1. Dung mardosa si Adam dohot si Hawa, aha do na dipaboa Jahowa taringot musu i?

DIBOTO si Adam do ndang boi ulok mangkatai. Jadi tingki mangkatai sada ulok tu si Hawa, ra nunga diboto si Adam ndang na ulok i na mangkatai, alai surusuruan do. (1 Mus. 3:1-6) Ndang diboto nasida ise do surusuruan i. Alai, gabe i do na diihuthon nasida jala mangalo tu Debata. (1 Tim. 2:14) Tingki i, pintor dipaboa Jahowa ma ise do surusuruan i, jala laho ripashononNa do i. Dipaingot Jahowa do muse molo surusuruan i do na laho manggugai angka naposoNa.​—1 Mus. 3:15.

2, 3. Boasa holan otik dipaboa Jahowa taringot Sibolis andorang so ro Messias?

² Ndang hea dipaboa Jahowa ise do goar ni surusuruan i. * Alai, ndang sahat 2.500 taon dung mardosa si Adam dohot si Hawa, dipaboa Jahowa do ise ibana. (Job 1:6) Digoari do  ibana “Sibolis”. Molo di hata aslina, dipangke do goar “Setan” na lapatanna “Pangalo” laho mandok Sibolis. Alai holan tolu buku do na manurat taringot goar i, i ma di 1 Kronika, Job, dohot Sakaria. Boasa holan otik hatorangan taringot ibana andorang so ro Messias?

³ Ndang pola godang dipaboa Jahowa taringot Sibolis di angka buku Heber. Alana, na tinuju ni angka buku i, i ma laho mangurupi angka halak asa mamboto taringot Messias jala mangihuthon ibana. (Luk. 24:44; Gal. 3:24) Dung ro Messias, dipangke Jahowa ma ibana dohot angka siseanna laho patorangkon taringot Sibolis dohot angka surusuruan na mangalo tu Debata. * Boasa? Alana Jesus dohot angka na miniahan do na dipangke Jahowa haduan laho mangaripashon Sibolis dohot sude na mangihuthon ibana.​—Rom 16:20; Pgk. 17:14; 20:10.

4. Boasa ndang pola hita mabiar tu Sibolis?

⁴ Dipatudos apostel Petrus do molo Sibolis dos songon “babiat na marauang”, jala dijou si Johannes do ibana “ulok” dohot “naga”. (1 Ptr. 5:8; Pgk. 12:9) Alai, unang pola mabiar hita tu Sibolis i. Dao do umgogo Jahowa sian ibana. (Jaha Jakobus 4:7.) Boi do taalo musunta i ala diondingi Jahowa, Jesus, dohot angka surusuruan do hita. Alai, adong do tolu sungkunsungkun na ringkot na porlu taalusi: Sadia balga do huaso ni Sibolis laho mangaliluhon angka jolma? Songon dia ibana mangaliluhon angka jolma? Aha do na so boi diulahon ibana? Taalusi ma angka sungkunsungkun on jala tadapot ma parsiajaranna.

5, 6. Boasa pamarentaon ni jolma ndang boi padengganhon portibi on?

⁵ Godang do angka surusuruan na mangihuthon Sibolis jala mangalo tu Debata. Alana, andorang so ro Aek na Sumar, dielaela Sibolis do pigapiga surusuruan asa mangulahon parmainanon tu angka anak boru. Di Bibel, digombarhon do Sibolis i songon naga na didabuhon sian surgo. Alai disarat ibana do sapartolu angka bintang di langit, na manggombarhon angka surusuruan i. (1 Mus. 6:1-4; Jud. 6; Pgk. 12:3, 4) Ndang olo be nasida gabe keluarga ni Debata. Jala olo do nasida gabe diatur Sibolis. Taingot ma, adong do na mangatur nasida. Dibahen Sibolis do sada pamarentaon na maniruniru Harajaon ni Debata. Ibana ma na gabe raja, diuluhon ibana ma angka surusuruan na jahat i. Dilehon Ibana ma huaso dohot portibi on tu angka surusuruan i asa dirajai nasida.​—Eps. 6:12.

⁶ Dipangke Sibolis ma pamarentaonna i laho mangatur pamarentaon ni jolma. Taboto do i, alana tingki dipatudu ibana tu Jesus “sude harajaon na di tano on”, didok ibana do, “Tu Ho ma lehononku sasudena on gomgomanmu ro di hasangaponna i, ai  tu ahu dipasahat i, jala hulehon i tu silomo ni rohangku.” (Luk. 4:5, 6) Memang, godang do angka pamarentaon na marsitutu mambahen na denggan tu rayatna, jala adong do parhuaso na lomo rohana mangurupi halak. Alai, ndang adong nanggo sada pe pamarentaon i na boi padengganhon portibi on.​—Ps. 146:3, 4; Pgk. 12:12.

