1. Boasa marlas ni roha hita saonari?

LAS DO ROHANTA ala saonari naposo ni Debata lam marsinondang! Di taon naung salpu, angka naposo ni Jahowa mangurupi lobi sian 10 juta halak marsiajar Bibel. Asing ni i, marjuta halak ro tu borngin parningotan jala marsiajar ma nasida taringot holong ni Debata marhite tobusan.​—1 Joh. 4:9.

2, 3. (a) Aha do na so boi mangambati hita gabe “panondang tu portibi on”? (b) Aha do na laho taulas di parsiajaran on?

² Di liat portibi on, marragam do bahasa ni Sitindangi Ni Jahowa. Alai nang pe songon i, marsada do hita laho mamuji Jahowa. (Pgk. 7:9) Manang aha pe bahasanta, manang didia pe hita tading, boi do hita gabe “panondang tu portibi on”.​—Plp. 2:15.

³ Molo marbarita hita, marsada, jala tongtong jaga, boi ma hita gabe parohon pujian tu Jahowa. Alai songon dia do carana?​—Jaha Mateus 5:14-16.

4, 5. (a) Asing ni marbarita, songon dia do hita boi parohon pujian tu Jahowa? (b) Aha do hasilna molo burju hita? (Ida gombar di mula ni parsiajaran.)

⁴ Parohon pujian tu Jahowa do molo marbarita hita jala mangurupi halak marsiajar Bibel. (Mat. 28:19, 20) Taon 1925, didok di artikel “Light in the Darkness” (“Marsinondang di Haholomon”), di tingki ari parpudi, ndang boi hita marsihohot di jolo ni Debata molo ndang “mangalehon diri laho parohon pujian tu Debata”. Jala didok muse, “Ingkon taulahon do i marhite marbarita na uli tu sude halak, jala mangihuthon uhum ni Debata.” (The Watch Tower, 1 Juni 1925) Asing ni marbarita na uli, ingkon denggan do pangalahonta asa parohon pujian tu Jahowa. Godang do halak na mamparrohahon hita tingki marbarita. Molo burju hita jala olo manise nasida, boi do gabe denggan pandapot ni nasida taringot hita dohot taringot Debata na tasomba.

⁵ Didok Jesus do tu angka siseanna, “Tingki masuk hamu tu sada jabu, pangkulingi ma parjabu i.” (Mat. 10:12) Di inganan ni Jesus marbarita, somal do parjabu manogihon halak tu jabuna, nang pe ndang marsitandaan dope. Alai saonari on di godang inganan, ndang somal songon i. Molo adong halak na so tinanda ro tu jabu, olo do mabiar parjabu i. Alai molo burju hita tu nasida, boi do gabe pos roha ni parjabu i. Tingki marbarita hita di inganan na ribur mamangke rak beroda, gabe las do roha ni halak molo burju hita tu nasida. Jala gabe olo do nasida mambuat sijahaonta manang gabe mangkatai dohot hita!

6. Aha do na diulahon donganta naung matua asa tongtong marbarita?

⁶ Adong donganta naung marsaripe di Inggris na so tolap be leleng marbarita sian jabu tu jabu, ala nunga matua nasida. Jadi, dibahen nasida ma meja di jolo ni jabuna, jala dibahen ma angka sijahaon disi. Jonok ni singkola do jabuna i. Jadi dibahen ma sijahaon disi asa diida angka natua-tua na laho mangalap gellengna sian singkola. Adong do sian nasida na mambuat sijahaon i, songon Pertanyaan Kaum Muda—Jawaban yang Praktis, jilid 1 dohot jilid 2. Adong do sahalak donganta perintis na jotjot mandongani nasida. Diida angka natuatua ma na burju do ibana dohot dua donganta naung matua i. Jadi adong do sahalak natuatua na olo marsiajar Bibel.

7. Songon dia hita mangurupi angka pangungsi?

⁷ Godang do nuaeng on halak na laho sian huta ni nasida, jala mangungsi tu luar negeri. Aha ma na boi tabahen laho mangurupi angka pangungsi i  mananda Jahowa? Tapangkulingi ma nasida mamangke bahasa ni nasida. Asing ni i, tapangke ma aplikasi JW Language, laho mamparsiajari piga-piga hata asa boi hita mangkatai tu nasida. Dung i, patudu ma video dohot sijahaonta di bahasa ni nasida, na adong di jw.org.​—5 Mus. 10:19.

