1, 2. Boasa ingkon taulas taringot tu opat raja ni Juda?

MOLO diida hamu sasahalak tarsulandit jala madabu di sada dalan, tontu hamu pe gabe manat ma molo mardalan sian i. Suang songon i, molo tarimangi hasalaan ni na asing, boi ma tapasiding hasalaan na sarupa. Umpamana, taparsiajari ma hasalaan ni halak na disurat di Bibel.

² Di artikel minggu naung salpu, nunga taulas taringot tu opat raja ni Juda na manomba Jahowa sian nasa roha. Alai, hea do diulahon nasida hasalaan. Disurat do di Bibel taringot tu parngoluon ni nasida asa boi tarimangi jala mandapot parsiajaran sian i. Aha do na taparsiajari sian nasida, jala songon dia do asa unang taulahon hasalaan na sarupa?—Jaha Rom 15:4.

3-5. (a) Nang pe si Asa manomba Jahowa sian nasa rohana, hasalaan aha do na diulahon ibana? (b) Boasa si Asa marhaposan tu jolma tingki laho marporang mangalo si Baesa?

³ Na parjolo, taulas ma taringot tu si Asa. Tingki ro sajuta tentara ni Etiopia mamorangi Juda, marhaposan tu  Jahowa do si Asa. Alai tingki mangalo si Baesa, i ma raja ni Israel, ndang marhaposan tu Jahowa ibana. Lomo roha ni si Asa asa unang dipatogu si Baesa kota Rama, sada kota di parbatasan ni Israel dohot harajaon ni Juda. (2 Kron. 16:1-3) Disogok si Asa ma raja ni Ram asa mangurupi ibana. Tingki ro halak Ram mamorangi halak Israel, ”ndang ditorushon [si Baesa] be patoguhon kota Rama, ditadingkon ma ulaonna i”. (2 Kron. 16:5, Bibel siganup ari) Dirimpu si Asa, nunga sintong na pinillitna i.

⁴ Songon dia do pangkilalaan ni Jahowa? Ndang las roha ni Jahowa mangida si Asa. Disuru ma panurirang Hanani pasingothon si Asa. (Jaha 2 Kronika 16:7-9.) Didok si Hanani tu si Asa, ”Olat ni on masa ma hamusuon di ho.” Tutu, si Asa do na mangarajai kota Rama. Alai saleleng ni ngoluna, godang do parporangan na diadopi ibana dohot rayatna.

⁵ Di minggu na salpu, taboto las roha ni Jahowa mangida si Asa. Nang pe mardosa si Asa, diboto Debata do na holong roha ni si Asa tu Ibana. (1 Raj. 15:14) Alai ala mangulahon na sala, ndang boi dipasiding si Asa pangkorhon ni ulaonna. Boasa si Asa marhaposan tu diri sandiri dohot tu jolma, ndang tu Jahowa? Ra dirimpu si Asa, nasida boi monang ala mangasahon pamingkirionna sandiri tingki marporang. Manang, ditangihon ibana pandapot na sala sian na asing.

6. Aha do na taparsiajari sian hasalaan ni si Asa? Bahen ma tudosan.

⁶ Aha do na taparsiajari sian si Asa? Sai marhaposan tu Jahowa ma hita, unang tu diri sandiri. Tapangido ma pangurupionNa, ndang soal songon dia sitaononta. Tapingkirhon ma: Tingki laho pasaehon parsoalan, marhaposan tu pamingkirionku do ahu? Manang, jolo husulingkiti do hatorangan sian Bibel, jala mangasahon i tingki pasaehon parsoalan? Umpamana alani keluarga, ra gabe maol hamu marpungu jala ro tu kebaktian. Tingki masa sisongon i, dipangido hamu do pangurupion tu Jahowa asa diboto hamu na laho ulahononmuna? Manang, ala nunga leleng ndang karejo, olo do ra adong mangalehon karejo tu hamu. Dipaboa hamu do tu ibana na ingkon marpungu hamu ganup minggu, jala ndang mabiar nang pe ingkon dipakaluar sian i? Ndang soal songon dia sitaononta, taingot ma hata ni panurat psalmen, ”Pasahat ma dalanmu tu Jahowa jala haposi Ibana, asa Ibana paturehon.”—Ps. 37:5.

7, 8. Aha do hasalaan na diulahon si Josapat, jala aha do pangkorhonna? (Ida gombar di mula ni parsiajaran.)

⁷ Saonari taulas ma taringot tu anak  ni si Asa, na margoar si Josapat. Denggan do parangena jala mambahen las roha ni Jahowa. Tingki marpangunsandean tu Jahowa, diulahon ibana do na denggan. Alai, hea do ibana mangulahon na sala. Disuru do anakna mangalap boru ni Raja Ahab na jahat. Sahata do si Ahab dohot si Josapat mamorangi halak Ram, nang pe nunga dipasingot panurirang Mika ibana asa unang mangulahon i. Di parporangan i, ro ma halak Ram laho mambunu si Josapat. (2 Kron. 18:1-32) Tingki mulak si Josapat tu Jerusalem, disungkun panurirang Jehu ma ibana, ”Tung na jadi ma di roham tolongan halak parjahat manang haholongan halak na hinagigihon ni Jahowa?”—Jaha 2 Kronika 19:1-3.

