Sian taon 1988, nungnga merintis si Jack rap dohot si Marie-Line. Hatop do nasida mambahen penyesuaian tu akka penugasan na dilehon tu nasida saleleng di Guadeloupe dohot di Guyana Prancis. Saonari dua inganan on diawasi kantor cabang Prancis. Taida ma songon dia pengalaman ni nasida.

Aha do na mangonjar rohamuna dohot tu dinas sepenuh waktu?

Marie-Line: Magodang di Guadeloupe do au. Tikki dakdanak, jotjot do au marbarita rap dohot omakku. Sahalak Sitindangi na ringgas do ibana. Holong do rohakku tu akka jolma, jadi dung sae au sikkola taon 1985, pittor merintis ma au.

Jack: Tikki poso, jotjot do au rap dohot akka perintis na ringgas marbarita. Najolo merintis ekstra do au molo libur sikkola. Sipata di ari sabtu, lao do hami marbus dohot akka perintis. Marbarita ma hami sadari manipat. Dung i mardalani ma hami tu pantai. Las hian do rohakku molo huingot i!

Taon 1988, marhasohotan ma au dohot si Marie-Line. Dung i ninna rohakku ma, ‘Godang do tikkinami, boha molo rap merintis hami?’ Jadi rap ma au merintis dohot si Marie-Line. Dung sataon, dohot ma hami tu sikkola perintis. Dung i, gabe perintis istimewa ma hami. Ditugashon ma hami tu piga-piga inganan di Guadeloupe. Dung i, pinda ma hami muse tu Guyana Prancis.

Godang do perubahan penugasan na diadopi hamu saleleng martaon-taon. Boha do caramuna menyesuaihon diri tu inganan na baru? 

Marie-Line: Diboto akka dongan na di kantor cabang Guyana Prancis do ayat favoritnami, i ma Jesaya 6:8. Jadi tikki ditelepon nasida hami, attar didok ma, “Diingot hamu do ayat favoritmuna?” Nga diboto hami aha maksud ni i. Naeng dipapinda nama hami tu penugasan na baru. Jadi didok hami ma, “Dison do ahu, suru ma ahu!”

Dang olo hami mambandingkon penugasan na baru tu penugasan na leleng. Alana olo do  annon gabe dang las be rohanami di penugasan na baru. Jadi marsitutu do hami lao mananda akka dongan.

Jack: Najolo, adong do piga-piga dongan na lomo rohana molo disi hami torus. Jadi sai dipangido halak i do asa unang pinda hami. Denggan do nian maksud ni nasida. Alai tikki pinda hami sian Guadeloupe, adong ma donganta na manaringoti hata ni Jesus na disurat di Mateus 13:38. Didok, “Ladang, i ma portibi on.” Jadi, tikki adong penugasan na baru sai diingot hami ma, manang tudia pe hami pinda, ladang na sarupa do na hukarejoi hami. Akka halak dohot daerah dinasna do urrikkot.

Tikki sahat hami di penugasan na baru, diida hami las do roha ni akka halak na tading disi. Jadi naeng diihutton hami do hasomalan ni halak na adong di inganan on. Asing do memang sipanganon dison. Alai, huallanghami do aha na diallang halak i. Siinumon pe songon i do. Alai ikkon jolo dipastihon hami denggan do i tu kesehatannami. Marsitutu do hami mangida akka na denggan sian penugasannami.

Marie-Line: Godang do na boi diparsiajari hami sian akka dongan. Huingot do tikki parjolo sahali hami di Guyana Prancis. Ro ma udan na doras. Jadi dipaima hami ma asa so udan i, baru pe lao hami marbarita. Alai disukkun donganku ma, “Boha, lao ma hita?” Songgot do rohakku. Hudok ma, “Boha carana?” Ninna ma, “Buat ma payungmi. Marsepeda ma hita.” Gabe huparsiajari ma boha carana maniop payung sambil marsepeda. Autsugari dang huparsiajari hian i, dang hea boi au marbarita molo ro udan!

Nga adong hira-hira 15 hali hamu pinda ate. Adong do tips na boi dibagihon hamu molo naeng pinda?

