1. Songon dia do hita boi maniru Jahowa?

MANSAI holong do roha ni Jahowa tu hita. (Joh. 3:16) Lomo do rohanta maniru Ibana. Alani i, marsitutu ma hita asa “sapangkilalaan, masihaholongan, [jala] marasi ni roha” tu sude halak, tarlumobi tu “dongan sahaporseaon”. (1 Ptr. 3:8; Gal. 6:10) Tingki susa angka donganta, lomo do rohanta mangurupi nasida.

2. Di parsiajaran on, aha do na laho taulas?

² Sude na manomba Jahowa, ingkon mangadopi hasusaan. (Mrk. 10:29, 30) Ala nunga jonok ajal ni portibi on, ra lam godang do sitaonon na taadopi. Songon dia hita asa boi marsiurupan? Taulas ma contoh sian si Lot, si Job, dohot si Naomi. Jala taulas ma piga-piga hasusaan na diadopi angka donganta saonari jala songon dia hita boi mangurupi nasida.

3. Songon na disurat di 2 Petrus 2:7, 8, keputusan aha do na dibahen si Lot, jala aha do akibatna?

³ Dibahen si Lot do keputusan na sala. Dipillit ibana do tading di Sodom, hape angka halak na jahat do na tading disi. (Jaha 2 Petrus 2:7, 8.) Alai ala pinda tusi, gabe godang do hasusaan na diadopi si Lot, nang pe godang artana. (1 Mus. 13:8-13; 14:12) Jala ra, ala na holong situtu do roha ni istri ni si Lot tu kota i manang tu angka halak na disi, umbahen ndang dioloi ibana Jahowa. Alani i, tingki dibahen Jahowa udan api dohot barerang, mate ma istrina i. Dua boru ni si Lot nunga martunangan  dohot halak Sodom. Alai mate do tunangan ni nasida i. Mago do sude arta ni si Lot, jabuna, jala mate istrina. (1 Mus. 19:12-14, 17, 26) Alai nang pe songon i, tingki susa si Lot tongtong do sabar Jahowa tu ibana.

4. Songon dia do Jahowa patuduhon na sabar Ibana tu si Lot? (Ida gambar sampul.)

⁴ Nang pe dipillit si Lot tading di Sodom, alai tongtong do asi roha ni Jahowa tu ibana. Disuru Jahowa do angka suru-suruan laho paluahon keluarga ni si Lot. Alai ndang pintor dioloi ibana dohot keluargana suru-suruan i asa manadingkon Sodom. Ala ‘lambat do si Lot’, ditiop suru-suruan i ma tangan ni si Lot jala diboan kaluar sian i. (1 Mus. 19:15, 16, Bibel siganup ari) Dung i, didok suru-suruan i ma asa lari ibana tu dolok. Alai ndang dioloi ibana Jahowa. Dipangido si Lot do asa tu kota na umjonok ibana laho. (1 Mus. 19:17-20) Sabar do Jahowa tu si Lot, jala dipaloas do si Lot laho tusi. Alai dung sahat di kota i, mabiar do ibana tading disi. Pinda ma muse ibana tu dolok, hape tusi do parjolo sahali disuru Jahowa ibana laho. (1 Mus. 19:30) Mansai sabar do Jahowa tu si Lot! Songon dia hita boi maniru Jahowa?

5-6. Hombar tu 1 Tessalonik 5:14, songon dia do hita boi maniru Debata?

⁵ Songon si Lot, ra adong do donganta na mambahen keputusan na sala jala gabe susa ibana alani keputusanna i. Molo masa sisongon i, aha do na taulahon? Ra olo do gabe tubu di rohanta mandok, alani salana sandiri do umbahen na masa i tu ibana. (Gal. 6:7) Alai adong do cara na dumenggan. Tatiru ma cara ni Jahowa mangurupi si Lot. Songon dia carana?

⁶ Ndang holan laho mangalehon sipasingot disuru Jahowa suru-suruanna, alai dohot do mangurupi si Lot asa kaluar sian Sodom. Suang songon i ma nang hita. Ra, tingki adong donganta naeng mangulahon na sala, olo do tapasingot ibana. Alai ndang sae holan i, ingkon taurupi do ibana marhite Bibel. Nang pe ndang pintor diulahon tudu-tudu i, ingkon sabar do hita. Tatiru ma dua suru-suruan i. Tongtong ma taurupi angka donganta, jala tapatudu ma i sian parniulaonta ndang holan sian hata. (1 Joh. 3:18) Ra, ingkon hita do na parjolo mangkatai tu ibana, jala mangurupi ibana asa mangulahon tudu-tudu na dilehon.​—Jaha 1 Tessalonik 5:14.

