1, 2. (a) Aha do na dihatai Jesus dohot angka siseanna di borngin andorang so mate ibana? (Ida gombar di mula ni parsiajaran.) (b) Boasa ringkot taingot alasan na dipaboa Jesus? (c) Aha do na laho taulas?

DI BORNGIN andorang so mate Jesus, mangkatai do ibana dohot angka siseanna. Dipapos ma roha ni nasida, na holong situtu do Jesus tu nasida. Jala dipaboa Jesus do tudosan taringot hau anggur, na taulas di parsiajaran naung salpu. Lomo do roha ni Jesus laho patoguhon angka siseanna asa tongtong nasida “marparbuehon na godang”. Lapatanna, i ma asa tongtong nasida mamaritahon taringot Harajaon ni Debata.​—Joh. 15:8.

² Alai, Jesus ndang holan paboahon aha na porlu diulahon nasida. Dipaboa ibana do boasa ingkon tongtong marbarita. Ringkot do taingot on. Jala molo tarimangi i, boi i patoguhon hita asa tongtong “mangkatindangkonsa tu saluhutna bangso”. (Mat. 24:13, 14) Di parsiajaran on, taulas ma opat alasan sian Bibel boasa hita ingkon tongtong marbarita. Jala, taulas ma muse adong opat silehonlehon sian Jahowa  na boi mangurupi hita asa tongtong marparbue.

3. (a) Songon na disurat di Johannes 15:8, boasa ringkot hita marbarita? (b) Manggombarhon aha do parbue ni anggur i, jala boasa pas tudosan i?

³ Alasan na rumingkot boasa hita ingkon tongtong marbarita, i ma laho pasangaphon Jahowa jala pabadiahon goarNa. (Jaha Johannes 15:1, 8.) Tingki Jesus paboahon tudosan taringot hau anggur, dipatudos do molo Jahowa dos songon nampunasa porlak na manubuhon hau anggur i. Jesus ma hau anggur i, jala angka siseanna ma rantingna. (Joh. 15:5) Jadi di tudosan i, parbue ni anggur i manggombarhon ulaon ni angka siseanna, i ma marbarita. Dipaboa Jesus do tu angka apostelna, “Marsangap ma Damang, molo marparbuehon na godang hamu.” Molo denggan parbue ni anggur i, gabe sangap do nampunasa porlak i. Suang songon i ma, molo taulahon na dumenggan laho marbarita taringot Harajaon ni Debata, i parohon sangap manang hamuliaon tu Jahowa.​—Mat. 25:20-23.

4. (a) Songon dia hita pabadiahon goar ni Debata? (b) Songon dia pangkilalaanta molo tapabadiahon goar ni Debata?

⁴ Ndang boi be tatambai habadiaon ni goar ni Debata. Alana, nunga badia situtu goarNa i sian mulana. Alai, didok panurirang Jesaya do, “Tagonan Jahowa Zebaot parbadiai hamu.” (Jes. 8:13) Jadi, songon dia hita pabadiahon goar ni Debata tingki marbarita? Tapabadiahon do goar Jahowa, molo taharingkothon goarNa di ngolunta, jala taurupi angka halak asa mangantusi na badia do goarNa i. (Mat. 6:9) Umpamana, boi do taajari halak laho mamboto angka parange ni Jahowa, dohot sangkapNa tu jolma asa mangolu di Paradeiso. Molo taulahon i, on patuduhon hita mangurupi halak asa mangantusi na margabus do Sibolis taringot Jahowa. (1 Mus. 3:1-5) Jala, taurupi ma angka halak asa mamboto holan Jahowa do na tama “manjalo hasangapon dohot hamuliaon dohot hagogoon”. (Pgk. 4:11) Si Rune naung gabe perintis saleleng 16 taon mandok, “Gabe las do rohangku ala huboto na dilehon Jahowa do ulaon na sumurung di ahu, i ma laho mangkatindangkon si Panompa saluhutna. Gabe lomo ma rohangku marbarita.”

5. (a) Songon na didok di Johannes 15:9, 10, boasa hita ingkon marbarita? (b) Asa diantusi angka siseanna na porlu do nasida martahan, aha do na didok Jesus?

