1. Boha do pakkilalaan ni Jahowa molo adong sada naposona na mulak tu Ibana?

SONGON naung taulas di parsiajaran naung salpu, dipatudos Jahowa do dirina songon sahalak parmahan na burju na manarihon ganup biru-biruna. Jala dilului Ibana do biru-biruna na mago. Didok Jahowa do tu halak Israel na manadikkon Ibana, “Mulak ma hamu tu ahu, asa mulak ahu tu hamu.” Jala taboto do, toktong do songon i pakkilalaan ni Jahowa ala didok Ibana, ‘Ndang mubauba ahu.’ (Mal. 3:6, 7) Didok Jesus, las hian do roha ni Jahowa dohot akka suru-suruan molo adong sada naposona na mulak tu Ibana.​—Luk. 15:10, 32.

2. Aha do na lao taulas di parsiajaran on?

² Saonari, taulas ma parsiajaran sian tolu tudosan ni Jesus. Sian akka tudosan i, boi ma taboto songon dia carana mangurupi akka halak na mandao sian Jahowa. Taulas ma muse akka parange na ikkon tapatudu asa boi mangurupi nasida. Jala boasa boi las rohatta molo marsitutu hita mangurupi nasida.

3-4. Di tudosan na disurat di Lukas 15:8-10, boasa marsitutu borua i mangalului hepeng logam drakhma na mago?

³ Ikkon marsitutu do hita mangalului akka halak na lomo rohana mulak tu Jahowa. Di Injil Lukas, dipaboa Jesus do tudosan taringot sahalak borua na mangalului hepeng logam drakhma na mago. Sian tudosan i, boi ma taida na marsitutu do borua i mangalului hepengna.​—Jaha Lukas 15:8-10.

⁴ Dipaboa Jesus do pakkilalaan ni borua i tikki dapotna hepeng logam drakhma na mago i. Di jaman ni Jesus, tikki muli sahalak borua Israel, olo do ra dilehon omakna sappulu hepeng logam drakhma tu ibana. Jadi boi ma tabayakkon mararga situtu do sada hepeng logam i di borua i. Didok roha ni borua i, na dabu do ra hepengna i tu lante. Jadi dipagalak ibana ma palitona lao mangalului i. Alai ala dang pola torang palito i, dang dapotna dope hepengna. Jadi manat do disapu  ibana jabuna. Tikki manapu, diida ibana ma adong na marhillong di lante. I do hape hepengna na mago i. Las hian do rohana! Dijou ibana ma akka dongan dohot tetanggana lao paboahon taringot i.

5. Boasa ikkon marsitutu hita mangalului akka dongan na so aktif?

⁵ Songon na taida di tudosan ni Jesus, molo adong barangta na mago, ikkon marsitutu do hita mangalului i. Suang songon i ma akka donganta na so aktif. Ikkon marsitutu do hita mangalului nasida. Ra nungnga martaon-taon nasida dang ro tu parpunguan dohot marbarita. Jala olo do ra nungnga pinda nasida, alai dang taboto tu dia. Pos ma rohatta, saonari adong do akka donganta na lomo rohana mulak tu Jahowa. Lomo do rohana manomba Jahowa muse rap dohot akka donganna, alai porlu do nasida diurupi.

6. Songon dia sude na di huria boi mangalului akka dongan na so aktif?

⁶ Ise do na boi dohot mangalului akka dongan na so aktif? Sude hita, tarmasuk ma i akka sintua, perintis, penyiar, dohot keluarga ni dongan na so aktif i. Adong do dongan manang keluargamuna na so aktif? Aha do na lao diulahon hamu molo pajuppang dohot akka dongan na so aktif tikki marbarita manang tikki kesaksian di tempat umum? Paboa ma tu nasida molo lomo do rohana dikunjungi, asa dilehon nomor teleponna tu akka sintua di huria.

7. Aha do na boi diparsiajari hamu sian na diulahon sahalak sintua na margoar si Thomas?

⁷ Songon dia akka sintua mangalului akka dongan na so aktif na lomo rohana mulak tu Jahowa? Parrohahon ma pengalaman ni sahalak sintua sian Spanyol na margoar si Thomas. * Diurupi ibana do lobi sian 40 donganta na so aktif asa mulak tu Jahowa. Didok si Thomas, “Parjolo sahali, husukkun ma akka dongan na mamboto didia saonari jabu ni akka dongan na so aktif. Manang, husukkun ma nasida, diingot nasida dope akka ise na so ro be marpungu. Godang do akka dongan di huria na semangat mangurupi. Dung i, tikki ro au manjuppangi akka dongan na so aktif i, husukkun do taringot ianakkon dohot keluarga ni nasida. Olo do ra, najolo nungnga dohot marpungu ianakkon ni nasida, manang nungnga sanga gabe penyiar. Nasida pe boi do diurupi asa mulak tu Jahowa.”

