HUINGOT dope tingki i di Brookings, South Dakota, Amerika Serikat. Ngali hian huhilala di tingki manogot i. Ra, ro nama musim dingin. Tingki i, di gudang do ahu dohot pigapiga halak, jala angkahitir hami sude. Jongjong ma hami di jonok ni sada bak na balga na marisi aek, jala ngali do aek i! Alai, hupaboa ma tu hamu taringot tu ngolungku, asa diantusi hamu boasa di gudang i hami.

Ahu tubu tanggal 7 Maret 1936. Opat ma hami marhahamaranggi, jala ahu siampudan. Tading di perladangan na gelleng do hami di bagian timur ni South Dakota. Mangula, i ma ulaon na ringkot di hami, alai ndang i na rumingkot. Taon 1934, tardidi ma natuatuangku gabe Sitindangi Ni Jahowa. Na rumingkot di ngolu ni nasida, i ma mangulahon lomo ni roha ni Jahowa. Bapakku, si Clarence dohot tulangku, si Alfred, mandapot tanggung jawab gabe hamba sidang (saonari didok koordinator punguan ni angka sintua) di hurianami di Conde, South Dakota.

Ringgas do hami marpungu dohot marbarita, pasahathon pangkirimon sian Bibel. Sitiruon dohot pangajarajarion sian natuatuangku mangurupi hami mangkaholongi Jahowa. Tingki marumur onom taon, gabe penyiar ma ahu dohot itongku, si Dorothy. Taon 1943, dohot ma ahu tu Singkola Pangkobasion Teokratis, na baru dibahen dope.

Ringkot do di keluarganami ro tu kebaktian. Huingot dope tingki kebaktian di Sioux Falls, South Dakota, taon 1949. Donganta si Grant Suiter pasahathon jamita na  marjudul ”It Is Later Than You Think!” Dijujui ibana do sude halak Kristen naung tardidi asa mangalehon gumodang tingki laho marbarita. Dung i, tardidi ma ahu di kebaktian na mangihut, tanggal 12 November 1949 di Brookings. Alani i ma ahu di gudang na hudok i. Hami na opat paimahon asa tardidi di bak na balga na dibahen sian baja.

Tingki marumur 15 taon, merintis ma ahu tanggal 1 Januari 1952. Didok di Bibel, ”Manang ise na mangkombar halak na bisuk, gabe marbisuk do,” jala godang do halak na marbisuk di keluargangku na mangurupi ahu gabe perintis. (Poda 13:20) Jotjot do ahu marbarita dohot tulangku, si Julius, naung marumur 60 taon. Nang pe dao ibana umtua, las do rohanami rap marbarita. Godang do na huparsiajari sian ibana dohot pengalamanna. Di pudian ni ari, itongku si Dorothy pe gabe perintis.

Tingki poso dope ahu, jotjot do ditogihon natuatuangku angka pengawas wilayah dohot tungganeboruna tu jabunami. Pengawas wilayah na godang mangalehon pangurupion tu ahu, i ma si Jesse dohot si Lynn Cantwell. Diparrohahon jala dipatogu do ahu. Tingki ro nasida tu angka huria na jonok tu hurianami, sipata ditogihon do ahu rap marbarita. Las rohangku rap marbarita dohot nasida! Lomo rohangku songon nasida, marhiras ni roha jala gabe perintis.

Pengawas wilayahnami na mangihut, i ma si Bud Miller. Marumur 18 taon ma ahu tingki ro ibana dohot tungganeboruna, si Joan tu hurianami. Alai tingki i, ingkon hujumpangi do panitia wajib militer. Lomo roha ni panitia i asa dohot ahu mangulahon ulaon na maralo tu parenta ni Jesus taringot tu netral di politik. Alai, lomo rohangku pasahathon barita taringot tu Harajaon. (Joh. 15:19) Alani i, hupangido ma asa dipaloas nasida ahu tongtong marbarita.

Las situtu rohangku tingki didok Donganta si Miller, na laho dongananna ahu manjumpangi panitia i. Ndang parila jala ndang adong na dihabiari ibana. Tangkas do diantusi ibana isi ni Bibel. Lam barani ma ahu ala didongani ibana! Tingki musim panas  taon 1954, dioloi panitia i ma pangidoanku asa tongtong gabe parbarita. Boi ma godang tingkingku mangulahon ulaon partondion.

Dung i, ditogihon ma ahu mangurupi tu Betel, di perladangan Menara Pengawal, di Staten Island, New York. Tolu taon ma ahu disi. Godang do pengalaman na denggan na huhilala ala rap saulaon dohot dongan sahaporseaon na marbisuk.

Stasiun radio WBBR dibahen di perladangan na di Staten Island. Dipangke Sitindangi Ni Jahowa do i sian taon 1924 sahat tu 1957. Holan 15 sahat tu 20 halak anggota Betel do na ditugashon disi. Godangan angka na poso do hami jala ndang marpengalaman. Alai, adong donganta naung matua, i ma si Eldon Woodworth na rap dohot hami. Sahalak na miniahan do ibana. Songon ama do ibana di hami jala godang na diajarhon tu hami. Molo adong na marsalisi, didok si Woodworth ma tu hami, ”Dipangke Jahowa do angka halak na so tipak mangulahon ulaonNa.”

Donganta si Frederick W. Franz pe rap dohot hami jala mangurupi hami. Marbisuk jala tangkas do diantusi ibana isi ni Bibel. Na mangalompa di hami, i ma si Harry Peterson. Ummura do mangingot goar i sian goarna na sasintongna, i ma si Papargyropoulos. Ibana pe sahalak na miniahan, jala mansai las rohana marbarita. Ringgas do Donganta si Peterson mangulahon ulaonna di Betel, alai ndang hea ditadingkon ibana ulaon marbarita. Ganup bulan, marratus do majalah na disarhon ibana. Tangkas do diantusi ibana isi ni Bibel, jala dialusi do godang sungkunsungkunnami.