⁵ Jaha Johannes 15:9, 10. Alasan na paduahon, i ma ala tahaholongi do Jahowa dohot Jesus. (Mrk. 12:30; Joh. 14:15) Dipaboa Jesus do tu angka siseanna molo nasida ingkon ‘mian di bagasan rohana’. Boasa didok Jesus songon i? Ala diboto Jesus  na porlu do angka siseanna martahan asa tongtong gabe halak Kristen na denggan. Jala, di Johannes 15:4-10, dipangke Jesus do hata “mian” pigapiga hali, asa diantusi angka siseanna na porlu do nasida martahan.

6. Songon dia hita patuduhon na lomo do rohanta mian di bagasan holong ni Kristus?

⁶ Songon dia hita patuduhon na lomo do rohanta mian di bagasan holong ni Kristus? Unduk ma hita tu ibana. Dipangido Jesus do asa taulahon songon naung dibahen ibana. Didok Jesus, “Songon Ahu pe na mangaradoti angka patik ni Damang, gabe mian di bagasan holong ni rohana.” Gabe sitiruon do Jesus di hita.​—Joh. 13:15.

7. Aha do partalian ni unduk dohot holong?

⁷ Tangkas do dipaboa Jesus molo unduk hita, tanda ni holongta do i tu ibana. Didok Jesus, “Manang ise na maniop angka patikki jala diradoti, i do na holong roha di Ahu.” (Joh. 14:21) Sian Amana do parenta ni Jesus i. Jadi, molo taoloi parentana laho marbarita, na patuduhon holong tu Jahowa do hita disi. (Mat. 17:5; Joh. 8:28) Jadi, molo tapatudu holong tu nasida, gabe mian ma hita di bagasan holong ni nasida.

8, 9. (a) Aha do muse alasanna boasa hita ingkon marbarita? (b) Songon dia Hata ni Debata na di Hesekiel 3:18, 19 dohot 18:23 mangonjar rohanta asa tongtong marbarita?

⁸ Alasan na patoluhon, i ma ala hita naeng paingothon angka halak taringot ari rimas ni Jahowa. Di Bibel, didok do molo si Noak sahalak “parjamita hatigoran”. (Jaha 2 Petrus 2:5.) Andorang so ro Aek na Sumar, dipaingot si Noak do tu angka halak na laho masa panguhuman i. Boasa boi tadok songon i? Alana didok Jesus do, “Tagan so ro aek na sumar i, marmangani nasida jala minumminum, mangoli dohot pabolihonsa, paima dapot ari habobongot ni si Noak tu bagasan parau i. Laos so mamoto nasida, paima ro aek na sumar i mangaupi nasida saluhutna. Suman tusi do sogot haroro ni Anak ni jolma i!” (Mat. 24:38, 39) Nang pe godang halak na so manangihon si Noak, tongtong do dipaboa ibana barita na sian Jahowa i.

⁹ Hita marbarita taringot Harajaon ni Debata tu godang halak saonari, asa nasida marsiajar taringot sangkap ni Debata di ari na naeng ro. Songon Jahowa, lomo do rohanta asa godang halak manjangkon  barita i jala boi tongtong “mangolu”. (Hes. 18:23) Tingki marbarita hita sian jabu tu jabu manang di inganan na godang halak, hita nunga pasingothon nasida taringot Harajaon ni Debata na naeng ro jala mangaripashon portibi na jahat on.​—Hes. 3:18, 19; Dan. 2:44; Pgk. 14:6, 7.

10. (a) Songon na didok di Mateus 22:39, boasa hita ingkon tongtong marbarita? (b) Songon dia si Paulus dohot si Silas mangurupi sahalak panjaga penjara di Pilippi?