8. Sian tudosan taringot anak na mago na disurat di Lukas 15:17-24, aha do na diulahon sahalak ama tikki marhamubaon anakna?

⁸ Parange na songon dia do na ikkon tapatudu asa boi taurupi akka dongan na lomo rohana mulak tu Jahowa? Boi ma hita marsiajar sian tudosan ni Jesus taringot anak na mago. (Jaha Lukas 15:17-24.) Dipaboa Jesus do songon dia anak na mago i manolsoli keputusanna jala mulak muse tu jabu. Tikki diida bapakna ibana, marlojong do bapakna lao mandapotton jala mangkaol ibana. Dipapos do rohana holong situtu do bapakna i tu ibana. Alai sai manolsoli do anakna i, didok ibana dang tama be ibana gabe anak. Diattusi bapakna do pakkilalaanna i. Dipatudu bapakna ma, toktong do ibana gabe anakna. Dang na dibahen ibana gabe parkarejo. Dibahen bapakna do pesta, jala dilehon ma tu ibana pakkean na bagak. Gabe pos ma rohana, na dijakkon bapakna i do muse ibana.

9. Akka parange aha do na ikkon tapatudu asa boi mangurupi akka na so aktif mulak tu Jahowa? (Ida kotak “ Songon Dia Hita Mangurupi Halak na Naeng Mulak tu Jahowa.”)

⁹ Dos do Jahowa songon ama na di tudosan i. Holong do rohana tu akka dongan na so  aktif, jala lomo rohana asa mulak muse nasida. Tatiru ma Jahowa asa boi hita mangurupi nasida. Tapatudu ma hasabaron, roha sapakkilalaan, dohot holong. Boasa porlu tapatudu akka parange on, jala songon dia carana?

10. Boasa ikkon sabar hita mangurupi akka dongan na so aktif?

¹⁰ Ikkon sabar do hita mangurupi akka dongan na so aktif. Alana porlu do tikki di nasida lao padenggatton parale-aleonna tu Jahowa. Godang akka donganta na so aktif mandok, sai torus do akka sintua dohot akka dongan di huria ro manjuppangi nasida. I do alana gabe olo nasida mulak tu Jahowa. Sahalak donganta borua sian Asia na margoar si Nancy mandok, “Adong do ale-aleku di huria na mangurupi au. Holong do rohana tu au jala nga songon kakakku ibana. Ditaringoti ibana do muse akka na denggan na hea dihilalala hami najolo. Sabar do ibana manangihon au tikki hupaboa pakkilalaanku, jala barani do ibana paingotton au. Ale-ale na burju do ibana. Rade do ibana mangurupi tikki sadihari pe.”

11. Boasa ikkon tapatudu roha sapakkilalaan tikki mangurupi halak na jut rohana?

¹¹ Tikki jut roha ni sasahalak, gabe haccit do pakkilalaanna. Alai molo tapatudu roha sapakkilalaan, boi do i mangubati lukkana i. Piga-piga donganta gabe dang aktif be, ala adong sasahalak di huria na mambahen haccit rohana. Jala nang pe nungnga martaon-taon, tong dope jut rohana. Alani i, gabe dang olo nasida mulak tu Jahowa. Adong do ra sian nasida na mandok, dang adil na dibahen donganna i tu nasida. Di tikki sisongon i, dihaporluhon nasida do dongan na olo manangihon  jala na mangattusi pakkilalaan ni nasida. (Jak. 1:19) Si Maria, sahalak donganta na hea dang aktif mandok, “Porlu do di au dongan na sabar manangihon, na olo mangapuli, jala rade mangurupi.”

12. Boasa holong ni Jahowa dipatudos songon tali?

¹² Di Bibel, dipatudos do holong ni Jahowa tu naposona songon tali. Aha do lapatanna? Parrohahon ma tudosan on: Bayakkon ma molo naeng lonong hamu di tonga ni laut. Dung i adong ma sasahalak sian kapal, dilemparhon ibana ma pelampung tu hamu. Ala dilehon pelampung, gabe boi ma hamu mumbang. Tottu diargai hamu do pangurupionna i. Alai dang sae holan i. Ngali do aek ni laut i. Olo do gabe mate hamu molo dang pittor dipanaek tu kapal. Jadi dilemparhon ibana ma tali tu hamu jala ditarik ma hamu asa naek tu kapal. Suang songon i ma Jahowa. Didok Ibana do taringot halak Israel na mandao sian Ibana, ‘Ahu manogu nasida marhitehite tali haholongon.’ (Hos. 11:4) Saonari pe, dang muba pakkilalaan ni Jahowa tu akka na mandao sian Ibana ala marsak jala gok sitaononna. Lomo do roha ni Jahowa asa diboto nasida na holong do rohana tu nasida. Lomo do rohana mangurupi nasida asa mulak tu Ibana. Jala, boi do dipakke Jahowa hamu lao patuduhon holongna tu nasida.