⁸ Tingki si Josapat dipasingot si Jehu, muba do ibana sian hasalaanna? Ndang muba. Nang pe lomo rohana mambahen las roha ni Jahowa, maraleale do muse ibana tu na so manomba Jahowa. Donganna, i ma Raja Ahasia, anak ni si Ahab. Rap do si Josapat dohot si Ahasia mambahen kapal. Alai, sega ma sude kapal i andorang so dipangke nasida.—2 Kron. 20:35-37.

9. Aha do pangkorhonna molo ndang manat hita mamillit dongan?

⁹ Aha do na taparsiajari sian na masa tu si Josapat? Diulahon si Josapat do na denggan jala ”mangalului Jahowa sian nasa rohana do ibana”. (2 Kron. 22:9) Alai, didongani ibana do angka na so manomba Jahowa, jala on parohon jea tu ngoluna. Hea do ibana naeng tarbunu. Ingot ma na didok di  buku Poda, ”Manang ise na mangkombar halak na bisuk, gabe marbisuk do, alai manang ise na sauduran dohot halak na oto, manjadi jahat do.” (Poda 13:20) Lomo do rohanta paboahon taringot Jahowa tu na asing. Alai, marjea do ngolunta molo solhot tu halak na so manomba Jahowa.

10. (a) Molo naeng marhasohotan, aha do na taparsiajari sian si Josapat? (b) Aha do na ingkon taingot?

¹⁰ Molo naeng marhasohotan, aha do na taparsiajari sian si Josapat? Ra, lomo rohanta tu sasahalak na so manomba Jahowa. Ninna rohanta, di organisasi ni Jahowa, ndang adong na pas di rohanta na boi gabe dongan saripe. Manang, sai didok keluarganta tu hita asa marhasohotan andorang so lam matua. Tutu do i nian, ditompa Jahowa do hita asa mangkaholongi jala dihaholongi. Alai, molo ndang jumpangta dope halak na pas di rohanta, aha na ingkon taulahon? Tarimangi ma na masa tu si Josapat. Somalna, dipangido ibana do tudutudu sian Jahowa. (2 Kron. 18:4-6) Alai dung maraleale tu si Ahab, ditundalhon si Josapat ma sipasingot ni Jahowa. Ingkon diingot si Josapat, ”manatap manonggor do mata ni Jahowa manatap sandok tano on humaliang, laho mangalehon gogo tu halak parroha na marsitiopan tu Ibana”. (2 Kron. 16:9) Ingkon taingot, lomo do roha ni Jahowa mangurupi hita. Diboto Ibana do situasi ni ngolunta jala dihaholongi do hita. Tontu, molo naeng marhasohotan pe hamu, diboto Jahowa do pangkilalaanmuna. Porsea do hamu disi? Porsea ma, diparrohahon Ibana do hamu!

11, 12. (a) Sian ulaon ni si Hiskia, aha do na taboto taringot na di bagasan rohana? (b) Boasa disalpuhon Jahowa hasalaan ni si Hiskia?

¹¹ Aha do parsiajaran sian si Hiskia? Diurupi Jahowa do ibana mamboto aha na di bagasan rohana. (Jaha 2 Kronika 32:31.) Tingki marsahit, didok Debata boi do ibana malum jala dilehon do sada tanda laho paposhon rohana. Dibahen Jahowa ma halinu di anak ni tangga mardalan sampulu langka dompak pudi. Lomo roha ni raja ni Babel mamboto taringot tu tanda i, jala disuru ma tentarana manungkun tu si Hiskia. (2 Raj. 20:8-13; 2 Kron. 32:24) Ndang dipaboa Jahowa tu si Hiskia ingkon songon dia bahenon ni si Hiskia maradophon nasida. Didok di Bibel, ”ditadingkon Debata ma ibana”, asa diboto Debata aha na laho ulahononna. Dipatudu si Hiskia ma sude artana tu nasida. Tarboto ma na di bagasan roha  ni si Hiskia. Aha do na di bagasan rohana?

¹² Gabe ginjang do roha ni si Hiskia. ”Ndang dibaloshon si Hiskia, hombar tu asi ni roha jinalona i.” Ndang dipaboa di Bibel boasa muba pangalaho ni si Hiskia. Ra, ala monang ibana mangalo halak Assur manang ala malum sahitna. Manang, ala mamora ibana jala ditanda godang halak. Nang pe si Hiskia manomba Jahowa sian nasa rohana, hea do ginjang rohana jala ndang lomo roha ni Jahowa mangida i. Alai, ”dipaunduk si Hiskia rohana” jala disalpuhon Debata do hasalaanna.—2 Kron. 32:25-27; Ps. 138:6.

13, 14. (a) Sian dia do tarboto aha na di bagasan rohanta? (b) Molo adong na mamuji hita, aha do na ingkon taulahon?