Marie-Line: Sipata dang mura lao pinda. Jadi porlu do talului inganan na nyaman, asa tabo tahilala dung mulak sian marbarita.

Jack: Biasana, hucat do dinding ni jabunami na baru. Alai molo diboto kantor cabang holan satokkin do hami ditugashon di sada inganan, didok halak i ma, “Jack, sahali on unang pola loja ho mancat jabumi da!”

Malo do si Marie-Line on manusun barang. Dibahen ibana do sude barangnami tu piga-piga kotak. Jala disurat ma di kotak i, “kamar mandi”, “kamar tidur”, “dapur”, dohot na asing. Jadi  dung sahat hami di jabu na baru, gabe mura ma hami manusun akka kotak i tu ingananna. Dibahen ibana do muse daftar akka barang na adong di ganup kotak i, asa mura dilului hami akka barang na dihaporluhon.

Marie-Line: Ala taratur do dibahen hami sude, gabe hatop ma hami boi mardinas.

Boha do caramuna mangatur tikki asa boi ‘marhobas tu Jahowa sian nasa gogo’?​—2 Tim. 4:5.

Marie-Line: Jadi biasana di ari Senin do hami istirahat jala persiapan tu parpunguan. Mulai sian ari Selasa ma hami marbarita na uli.

Jack: Nang pe nungnga ditontuhon sadia kuota jam dinas na ikkon dipenuhi, alai dang i na gabe fokusnami. Ulaon marbarita i do na urrikkot di hami. Jadi mulai borhat hami sian jabu sahat tu na mulak, diusahahon hami do makkatai tu sude halak na dijuppangi hami.

Marie-Line: Misalna, tikki mardalani hami sai huboan do risalah. Adong do halak na ro mandapotton hami lao mangido sijahaon. Hape dang dipaboa hami dope na Sitindangi Ni Jahowa do hami. Alani i, ikkon sopan do pakkeannami jala denggan pangalahonami. Alana sude do diparrohahon halak.

Jack: Marsitutu do hami asa sai denggan pangalahonami diida akka tetangga. Dipapungu jala dipaias hami do akka sampah na adong di halaman ni jabunami. Diparrohahon akka tetangga do i. Sipata disukkun halak i do, “Adong do Bibelmi sada di au?”

Jotjot do hamu marbarita tu daerah terpencil. Adong do pengalamanmuna na menarik sian i?

Jack: Di Guyana adong do piga-piga daerah na maol didalani. Sipata ikkon didalani hami do hira-hira 600 km dibagasan saminggu, jala sega do dalanna. Alai na massai huingot, i ma tikki lao hami tu St. Élie, di daerah hutan Amazon. Marjom-jom ma hami di pardalanan mamakke motor na balga dohot parau. Panambang emas do godangan halak disi. Sipata dilehon nasida do emas na gelleng, ala dilehon hami sijahaon tu nasida. Bornginna i, diputarhon hami ma akka video organisasi. Godang do halak na ro.

Marie-Line: Baru-baru on, dipangido do si Jack lao pasahatton jamita di borngin parningotan di Camopi. Ikkon marparau mesin ma hami saleleng opat jom di sunge Oyapock asa sahat tu inganan i. Seru do pengalaman i.

Jack: Molo pas dang bagas sungena i jala marbatu-batu, doras do arusna jala berbahaya. Luar biasa do memang tikki huida arusna i sian parau. I do alana ikkon tarlatik do halak na mamboan parau i. Pengalaman na luar biasa do on. Nang pe holan 6 halak Sitindangi na ro, alai adong do hira-hira 50 halak nai na ro tu Parningotan i. Termasuk ma piga-piga halak Indian.

Marie-Line: Akka na poso pe boi didapot nasida pengalaman na sarupa, molo dilehon nasida unggodang tikki tu Jahowa. Ikkon pos do rohatta tu Jahowa tikki mangadopi situasi na sisongon i, asa lam togu haporseaotta. Jotjot do huida hami na sai diurupi Jahowa do hami.

Godang do bahasa na diparsiajari hamu. Mura do mamparsiajari i?

