1. Aha do na ingkon dipastihon natuatua molo naeng tardidi ianakhonna?

SAHALAK donganta na margoar si Blossom Brandt paboahon pengalamanna tingki mambahen haputusanna laho tardidi. “Nunga marbulanbulan ahu paboahon tu omak dohot bapak naeng tardidi ahu, jala jotjot do diulas hami taringot i. Naeng dipastihon nasida sadia bagas do ahu mangantusi haputusanki. Jadi tardidi ma ahu di tanggal 31 Desember 1934. I ma ari na so tarlupahon ahu.” Saonari pe, angka natuatua ingkon mangurupi ianakhonna laho mambahen haputusan na denggan. Molo palelengku ianakhonmuna asa tardidi alai ndang diboto alani aha, on boi manegai paralealeonna tu Jahowa. (Jak. 4:17) Alani i, andorang so tardidi ianakhonmuna, porlu do dipastihon hamu na tutu do ibana nunga rade gabe halak Kristen.

2. (a) Aha do na diparrohahon pigapiga pengawas wilayah taringot naposo? (b) Aha do na laho taulas di parsiajaran on?

 ² Pigapiga pengawas wilayah mamparrohahon godang do angka naposo na marumur lobi sian 19 taon na so tardidi dope. Adong do sian nasida nunga mananda hasintongan sian na metmet. Dohot do nasida marpungu jala marbarita jala tarida do nasida songon sahalak Sitindangi ni Jahowa. Alai, ndang tardidi dope nasida. Alana, pigapiga natuatua mangkilala ndang dope rade ianakhonna asa tardidi. Jadi di parsiajaran on, taulas ma adong opat na dihabiari natuatua na mambahen nasida gabe manundati ianakhonna asa tardidi.

3. Aha do na dipingkiri natuatua ni si Blossom?

³ Songon pengalaman ni si Blossom na di paboa di paragraf na parjolo, sai dipingkiri natuatuana do nunga cukup be umurna manang ndang laho mambahen haputusan asa tardidi. Jadi songon dia do angka natuatua mamboto nunga rade ianakhonna asa tardidi?

4. Songon dia Mateus 28:19, 20 boi mangurupi angka natuatua saonari?

⁴ Jaha Mateus 28:19, 20. Ndang adong dipaboa di Bibel umur sadia do sasahalak asa boi tardidi. Alai, ingkon manat do dipingkiri angka natuatua aha do lapatan ni ayat na disurat di Mateus 28:19. Hata na disurat di ayat i, lapatanna i ma mangajari halak asa boi gabe sisean. Lapatan ni sisean, i ma halak na mamparsiajari jala mangantusi aha na diajarhon Jesus jala mangihuthon ibana. Jadi, boi do natuatua mangajari ianakhonna sian mulai tubu dope. Tontu, ndang maksudna boi tardidi molo posoposo dope. Alai sian Bibel taboto, dakdanak pe boi do mangantusi jala mangkaholongi hasintongan na sian Bibel.

5, 6. (a) Aha do na boi taparsiajari sian pengalaman ni si Timoteus taringot pandidion? (b) Songon dia do cara na dumenggan mangurupi ianakhonmuna?

⁵ Sian mulai na poso dope, nunga gabe sisean ni Jesus si Timoteus. Jala nunga marhobas ibana tu Jahowa. Apostel Paulus mandok, “sian mulai na metmet dope” ibana nunga marsiajar hata ni Debata. Nang pe bapakna ndang sisomba Jahowa, alai diurupi omak dohot ompungna do ibana asa mangkaholongi hata ni Debata. Ujungna, togu ma haporseaonna. (2 Tim. 1:5; 3:14, 15, Bibel siganup ari) Jadi, tingki naeng marumur 20 taon, nunga mandapot tugas na ringkot ibana di huria.​—Ul. 16:1-3.

⁶ Ndang boi sude dakdanak matoras di umur na sarupa. Adong do naung mangantusi hasintongan jala tardidi tingki poso dope. Na asing, tardidi dung magodang saotik nai. Tontu, ndang boi dipaksa natuatua ianakhonna asa tardidi. Alai, ingkon tongtong do diurupi nasida ianakhonna asa taronjar mangalehon ngoluna tu Jahowa. Tontu, las do roha ni natuatua molo ianakhonna marbisuk mambahen haputusan. (Jaha Poda 27:11) Alani i, ingkon tongtong ma diingot angka natuatua: na tinuju ni nasida mangurupi ianakhonna, i ma asa boi gabe sisean ni Jesus. Jadi, sungkun ma rohamuna, ‘Nunga cukup be parbinotoan ni ianakhonku asa boi tardidi?’