13. Sian pengalaman ni si Pablo, songon dia do holongta tu akka dongan na so aktif boi mangurupi nasida mulak tu Jahowa?

¹³ Rikkot do molo jotjot tadok tu akka dongan na so aktif i, na tahaholongi do nasida, jala holong do roha ni Jahowa tu nasida. Parrohahon ma pengalaman ni donganta si Pablo na dipaboa di artikel sebelumna. Hea do ibana dang aktif saleleng lobi sian 30 taon. Didok  ibana, “Hea do sada tikki, adong sahalak donganta borua naung matua ro tu jabukku naeng manjuppangi au. Lambok do ibana makkatai tu au, jala sian i tarida do holongna. Gabe tangis ma au songon dakdanak. Hudok ma tu donganta i, hira na disuru Jahowa do ibana asa makkatai tu au. Mulai sian i, gabe olo ma au mulak tu Jahowa.”

14. Songon tudosan na dipaboa di Lukas 15:4, 5, aha do na diulahon sahalak parmahan dung dapotna biru-biru na mago i?

¹⁴ Ikkon torus do taurupi akka dongan na so aktif. Songon anak na mago na dipaboa di tudosan ni Jesus, ra nungnga leleng haccit roha ni akka donganta on, jala dang boi pittor malum i. Asing ni i, ala unggodang tikki na dipakke nasida tu ulaon ni portibi on, gabe dang togu be parale-aleonna tu Jahowa songon najolo. Jadi, ikkon taurupi do nasida asa padenggatton parale-aleonna tu Jahowa. Di tudosan taringot biru-biru na mago, dipaboa Jesus do aha na diulahon parmahan na burju i. Dung dapotna biru-biru na mago i, dibahen ma i tu abarana jala diboan mulak tu handang. Tottu, nungnga godang tikki dohot gogona dipakke lao mangalului biru-biru i. Alai diboto ibana, ala gale dope biru-biru i, diompa ibana ma biru-biru i jala boanonna muse mulak tu handang.​—Jaha Lukas 15:4, 5.

15. Songon dia hita mangurupi akka dongan na naeng mulak tu Jahowa? (Ida kotak “ Pangurupion na Massai Arga.”)

¹⁵ Memang, porlu do godang tikki dohot gogo lao mangurupi akka donganta na so aktif. Alai dilehon Jahowa do tu hita tondi parbadiana, Bibel dohot akka publikasi na diparade organisasi. Gabe boi ma hita mangurupi nasida patoguhon parale-aleonna tu Jahowa.  (Rom 15:1) Songon dia carana? Sada sintua naung berpengalaman mandok, “Godang donganta na so aktif na naeng mulak tu Jahowa porlu do diurupi marsiajar Bibel.” * Jadi, molo dipangido akka sintua hamu lao manguluhon parsiajaran Bibel dohot donganta na so aktif, las do rohamuna mangulahon i? Sada sintua na asing mandok, “Penyiar na manguluhon parsiajaran Bibel dohot dongan na so aktif i, porlu do gabe dongan na burju jala boi dihaporseai.”

16. Sian dia taboto na diurupi akka suru-suruan do hita?

¹⁶ Godang do pengalaman na patuduhon, diurupi akka suru-suruan do hita lao mangalului akka dongan na so aktif. (Pgk. 14:6) Contohna, i ma pengalaman ni si Silvio sian Ekuador. Martangiang do ibana asa dikirim Jahowa sasahalak lao mangurupi ibana mulak tu Jahowa. Tikki martangiang dope ibana, ro do dua sintua tu jabuna. Las do roha ni dua sintua i ala boi mangurupi donganta on asa boi mulak tu Jahowa.

17. Songon dia do pakkilalaatta ala boi mangurupi akka dongan na so aktif?

¹⁷ Las hian do rohatta ala boi mangurupi akka dongan na so aktif mulak tu Jahowa. Si Salvador, sahalak perintis na marsitutu mangurupi akka dongan na so aktif mandok, “Molo huingot muse akka donganta naung mulak tu Jahowa, las hian do rohakku. Olo do sampe tangis au. Sada hasangapon do di au ala boi rap saulaon dohot Jahowa lao mangurupi biru-biruna kaluar sian portibi ni Sibolis jala mulak muse tu Ibana.”​—Ul. 20:35.

18. Molo dang dohot be hamu marbarita jala ro tu parpunguan, aha do na porlu diingot hamu?

¹⁸ Molo dang dohot be hamu marbarita jala ro tu parpunguan, pos ma rohamuna toktong do dihaholongi Jahowa hamu. Lomo do roha ni Jahowa asa mulak hamu tu Ibana. Memang, ikkon marsitutu do hamu asa boi mulak tu Jahowa. Alai songon ama na dipaboa di tudosan ni Jesus, dipaima Jahowa do hamu jala las situtu do rohana lao manjakkon hamu.