7. Songon dia Sibolis mamangke agama palsu dohot bisnis? (Ida gombar di mula ni parsiajaran.)

⁷ Dipangke Sibolis dohot angka surusuruan na jahat i do agama palsu dohot bisnis laho “paotootohon liat portibi on”, manang saluhut jolma. (Pgk. 12:9) Dipangke Sibolis do agama palsu laho mansarhon angka gabus taringot Jahowa, jala marsitutu do ibana mambahen asa ndang diboto halak goar ni Debata. (Jer. 23:26, 27) Alani i, dirimpu pigapiga halak nunga manomba Debata nasida saleleng on. Hape sasintongna, surusuruan na jahat i do na disomba nasida. (1 Kor. 10:20; 2 Kor. 11:13-15) Dipangke Sibolis do muse angka bisnis laho paotootohon jolma. Lomo rohana asa dirimpu halak, hepeng do na boi mambahen martua ngolunta. (Poda 18:11) Godang do halak na porsea tu gabusna on, jala gabe suda ma tingki nasida holan laho mangalului “hepeng”. Ndang ringkot be Debata di nasida. (Mat. 6:24, Bibel siganup ari) Gabe ndang adong be holong ni nasida tu Debata, ala hepeng do na rumingkot di nasida.​—Mat. 13:22; 1 Joh. 2:15, 16.

8. Aha do parsiajaran na tadapot sian dosa na diulahon si Adam, si Hawa, dohot angka surusuruan na jahat?

⁸ Adong dua parsiajaran na ringkot na boi tadapot sian dosa na diulahon si Adam, si Hawa, dohot angka surusuruan i. Na parjolo, ingkon tapillit do ise na taihuthon, Jahowa do manang Sibolis. (Mat. 7:13) Na paduahon, terbatas do hasil na didapot angka na mangihuthon Sibolis. Memang, si Adam dohot si Hawa gabe boi manontuhon sandiri dia na denggan dohot na roa di nasida. Jala angka surusuruan na jahat i pe gabe boi do mangarajai pamarentaon ni jolma. (1 Mus. 3:22) Alai, tong do roa hasil ni i. Jadi sasintongna, ndang adong labana!​—Job 21:7-17; Gal. 6:7, 8.

9. Boasa porlu taboto Sibolis do na mangarajai portibi on?

⁹ Boasa porlu taboto Sibolis do na mangarajai portibi on? Asa taboto ingkon songon dia do hita maradophon pamarentaon ni jolma. Jala, boi do i gabe mangonjar rohanta laho marbarita. Taboto, dipangido Jahowa do hita asa unduk tu pamarenta. (1 Ptr. 2:17) Alai taingot ma, hita unduk tu nasida saleleng uhumna i ndang maralo tu uhum ni Debata. (Rom 13:1-4) Jala, hita pe ingkon netral, manang ndang mangkalomohon partai politik dohot angka pamimpin. (Joh. 17:15, 16; 18:36) Taboto do molo Sibolis naeng paroaroahon Debata, jala mambahen halak asa ndang mamboto goar ni Jahowa. Alani i, porlu do taajarhon hasintongan taringot Debata tu angka halak. Las do  rohanta ala hita ditanda Sitindangi Ni Jahowa. Holong tu Jahowa do na ummarga sian holong tu hepeng manang na asing.​—Jes. 43:10; 1 Tim. 6:6-10.

10, 11. Songon dia Sibolis mangelaela pigapiga surusuruan?

¹⁰ Jago do cara ni Sibolis laho mangaliluhon na asing. Dipangke ibana do umpan laho mangelaela nasida, jala olo do ibana paporsukporsuk nasida.

¹¹ Umpan i do na dipangke Sibolis laho mangelaela angka surusuruan. Ra, nunga leleng diparrohahon ibana songon dia carana laho mangelaela nasida. Alani i, pigapiga surusuruan tarelaela do, jala mangulahon parmainanon tu anak boru. Gabe tubu ma ianakhonnasida angka raksasa na jahat. (1 Mus. 6:1-4) Asing ni i, dijanjihon Sibolis do ra asa dilehon huaso tu nasida laho mangarajai halak. Alai sasintongna, na tinuju ni Sibolis, i ma laho mangambati surirang ni Jahowa taringot ‘pinompar ni boruboru i’. (1 Mus. 3:15) Alai, dibahen Jahowa do asa ndang marhasil sangkapna i. Dibahen Ibana ma Aek na Sumar, asa ndang saut rencana ni Sibolis dohot angka surusuruan na jahat i.

12. Aha do na boi taparsiajari sian angka surusuruan na tarelaela i?

¹² Aha na boi taparsiajari sian pengalaman on? Parmainanon dohot hasangapon do umjotjot dipangke Sibolis gabe umpan. Sasintongna, angka surusuruan na jahat i nunga leleng rap dohot Debata di surgo! Alai, sai dipingkiri nasida do sangkap na roa, jala marurat ma i di roha ni nasida. Alani i, tongtong ma taingot, nang pe nunga leleng hita manomba Jahowa, boi do tubu sangkap na roa di bagasan rohanta. (1 Kor. 10:12) Jadi, ingkon jotjot do tapareso rohanta jala pasiding ma molo adong pingkiran na roa dohot ginjang ni roha!​—Gal. 5:26; jaha Kolosse 3:5.

