1, 2. (a) Aha do na dipingkiri pigapiga natuatua tingki ianakhonna mamillit asa tardidi? (b) Boasa halak na laho tardidi ingkon manat mangarimangi i di bagasan rohana? (Ida gombar di mula ni parsiajaran.)

TINDANG ma si Maria dohot angka dongan na asing na laho tardidi, jala diida natuatuana ma ibana disi. Adong dua sungkunsungkun sian parjamita. Dialusi si Maria ma sungkunsungkun i, gogo jala tangkas. Dung i, tardidi ma ibana.

² Mansai las do roha ni natuatua ni si Maria ala tardidi ibana. Alai andorang so tardidi, adong do na sai dipingkiri omakna. Sungkunsungkun do roha ni omakna, ‘Paposohu do borungku laho tardidi? Tangkas do diantusi ibana lapatanna mangalehon diri tu Jahowa? Ndang na dumenggan molo dipaima ibana saotik nai?’ Godang angka natuatua na manungkun sisongon i tingki ianakhon ni nasida laho tardidi. (Pjm. 5:4) Mansai ringkot do mangalehon diri tu Jahowa jala tardidi.​—Ida ma kotak “ Nunga Dilehon Hamu Dirimuna tu Jahowa?”

3, 4. (a) Aha do tudosan na dipangke si Petrus laho patuduhon ringkot ni pandidion? (b) Boasa dipatudos si Petrus pandidion i tu si Noak na paulihon parau?

 ³ Dipatudos Petrus do pandidion i songon si Noak na paulihon sada parau. Didok ibana, “I do tudosan ni pandidion i, na paluahon hamu nuaeng.” (Jaha 1 Petrus 3:20, 21.) Sian ulaonna paulihon parau i, boi do taida molo si Noak marsitutu mangulahon na dihalomohon Debata. Pos do roha ni si Noak mangulahon i. Alani i, dipalua Jahowa ma ibana dohot keluargana sian Aek na Sumar. Aha do parsiajaranna tu hita?

⁴ Molo taingot muse taringot parau i, taboto ma na togu do haporseaon ni si Noak tu Debata. Tingki taida sasahalak na tardidi, taboto ma nunga dilehon dirina tu Debata ala porsea ibana tu haheheon ni Kristus. Songon si Noak, angka halak na tardidi pe rade do mangoloi Debata jala mangulahon ulaon na dilehon Debata tu nasida. Jala taingot ma, dipalua Jahowa do si Noak sian Aek na Sumar. Suang songon i ma, paluaonNa do angka halak na tardidi jala marsihohot. (Mrk. 13:10; Pgk. 7:9, 10) Jadi tangkas ma, mansai ringkot do di hita asa mangalehon diri tu Jahowa jala tardidi. Alani i, molo adong halak na manundati dirina laho tardidi, boi do gabe ndang dapotna hangoluan salelengna.

5. Aha do na laho taulas di parsiajaran on?

⁵ Nunga taboto be sada ulaon na mansai ringkot do pandidion i. Saonari, porlu do taboto alus ni sungkunsungkun  on: Aha do na didok Bibel taringot pandidion? Aha do na ingkon diulahon sasahalak andorang so tardidi? Tingki mangajari ianakhonta manang parsiajar Bibelta, boasa porlu tapingkirhon songon dia asa boi tardidi nasida?

6, 7. (a) Boasa si Johannes mandidihon angka halak? (b) Pandidion ni ise do na marimbar sian na asing, jala boasa?

⁶ Si Johannes pandidi ma halak na parjolo sahali mandidihon halak (Mat. 3:1-6) Boasa angka halak ro tu ibana laho tardidi? Laho patuduhon naung muba do nasida sian angka dosa ni nasida. Jala disolsoli nasida do hasalaanna ala ndang unduk tu Patik ni si Musa. Asing ni i, adong do na rumingkot muse sian pandidion ni si Johannes. Taboto, ibana do na mandidihon Jesus, Anak ni Debata. (Mat. 3:13-17) Alai, ndang hea Jesus mangulahon dosa. Alani i, ndang porlu ibana mambahen hamubaon. (1 Ptr. 2:22) Jadi, boasa ma ingkon tardidi Jesus? Ala naeng patuduhon na rade do ibana laho mangulahon sangkap ni Debata.​—Heb. 10:7.

⁷ Saleleng ulaon ni Jesus marbarita, dohot do angka siseanna mandidihon angka halak. (Joh. 3:22; 4:1, 2) Nasida tardidi laho patuduhon hamubaon ni nasida ala ndang mangoloi Patik ni si Musa. Alai dung mate Jesus jala dipahehe, asing do na tinuju ni angka siseanna asa tardidi.

8. (a) Aha do parenta na dilehon Jesus dung dipahehe ibana? (b) Boasa halak Kristen ingkon tardidi?

