POS DO rohatta ditogu-togu jala diurupi Jahowa do naposona saleleng “ari parpudi”. (2 Tim. 3:1) Alai hita sandiri do na mamillit lao mangihutton tudu-tudu sian Jahowa. Boi do tapatudos situasitta songon halak Israel najolo tikki di padang belantara. Porlu do nasida mangihutton tudu-tudu na dilehon marhite soara tarompet.

Disuru Jahowa do si Musa mambahen dua tarompet na sian perak asa gabe tanda tu bangso Israel lao “marpungu manang laho borhat”. (4 Mus. 10:2, Bibel siganup ari) Marasing-asing do soara ni tarompet na dipalu akka malim. Gabe boi ma diboto bangso Israel aha na ikkon ulahonon ni nasida. (4 Mus. 10:3-8) Saonari, marragam do tudu-tudu na tadapot sian Jahowa. Di artikel on, taulas ma tolu tudu-tudu na dilehon Jahowa, jala dos do i songon soara ni tarompet di jaman ni Israel najolo. Tudu-tudu i, i ma tikki digokkon hita asa marpungu, tikki digokkon akka sintua asa dilatik, jala tikki adong penyesuaian na dilehon tu sude huria.

Dipalu akka malim ma dua tarompet, na patuduhon disuru Jahowa sude halak Israel asa marpungu di jolo ni pintu ni tabernakel. (4 Mus. 10:3) Sude suku na mambahen kemah di humaliang ni tabernakel i, boi do mambege soara ni tarompet i. Akka halak na mambahen kemah di jonok ni pintu ni tabernakel boi do hatop sahat. Alai adong do akka halak na mambahen kemah dao sian tabernakel jala porlu do tikki dohot gogo di nasida asa boi sahat. Alai, dao manang na jonok pe nasida, lomo do roha ni Jahowa asa sude halak marpungu jala manangihon tudu-tudu.

Saonari dang disuru be hita asa marpungu di tabernakel, alai tong do digokkon hita asa ro tu parpunguan. Tarmasuk ma i kebaktian regional dohot acara istimewa na asing. Disi, tadapot do akka tudu-tudu na rikkot. Jadi marlas ni roha do hita sude, ala tajalo gokkon na sian Jahowa i. Memang, adong do sian hita na ro sian inganan na dao asa boi ro tu parpunguan i. Alai molo marsitutu hita asa ro, massai godang do laba na boi tadapot.

Songon dia do taringot akka donganta na tading di inganan na dao sian lokasi parpunguan i? Boi do nasida mandapot laba sian acara i? Ala nungnga maju be teknologi saonari, godang do akka donganta na boi mandapot laba sian acara parpunguan i. Gabe songon na rap marpungu do nasida dohot akka donganta na ro tusi. Contohna, tikki adong kunjungan sian wakil kantor pusat, dibahen kantor cabang di Benin ma siaran streaming tu akka donganta di kota Arlit, Niger na adong di Gurun Sahara. Adong do 21 halak na dohot mangida acara i. Nang pe nasida tading di  inganan na ao, alai songon na rap marpungu do nasida dohot 44.131 halak na ro tu parpunguan i. Sahalak donganta mandok, “Mauliate godang ma ala dibahen hamu siaran streaming tu inganannami. Gabe boi ma huboto hami na holong situtu do rohamuna tu hami.”

Molo holan sada do tarompet na dipalu akka malim, berarti holan akka pamimpin suku do na ikkon marpungu tu tabernakel. (4 Mus. 10:4) Disi, boi do dapot ni nasida tudu-tudu na rikkot dohot pelatihan sian si Musa. On boi mangurupi nasida mangulahon tanggung jawabna lao mamimpin akka halak na adong di suku ni nasida. Molo gabe sahalak pamimpin hamu di tikki i, tottu marsitutu do hamu asa boi ro jala manangihon tudu-tudu na dilehon disi.