13. Umpan aha do muse na dipangke Sibolis, jala songon dia asa ndang hona i tu hita?

¹³ Umpan na asing na dipangke Sibolis,  i ma taringot hadatuon. Saonari on, dibahen ibana do angka halak asa mangkalomohon angka begubegu marhite agama palsu dohot hiburan. Dipangke ibana do film, video game, dohot hiburan na asing, asa las roha ni angka halak tu hadatuon. Songon dia asa umpanna i ndang hona tu hita? Ndang boi tapangido asa disurat organisasi angka hiburan dia do na so boi tapillit. Ingkon talatik do panggora ni rohanta asa boi tapillit na denggan hombar tu prinsip ni Jahowa. (Heb. 5:14) Jala molo holongta tu Debata ndang “marpangansi”, gabe boi ma hita mamillit na dumenggan. (Rom 12:9) Molo halak na marpangansi manang munafik, asing hatana asing pambahenanna. Jadi, tingki tapillit hiburan, tasungkun ma dirinta, ‘Huihuthon do prinsip ni Bibel songon na hupaboa tu na asing? Songon dia pangkilalaan ni parsiajar Bibelhu molo diida ibana hupillit hiburan on?’ Molo taihuthon prinsip ni Bibel, gabe mura ma hita pasidingkon umpan na sian Sibolis.​—1 Joh. 3:18.

14. Songon dia Sibolis paporsukporsuk hita, jala songon dia hita mangadopi i?

¹⁴ Dipaporsukporsuk jala dipabiarbiar Sibolis do hita asa manadingkon Jahowa. Umpamana, dipangke ibana do angka pamarenta laho mangorai ulaonta marbarita. Manang dipangke ibana do muse angka donganta sakarejo dohot donganta di singkola laho pasogosogohon hita ala marsiajar Bibel. (1 Ptr 4:4) Dipangke do keluarganta laho mangambati hita asa unang be ro marpungu. (Mat.10:36) Aha do na boi taulahon laho mangadopi situasi songon i? Unang pola longang rohanta tu sisongon i, alana saonari na marporang do hita tu Sibolis. (Pgk. 2:10; 12:17) Jala taingot ma: na tinuju ni Sibolis disi, i ma asa songon na tutu hatana na mandok molo hita manomba Jahowa holan di tingki sonang do. Didok ibana molo susa ngolunta, gabe tatadingkon do Debata. (Job 1:9-11; 2:4, 5) Jadi, ingkon tapangido do gogo sian Jahowa. Taingot ma, ndang tadingkonon ni Jahowa hita.​—Heb. 13:5.

15. Boi do Sibolis mamaksa hita mangulahon na so tahalomohon?

¹⁵ Ndang boi dipaksa Sibolis hita asa mangulahon na so tahalomohon. (Jak. 1:14) Godang do halak na so mamboto nunga mangihuthon Sibolis nasida saleleng on. Alai, tingki nasida marsiajar Bibel, ingkon pillitonna do mangoloi ise, Jahowa do manang Sibolis. (Ul. 3:17; 17:30) Molo marsitutu hita asa unduk tu Debata, ndang boi Sibolis mambahen hita dao sian Debata.​—Job 2:3; 27:5.

16, 17. (a) Aha do muse na so boi diulahon Sibolis dohot angka surusuruan na jahat? (b) Boasa ndang porlu hita mabiar molo marsoara tingki martangiang?

¹⁶ Adong do muse na so boi diulahon Sibolis dohot angka surusuruan na jahat. Umpamana, di Bibel ndang hea didok molo nasida boi mamboto pingkiran dohot rohanta. Holan Jahowa dohot Jesus do na boi. (1 Sam. 16:7; Mrk. 2:8) Alai, porlu do hita mabiar molo mangkatai manang molo marsoara hita tingki martangiang? Ndang porlu. Boasa? Pingkirhon ma on: Ndang mabiar hita tingki marbarita na uli, nang pe boi diida Sibolis hita. Suang songon i ma, ndang porlu hita mabiar molo marsoara hita tingki martangiang, nang pe boi dibege Sibolis hita. Jala, di Bibel dipaboa do pigapiga naposo ni Debata na marsoara tingki martangiang. Ndang mabiar nasida molo dibege Sibolis tangiang ni nasida i. (1 Raj. 8:22, 23; Joh. 11:41, 42; Ul. 4:23, 24) Molo marsitutu hita mangkatahon na sintong jala mangulahon na dihalomohon Debata, pos ma rohanta ndang dipasombu Jahowa hita digugai Sibolis.​—Jaha Psalmen 34:8.

¹⁷ Porlu do taboto songon dia musunta, alai ndang porlu hita mabiar tu ibana. Nang pe jolma na mardosa dope hita, alai diurupi Jahowa do hita asa boi monang mangadopi Sibolis! (1 John 2:14) Molo taalo Sibolis, maporus do ibana sian hita. (Jak. 4:7; 1 Ptr. 5:9) Saonari on, angka na poso do na jotjot dielaela Sibolis. Songon dia asa boi nasida mangadopi elaela i? Taulas ma i di parsiajaran na mangihut.