1. Boasa pigapiga halak tama manjalo hasangapon, jala aha do na laho taparsiajari di artikel on?

SONGON dia do caranta pasangaphon halak na asing? Marhite mamparrohahon nasida jala patuduhon pangargaion. Somalna, sasahalak dipasangap ala denggan mangulahon ulaonna manang ala adong jabatanna. Di artikel on, taulas ma ise na ingkon tapasangap jala boasa.

2, 3. (a) Boasa holan Jahowa na boi umsangap tabahen? (Ida gombar di mula ni parsiajaran.) (b) Ise do Birubiru na dipaboa di Pangungkapon 5:13, jala boasa ingkon tapasangap ibana?

² Didok di Pangungkapon 5:13, ingkon tapasangap do ”na hundul di habangsa i”, i ma Jahowa dohot ”Birubiru i”. Di Pangungkapon bindu 4, dipaboa surusuruan do boasa Jahowa, ”na mangolu ro di salelenglelengna” ingkon tapasangap. Didok nasida, ”Ale Tuhan Debatanami, na tama do Ho manjalo hasangapon dohot hamuliaon dohot hagogoon, ai ditompa Ho do saluhutna;  hinorhon ni lomo ni roham do, umbahen manjadi angka i jala tartompa!”—Pgk. 4:9-11.

³ ”Birubiru” na dipaboa di Pangungkapon 5:13, i ma Jesus Kristus. Sian dia taboto? Tingki di tano on, didok do Jesus i ”Birubiru ni Debata, na mamorsan dosa ni portibi on”. (Joh. 1:29) Ndang adong raja na songon Jesus, na olo mate gabe tobusan humongkop jolma. I do alana ingkon tapasangap ibana. Alani i, tama do Jesus dipasangap, ala ibana ”Raja ni angka raja, Tuhan ni angka tuan”. (1 Tim. 6:14-16) Ra, sarupa do pangkilalaanmuna songon angka surusuruan na marende, ”Na tama do Birubiru naung tarbunu i manjalo hagogoon dohot hamoraon dohot hapistaran dohot sahala dohot hamuliaon dohot hasangapon dohot pujipujian!”—Pgk. 5:12.

4. Aha do labana molo tapasangap Jahowa dohot Jesus Kristus?

⁴ Didok di Johannes 5:22, 23, Jahowa nunga mamillit Jesus gabe panguhum tu angka jolma. On ma na mambahen ingkon tapasangap Jesus. Molo taulahon on, hita pe nunga pasangaphon Jahowa. Molo tapasangap Jesus dohot Jahowa, boi ma hita mangolu salelengna.—Jaha Psalmen 2:11, 12.

5. Boasa sude halak boi mandapot hasangapon dohot pangargaion?

⁵ Ditompa do jolma tudos tu rupa ni Debata. (1 Mus. 1:27) Lapatanna, sude jolma boi maniru parange ni Debata. Umpamana, boi do tapatudu holong, haburjuon, dohot asi ni roha. Dilehon do muse panggora ni roha tu hita, i ma parbinotoan asa taboto dia na denggan dohot na roa, na tama dohot na so tama. (Rom 2:14, 15) Lomo do roha ni godangan halak mangida angka na denggan jala mardame dohot na asing. Ndang songgot rohanta alani on, alana Jahowa i ma Debata na taratur dohot silehon dame. Tangkas ma, sude jolma boi maniru parange ni Jahowa. Alani i, tama do nasida dipasangap jala diargai.—Ps. 8:6.

6, 7. Aha do imbar ni Sitindangi Ni Jahowa tu godangan halak taringot pasangaphon na asing?

⁶ Taboto, ingkon tapasangap do halak na asing. Alai, olo do maol mamboto songon dia cara na denggan laho pasangaphon nasida. Alana, portibi on nunga mangalehon pangkorhon na roa tu jolma. Godang do halak gabe mandebatahon sadasada baoa manang borua, jala mangihuthon cara marpangkean dohot pangalaho ni nasida. Jotjot do angka halak mambahen songon i tu angka pamimpin agama, parpolitik, parolahraga, artis, dohot angka na asing.

⁷ Diboto Sitindangi Ni Jahowa, sala do molo songon i tabahen tu sasahalak. Sian sude jolma, holan Jesus ma na mangalehon sitiruon na dumenggan. (1 Ptr. 2:21) Taingot ma, sude hita nunga ”mardosa jala ndang dapot pujion ni Debata”. (Rom 3:23) Ndang tama jolma tasomba. Molo pasangaphu tabahen tu jolma, ndang las roha ni Jahowa.

8, 9. (a) Songon dia do Sitindangi Ni Jahowa maradophon angka pamarenta? (b) Di tingki andigan do hita ndang mangoloi pamarenta?