Saonari, akka sintua di huria dang didok “pamimpin”, jala dang diparetta nasida biru-biru ni Debata. (1 Ptr. 5:1-3) Alai marsitutu do nasida lao mamparmahani biru-biru ni Debata. Alani i, las do roha ni nasida tikki digokkon asa mandapot pelatihan di Singkola Pangkobasion tu Harajaon. Di sikkola on, diurupi do akka sintua asa lam denggan mengurus kebutuhan di huria. Gabe boi ma diurupi nasida akka dongan di huria asa lam jonok tu Jahowa. Nang pe dang hea hamu dohot tu sikkola on, alai tong do dapotmuna laba sian i. Alana dipakke akka sintua na dohot tu sikkola on do akka na diparsiajari nasida i lao mangurupi huria.

Sipata dibahen akka malim di Israel do muba-uba soara ni tarompet i. On patuduhon na disuru Jahowa do sude bangso i asa papindahon kemah ni nasida. (4 Mus. 10:5, 6) Taratur do nasida tikki pinda, alai porlu do godang tikki dohot gogo lao mangulahon i. Sipata olo do maol dihilala piga-piga halak Israel lao pinda tu inganan na asing. Boasa?

Adong do na makkilala pajotjothu jala toppu-toppu do nasida disuru pinda. “Olo do sipata holan sian botari tu na manogotna do ombun i di ginjang ni [tabernakel] i.” Sipata olo do muse “dua ari, manang na sabulan, manang na sataon”. (4 Mus. 9:21, 22, Bibel siganup ari) Jala, 4 Musa bindu 33 mandok, adong hira-hira 40 hali halak Israel pinda tu inganan na asing.

Sipata, dapot ni halak Israel ma inganan na denggan jala dibahen nasida ma kemah disi. Tottu, las do roha ni nasida ala boi dapot inganan na denggan di tonga-tonga ni “padang pasir na bidang jala na gok parmaraan”. (5 Mus. 1:19, Bibel siganup ari) Alani i, olo do ra borat dihilala nasida molo disuru pinda tu inganan na so denggan.

Tikki naeng pinda bangso i, ikkon sabar do piga-piga suku paimahon giliranna lao borhat. Dibege sude halak do soara ni tarompet na muba-uba i, alai dang boi pittor borhat nasida sude. Tikki parjolo sahali dibege nasida soara ni tarompet na muba-uba i, on patuduhon ikkon borhat do akka suku na adong di sabola timur ni tabernakel, i ma suku Juda, Isasar dohot Zebulon. (4 Mus. 2:3-7; 10:5, 6) Dung borhat nasida, dibahen akka malim ma muse soara ni tarompet na muba-uba i, on patuduhon ikkon borhat do tolu suku na asing na adong di sabola selatan ni tabernakel. Songon i ma torus dibahen akka malim sahat tu na borhat sude bangso i.

Olo do ra maol dihilala hamu mangihutton piga-piga penyesuaian na dibahen organisasi. Ra, didok rohamu pagodangku do penyesuaian na dibahen. Manang dihilala hamu nungnga denggan be akka tudu-tudu na dibahen saleleng on jala dang lomo rohamu molo dipauba muse i. Manang aha pe alasanna, tottu dang mura di hamu lao mangihutton tudu-tudu na baru i, jala porlu do tikki di hamu asa boi mangulahon i. Alai, molo marsitutu hita mangihutton tudu-tudu na dibahen, dapotta ma pasu-pasu sian Jahowa.

Di jaman ni si Musa, ditogu-togu Jahowa do marjuta bawa, borua dohot akka dakdanak mamolus padang belantara. Dang boi nasida martahan molo dang di togu-togu Jahowa. Saonari, ditogu-togu Jahowa do hita saleleng ari parpudi on, diurupi Ibana do hita asa toktong jonok tu Ibana jala asa toktong togu haporseaotta. Alani i, marsitutu ma hita asa unduk, songon halak Israel na mangihutton tudu-tudu na dilehon marhite tarompet!