HIRAHIRA taon 1910, pinda ma natuatuangku sian Tbilisi, Georgia tu Kanada. Tading ma nasida di jabu na metmet di parladangan jonok ni huta Pelly, Saskatchewan, di Kanada barat. Ahu tubu taon 1928, jala ahu ma siampudan sian onom hami na marhahamaranggi. Onom bulan andorang so tubu ahu, mate ma bapakku. Tingki posoposo ahu, mate ma omakku. Mate ma muse si Lucy itongku siangkangan, tingki marumur 17 taon. Alani i, tulangnami si Nick ma na mangurus hami.

Tingki dakdanak, diida keluargangku ma hutarik ihur ni hodanami. Mabiar ma nasida so tung disipak hoda i ahu. Gogo ma digora nasida asa unang hutarik ihur ni hoda i. Hutundali do nasida jala ndang hubege soara ni nasida. Tuani ma ndang disipak hoda i ahu. Tingki i, diboto keluargangku ma na so marbinege do hape ahu.

Sasahalak tondongnami mandok, dumenggan do molo marsingkola ahu di singkola ni na ngungu. Dipasingkolahon tulangku ma ahu tu singkola ni na ngungu di Saskatoon, Saskatchewan. Dao do singkola on sian jabunami. Mabiar ma ahu ala lima taon dope umurhu. Holan tingki libur manang tingki musim panas do ahu boi pajumpang dohot keluargangku. Huparsiajari ma bahasa ni na ngungu jala las rohangku marmeami dohot dakdanak na asing.

Taon 1939, itongku si Marion muli tu si Bill Danylchuck, jala nasida ma na mangurus ahu dohot itongku si Frances. Nasida ma keluargangku na parjolo marsiajar Bibel dohot Sitindangi Ni Jahowa. Tingki libur musim panas, marsitutu do nasida paboahon na diparsiajari sian Bibel tu ahu. Ndang mura mangkatai tu nasida, ala ndang diantusi nasida bahasa ni na ngungu. Alai diboto nasida do na las rohangku marsiajar taringot Jahowa, jala huboto do sude na diulahon nasida hombar tu na didok di Bibel. Dohot ma ahu tingki marbarita nasida. Dung i, lomo rohangku asa tardidi. Alani i, tanggal 5 September 1941, tardidi ma ahu jala si Bill do na mandidi ahu. Tardidi ma ahu di bak na sian bosi na marisi aek sian sumur. Ngali situtu do aek i!

Taon 1946, tingki mulak ahu ala libur musim panas, kebaktian ma hami di Cleveland, Ohio, Amerika Serikat. Di ari na parjolo, dibahen itongku ma catatan di ahu asa huantusi acara i. Alai di ari paduahon, las situtu rohangku ala adong na manerjemahon angka jamita di kebaktian i mamangke bahasa ni na ngungu. Las rohangku ala boi huihuthon sude acara i jala tangkas huantusi na diajarhon di Bibel!

Tingki i, baru sae dope Porang Dunia na paduahon. Lomo roha ni halak asa marsihohot tu negarana. Alai, singkola ma ahu muse dung mulak sian kebaktian i. Jala lomo rohangku tongtong marsihohot tu Jahowa ala nunga huantusi hasintongan. Ndang olo be ahu salut bendera, mangendehon ende ni negara, jala ndang dohot tu angka ari raya. Ndang laho be ahu tu gareja dohot donganku. Gabe muruk ma angka guru, direhei ma ahu, jala margabus do nasida asa huoloi nasida. Diboto dongan sasingkolangku ma na masa tu ahu. Alani i, gabe hupasahat ma barita na uli tu nasida. Pigapiga dongan sasingkolangku, songon si Larry Androsoff, si Norman Dittrick, dohot si Emil Schneider, gabe Sitindangi Ni Jahowa sahat tu saonari.

Tingki laho ahu tu huta na asing, marsitutu do ahu marbarita tu na ngungu. Umpamana tingki di Montreal, laho ma ahu tu inganan ni halak na ngungu. Disi, marbarita ma ahu tu si Eddie Tager, dolidoli anggota ni pareman. Di huria na marbahasa na ngungu di Laval, Quebec do ibana sahat tu na mate di taon naung salpu. Pajumpang do ahu muse dohot dolidoli na margoar si Juan Ardanez. Ibana songon halak Berea najolo, disulingkiti do sude hatorangan na dilehon, asa diboto na hombar do i tu Bibel. (Ul. 17:10, 11) Gabe Sitindangi ma ibana jala gabe sintua di Ottawa, Ontario, sahat tu na mate.

Taon 1950, pinda ma ahu tu Vancouver. Nang pe lomo rohangku marbarita tu na ngungu, alai ndang lupa ahu tingki marbarita tu borua na so ngungu, i ma si Chris Spicer. Lomo rohana manjalo majalah ganup bulan jala ditogihon ahu asa pajumpang tu tungganedolina, i ma si Gary. Ro ma ahu tu jabuna, jala leleng do hami mangkatai marhite manurat na laho sidohononnami. Dungkon i ndang hea be hami pajumpang. Alai dung pigapiga taon,  songgot rohangku tingki dijalang nasida ahu di kebaktian di Toronto, Ontario. Tingki i ma si Gary tardidi. Pengalaman on paingothon ahu asa tongtong marbarita. Alana, ndang taboto ise na olo manjangkon hasintongan.