¹⁰ Alasan na paopathon, i ma ala tahaholongi do angka halak. (Mat. 22:39) Alani i, gabe marsitutu do hita marbarita ala taboto, di sada tingki boi do muba situasi ni nasida jala gabe denggan ma nasida manjangkon. Umpamana, tingki si Paulus dohot si Silas dipenjarahon di Pilippi. Di tonga borngin, masa ma gempa. Gabe sega ma bangunan ni penjara i, jala bungka ma pintu ni penjara. Gabe mabiar ma na manjaga penjara i. Dirimpu ibana nunga lari sude angka tahanan, jadi naeng maningkot ma ibana. Alai diambati si Paulus ma ibana jala didok, “Unang bahen jea tu ho!” Disungkun panjaga i ma, “Aha ma bahenonku, asa malua ahu?” Didok si Paulus dohot si Silas ma, “Haporseai ma Tuhan Jesus, asa malua ho dohot isi ni bagasmi!”​—Ul. 16:25-34.

11, 12. (a) Aha do na boi taparsiajari sian pengalaman ni panjaga penjara i? (b) Boasa lomo rohanta marbarita?

¹¹ Aha do na boi taparsiajari sian pengalaman ni panjaga penjara i? Dung masa gempa i, gabe muba do parangena jala pintor dipangido ibana do pangurupion. Suang songon i ma, adong do pigapiga halak na so manjangkon barita na uli di mulana. Alai, gabe muba do nasida dung masa hasusaan di ngolu ni nasida. Umpamana, adong do na gabe marsak ala di-PHK manang sirang dohot dongan saripena. Adong muse na lungun rohana ala marsahit, manang ala marujung ngolu halak na hinaholonganna. Di tingki sisongon i, olo do gabe sungkunsungkun roha ni nasida taringot ngolu on. Olo do gabe disungkun nasida, ‘Aha ma bahenonku, asa malua ahu?’ Dung i, boi do gabe olo nasida manangihon barita pangkirimon na tapasahat.

¹² Alani i, marsitutu ma hita asa tongtong marbarita. Di sada tingki, molo nunga olo nasida manjangkon barita na uli, sai rade do hita laho mangurupi nasida. (Jes. 61:1) Si Charlotte, naung merintis saleleng 38 taon mandok, “Godang halak saonari nunga lilu. Porlu do nasida manangihon barita na uli.” Si Ejvor, naung merintis saleleng 34 taon mandok, “Saonari, lam godang do halak na marsak jala mandele. Lomo do rohangku mangurupi nasida. Jadi, taronjar ma rohangku laho marbarita.” Tangkas ma, molo tahaholongi angka halak, gabe lomo do rohanta marbarita!

13, 14. (a) Silehonlehon aha do na disurat di Johannes 15:11? (b) Songon dia hita boi marlas ni roha songon Jesus? (c) Songon dia las ni roha i mangurupi hita tingki marbarita?

¹³ Di borngin andorang so mate Jesus, didok ibana adong do silehonlehon tu angka apostelna. Jala on boi mangurupi nasida asa tongtong marparbue. Angka aha ma i, jala songon dia i boi mangurupi hita saonari?

¹⁴ Las ni roha. Gabe borat do tahilala  tingki marbarita? Ndang. Dung dipaboa Jesus tudosan taringot hau anggur, didok ibana molo marbarita hita, gabe boi do dapotta las ni roha sian ibana. (Jaha Johannes 15:11.) Songon dia carana? Taingot ma molo di tudosan i, dipatudos do Jesus songon hau anggur, jala siseanna ma angka rantingna. Angka ranting boi mandapot aek dohot sipanganonna, holan molo ranting i ndang maponggol sian hauna. Suang songon i ma, boi do tongtong hita marlas ni roha molo tongtong taihuthon Jesus, i ma laho mangulahon sangkap ni Debata. (Joh. 4:34; 17:13; 1 Ptr. 2:21) Si Hanne naung merintis saleleng 40 taon mandok, “Ala sai las do rohangku tingki dung sae marbarita, gabe taronjar do rohangku asa tongtong merintis.” Las ni roha i boi mambahen hita tongtong ringgas marbarita, nang pe godang na so olo manangihon.​—Mat. 5:10-12.

15. (a) Silehonlehon aha do na disurat di Johannes 14:27? (b) Songon dia dame ni roha i mangurupi hita tingki marbarita?

