PARSIAJARAN 21
Unang ma Dioto-otoi “Habisuhon ni Portibi On”
“Haotoon do di Debata habisuhon ni portibi on.”—1 KOR. 3:19.
ENDE 98 Bibel—Sinihathon ni Debata
NA LAHO DIULAS *
1. Aha do labana molo taparsiajari Bibel?
ALA ditogu-togu Jahowa, boi do hita mangadopi sude hasusaan. (Jes. 30:20, 21) Marhite Bibel diajari do hita asa boi “rade mangulahon angka ulaon na denggan”. (2 Tim. 3:17) Molo taihuthon ajaran ni Bibel, gabe umbisuk do hita sian angka halak na mangihuthon “habisuhon ni portibi on”.—1 Kor. 3:19; Ps. 119:97-100.
2. Aha do na laho taulas di parsiajaran on?
2 Songon na laho taulas, ala adong di hita roha na mangkaringkothon diri sandiri, olo do gabe mura hita mangihuthon bisuk ni portibi on. Ra tahilala gabe maol do pasidingkon pingkiran dohot parniulaon ni halak na mangihuthon bisuk ni portibi on. Alani i, Bibel mandok, “Manat ma hamu tu angka halak na laho mamparhatoban hamu marhite ajaran ni jolma dohot angka hata na so marguna, i ma na sian adat ni jolma.” (Kol. 2:8) Di parsiajaran on, laho taulas ma songon dia angka halak porsea tu dua gabus ni Sibolis. Tingki mangulas i, gabe taboto ma haotoon do bisuk ni portibi on jala dumenggan do bisuk ni Jahowa.
PANDANGAN NI HALAK TARINGOT SEKS
3-4. Di mula ni abad 20-an, songon dia do angka halak di Amerika Serikat muba pandanganna taringot seks?
3 Di mula ni abad 20-an, muba do pandangan ni angka halak di Amerika Serikat. Najolo, porsea do nasida angka na mardongan saripe do na boi mangulahon seks jala ndang pola lomo roha ni nasida mangkatai taringot i di jolo ni halak. Alai lam leleng, muba do pandangan ni halak taringot i jala gabe lomo ni roha ni nasida nama na dibahen.
4 Di taon 1920-an, gabe muba do pandangan dohot pangalaho ni halak taringot seks, dung dihilala nasida hasusaan alani Porang Dunia I. Sahalak peneliti mandok, “Angka film, hiburan, ende, novel, dohot iklan patuduhon seks na so patut.” Di tingki i, ndang suman be cara ni halak marjoget dohot cara ni nasida marpangkean. Songon na dipaboa Bibel taringot ari parpudi, gabe “holongan tu giot-giot ni rohana” do angka halak.—2 Tim. 3:4.
Ndang olo naposo ni Jahowa mangihuthon pandangan ni halak di portibi on (Ida paragraf 5) *
5. Di taon 1960-an, songon dia do pandangan ni angka halak taringot seks?
5 Di taon 1960-an, lam godang do halak na so marhasohotan dope tading sajabu, baoa mangulahon seks dohot baoa, jala mura manirangkon dongan saripena. Angka hiburan pe jotjot patuduhon seks na so patut. Aha ma akibatna? Sahalak panurat ni buku mandok, godang halak gabe marjea ala “ndang denggan be pangalaho ni angka jolma”. Ujungna, gabe godang do keluarga na sursar, adong do na gabe mandele jala godang na jotjot mangida pornografi. Asing ni i, gabe godang ma sahit alani hubungan seks, songon AIDS. On patuduhon haotoon do bisuk ni portibi on.—2 Ptr. 2:19.
6. Boasa pandangan ni halak di portibi on taringot seks dos songon na dihalomohon Sibolis?
6 Pandangan ni halak di portibi on taringot seks dos songon na dihalomohon Sibolis. Sasintongna, silehon-lehon ni Debata do hubungan seks dohot parsaripeon. Alai, lomo do roha Sibolis molo sasahalak mangulahon i ndang songon na dihalomohon Debata. (Eps. 2:2) Molo diulahon sasahalak seks na so patut, on patuduhon na so diargai ibana do silehon-lehon sian Debata laho marpinompari. Jala ndang boi be ibana mandapot hangoluan salelengna.—1 Kor. 6:9, 10.
PANDANGAN NI BIBEL TARINGOT SEKS
7-8. Boasa pandangan ni Bibel taringot seks dumenggan sian na didok portibi on?
7 Angka halak na mangihuthon bisuk ni portibi on mandok ndang masuk angkal poda ni Bibel taringot seks. Ra, didok roha ni nasida, ‘Molo silehon-lehon sian Jahowa do hubungan seks i, boasa diorai hita mangulahon i?’ Angka halak na marpingkir songon i mangkilala boi do nasida mangulahon manang aha pe na dihalomohon rohana. Alai didok Bibel, ndang ingkon taulahon sude na dihalomohon rohanta. Ingkon boi do taorom dirinta. (Kol. 3:5) Asing ni i, adong do silehon-lehon sian Jahowa i ma parsaripeon. Dung mardongan saripe, boi do suami dohot istri mangulahon hubungan seks. (1 Kor. 7:8, 9) Jala, ndang porlu ganggu roha ni nasida laho mangulahon i.
