1, 2. (a) Boasa angka na poso boi monang mangalo Sibolis dohot angka surusuruanna? (Ida gombar di mula ni parsiajaran.) (b) Aha na laho taulas?

DIPATUDOS apostel Paulus do halak Kristen songon sahalak tentara. Alana, na marporang do hita mangalo Sibolis dohot angka surusuruanna. Jala nunga marpengalaman nasida marporang saleleng marribu taon. Ra, hira na so boi do hita monang mangalo nasida, tarlumobi angka na poso. Alai, boi do angka na poso monang mangalo musu sisongon i? Boi do. Alana, dapot nasida do gogo sian Jahowa. Songon tentara na tarlatik, porlu do nasida mamangke “pangkean sinjata na sian Debata” asa boi rade marporang.​—Jaha Epesus. 6:10-12.

² Dibahen si Paulus tudosan on, ra ala dibayangkon ibana do pangkean ni tentara Rom. (Ul. 28:16) Jadi di parsiajaran on taulas ma taringot tudosan on, ambatambat na diadopi na poso, jala aha do labana molo tapangke angka sinjata na sian Debata.

3, 4. Boasa parbinotoan sian Bibel dipatudos songon tali pinggang ni tentara Rom?

³ Jaha Epesus 6:14. Dibahen do bosi di hohos manang tali pinggang ni tentara Rom, asa manutupi gontingna jala asa gomos pangkeanna. Jala adong do tali pinggang na mamangke gantungan ni podang dohot balati. Ingkon gomos do diingkat tali pinggangna i, asa unang targanggu nasida marporang.

⁴ Songon tali pinggang i, parbinotoan na tadapot sian Hata ni Debata boi mangondingi hita sian ajaran na so sintong. (Joh. 8:31, 32; 1 Joh. 4:1) Lam lomo rohanta mamparsiajari Hata ni Debata, lam mura ma hita mangihuthon uhumNa. Dos ma i songon na mamangke “bajubaju partahanan”. (Ps. 111:7, 8; 1 Joh. 5:3) Jala, molo lam taantusi Hata ni Debata, gabe boi ma taalo Sibolis.​—1 Ptr. 3:15.

5. Boasa ingkon tongtong hita mandok na sintong?

⁵ Mansai ringkot do Hata ni Debata di hita. Alani i, ingkon taihuthon do parenta di Bibel laho mangkatahon na sintong ganup tingki. Alana, gabus do sinjata na jotjot dipangke Sibolis. Molo margabus sasahalak, boi do gabe hansit rohana sandiri, tarlumobi halak na digabusi. (Joh. 8:44) Nang pe mardosa hita, marsitutu ma hita asa unang margabus. (Eps. 4:25) Memang, ndang mura mangulahon i. Si Abigail, na marumur 18 taon mandok, “Ndang sai mura mangkatahon na sintong, tarlumobi di tingki adong parsoalan.” Jadi boasa ibana tongtong jujur? Didok ibana, “Molo jujur ahu gabe ias ma panggora ni rohangku di adopan ni Jahowa, jala pos do roha ni natuatuangku dohot donganku tu ahu.” Si Victoria, na marumur 23 taon mandok, “Molo tahatahon na sintong jala marsihohot, olo do gabe dilesengi hita. Alai godang do labana: gabe pos ma rohanta, lam jonok tu Jahowa, jala lam diargai halak ma hita.” I ma boasa ringkot hita tongtong “marhohoshon hasintongan”!

6, 7. Boasa uhum na sian Debata dipatudos songon bajubaju partahanan?

⁶ Somalna bajubaju partahanan ni tentara Rom dibahen sian bosibosi na manutupi sude andorana. Bosibosi i dikancingkon tu bahan kulit mamangke haithait bosi. Alai umgodang do bosibosi dilongkothon di bagian pundakna. Ra, gabe ummaol do ibana laho marhusor, jala ingkon sai dipareso ibana do asa bosibosi i tongtong gomos. Alai, bajubaju partahanan on boi mangalinggomi jantung dohot na asing asa unang hona podang manang panah!

 ⁷ Songon bajubaju partahanan i, songon i ma uhum ni Jahowa boi mangalinggomi ‘rohanta’. (Poda 4:23) Ndang olo sahalak tentara manukar bosibosi ni bajuna i tu bosibosi na so denggan. Suang songon i ma, ndang olo hita manukar uhum ni Jahowa tu pamingkirionta sandiri. Ndang boi holan hita sandiri na manjaga rohanta. (Poda 3:5, 6) I do alana, ringkot do molo tapareso “bajubaju partahanan” na tadapot sian Jahowa, asa tongtong i manjaga rohanta.