Jack: Daong bah. Ala na porlu hian do bahasa i dipakke umbahen na huparsiajari i. Pittor dapottu ma tugas manguluhon parsiajaran Joujou Paboahon di bahasa Sranantongo. * Hape tugas manjaha Bibel pe dang hea dope dapottu tikki i. Husukkun ma sahalak donganta, “Diattusi ho do nakkin aha na hudok i?” Ninna ma, “Sipata dang diattusi hami aha na nidokmi. Alai mantap do nian.” Akka dakdanak do na jotjot mangurupi au. Molo sala na hudok, pittor dipaboa nasida do. Molo na asing, dang pittor olo paboahon. Jadi godang do na huparsiajari sian akka na poso.

Marie-Line: Di sada daerah, adong studikku na marbahasa Prancis, Portugis dohot Sranantongo. Adong donganta na mandok, tumagon do parjolo hustudihon halak na bahasana maol  huattusi, baru na parpudi halak na bahasana mura huattusi. Tutu do na nidokna i. 

Hea ma di bagasan sadari, adong studikku na marbahasa Sranantongo, na paduahon na marbahasa Portugis. Tikki mulai hustudihon na marbahasa Portugis i, didok partnerhu ma, “Marie-Line, boasa gabe asing bahasami?” Baru pe sadar au, na marbahasa Sranantongo do au hape makkatai tu studikki, dang marbahasa Portugis!

Massai holong do roha ni akka dongan tu hamu. Boasa boi toktong solhot hamuna tu nasida?

Jack: Didok do di Poda 11:25 (Bibel siganup ari), “Manang ise na mangalehon pasupasu, lam godang do di ibana pasupasu.” Jadi dang olo hami manahan dirinami lao mangalehon tikki tu akka dongan. Misalna, tikki adong ulaon mangarawat Bale Harajaon, adong na mandok, “Lok ma akka penyiar i na karejo brur.” Jadi hudok ma, “Bah, au pe penyiar do. Molo adong siulaon, ikkon dohot do au.” Memang sipata, ikkon tabahen do tikki tu diritta sandiri. Alai unang ma gabe i na mangambati hita lao mangurupi na asing.

Marie-Line: Marsitutu do hami patuduhon minat pribadi tu akka dongan. Misalna, rade do hami manjaga gelleng ni akka dongan manang manjemput nasida sian sikkola. Disusun hami do rencana asa rade mangurupi nasida. Manang sadihari pe nasida porlu diurupi, diurupi hami do. Alani i, gabe marale-ale ma hami tu nasida.

Pasu-pasu aha do na didapot hamu ala mangurupi di daerah na makkaporluhon parbarita?

Jack: Ala dilehon hami unggodang tikki tu Jahowa, godang do pasu-pasu na didapot hami. Boi ma dinikmati hami akka toppaan ni Jahowa. Nang pe sipata godang ambat-ambat, alai dame do pikkirannami. Alana las do rohanami mangurupi akka naposo ni Debata manang didia pe.

Tikki poso, hea do au dipenjarahon di Guyana Prancis ala dang olo gabe tentara. Alai dang hea tarpikkir au boi ro muse tusi gabe sahalak misionaris. Jala boi marbarita na uli tu akka halak na di penjara i. Memang massai godang do pasu-pasu na dilehon Jahowa!

Marie-Line: Las hian do rohakku ala hulehon tikki dohot gogokku lao mangurupi na asing. Massai sonang ngolunami ala marhobas tu Jahowa. Jala on do na mambahen lam togu parsaripeonnami. Olo do dipaboa si Jack tu au asa dijamu hami mangan sada keluarga na marmet-met ni roha. Hudok ma, “Bah, sarupa na di rohatta ate?” Jotjot do hami sapikkiran.

Jack: Baru-baru on, hona kanker prostat do au. Lungun do roha ni si Marie-Line mambege i. Alai hudok ma tu ibana, “Hasian, molo tung pe mate au sogot, las do rohakku ala nungnga hupakke ngolukku lao manomba Jahowa jala mambahen las rohana.”​—1Mus. 25:8.

Marie-Line: Dilehon Jahowa do tu hami akka tugas na so hea dibayakkon hami. Godang do akka na denggan naung dihilala hami. Ala pos situtu do rohanami tu Debata, manang tudia pe organisasi manugashon hami, ikkon lao do hami tusi!