¹⁵ Dame ni roha. (Jaha Johannes 14:27.) Di borngin andorang so mate Jesus, didok ibana tu angka apostelna, “Dame do hutinggalhon di hamu.” Songon dia dame sian Jesus i mangurupi hita marbarita? Molo tongtong hita marbarita, taboto na las do roha ni Jahowa dohot Jesus tu hita. Alani i, gabe dame ma pangkilalaanta. (Ps. 149:4; Rom 5:3, 4; Kol. 3:15) Si Ulf naung merintis saleleng 45 taon mandok, “Dung sae marbarita, loja do huhilala. Alai, sabas jala dame do huhilala.” Las do rohanta ala boi tadapot hadameon na manongtong!

16. (a) Silehonlehon aha do na disurat di Johannes 15:15? (b) Songon dia angka apostel boi gabe aleale ni Jesus?

¹⁶ Paralealeon. Dung didok Jesus na lomo do rohana asa marlas ni roha nasida, dipatorang ibana do boasa porlu nasida patuduhon holong na so mangkaringkothon diri. (Joh. 15:11-13) Didok ibana, “Aleale do hamu hudok.” Sada silehonlehon na arga do i! Alai songon dia angka apostelna i boi tongtong gabe alealena? Didok Jesus, “Laho hamu marparbue.” (Jaha Johannes 15:14-16.) Lapatanna, tongtong ma marbarita. Dua taon andorang so dipaboa Jesus i, hea do didok ibana tu nasida, “Alai borhat ma hamu mamaritahon hata on: Nunga songgop harajaon banua ginjang i!” (Mat. 10:7) I do alana di borngin andorang so mate Jesus, dipaingot ibana do angka siseanna asa tongtong lao marbarita.  (Mat. 24:13; Mrk. 3:14) Diboto Jesus do ndang mura on di nasida. Alai boi do nasida mangulahon i jala tongtong gabe alealena. Songon dia carana? I ma marhite silehonlehon na asing.

17 (a) Silehonlehon aha do na disurat di Johannes 15:7? (b) Songon dia silehonlehon i mangurupi angka sisean ni Jesus?

¹⁷ Dialusi do tangiangta. Jesus mandok, “Pangido hamu ma manang aha pe, jaloonmuna do i.” (Joh. 15:7, 16, Bibel siganup ari) Tontu, gabe dipatogu do angka apostel alani janji ni Jesus on! * Ndang diboto angka apostel na laho mate nama Jesus. Alai mate pe Jesus, ndang lapatanna gabe so adong na mangurupi nasida. Rade do Jahowa mangalusi tangiang ni nasida jala mangurupi nasida marbarita. Jala tutu do i. Dung mate Jesus, dipangido angka apostel do habaranion sian Jahowa, jala dialusi Jahowa do tangiang ni nasida i.​—Ul. 4:29, 31.

18. Angka silehonlehon aha do na boi mangurupi hita saonari?

¹⁸ Songon i ma hita saonari. Molo tongtong hita marbarita, tongtong ma hita gabe aleale ni Jesus. Jala pos do rohanta, sai rade do Jahowa mangalusi tangiangta jala diurupi do hita tingki tahilala hira na maol marbarita. (Plp. 4:13) Mansai las do rohanta ala rade do Jahowa mangalusi tangiangta, jala boi hita gabe aleale ni Jesus. Sude silehonlehon na sian Jahowa on mangurupi hita asa tongtong marparbue.​—Jak. 1:17.

19. (a) Boasa hita ingkon tongtong marbarita? (b) Aha do na boi mangurupi hita mangulahon tugas na sian Debata?

¹⁹ Di parsiajaran on, nunga taulas adong opat alasan boasa hita ingkon tongtong marbarita, i ma: laho pasangaphon Jahowa jala pabadiahon goarNa, ala tahaholongi do Jahowa dohot Jesus, paingothon angka halak, jala tahaholongi do angka halak. Asing ni i, nunga taulas adong opat silehonlehon: las ni roha, dame, paralealeon, dohot alus ni tangiangta. Sude silehonlehon on mangurupi hita asa boi mangulahon tugas na sian Debata. Mansai las do roha ni Jahowa molo diida Ibana hita tongtong “marparbuehon na godang”!