujungna, diulahon ibana muse na jahat. Mansai imbar do ibana sian ompungna, si Daud! Tutu, hea do si Daud mangulahon na sala. Alai, disolsoli ibana do pambahenanna.  Dipatudu do holongna tu Jahowa saleleng ni ngoluna.​—1 Raj. 14:8; Ps. 51:3, 19; 63:2.

Godang do na boi taparsiajari sian hatorangan on. Sipujion do halak na paradehon angka na porlu di keluargana jala mangurupi angka na asing. Alai asa diurupi Jahowa, ingkon tasomba do Ibana hombar tu lomo ni rohaNa, jala ingkon solhot parale-aleonta tu Ibana.

Asa boi songon i, ingkon tahaholongi do Jahowa sian nasa rohanta. Dipatudos do on songon manjaga api. Asa tongtong galak, ingkon ditambai do sobanna. Suang songon i ma holongta tu Jahowa. Asa boi togu, ingkon taratur do hita marsiajar Bibel, mangarimangi i, dohot martangiang. (Ps. 1:2; Rom 12:12) Gabe taronjar ma rohanta laho pasonangkon roha ni Jahowa. Jala molo taulahon na sala, pintor tapangido ma asi ni roha ni Jahowa. Jadi, unang ma tatiru si Rehabeam. Tongtong ma hita marsihohot.​—Jud. 20, 21.