8, 9. (a) Songon dia parpunguan tonga pokan boi mangurupi hita? (b) Songon dia natua-tua mangurupi angka ianakhonna asa lam denggan markomentar?

⁸ Dilehon Jahowa do sude na tahaporluhon asa lam denggan marbarita. Umpamana, di Parpunguan Hangoluan dohot Pangkobasion, diurupi do hita asa barani manjumpangi muse jala mangurupi nasida marsiajar Bibel.

⁹ Tingki parjolo sahali ro, godang do na longang rohana ala mambege komentar ni angka dakdanak di huria. Boi ma diajari hamu angka gellengmuna asa markomentar mamangke hata ni nasida sandiri. Piga-piga halak gabe taronjar do rohana marsiajar Bibel ala mambege angka dakdanak boi paboahon haporseaonna sandiri.​—1 Kor. 14:25.

10. Songon dia ibadat keluarga boi mambahen keluarga gabe lam marsada?

¹⁰ Sada cara na asing laho parohon pujian tu Jahowa, i ma molo lam marsada hita di keluarga dohot di huria. Umpamana, hamu angka natua-tua,  bahen ma Ibadat Keluarga na taratur. Godang do angka keluarga na rap manonton JW Broadcasting, dungkon i diulas nasida ma i. Alai ingot ma, ndang sarupa parsiajaran na dihaporluhon dakdanak dohot na poso. Jadi, marsitutu ma hamu asa sude anggota keluargamuna boi mandapot parsiajaran sian ibadat keluarga.​—Ps. 148:12, 13.

11-13. Songon dia hita boi mambahen huria asa lam marsada?

¹¹ Hamu angka na poso, boi do diurupi hamu angka dongan di huria. Boi do hamu maraleale dohot angka na matua. Boi do disungkun hamu angka pengalaman ni nasida jala songon dia nasida boi marsihohot tu Jahowa. Sian pengalaman ni nasida, boi do dapotmuna parsiajaran. Boi ma hamu gabe masipatoguan! Jadi manang ise pe hita, na poso dohot na matua, boi do tajangkon angka na baru ro tu Bale Harajaon. Tadok ma horas, tajalang ma nasida, talului ma hundulanna, jala patandahon ma nasida tu angka dongan na asing. Bahen ma gabe las roha ni nasida.

¹² Angka na matua pe boi do tongtong parohon pujian tu Jahowa. Umpamana, tingki manguluhon parpunguan laho marbarita lehon ma daerah na boi dikarejohon angka na matua. Dung i, diatur ma asa didongani na poso nasida. Angka donganta na marsahit pe, olo do marmetmet ni roha ala ndang boi be marbarita songon najolo. Alai las do roha ni nasida molo diparrohahon jala diantusi hamu situasi ni nasida. Jadi angka donganta na poso, na matua, dohot naung leleng gabe Sitindangi, boi do gabe tongtong ringgas marbarita alani burju ni rohanta.​—3 Mus. 19:32.

¹³ Didok panurat Psalmen, “Dengganna i dohot sonangnai, molo tung pungu sahundulan angka na marhahamaranggi!” (Jaha Psalmen 133:1, 2.) Las do roha ni halak Israel tingki rap marpungu laho manomba Jahowa. Dipatudos do i songon miak laho mamiahi, na lambok jala angur. Suang songon i ma molo tapatudu haburjuon laho patoguhon angka dongan. Boi do i mambahen hita gabe lam marsada. Jadi, ingkon lam solhot ma hita tu angka dongan di huria.​—2 Kor. 6:11-13.

14. Songon dia hamu boi parohon pujian tu Jahowa di ingananmuna?

¹⁴ Manang didia pe hita, boi do hita parohon pujian tu Jahowa. Molo burju hita tu hombar jabunta, olo do gabe taronjar roha ni nasida laho marsiajar Bibel. Tarimangi ma: ‘Songon dia do pandapot ni hombar jabungku taringot ahu? Sai ias do jabungku? Denggan do ahu tu hombar jabungku? Olo do ahu mangurupi nasida?’ Sungkun ma donganta di huria songon dia nasida patuduhon haburjuon tu keluarga, hombar  jabu, dongan sakarejo, manang tu dongan sasingkola.​—Eps. 5:9.