⁸ Di taon 33 M tingki dung dipahehe Jesus, mangkatai ma ibana tu lobi sian 500 baoa, borua, dohot angka dakdanak. Ra, di tingki i ma ibana mandok, “Laho ma hamu, podai hamu ma saluhut bangso, didi hamu ma nasida tubagasan Goar ni Ama. Anak dohot Tondi Parbadia! Laos ajari hamu ma nasida mangaradoti nasa hata naung hupatikkon tu hamu.” (Mat. 28:19, 20; 1 Kor. 15:6) Dijujui Jesus do angka na mangihuthon ibana asa mambahen angka halak gabe siseanna. Ingkon tardidi do manang ise na naeng gabe siseanna. (Mat. 11:29, 30) Molo manomba Debata ingkon tajangkon do Jesus na dipangke Jahowa laho mangulahon sangkapNa. Dung i, boi ma tardidi hita songon na dihalomohon Debata. Godang do bukti sian Bibel na patuduhon mansai ringkot do pandidion di angka sisean ni Jesus na parjolo. Ndang olo nasida manundati asa tardidi.​—Ul. 2:41; 9:18; 16:14, 15, 32, 33.

9, 10. Aha do na boi taparsiajari sian pengalaman ni sahalak Etiopia dohot si Saul?

⁹ Jaha Ulaon ni Apostel 8:35, 36. Adong sahalak parpangkat na timbo sian Etiopia naung martangiang di Jerusalem jala naeng mulak tu hutana. Dijujui surusuruan ni Jahowa ma si Pilippus asa marbarita tu ibana. Jadi ‘dibaritahon ma Jesus tu  ibana’. Dung i, aha do na diulahon halak Etiopia i? Gabe diantusi ibana ma mansai ringkot do marhaporseaon tu Jesus, jala taronjar do rohana mangulahon na dipangido Jahowa tu halak Kristen. Jadi pintor dipangido ibana do asa tardidi.

¹⁰ Sada pengalaman na asing, i ma taringot si Saul. Halak Jahudi do ibana. Di tingki i ndang olo be Jahowa manjangkon halak Jahudi ala ndang unduk nasida tu Ibana. Alai porsea do si Saul na tongtong halak Jahudi boi manomba Debata. Asing ni i, ndang lomo rohana mangida halak Kristen jala diorai ibana do nasida. Di sada tingki, mangkatai ma Jesus sian surgo tu si Saul. Aha do na diulahon si Saul? Las do rohana manjangkon pangurupion sian halak Kristen na margoar si Ananias. Bibel mandok, “Dung i hehe ma ibana gabe tardidi.” (Ul. 9:17, 18; Gal. 1:14) Di pudian ni ari gabe ditanda ma ibana sahalak Apostel na margoar si Paulus. Taingot ma tingki diboto ibana na dipangke Debata do Jesus laho mangulahon sangkapNa, pintor olo do ibana tardidi.​—Jaha Ulaon ni Apostel 22:12-16.

11. (a) Aha do na mangonjar roha ni parsiajar Bibel asa tardidi? (b) Songon dia do pangkilalaanta molo adong na tardidi?

¹¹ Dos songon i ma pangkilalaan ni angka parsiajar Bibel saonari, na poso nang na matua. Ala holong jala porsea do nasida tu hasintongan sian Bibel, gabe taronjar do rohana asa mangalehon dirina tu Jahowa jala tardidi. Jadi mansai ringkot do manangihon jamita taringot pandidion di kebaktian. Las do roha ni Sitindangi Ni Jahowa mangida angka parsiajar Bibel na manjangkon hasintongan jala tardidi. Songon i do pangkilalaan ni natuatua molo tardidi ianakhonna. Saleleng taon 2017, adong lobi sian 284.000 halak na mangalehon diri tu Jahowa jala tardidi. (Ul. 13:48) Tangkas ma diantusi nasida do na porlu halak Kristen asa tardidi. Alai, aha do na ingkon diulahon nasida andorang so tardidi?

12. Aha do na ingkon diulahon parsiajar Bibel andorang so tardidi?

¹² Andorang so tardidi, porlu do parsiajar Bibel mangantusi hasintongan taringot Debata, sangkapNa tu jolma dohot tano on, jala aha do na diulahon Ibana laho paluahon jolma. (1 Tim. 2:3-6) Dung i, porlu ma nasida patoguhon haporseaonna, alana i do na mangurupi nasida asa mangoloi Debata jala ndang be mangulahon na sala. (Ul. 3:19) Ringkot do on, ala ndang olo Jahowa manjangkon panombaon ni sasahalak na tongtong mangulahon na dihasogohon rohaNa. (1 Kor. 6:9, 10) Alai, adong do muse na ringkot. Molo naeng talehon dirinta tu  Jahowa, ingkon tongtong do hita ro tu parpunguan jala marbarita na uli dohot mangajari halak. On do na ingkon diulahon angka halak na naeng mangihuthon Kristus. (Ul. 1:8) I ma na ingkon parjolo diulahon sahalak parsiajar Bibel. Dung pe i, baru ma boi ibana mangalehon diri tu Jahowa marhite tangiang jala tardidi.