7. Songon dia do hita boi maniru cara ni Jahowa mangida si Lot?

⁷ Ndang sai diingot Jahowa hasalaan ni si Lot. Disuru Jahowa do apostel Petrus manurat taringot si Lot, i ma halak na mangulahon lomo ni roha ni Debata. Tontu las do rohanta ala disesa Jahowa do hasalaanta! (Ps. 130:3) Boi do tatiru cara ni Jahowa mangida si Lot? Molo marsitutu hita mangida angka na denggan sian angka donganta, gabe lam sabar ma hita tu nasida. Jala olo ma nasida taurupi.

8. Molo marasi ni roha hita, aha do na laho taulahon?

⁸ Imbar do si Job sian si Lot. Ndang ala na sala mambahen keputusan si Job umbahen na susa ibana. Godang do hasusaan na diadopi ibana. Mago do artana, direhei halak jala marsahit na posi. Asing ni i, mate sude ianakhonna jala tolu donganna mandok hata na  mambahen hansit rohana. Boasa ndang dipatudu tolu donganna i asi ni roha tu si Job? Ala ndang diantusi nasida boasa masa i tu si Job. Didok roha ni nasida, na adong do dibahen si Job na sala umbahen masa i tu ibana. Unang ma tatiru nasida. Ingkon taboto do, holan Jahowa do na tangkas mamboto taringot situasi ni sasahalak. Alani i, manat ma tatangihon donganta na susa tingki paboahon na di rohana. Molo diulahon hamu i, na patuduhon roha sapangkilalaan do hamu tu angka donganmuna.

9. Molo marasi ni roha hita, aha do na ingkon tapasiding, jala boasa?

⁹ Molo marasi ni roha, tontu ndang olo hita manggosip taringot hasusaan ni donganta. Halak na lomo rohana manggosip, ndang mambahen dame huria, alai mambahen sega do. (Poda 20:19; Rom 14:19) Halak na so marbisuk do molo lomo rohana manggosip. Jala hatana i, boi mambahen lam hansit pangkilalaan ni donganta na susa. (Poda 12:18; Eps. 4:31, 32) Alani i, angka na denggan ma na taida sian donganta jala tapingkirhon ma songon dia hita boi mangurupi ibana!

10. Parsiajaran aha do na tadapot sian Job 6:2, 3?

¹⁰ Jaha Job 6:2, 3. Hea do si Job mandok ‘hata na oto’. Alai dungkon i, disolsoli ibana do hatana i. (Job 42:6) Songon si Job, olo do halak na marsak mandok hata na oto manang hata na so jolo dipingkiri. Dung i, disolsoli ibana do hatana i. Molo masa songon i, aha do na ingkon taulahon? Tapatudu ma asi ni roha. Ingot ma, ndang lomo roha ni Jahowa susa hita jala marsak. Naposo ni Jahowa na togu haporseaonna pe, boi  do mandok hata na so jolo dipingkiri tingki marsak. Nang pe didok ibana na so sintong taringot Jahowa manang taringot hita, unang ma pintor muruk jala unang ma tauhumi nasida.​—Poda 19:11.

11. Tingki mangalehon poda, songon dia do angka sintua maniru si Elihu?

¹¹ Sipata, porlu do dilehon poda manang sipasingot tu halak na marsak. (Gal. 6:1) Songon dia angka sintua mangulahon i? Boi do ditiru nasida si Elihu, na patuduhon roha sapangkilalaan tingki manangihon si Job. (Job 33:6, 7) Dilehon si Elihu do poda tu si Job dung diantusi ibana pangkilalaan ni si Job. Songon si Elihu, angka sintua pe ingkon manat do manangihon jala mangantusi situasi ni sasahalak. Molo diulahon nasida i, tontu gabe olo do halak manjalo poda sian nasida.

12. Dung mate suami dohot dua anakna, songon dia do pangkilalaan ni si Naomi?

¹² Sahalak borua na setia do si Naomi. Alai dung mate suami dohot dua anakna, gabe naeng diganti si Naomi ma goarna gabe “si Mara” lapatanna “si Paet”. (Rut 1:3, 5, 20, 21) Alai parumaenna si Rut, tongtong do rap dohot ibana. Diparade si Rut do angka na porlu di si Naomi jala lambok do ibana mangkatai tu si Naomi. Dipatudu si Rut do holongna tu si Naomi marhite hata na patoguhon roha.​—Rut 1:16, 17.

13. Boasa angka donganta na mate dongan saripena porlu diurupi?

¹³ Tingki adong donganta na mate dongan saripena, porlu do ibana diurupi. Halak na mardongan saripe, dos do songon dua hau na rap tubu. Dung martaon-taon, marsijalinan do angka uratna. Molo mate sada hau i, tontu balga do pengaruhna tu hau na sada nai. Suang songon i ma, molo mate dongan saripe ni sasahalak, balga do pengaruhna i tu ibana. Jala leleng do mago lungun ni rohana i. Si Paula * na tompu mate suamina mandok, “Muba situtu do ngolungku, jala ndang mararga be ahu huhilala. Ndang adong be ale-alengku. Somalna, hupaboa do sude tu suamikku aha na adong di rohangku. Di tingki susa nang sonang, sai rap do hami. Molo susa huhilala, rade do ibana manangihon ahu. Alai dung mate ibana, hira na adong ma huhilala na mago sian diringku.”