 ⁸ Adong do pigapiga halak na dipasangap ala denggan jabatanna. Umpamana, pingkirhon ma taringot tu angka pamarenta dohot ulaon ni nasida. Dibahen nasida do tarlinggomi negarana, jala diparrohahon do na porlu tu rayatna. Godang do laba sian ulaon ni nasida. Didok apostel Paulus, taangkui ma nasida gabe ”panggomgomi na marsahala”. Ingkon taihuthon do uhum ni nasida, ala didok si Paulus, ”Tu ganup ma lehon hamu na tama tungguonna: Beo tu na patut manjalosa” dohot ”hormat tu na talup hormatan”.—Rom 13:1, 7.

⁹ Ala Sitindangi Ni Jahowa do hita, ingkon tapatudu ma pangargaion tu pamarenta. Alai, marasingasing do hasomalan dohot na pinangido ni pamarenta di ganup negara. Alani i, taihuthon ma tudutudu sian pamarenta di negaranta. Alai, molo dipangido hita mangulahon ulaon na so dihalomohon Jahowa, unang ma taulahon i. Ingkon tapasangap jala oloan ma hita tu Jahowa, unang apala tu jolma.—Jaha 1 Petrus 2:13-17.

10. Songon dia do naposo ni Jahowa najolo mangalehon sitiruon na denggan tu hita?

¹⁰ Marsiajar ma hita sian naposo ni Jahowa najolo, na pasangaphon pamarenta. Umpamana, si Josep dohot si Maria. Tingki pamarenta ni Rom laho mamboto sadia godang rayatna, laho do si Josep dohot si Maria tu Betlehem pasurathon diri ni nasida. Hape naeng hipas nama si Maria di tingki i. (Luk. 2:1-5) Apostel Paulus pe mangalehon sitiruon taringot tu mangargai pamarenta. Tingki didok sintua ni malim si Paulus mangulahon ulaon na jahat, denggan do ibana ro tu jolo ni Raja Herodes Agripa dohot si Festus, i ma gubernur ni Rom di provinsi Juda, laho patuduhon na so sala do ibana.—Ul. 25:1-12; 26:1-3.

11, 12. (a) Boasa ndang boi pasangaphu tabahen tu pamimpin agama? (b) Aha do na masa tingki sahalak Sitindangi sian Austria patuduhon pangargaion tu sasahalak sian bagian politik?

¹¹ Songon dia taringot tu pamimpin agama? Ingkon mansai sangap do tabahen nasida? Tapasangap ma nasida dos songon pasangaphon na asing. Alai sala do molo pasangaphu nasida tabahen, nang pe i na pinangido ni nasida. Boasa? Alana, agama na so sintong ndang mangajarhon hasintongan taringot tu Debata dohot Bibel. Sogo do roha ni Jesus mangida pamimpin agama na so sintong jala didok do nasida pargabus jala jahat. (Mat. 23:23, 24) Alai, ndang sala molo sangap tabahen pamarenta. Molo taulahon songon i, olo do sipata diurupi nasida hita.

¹² Adong sasahalak di bagian politik na sian Austria, margoar Dr. Heinrich Gleissner. Tingki Porang Dunia II, ditangkup Nazi ma ibana. Tingki di kareta api na mamboan ibana tu penjara, pajumpang ma ibana dohot si Leopold Engleitner, sahalak Sitindangi sian Austria. Tingki  patorangkon haporseaonna, dipatudu si Engleitner do pangargaion tu Dr. Gleissner na manangihon ibana. Ala di bagian politik do si Gleissner, dung sae porang, diurupi ibana ma ulaon ni Sitindangi di Austria. Ra, adong do pengalaman na sarupa na diboto hamu taringot patuduhon pangargaion tu pamarenta.

13. Ise do na tama mandapot hasangapon sian hita, jala boasa?

¹³ Tama do dongan sahaporseaonta tapasangap. Tarlumobi angka baoa na manguluhon hita, songon sintua, pengawas wilayah, Panitia Cabang, dohot Punguan na Mangaradoti Organisasi. (Jaha 1 Timoteus 5:17.) Diparrohahon do na porlu di naposo ni Debata, jala hombar tu Bibel, didok do nasida ”silehonlehon tu angka jolma”. (Eps. 4:8) Alani i, ingkon tapasangap do nasida, ndang soal sian dia harorona, aha singkolana, aha jabatanna manang sadia godang artana. Dilehon halak Kristen di abad na parjolo do sitiruon. Dipasangap do angka baoa na manguluhon nasida, jala hita pe songon i. Unang ma tabahen nasida gabe songon surusuruan manang gabe halak na umjago. Alai, tapasangap jala taargai ma nasida ala hiras roha ni nasida jala serep marroha.—Jaha 2 Korint 1:24; Pangungkapon 19:10.

14, 15. Aha do imbar ni angka sintua di Sitindangi Ni Jahowa tu pamimpin agama na asing?