15. Boasa hita ingkon tongtong jaga?

¹⁵ Molo naeng tongtong hita parohon pujian tu Jahowa, ingkon marbisuk ma hita mamangke tingkinta. Didok Jesus do piga-piga hali tu angka siseanna, “Sai jaga ma hamu.” (Mat. 24:42; 25:13; 26:41) Molo tahilala leleng nai dope “hasusaan bolon” i, olo do gabe ndang ringgas be hita mangurupi halak mananda Jahowa. (Mat. 24:21) Jala, lam leleng gabe ndang parohon pujian be hita tu Jahowa.

16, 17. Aha do na boi diulahon hamu asa tongtong jaga?

¹⁶ Ingkon lam jaga do hita. Alana portibi on nunga lam sursar. Alai taboto do nunga jonok be ari na ditontuhon Jahowa i. (Mat. 24:42-44) Ingkon sabar do hita paimahon jala tongtong ma taingot pangkirimonta. Tajaha ma Bibel ganup ari, jala tongtong ma martangiang tu Jahowa. (1 Ptr. 4:7) Tatiru ma angka donganta naung  martaon-taon marsihohot tu Jahowa. Carana, tajaha ma pengalaman ni nasida. Umpamana di artikel “Tujuh Puluh Tahun Memegang Punca Baju Seorang Yahudi”, na adong di Menara Pengawal 15 April 2012, halaman 18-21.

¹⁷ Tapangke ma godang tingki laho manomba Jahowa. Taurupi ma halak na asing, jala marsaor ma hita tu angka dongan. Gabe las ma rohanta, jala hira na hatop ma salpu tingki. (Eps. 5:16) Nunga godang na diulahon angka naposo ni Debata saleleng marratus taon. Jadi saonari, ingkon lam ringgas ma hita. Alana lam maju do ulaon ni Jahowa. Gabe lam dipuji ma Jahowa!

18, 19. Songon dia angka sintua boi mangurupi hita asa ringgas manomba Jahowa? Paboa ma sada pengalaman.

¹⁸ Nang pe hita jolma na mardosa, olo do Jahowa manjangkon hita. Dilehon Ibana do tu hita “silehon-lehonna”, i ma angka sintua di huria. (Jaha Epesus 4:8, 11, 12.) Jadi molo dijumpangi sintua hamu, disi ma tingkina boi tatiru bisuk ni nasida jala manjalo podana.

¹⁹ Adong donganta naung marsaripe di Inggris na mangadopi parsoalan di keluargana. Jadi dipangido ma asa diurupi dua sintua nasida. Dihilala istrina, ndang denggan suamina i manguluhon keluargana laho manomba Jahowa. Jala dihilala suamina, ndang malo ibana mangajari jala ndang adong dibahen ibana ibadat keluarga. Dijujui angka sintua i ma suamina asa maniru cara ni Jesus manarihon angka siseanna. Dipatogu nasida ma muse istrina asa sabar tu suamina. Jala dilehon do tudu-tudu tu nasida asa boi mambahen ibadat keluarga dohot dua ianakhonna. (Eps. 5:21-29) Marsitutu do suamina i asa denggan manguluhon keluargana. Jala dipatogu angka sintua i do ibana asa ndang marnaloja jala tongtong mangasahon Jahowa. Alani haburjuon dohot holong ni angka sintua i, gabe boi ma diurupi keluarga i!

20. Aha do hasilna molo hita marsitutu parohon pujian tu Jahowa?

²⁰ “Martua ma ganup na mangkabiari Jahowa, na marparange di angka dalanna i.” (Ps. 128:1) Marsitutu ma hamu parohon pujian tu Jahowa. Jadi, urupi hamu ma na asing asa mananda Debata, marsitutu ma asa tongtong marsada hamu di keluarga dohot di huria, jala tongtong ma jaga. Boi ma dapotmuna las ni roha sian i. Idaon ni halak ma angka na denggan sian hamu, jala nasida pe gabe olo mamuji Jahowa Debatanta.​—Mat. 5:16.