14-15. Songon dia hita boi mangapuli donganta na mate dongan saripena?

¹⁴ Songon dia hita boi mangapuli donganta na mate dongan saripena? Na rumingkot taulahon, ingkon mangkatai do hita tu ibana nang pe ndang taboto aha na laho tadok manang mabiar hita sala mandok hata. Si Paula na dipaboa nangkin mandok, “Huboto do, molo hamatean i mambahen halak susa. Alani i, olo do gabe mabiar halak na laho mangapuli mandok hatana, atik boha hatana i mambahen jut roha ni na diapuli i. Alai tumagon do i sian apala ndang adong mandok manang aha.” Ndang porlu godang tadok hata tu halak na marhabot ni roha. Didok si Paula muse, “Huargai do tingki adong dongan na mandok, ‘Dohot do ahu marlungun ni roha.’”

¹⁵ Si William na mate istrina piga-piga taon naung salpu mandok, “Huargai do tingki didok angka dongan angka na denggan taringot istrikku. On  mambahen pos rohangku na dihaholongi jala diargai nasida do istrikki. Balga do pengaruhna tu ahu. Hata ni nasida i mangapuli rohangku. Alana mansai arga do istrikki di ahu.” Donganta na mabalu na margoar si Bianca mandok, “Tarapul do rohangku tingki ditogihon angka dongan ahu asa rap martangiang jala dijahahon nasida piga-piga ayat sian Bibel. Las do muse rohangku tingki ditaringoti nasida angka na denggan taringot suamikki, jala denggan do ditangihon nasida tingki hupaboa muse taringot ibana.”

16. (a) Aha do na ingkon taingot tingki mangurupi halak na marhabot ni roha? (b) Hombar tu Jakobus 1:27, aha do tanggung jawab na dilehon Jahowa tu hita?

¹⁶ Songon si Rut na tongtong mandongani si Naomi, hita pe ingkon tongtong do mangurupi halak na marhabot ni roha. Si Paula na dipaboa nangkin mandok, “Tingki baru mate suamikku, godang do angka dongan na mangurupi ahu. Alai lam leleng, sibuk do sude angka donganta tu ulaonna be. Hape sasintongna, ndang boi dope pintor tarapul rohangku. Ringkot do diurupi halak na marhabot ni roha, ra saleleng marbulan-bulan manang martaon-taon.” Tontu ndang sai sarupa sude halak. Adong do na hatop boi tarapul rohana jala ndang sai marlungun ni roha. Alai na asing, olo do gabe lungun rohana muse tingki adong ulaon na mambahen ibana mangingot halak naung mate i. Ingot ma, dilehon Jahowa do tanggung jawab tu hita  laho mangapuli halak na marhabot ni roha.​—Jaha Jakobus 1:27.

17. Boasa angka halak na ditadingkon dongan saripena porlu taurupi?

¹⁷ Halak na ditadingkon dongan saripena, boi do gabe mandele jala mansai hansit do i. Si Joyce na ditadingkon suamina alani borua na asing mandok, “Hansit do pangkilalaan molo mate dongan saripe, alai humansit do molo disirangkon alani borua na asing. Molo mate suamikku ala marsahit manang ala na kecelakaan, tontu ndang na dipillit suamikku asa masa i. Alai tingki ditadingkon ahu alani borua na asing, ibana do na mamillit i. Jala mansai hansit do on.”

18. Aha do na boi taulahon laho mangurupi angka dongan na so adong be dongan saripena?

¹⁸ Tingki taapuli angka dongan na ditadingkon dongan saripena, on patuduhon na holong do rohanta tu nasida. Di situasi sisongon i, porlu do di nasida dongan na burju. (Poda 17:17) Songon dia carana asa boi hita gabe dongan na burju? Boi do tatogihon nasida asa rap mangan, rap mardalani, manang rap marbarita. Sipata, boi do tatogihon rap dohot tu ibadat keluarga. Molo taulahon i, las ma roha ni Jahowa. Alana jonok do Ibana tu “angka halak na marsak roha” jala “mangondihon angka na mabalu”.​—Ps. 34:19; 68:6, Bibel siganup ari.

19. Hombar tu 1 Petrus 3:8, aha do na ingkon taulahon?

¹⁹ Satongkin nai, dung mamarenta Harajaon ni Debata di tano on, sude “angka hasusaan di tingki na salpu, nunga salpu be i jala dihalupahon.” Tontu tarpaima do hita tingki ‘angka na masa di tingki na salpu i, halupahononhon saluhut’. (Jes. 65:16, 17, Bibel siganup ari) Alai andorang so ro tingki i, masiurupan ma hita dohot angka dongan jala tapatudu ma sian pangkataion dohot sian parniulaonta na holong do rohanta tu sude dongan sahaporseaonta.​—Jaha 1 Petrus 3:8.