8. Boasa ingkon taihuthon uhum ni Jahowa?

⁸ Hea do dihilala hamu uhum ni Jahowa hira na mambahen gabe ndang bebas hamu? Si Daniel, na marumur 21 taon mandok, “Sai dipasogosogo guru dohot donganku do ahu di singkola, ala marsiajar Bibel ahu. Gabe metmet do rohangku jala marsak. Alai ujungna, huhilala do labana mangihuthon uhum ni Jahowa. Huida ma adong donganku na gabe narkoba on, dohot putus singkola. Asi do roha mangida nasida. Jadi tutu do dijaga Jahowa ahu.” Si Madison, na marumur 15 taon mandok, “Ndang mura mangihuthon uhum ni Jahowa jala pasidingkon pamingkirion ni angka donganku. Alai sai huingot do, ditanda halak do ahu Sitindangi Ni Jahowa, jala angka elaela i cara ni Sibolis do laho mambahen ahu mandao sian Debata. Molo boi hualo elaela i, gabe las do rohangku.”

9-11. (a) Manggombarhon aha do sipatu ni tentara Rom? (b) Aha do na ingkon tabahen asa lam denggan marbarita?

⁹ Jaha Epesus 6:15. Ingkon marsipatu do tentara Rom laho marporang. Sipatuna i dibahen sian bahan kulit sampe tolu lampis. Jadi, jago do sipatuna i jala tabo pangkeon. Alani i, gabe ndang mura nasida tarsulandit.

¹⁰ Dos songon sipatu i, na ingkon dipangke laho marporang, hita pe ingkon tongtong do “mangkaringgashon barita na uli, pardamean i”. (Jes. 52:7; Rom 10:15) Alai, ingkon barani do hita marbarita. Si Bo, na marumur 20 taon mandok, “Mabiar do ahu marbarita tu dongan singkolangku. Maila do ahu. Alai molo hupingkiri, ndang huboto boasa songon i ahu. Saonari las do rohangku ala boi marbarita tu angka donganku.”

¹¹ Godang angka na poso saonari mandok, ummura do nasida marbarita molo nunga diparade hian angka na porlu. Angka aha ma na porlu taparade? Si Julia, na marumur 16 taon mandok, “Sai huboan do angka sijahaonta di tashu. Hutangihon ma pandapot dohot na dihaporseai angka donganku singkola. Gabe huboto ma aha na  porlu huparade jala na laho hupatorang tu nasida.” Si Makenzie, na marumur 23 taon mandok, “Molo denggan tatangihon nasida, gabe taboto ma aha do masalah ni nasida. Nunga hujaha be sude angka sijahaonta taringot angka na poso. Alani i, pintor huboto ma poda sian Bibel manang bahan sian situs jw.org na cocok tu nasida.” Jadi molo denggan taparade hian angka na porlu laho marbarita, dos do i songon mamangke “sipatu” na pas tu hita.

12, 13. Aha do “sumbia api” sian Sibolis i?

¹² Jaha Epesus 6:16. Diboan sahalak tentara Rom do lombulombu manang perisai na balga. Boi do i manutupi pundak sahat tu duguldugulna sian podang, hujur dohot sumbia manang panah.

¹³ “Sumbia api” na ditembakhon Sibolis tu hita, i ma gabus taringot Jahowa. Didok ibana do molo Jahowa ndang mangkaholongi hita, jala ndang  parduli tu hita. Si Ida, na marumur 19 taon mandok, “Jotjot do huhilala hira na ndang jonok Jahowa tu ahu jala ndang olo Ibana gabe Alealengku.” Aha ma na diulahon ibana molo songon i pangkilalaanna? “Parpunguan do na balga pangkorhonna tu haporseaonku. Najolo, holan hundul do ahu tingki marpungu, ndang hea mangalehon komentar. Hurimpu ndang olo halak manangihon komentarhu. Alai saonari, huparade hian do bahan tu parpunguan asa boi ahu markomentar dua manang tolu hali. Maol do on huhilala. Alai las do rohangku dung huulahon i. Dipatogu angka dongan do ahu. Marhite parpunguan, huboto ma na holong do Jahowa tu ahu.”

14. Aha do na taparsiajari sian pengalaman ni si Ida?

¹⁴ Molo perisai ndang mubauba ungkuranna. Alai molo haporseaon ndang songon i. I do na boi taida sian pengalaman ni si Ida. Boi do haporseaonta lam togu manang lam gale. Hita do na manontuhon i. (Mat. 14:31; 2 Tes. 1:3) Jadi, asa boi “lombulombu haporseaon” i mangondingi hita, ingkon tabahen do i asa lam balga jala lam togu!