Di perladangan i, dipapungu hami ma buah dohot sayur i tu bagasan kaleng. Ganup taon, hirahira 42.600 liter ma buah dohot sayur na diboan tu keluarga Betel. Donganku saulaon, i ma si Etta Huth, donganta borua na marbisuk. Ibana ma na mambahen cara na dipangke hami laho pamasukhon buah dohot sayur i tu kaleng. Marroan do  angka donganta borua na jonok tu inganan i, jala si Etta ma mangalehon ulaon tu nasida. Nang pe godang na diboto si Etta taringot tu ulaonna i, diargai ibana do angka donganta baoa na mangaradoti perladangan i. Gabe sitiruon do ibana di hami.

Sada sian angka borua na ro mangurupi hami, i ma si Angela Romano. Si Etta ma na mangurupi ibana marsiajar Bibel. Bulan April 1958, marhasohotan ma ahu dohot si Angela. Las rohanami rap manomba Jahowa saleleng 58 taon. Haporseaon ni si Angela na togu mambahen togu parsaripeonnami. Marbisuk do ibana, jala molo adong sitaononnami, pos do rohangku tu pangurupionna.

Tingki gedung WBBR di Staten Island digadis taon 1957, mangurupi di Betel Brooklyn ma ahu satongkin. Dung marhasohotan dohot si Angela, ndang di Betel be ahu. Merintis di Staten Island ma hami saleleng tolu taon. Hea do ahu gabe parkarejo ni halak na manuhor stasiun radionta, na digoari ibana WPOW.

Sederhana do parngoluonnami, asa boi hami laho manang tudia pe ditugashon. Taon 1961, ditogihon ma hami gabe perintis istimewa di Falls City, Nebraska. Alai dung sahat disi, ditogihon ma hami asa dohot tu Singkola Pangkobasion tu Harajaon saleleng sabulan di South Lansing, New York. Las do rohanami boi dohot tu singkola i, jala didok rohanami mulak tu Nebraska do hami dung sae singkola. Alai, songgot do rohanami tingki mandapot tugas na baru. Gabe misionaris di Kamboja ma hami! Di Kamboja, diida hami, dibege hami, jala dihilala hami ma angka na so hea diboto hami. Lomo do rohanami pasahathon barita taringot tu Harajaon tu angka halak disi.

Alai muba ma situasi politik di Kamboja, jala ingkon laho ma hami tu Vietnam Selatan. Dung dua taon, marsahit ma ahu jala mulak ma hami tu Amerika Serikat. Leleng do ahu marsahit. Dung malum, merintis ma hami muse.

Bulan Maret 1965, gabe pengawas wilayah ma hami. Saleleng 33 taon, las rohanami gabe pengawas wilayah dohot pengawas distrik, jala mangurupi di angka kebaktian. Las do rohangku mangulahon on, alana kebaktian ma ulaon na sai hupaima. Saleleng pigapiga taon, ditugashon ma hami tu angka huria di New York City dohot huria na jonok tusi, jala godang kebaktian dibahen di Yankee Stadium.

Dijalo hami do godang tanggung jawab na baru dohot na maol. Taon 1995, ditogihon ma ahu gabe instruktur di Singkola Pelatihan Pelayanan. Dung tolu taon, ditogihon muse hami tu Betel. Las situtu rohangku ala boi muse mangurupi di Betel  dungkon 40 taon. Alana, disi do ahu parjolo sahali gabe dohot tu dinas sepenuh waktu khusus. Hea do ahu mangurupi di Departemen Dinas jala gabe instruktur di godang singkola. Taon 2007, dibahen Punguan na Mangaradoti Organisasi ma Departemen Sekolah Teokratis, laho mangaradoti angka singkola na dibahen di Betel. Saleleng pigapiga taon, ahu ma na mangaradoti di departemen i.

Na parpudi on, godang do hamubaon na dibahen tu angka singkola di Betel. Taon 2008, dibahen ma Singkola tu Sintua di Huria. Saleleng dua taon, nunga adong lobi sian 12.000 sintua na diajari di Patterson dohot di Betel Brooklyn. Saonari, singkola on pe dibahen di godang inganan. Taon 2010, goar ni Singkola Pelatihan Pelayanan diganti gabe Singkola Alkitab tu Saudara Lajang, jala dibahen ma singkola na baru, i ma Singkola Alkitab tu Pasangan Kristen.

Bulan September 2014, dipasada ma dua singkola i gabe Singkola tu Parbarita Harajaon. Na boi dohot tu singkola i, i ma donganta naung marhasohotan, jala donganta baoa dohot borua na so marhasohotan dope. Mansai las hian roha ni sude donganta tingki mamboto, na laho dibahen singkola on di inganan ni nasida. Las roha mangida godang donganta dohot tu angka singkola on. Mandok mauliate do ahu ala boi pajumpang dohot marragam halak na rade mangalehon diri asa dohot tu singkola on.

Molo hurimangrimangi taringot tu ngolungku, andorang so tardidi di gudang na ngali i sahat tu saonari, mandok mauliate situtu do ahu tu Jahowa ala boi mananda angka halak na marbisuk. Diurupi nasida do ahu lam solhot tu Jahowa. Adong do na umposo manang umtua sian ahu. Nasida pe sian marragam hasomalan. Molo huida sian parniulaon ni nasida, mansai holong do rohanasida tu Jahowa. Mandok mauliate do ahu ala boi marsiajar sian angka halak na marbisuk di organisasi ni Jahowa.