7. Ingkon sude do diboto halak isi ni Bibel asa boi tardidi?

⁷ Tingki natuatua mangajari ianakhonna, nasida mangurupi ianakkonna asa tangkas mamboto hasintongan. Parbinotoan i do na mangonjar roha ni ianakhonna asa mangalehon dirina tu Jahowa. Alai, ndang lapatanna ingkon sude diboto nasida isi ni Bibel baru pe nasida boi tardidi. Alana angka sisean ni Jesus ingkon tongtong do marsiajar nang pe nunga tardidi. (Jaha Kolosse 1:9, 10.) Jadi, sadia bagas do parbinotoan ni halak asa boi tardidi?

8, 9. Aha na masa tu sahalak penjaga penjara na di Pilippi, jala aha ma na boi taparsiajari sian i?

⁸ Di tingkinta saonari, boi do natuatua marsiajar sian pengalaman ni angka halak najolo. (Ul. 16:25-33) Umpamana songon pengalaman ni si Paulus tingki pardalananna na paduahon laho marbarita na uli tu Pilippi taon 50. Ditudu, ditangkup, jala dipamasuk do ibana dohot si Silas tu penjara. Alai, di borngin i ro ma gempa jala tarbungka ma sude pintu ni penjara. Dirimpu na manjaga penjara i nunga lari sude na di bagas penjara. Naeng bunu diri ma ibana, alai pintor diambati si Paulus do. Diajari si Paulus dohot si Silas ma penjaga penjara i dohot keluargana taringot Jesus. Porsea do nasida taringot Jesus. Jala diantusi nasida do na mansai ringkot do mangihuthon Jesus. Pintor tardidi ma nasida. Jadi, aha ma na boi taparsiajari sian pengalaman ni nasida?

⁹ Ra, najolo tentara ni halak Rom do penjaga penjara i. Ndang diboto ibana taringot hata ni Debata. Jadi, molo naeng gabe sahalak Kristen, ingkon marsitutu do ibana mamparsiajari hata ni Debata. Ingkon diantusi ibana do aha na dipangido Debata asa boi gabe naposoNa. Jala, ingkon diihuthon ibana do na diajarhon Jesus. Nang pe holan satongkin ibana marsiajar, boi do i mangonjar rohana asa tardidi. Jadi, molo lomo roha ni ianakhonmuna asa tardidi, aha ma na boi ulahononmuna? Jujui ma nasida asa paboahon i tu sintua. Jadi, angka sintua ma na boi mangida nunga boi manang na ndang nasida tardidi. * Songon halak Kristen na asing, ingkon tongtong do ibana marsiajar taringot Jahowa saleleng ngoluna.​—Rom 11:33, 34.

10, 11. (a) Aha do na dipingkirhon pigapiga natuatua di tingkinta saonari? (b) Aha do na sasintongna boi mangondingi ianakhonmuna?

¹⁰ Pigapiga natuatua marpingkir, tumagon ma tamat ianakhonna kuliah  jala dapot karejo na denggan jolo, baru ma nasida tardidi. Tontu, alani holongna do umbahen na dipingkiri nasida songon i. Alai, porlu do rimangan ni angka natuatua sungkunsungkun on: ‘Boi do cara sisongon i mangurupi ianakhonku asa marhasil di ngoluna? Hombar do i tu hata ni Bibel? Aha do na dipangido Jahowa taringot ngolunta?’​—Jaha Parjamita 12:1.

¹¹ Ingkon tongtong do diingot natuatua, godang do na di portibi on na maralo sian lomo ni roha ni Debata. (Jak. 4:7, 8; 1 Joh. 2:15-17; 5:19) Jadi, paralealeonna tu Jahowa do na boi mangondingi ianakhonmuna sian Sibolis, portibi on, dohot pamingkirion na sala. Jadi, molo singkola dohot karejo do na rumingkot dibahen hamu tu ianakhonmuna, gabe dirimpu ibana ma ndang apala ringkot maraleale tu Jahowa. Bahaya do i. Molo holong do hamu tu ianakhonmuna, lomo do rohamuna molo portibi on na mangajari ianakhonmuna asa sonang ngoluna? Holan sada do carana asa boi marhasil jala marlas ni roha, i ma molo Jahowa na rumingkot di ngolunta.​—Jaha Psalmen 1:2, 3.

12. Boasa adong natuatua marpingkir unang hatophatop laho tardidi?

¹² Sahalak ina paboahon, ndang lomo rohana molo boruna tardidi. Didok ibana, “Sasintongna, na mabiar do ahu molo dipecat borungku.” Songon donganta i, pigapiga natuatua marpingkir tumagon ma dipaima tamba saotik nai umur ni ianakhonna. Asa boi ibana marpingkir molo tarelaela mangulahon na sala. (1 Mus. 8:21; Poda 22:15) Ra, ala diboto nasida do molo ndang tardidi dope, ndang dipecat molo mangulahon dosa. Alai, boasa sala pamingkirion sisongon i?​—Jak. 1:22.