15, 16. Songon dia pangkirimon i dipatudos songon tahuluk?

¹⁵ Jaha Epesus 6:17. Dipangke tentara Rom do tahuluk na mangalinggomi ulu, rungkung, dohot bohina. Boi do i ditioptiop nasida.

¹⁶ Songon tahuluk na manjaga ulu ni sahalak tentara, “pangkirimon ni roha di haluaon” boi manjaga pingkiranta. (1 Tes. 5:8; Poda 3:21) Pangkirimon i mangurupi hita asa tongtong mangingot janji ni Debata. Jala on mambahen hita asa ndang mura marmetmet ni roha nang pe adong parungkilanta. (Ps. 27:1, 14; Ul. 24:15) Asa boi pangkirimon i manjaga pingkiranta, ingkon porsea do hita na laho masa i. Jadi, tapangke ma “tahuluk” i di ulunta, unang holan tatioptiop!

17, 18. (a) Aha do na diulahon Sibolis asa ndang tapangke tahuluk i? (b) Aha do buktina ndang sude angka na poso boi dielaela Sibolis?

¹⁷ Aha do na diulahon Sibolis asa ndang tapangke tahuluk i? Ingot ma na dibahen ibana tu Jesus. Diboto ibana do molo Jesus na laho mamarenta jolma haduan. Alai, ingkon dihilala ibana do jolo hasusaan dohot hamatean. Dungkon i, baru pe ibana gabe Raja. Jadi, ditawarhon Sibolis ma asa tibu ibana mamarenta. Dijanjihon Sibolis do molo olo Jesus manomba ibana, lehononna do pamarentaon ni portibi on tu ibana. (Luk. 4:5-7) Suang songon i ma, diboto Sibolis do na dijanjihon Jahowa tu hita portibi na imbaru. Alai, ingkon tapaima do i nang pe godang parungkilonta. Jadi, ditawarhon Sibolis do hasonangan ni portibi on, asa ndang taharingkothon be Harajaon ni Debata.​—Mat. 6:31-33.

¹⁸ Godang do angka na poso saonari ndang boi dielaela Sibolis. Umpamana, si Kiana na marumur 20 taon mandok, “Huboto do holan Harajaon ni Debata do na boi manalpuhon sude hasusaanta saonari.” Songon dia do  pangkirimonna i mangkorhon tu parngoluonna? On mangurupi ibana asa tongtong mangingot na laho salpu do portibi on. I do alana, ndang olo ibana pasudahon tingkina holan asa marhasil di portibi on. Dipangke ibana do sude tingki dohot gogona laho manomba Jahowa.

19, 20. Songon dia do hita asa lam denggan mamangke Hata ni Debata?

¹⁹ Dipangke tentara ni Rom do podang na ganjangna 50 sentimeter. Jala tarlatik do nasida mamangke i, ala ganup ari do dipangke nasida i.

²⁰ Didok si Paulus do molo Hata ni Debata dos songon podang, na dilehon Jahowa tu hita. Alani i, ingkon jotjot do taparsiajari i asa boi tongtong togu haporseaonta, manang asa boi denggan caranta marpingkir. (2 Kor. 10:4, 5; 2 Tim. 2:15) Jadi, songon dia do asa lam denggan hita mamangke i? Si Sebastian, na marumur 21 mandok, “Husurat do sada ayat sian ganup bindu tingki manjaha Bibel. Jala hususun do sude angka ayat favorithu.” On mambahen ibana lam mangantusi aha na dihalomohon Jahowa. Asing ni i, si Daniel mandok, “Tingki manjaha Bibel, hupillit do ayat na boi mangurupi ahu laho marbarita. Jala boi ma diida halak songon dia hamu mangargai Hata ni Debata jala mambahen na dumenggan laho mangurupi nasida.”

21. Boasa ndang pola hita mabiar tu Sibolis dohot angka surusuruanna?

²¹ Songon naung taparsiajari sian pengalaman ni angka na poso di parsiajaran on, ndang porlu hita mabiar tu Sibolis dohot angka surusuruanna. Tutu do nasida umgogo sian hita, alai dao umgogo Jahowa sian nasida. Jala ndang laho mangolu salelengna nasida. Laho dihurung do nasida saleleng Saribu Taon di Pamarentaon ni Kristus. Dungkon i, diripashon ma nasida. (Pgk. 20:1-3, 7-10) Taboto do songon dia musunta i, angkalna, dohot sangkapna. Alai marhite pangurupion ni Jahowa, boi do tongtong hita martahan mangalo nasida!