Parngoluon na Sederhana Parohon Las ni Roha
SI DANIEL DOHOT SI MIRIAM marhasohotan bulan September taon 2000, jala tading di Barcelona, Spanyol. Sonang do parngoluon ni nasida. Didok si Daniel, ”Ala denggan karejonami, boi ma hami mangan di restoran, mardalani tu luar negeri, jala manuhor pangkean na arga. Hami pe ringgas do marbarita.” Alai adong na mambahen muba parngoluonnami.
Di kebaktian taon 2006, ditangihon si Daniel ma jamita na manungkun songon on, ”Marsitutu do hita mangurupi angka halak asa mardalan di dalan tu hangoluan salelengna?” (Poda 24:11) Jamita i patorangkon, martanggung jawab do hita pasahathon barita na uli tu halak, ala mangkorhon do i tu haluaon ni nasida. (Ul. 20:26, 27) Didok si Daniel, ”Huhilala songon na mangkatai do Jahowa tu ahu.” Dipaboa muse di jamita i, gumodang do las ni rohanta molo gumodang tingki na talehon di ulaon partondion. Dirimangi si Daniel tutu do hatorangan i, jala boi do on diida ibana sian si Miriam na marlas ni roha ala merintis.
Mangkorhon situtu do jamita on tu si Daniel. Alani i, diorui ma tingkina di parkarejoan, merintis ma ibana, jala dipingkirhon ibana ma las ni roha na boi hilalaonna dohot si Miriam molo laho nasida mangurupi inganan na mangkaporluhon godang parbarita.
MULANA SUSA, UJUNGNA MARLAS NI ROHA
Bulan Mei 2007, kaluar ma si Daniel dohot si Miriam sian parkarejoanna jala pinda tu Panama, kota naung hea didalani nasida. Inganan ni nasida marbarita, i ma pigapiga pulo di Bocas del Toro Archipelago di Laut Karibia. Halak Ngabe do godangan disi. Didok roha ni nasida, boi do nasida tading di Panama saleleng ualu bulan mamangke hepeng na disimpan hian.
Markapal dohot marsepeda do nasida tu angka pulo. Diingot nasida ma tingki parjolo sahali marsepeda na daona hirahira 30 kilometer mamolus dolok na rais jala mohop ari. Loja situtu dihilala si Daniel jala naeng pingsan. Alai, diurupi halak Ngabe na disi do nasida, ala boi nasida mandok pigapiga hata di bahasa ni halak Ngabe. Dung i, adong ma 23 halak na marsiajar Bibel tu nasida.
Dung habis hepeng ni nasida, aha do na masa? Didok si Daniel, ”Tangis ma hami ala mamingkirhon na ingkon mulak hami tu Spanyol. Alai, lungun do rohanami manadingkon angka parsiajar Bibel i.” Sabulan dungkon i, adong ma barita silas ni roha. Didok si Miriam, ”Ditugashon ma hami gabe perintis istimewa. Tung las situtu rohanami ala boi tongtong marbarita dison!”
LAS NI ROHA NA UMBALGA
Taon 2015, ala adong na muba di organisasi, ndang perintis istimewa be nasida na dua. Songon dia do pangkilalaan ni nasida? Porsea do nasida tu janji di Psalmen 37:5, ”Pasahat ma dalanmu tu Jahowa jala haposi Ibana, asa Ibana paturehon.” Dapot ni nasida ma karejo na mangurupi nasida tongtong merintis biasa. Saonari, nasida di huria na di Veraguas, Panama.
Didok si Daniel, ”Andorang so laho sian Spanyol, ndang pos rohanami na boi hami mangkasabamhon na adong. Hape saonari boi do hami, jala ndang susa parngoluonnami.” Aha do silas ni roha na umbalga na dihilala nasida? Didok nasida, ”Ndang adong silas ni roha na umbalga ala mangurupi halak mananda Jahowa!”