13. Tingki mangajari halak boasa porlu taingot ringkot do nasida asa tardidi?

¹³ Tingki taurupi ianakhonta dohot parsiajar Bibelta, taingot ma molo sude halak na naeng mangihuthon Jesus ingkon tardidi do. Talului ma tingki na pas laho paboahon taringot i. Unang pola mabiar hita mangulahon i. Lomo do rohanta molo ianakhonta dohot parsiajar Bibelta boi mambahen hamajuon jala tardidi!

14. Boasa ndang boi hita mamaksa halak asa tardidi?

¹⁴ Tontu, ndang boi tapaksa ianakhonta manang parsiajar Bibelta asa tardidi. Jahowa pe ndang olo mamaksa halak asa manomba Ibana. (1 Joh. 4:8) Jadi tingki mangajari halak, ingkon taurupi do nasida mangantusi mansai ringkot do patoguhon paralealeon tu Jahowa. Dung i, gabe diargai ibana ma hasintongan taringot Debata jala lomo rohana mangulahon na ingkon diulahon halak Kristen. Molo nunga dihilala ibana i sude, gabe taronjar ma rohana asa tardidi.​—2 Kor. 5:14, 15.

15, 16. (a) Adong do ditontuhon umur sadia asa boi tardidi? Patorang ma. (b) Boasa parsiajar Bibel ingkon tardidi muse nang pe nunga hea tardidi ibana di agama na asing?

 ¹⁵ Ndang ditontuhon ingkon sadia umurna asa boi tardidi. Alana ndang sarupa hamajuon ni sude parsiajar Bibel. Adong do na hatop maju, adong do na leleng. Godang do na tardidi tingki poso jala marsihohot sahat tu na matua. Adong do na mandapot hasintongan jala tardidi tingki dung matua. Jala pigapiga sian i, adong na marumur lobi sian 100 taon!

¹⁶ Adong sahalak borua na matua na marsiajar Bibel jala nunga hea tardidi di pigapiga agama. Jadi disungkun ibana ma tu na mangurupi ibana marsiajar Bibel, porlu dope ibana tardidi manang na ndang. Dipatudu donganta i ma pigapiga ayat sian Bibel laho mangalusi sungkunsungkunna i. Dung diantusi ibana hatorangan sian Bibel, pintor dipillit ibana ma asa tardidi, nang pe nunga marumur lobi sian 70 taon ibana tingki i. Aha do na boi taparsiajari sian pengalaman i? Dihalomohon Jahowa do asa tardidi hita molo nunga mamboto hasintongan taringot Ibana dohot sangkapNa. Alani i, nang pe hita nunga tardidi di agama na asing, ingkon tardidi do muse hita gabe sahalak Sitindangi Ni Jahowa.​—Jaha Ulaon ni Apostel 19:3-5.

17. Aha do na porlu dirimangi sasahalak di ari tingki ibana tardidi?

¹⁷ Sada ari na parohon las ni roha do di halak Kristen tingki tardidi nasida. Di tingki i ma hita tangkas mangarimangi, aha lapatan ni mangalehon diri jala tardidi. Ingkon marsitutu do hita asa hombar parniulaonta tu sude na ingkon diulahon halak Kristen. Angka sisean ni Jesus “ndang be mangolu di dirina sandiri alai di Kristus naung mate i do jala naung hehe”.​—2 Kor. 5:15, Bibel siganup ari; Mat. 16:24.

18. Sungkunsungkun aha do na laho taulas di parsiajaran na mangihut?

¹⁸ Dung taulas parsiajaran on, taboto ma sada haputusan na ringkot do asa boi gabe sahalak Kristen na sintong. I ma boasa dipingkiri omak ni si Maria sungkunsungkun na dipaboa di mula ni parsiajaran. Molo hamu nunga marianakhon, ra sungkunsungkun do rohamu: ‘Tutu do nunga rade ianakhonku asa tardidi? Tangkas do ditanda ibana Jahowa umbahen na olo ibana tardidi? Ingkon kuliah jala dapot karejo do parjolo baru pe ibana tardidi? Songon dia molo diulahon ibana dosa na balga dung tardidi?’ Taulas ma sungkunsungkun on di parsiajaran na mangihut. Jala taulas ma ingkon songon dia do pangkilalaan ni natuatua taringot pandidion.