¹³ Aha do na taparsiajari sian si Hiskia? Ingot ma, gabe ginjang do rohana dung diurupi Jahowa ibana manaluhon halak Assur, jala dung dipamalum Jahowa sahitna. Alani i, tingki adong na mamuji hita manang tingki denggan parngoluonta, aha do siulahononta? Tarboto do na di bagasan rohanta sian parniulaonta. Umpamana, sahalak donganta baoa marsitutu paradehon jamitana jala denggan pasahathon jamita i tu na torop. Alani i, godang ma na mamuji ibana. Ingkon songon dia do ibana maradophon pujian i?

¹⁴ Taingot ma na nidok ni Jesus, ”Molo dung diula hamu saluhut na nidokkonna i tu hamu, dok hamu ma: Naposo na so hasea do hami; intap ulaon na patut do huula hami.” (Luk. 17:10) Tingki ginjang roha ni si Hiskia, ndang dipatudu pangargaion tu pangurupion ni Jahowa. Molo adong na mamuji hita ala denggan jamitanta, aha do na mangurupi hita marserep ni roha? Tarimangi ma pangurupion ni Jahowa asa taronjar rohanta laho paboahon, Jahowa do na mangurupi hita pasahathon jamita i. Alana, ibana do na mangalehon Bibel dohot tondi parbadia.

15, 16. Aha do na diulahon si Josia na mambahen ibana mate?

¹⁵ Saonari, aha do na taparsiajari sian si Josia? Nang pe si Josia sahalak raja na burju, alai diulahon ibana do hasalaan na mambahen ibana gabe mate. (Jaha 2 Kronika 35:20-22.) Aha do na masa? Marporang ma si Josia dohot si Neko, i ma raja ni Misir. Hape sasintongna, ndang porlu ibana marporang. Nunga didok si Neko, na so olo ibana marporang tu si Josia. Didok di Bibel, hata ni si Neko ”sian pamangan ni Debata”. Alai, laho  do si Josia marporang jala tarbunu. Boasa dialo ibana si Neko? Ndang dipaboa alusna di Bibel.

¹⁶ Sasintongna, boi do diboto si Josia molo hata ni si Neko sian Jahowa. Songon dia carana? Ingkon sungkunonna do nian panurirang Jeremia. (2 Kron. 35:23, 25) Ingkon dipingkiri si Josia do angka na masa. Ndang laho mamorangi Jerusalem si Neko, alai tu Karkemis do ibana laho. Jala ndang dileai ibana Jahowa manang bangsoNa. Andorang so manontuhon sipillitonna, ndang manat dipingkiri si Josia taringot on. Aha do parsiajaranna? Molo adong sitaononta jala ingkon tatontuhon sipillitonta, ingkon jolo tapingkiri do lomo ni roha ni Jahowa.

17. Molo adong sitaononta, aha do na ingkon taulahon asa unang mangulahon hasalaan songon si Josia?

¹⁷ Tingki manontuhon sipilliton, ingkon jolo tarimangi do prinsip sian Bibel na boi mangurupi hita jala songon dia hita mangulahon i. Tasulingkiti ma angka prinsip i di publikasinta manang manungkun pandapot ni angka sintua. Las do rohanasida mangurupi hita mangantusi prinsip sian Bibel. Tarimangi ma situasi on: Adong donganta borua na tungganedolina ndang Sitindangi Ni Jahowa. Sada tingki, naeng marbarita na uli ma ibana. (Ul. 4:20) Tingki i, didok tungganedolina ma asa unang laho ibana marbarita, ala nunga leleng nasida ndang paduadua. Naeng ditogihon tungganedolina ibana tu sada inganan. Dirimangi donganta on ma pigapiga ayat asa marbisuk ibana manontuhon sipilliton. Diboto ibana, ingkon unduk do tu Debata jala nunga diparentahon Jesus sude siseanna asa marbarita. (Mat. 28:19, 20; Ul. 5:29) Alai diingot ibana, ingkon unduk do tungganeboru tu tungganedolina, jala ingkon dilehon do tingki asa rap dohot tungganedolina. (Eps. 5:22-24; Plp. 4:5) Ingkon dipingkirhon ibana: Na sai diorai tungganedolina do ibana marbarita, manang asa rap do nasida na dua di tingki i umbahen na dipangido asa unang marbarita? Tatontuhon ma sipilliton na denggan jala palashon roha ni Debata.

18. Aha do parsiajaran na tadapot dungkon mangulas taringot tu opat raja ni Juda?

¹⁸ Sipata, olo do hita mangulahon hasalaan songon opat raja ni Juda. Ra, (1) marhaposan tu dirinta do hita, (2) ndang manat mamillit dongan, (3) ginjang rohanta, manang (4) manontuhon sipilliton andorang so mamingkiri na dihalomohon Debata. Nang pe songon i, boi do tongtong tabahen las roha ni Jahowa. Diida do angka na denggan sian dirinta, dos songon na niidaNa sian opat raja i. Diboto Jahowa do sadia balga holongta tu Ibana jala songon dia hiras ni rohanta manomba Ibana. Dilehon Ibana do hatorangan taringot tu angka raja i, asa boi tapasiding hasalaan na balga. Tarimangi ma on sude, jala mandok mauliate ma ala nunga diparade Jahowa on tu hita!