¹⁴ Angka sintua di huria doshon  parmahan na serep marroha. Ndang olo nasida dibahen songon artis. Alani i, mansai imbar do nasida sian angka pamimpin agama saonari dohot di tingki ni Jesus. Didok Jesus taringot tu angka pamimpin agama, ”Sai hundulan na sumangap do ditodo, uju di parpestaan, songon i bangku jolojolo di angka parguruan. Dipangido, naeng tabion nasida di onan.”—Mat. 23:6, 7.

¹⁵ Unduk do angka sintua tu hata ni Jesus na mandok, ”Unang ma margoar guru, ai Sada do Gurumuna; saluhutna hamu marhahamaranggi. Ndang jadi goaronmuna manang ise sian hamu ”Ama” di tano on, ai Sada do Amamuna, i ma na di banua ginjang i! Jala ndang jadi goaron hamu Partogi, ai Sada do Partogimuna, i ma Kristus i! Alai na sumangap sian hamu, i ma gabe songon naposomuna! Ai sipaoruon do ganup na patimbo dirina; alai sipatimboon do na paoru dirina.” (Mat. 23:8-12) Molo serep roha ni angka sintua jala unduk tu hata ni Jesus, dihaholongi, diargai, jala dipasangap dongan sahaporseaonna ma nasida.

16. Boasa ingkon marsitutu hita pasangaphon na asing hombar tu lomo ni roha ni Jahowa?

¹⁶ Porlu do tingki laho marsiajar taringot tu cara na denggan laho pasangaphon na asing. On ma na hea masa tu halak Kristen di abad na parjolo. (Ul. 10:22-26; 3 Joh. 9, 10) Porlu do hita marsitutu. Molo tapasangap na asing hombar tu lomo ni roha ni Jahowa, dipasupasu ma hita.

17. Aha do labana molo tapasangap angka halak na marhuaso?

¹⁷ Molo tapasangap jala taargai halak na marhuaso di ingananta, olo do nasida paloashon hita marbarita. Gabe ndang curiga be nasida tu ulaonta. On ma na masa di Jerman pigapiga taon naung salpu, tingki sahalak perintis na margoar si Birgit laho tu sada acara di singkola, ala naeng tamat singkola boruna. Didok angka guru na adong di singkola i tu si Birgit, las do roha ni nasida ala adong anak ni Sitindangi di singkola i, alana on mambahen gabe lam denggan singkola i. Dipaboa si Birgit tu nasida, ”Diajari hami do ianakhonnami taringot tu aturan ni Debata asa denggan marpangalaho jala pasangaphon guru.” Sahalak guru mandok, molo sude siswa i Sitindangi Ni Jahowa, mura ma mangajari nasida. Las do roha ni nasida mangida anak ni Sitindangi. Pigapiga minggu dungkon i, ro ma sahalak guru tu kebaktian.

18, 19. Aha do na ingkon taingot tingki pasangaphon sintua?

 ¹⁸ Prinsip na adong di Bibel boi mangurupi hita asa denggan pasangaphon angka sintua. (Jaha Heber 13:7, 17.) Ingkon tapuji do nasida ala marhiras ni roha. Molo taihuthon tudutudu sian nasida, las ma roha ni nasida. Didok di Bibel, ingkon tatiru do haporseaon ni nasida. Alai, ndang ingkon gabe pas songon nasida caranta marpangkean, mangkatai, dohot mangajari. Molo taulahon songon i, on patuduhon jolma do na taihuthon, ndang Jesus Kristus. Taingot ma, sarupa do hita dohot angka sintua, jolma na mardosa dope.

¹⁹ Molo ndang tabahen angka sintua songon artis, on boi mambahen nasida tongtong marserep ni roha. Jala ndang didok roha ni nasida, na dumenggan dirina sian na asing manang sai sintong ulaonna.

20. Aha do labana molo tapasangap na asing?

²⁰ Molo tapasangap na asing, on mambahen hita ndang mangkaringkothon diri jala tongtong marserep ni roha tingki adong na mamuji hita. Jala mangurupi hita asa unang tartuktuk tingki na tapasangap mambahen jut rohanta. Asing ni i, on mambahen hita tongtong marsada di organisasi ni Jahowa. Ndang dibahen organisasi sasahalak gabe pasangaphu.

21. Aha do laba na rumingkot ala pasangaphon na asing?

²¹ Laba na rumingkot ala pasangaphon na asing, i ma mambahen las roha ni Debata. Marsihohot ma hita jala taulahon na dihalomohon rohaNa. Molo taulahon i, boi ma Jahowa mangalusi Sibolis na mandok, ndang adong sada pe jolma na olo marsihohot. (Poda 27:11) Godang do na so mangantusi cara na denggan pasangaphon sasahalak. Mandok mauliate ma hita ala taboto cara pasangaphon sasahalak hombar tu lomo ni roha ni Jahowa!