13. Molo so tardidi dope ianakhonmuna, tutu do ndang martanggungjawab ibana tu Jahowa?

 ¹³ Tontu, ndang lomo roha ni natuatua molo ianakhonna tardidi, hape ndang rade dope mangalehon dirina tu Jahowa. Dirimpu nasida molo ndang tardidi dope ndang porlu ianakhonna martanggungjawab tu Jahowa molo mangulahon dosa. Alai sasintongna, tongtong do nasida ingkon martanggungjawab tu Jahowa ala nunga diboto nasida dia na sintong dohot na sala. (Jaha Jakobus 4:17.) Jadi, unang ma sundati hamu ianakhonmuna laho tardidi. Nang pe poso dope nasida, ajari ma mangkaholongi aha na sintong jala mangkasogohon angka na roa. Jala gabe sitiruon ma hamu taringot i. (Luk. 6:40) Holong ni roha ni ianakhonmuna tu Jahowa boi mangurupi nasida pasidingkon ulaon na parohon dosa, jala mangulahon lomo ni roha ni Jahowa—Jes. 35:8.

14. Songon dia do angka sintua mangurupi angka natuatua?

¹⁴ Angka sintua boi mangurupi natuatua molo jotjot nasida mangkatahatai taringot las ni roha ala marhobas tu Jahowa. Songon pengalaman ni donganta borua na mangkatahatai dohot donganta si Russell. Di tingki i, marumur onom taon dope ibana. Didok ibana, “Dilehon ibana do tingkina 15 minut laho mangkatahatai taringot citacita partondion.” Aha ma hasilna? Ujungna, gabe sahalak perintis do ibana lobi sian 70 taon! On patuduhon, pangkataion na patoguhon boi do mangkorhon tu parngoluan ni sasahalak. (Poda 25:11) Angka sintua boi manjujui natuatua dohot ianakhonna asa dohot mangurupi ulaon di Bale Harajaon. Boi do disungkun angka sintua aha do na boi diulahon ianakhon ni nasida.

15. Songon dia do angka dongan di huria boi mangurupi angka na poso?

 ¹⁵ Songon dia do angka dongan di huria boi mangurupi? Tasarihon ma angka na poso. Umpamana, boi do diida hamu adong na poso na pajonokkon diri tu Jahowa. Boi do diida hamu i sian komentarna di parpunguan, manang adong do bagianna di parpunguan parsitongaan ni minggu. Marbarita do ibana di singkola jala ndang olo ibana tarelaela mangulahon na sala. Molo adong na songon i, pintor puji ma! Jala mangkatahatai ma hamu dohot angka na poso andorang manang dung sae parpunguan. Molo taulahon i, boi ma dihilala na poso na mararga do nasida di organisasi.​—Ps. 35:18.

16, 17. (a) Boasa ringkot ianakhonmuna asa tardidi? (b) Aha do las ni roha na boi dihilala natuatua? (Ida ma gombar di mula ni parsiajaran.)

¹⁶ Mangajari ianakhonmuna mangkaholongi Jahowa sada hasangapon na mansai balga do i. (Ps. 127:3; Eps. 6:4) Songon di tingki ni halak Israel, sian na tubu ianakhon ni nasida nunga gabe ampuna ni Jahowa nasida. Alai di tingkinta saonari ndang songon i be. Boasa? Alana nang pe natuatua mangkaholongi Jahowa dohot hasintongan ndang pintor olo ianakhonna mangihuthon i. Jadi sian na tubu ianakhonmuna, ingkon diurupi hamu do ibana asa gabe sisean ni Jesus, mangalehon diri tu Jahowa, jala tardidi. Boasa i ringkot? Alana, molo dilehon dirina tu Jahowa, tardidi, jala tongtong marsihohot manomba Jahowa, boi do i mangurupi ibana asa malua sian haporsuhon bolon.​—Mat. 24:13.

¹⁷ Songon si Blossom Brandt, tingki dipaboa ibana naeng tardidi dipastihon natuatuana do parjolo nunga rade ibana manang na ndang. Dung pos roha ni natuatuana, diurupi ma ibana. Di borngin andorang so tardidi, dipaboa ibana ma: “Marsinggang do hami sude tingki martangiang. Didok bapak do di tangiangna, las hian do rohana ala boruna nunga rade mangalehon diri tu Jahowa.” Dung 60 taon tardidi ibana, didok ma: “Sahat tu andigan pe, ndang tarhalupahon ahu borngin i!” Hamu pe angka natuatua, tontu hamu pe dohot do marlas ni roha tingki diida hamu ianakhonmuna mangalehon diri jala tardidi gabe naposo ni Jahowa.