Mulak ma ahu muse tu Saskatoon. Adong sahalak borua na manogihon ahu asa mangajarhon hasintongan tu dua boruna na kembar alai ngungu, i ma si Jean dohot si Joan Rothenberger. Nasida marsingkola di singkolangku hian. Dung i, dipaboa nasida ma aha na diparsiajari sian Bibel tu dongan sasingkolana. Ujungna, lima donganna gabe Sitindangi Ni Jahowa. Sada sian nasida i ma si Eunice Colin. Nunga hea pajumpang ahu dohot ibana tingki naeng tamat singkola. Tingki i, dilehon ma bonbon tu ahu jala lomo rohana asa mardongan hami. Dung i, gabe sasahalak na ringkot ma ibana di ngolungku, i ma gabe tungganeborungku!

Tingki diboto omakna na marsiajar Bibel si Eunice, didok omakna ma tu guru kepala asa diorai si Eunice. Nang pe diorai jala ndang dipaloas marsiajar, marsitutu do si Eunice tongtong marsihohot tu Jahowa. Tingki laho tardidi, didok natuatuana ma tu ibana, ”Molo gabe Sitindangi Ni Jahowa do ho, ingkon laho do ho sian jabu on!” Tingki marumur 17 taon, laho ma si Eunice sian jabu jala pinda tu jabu ni sada keluarga Sitindangi. Diuduti ma muse marsiajar, dung i tardidi. Tingki marhasohotan hami taon 1960, ndang ro natuatua ni si Eunice tu pesta i. Alai dung pigapiga taon, diargai nasida do hami alani haporseaonnami jala denggan caranami pagodanggodangkon ianakhonnami.

Adong pitu ianakhonnami alai ndang ngungu. Maol do pagodanggodangkon nasida ala ndang diantusi  na nidoknami. Marsitutu do hami asa diantusi bahasanami, asa boi hami mangkatai jala mangajarhon hasintongan tu nasida. Diurupi dongan di huria do hami. Umpamana, hea do sada natuatua di huria manurat tu hami, sada sian anakkonnami mandok hata na so denggan di Bale Harajaon. Gabe boi ma diurupi hami anaknami marparange na denggan. Opat sian nasida, i ma si James, si Jerry, si Nicholas, dohot si Steven, nunga gabe sintua jala tongtong marsihohot manomba Jahowa raphon keluarga ni nasida. Si Nicholas dohot tungganeboruna, si Deborah, mangurupi di kantor cabang Inggris di penerjemahan bahasa ni na ngungu. Si Steven dohot tungganeboruna, si Shannan, mangurupi di kantor cabang Amerika Serikat di penerjemahan bahasa ni na ngungu.

Sabulan andorang so gok opatpulu taon parsaripeonnami, mate ma si Eunice alani kanker. Saleleng marsahit, porsea situtu do ibana tu haheheon. Maimaima do ahu pajumpang dohot ibana muse di ari haheheon.

Bulan Februari 2012, madabu ma ahu jala maponggol gontingku. Ala  ingkon diurupi, pinda ma ahu asa rap dohot anakku raphon parumaenku. Saonari hami di Huria Calgary na Marbahasa na Ngungu, jala sintua do ahu disi. Sasintongna, on ma parjolo sahali ahu di huria marbahasa na ngungu! Ra sungkunsungkun do rohamu songon dia ahu patoguhon paralealeonku tu Jahowa tingki di huria marbahasa Inggris. Sai diurupi Jahowa do ahu. Digohi do janjiNa laho mangurupi na so marama. (Ps. 10:14) Mandok mauliate do ahu tu donganta na mangurupi marhite manurat sidohononna, marsiajar bahasa ni na ngungu, jala manerjemahon bahasa na asing asa huantusi.

Sipata, ndang boi huantusi na didok halak jala didok rohangku ndang adong na mangantusi songon dia mangurupi halak na ngungu. Gabe marsak jala ndang hiras rohangku. Molo masa sisongon i, hurimangi do hata ni si Petrus tu Jesus, ”Tung tu ise ma hami laho, ale Tuhan? Di Ho do hata hangoluan sisalelenglelengna!” (Joh. 6:66-68) Dos songon donganta na ngungu na tongtong marsihohot manomba Jahowa, marsiajar do ahu asa sabar. Marsiajar do ahu asa tongtong marpos ni roha tu Jahowa dohot tu organisasiNa, jala on parohon godang pasupasu. Saonari, godang do publikasinta di bahasa ni na ngungu, jala las situtu rohangku ala boi marpungu jala mangihuthon kebaktian mamangke Bahasa ni na Ngungu di Amerika. Boi ma hudok, las situtu rohangku jala godang pasupasu na hudapot ala manomba Debata Jahowa.