8 Ndang songon bisuk ni portibi on, Bibel mangajarhon na denggan taringot seks. Didok do muse hubungan seks boi parohon las ni roha. (Poda 5:18, 19) Alai, Bibel mandok, “Ingkon sude do hamu mamboto songon dia mangarajai dirina be, asa sangap hamu jala badia. Unang ma ihuthon angka bangso na so mananda Debata, na so boi mangarajai hisap-hisap ni dagingna, jala na sai mangulahon i di ngoluna.”—1 Tes. 4:4, 5.
9. (a) Songon dia naposo ni Jahowa di mula ni abad 20-an diurupi asa mangihuthon bisuk na sian Jahowa? (b) Sipaingot aha do na boi tadapot sian 1 Johannes 2:15, 16? (c) Hombar tu Rom 1:24-27, angka ulaon aha do na ingkon tapasiding?
9 Di mula ni abad 20-an, godang halak “ndang adong aturan di ngolu ni nasida”. (Eps. 4:19) Alai naposo ni Jahowa ndang olo mangihuthon i. Marsitutu do angka donganta mangihuthon prinsip ni Bibel. Di The Watch Tower 15 Mei 1926 dipaboa, “angka baoa manang borua ingkon tongtong manjaga asa ias pingkiran dohot parniulaonna tarlumobi tingki maradophon halak na so dongan saripena”. Aha pe na masa, tongtong do diihuthon naposona bisuk na sian Jahowa. (Jaha 1 Johannes 2:15, 16.) Tontu mandok mauliate do hita alani bisuk na sian Jahowa! Jala las do rohanta ala boi mandapot sipaingot na pas di tingkina na mangurupi hita pasidingkon bisuk ni portibi on. *—Jaha Rom 1:24-27.
PANDANGAN TARINGOT MANGKARINGKOTHON DIRI
10-11. Aha do na didok Bibel taringot angka na masa di ari parpudi?
10 Nunga didok di Bibel, “mangkaholongi dirina sandiri” do angka halak di ari parpudi. (2 Tim. 3:1, 2) Gabe taboto ma molo portibi on manjujui halak asa mangkaringkothon dirina sandiri. Sada ensiklopedia mandok, saleleng taon 1970-an, “godang do angka buku na dibahen laho paboahon songon dia carana asa marhasil di parngoluan”. Didok muse di ensiklopedia i, adong do piga-piga buku na mandok “ndang porlu sasahalak paubahon dirina”. Sada sian buku i mandok, “Dirimuna do na dumenggan jala na ummarga sian angka na asing. Alani i, haholongi ma dirimuna sandiri.” Dipaboa muse di buku i, “boi do sasahalak manontuhon sandiri aha na ingkon ulahononna jala aha na sintong didok rohana.”
11 Hea do dibege hamu hata songon i? Sarupa do i songon na didok Sibolis tu si Hawa. Didok Sibolis, boi do si Hawa ‘gabe doshon Debata umboto na denggan dohot na roa’. (1 Mus. 3:5) Saonari godang na marpingkir, laho manontuhon dia na denggan dohot na roa ndang porlu diurupi manang ise pe, dohot ma i Debata. Jala songon i do pandangan ni godang halak taringot parsaripeon.
Halak Kristen ingkon mangkaringkothon na asing, tarlumobi dongan saripena (Ida paragraf 12) *
12. Songon dia do pandangan ni godang halak di portibi on taringot parsaripeon?
12 Didok Bibel do tu angka na mardongan saripe, asa mangargai dongan saripena dohot janji taringot pardongan saripeon na dibahen nasida. Jala dipaboa Bibel do muse molo na mardongan saripe ingkon tongtong rap tading. Didok, “Tadingkonon ni baoa do amana dohot inana mandongani jolmana, jadi sada sibuk nasida.” (1 Mus. 2:24) Alai halak na mangihuthon bisuk ni portibi on mandok, molo na mardongan saripe ingkon mangkaringkothon dirina sandiri do. Sada buku taringot parsirangan mandok, “Di piga-piga acara perkawinan, janji taringot pardongan saripeon ingkon rap ‘saleleng hita mangolu’ diganti gabe ingkon rap ‘saleleng hita masihaholongan’”. On mambahen ndang togu be parsaripeon ni angka halak. Gabe godang ma keluarga na sursar jala godang na gabe mandele. Tangkas ma, haotoon do pandangan ni angka halak di portibi on.
13. Boasa sogo roha ni Jahowa tu halak na ginjang roha?
13 Bibel mandok, “Sogo do roha ni Jahowa di ganup siginjang roha.” (Poda 16:5, Bibel siganup ari) Boasa sogo roha ni Jahowa tu halak na ginjang roha? Alana holan mangkaringkothon diri sandiri do nasida dos songon Sibolis. Bayangkon ma, dirimpu Sibolis olo Jesus marsinggang jala manomba ibana, hape Jesus do na dipangke Jahowa laho manompa saluhutna! (Mat. 4:8, 9; Kol. 1:15, 16) Alani i, halak na oto do di adopan ni Jahowa halak na ginjang roha.
PANDANGAN NI BIBEL TARINGOT MANGKARINGKOTHON DIRI SANDIRI
14. Sian Rom 12:3, aha do na boi taboto taringot mangkaringkothon diri sandiri?
14 Bibel mandok ndang sala hita manarihon dirinta sandiri. Didok Jesus do, “Haholongi ma donganmu jolma doshon dirim,” on patuduhon porlu do hita manarihon dirinta sandiri. (Mat. 19:19) Alai ndang diajarhon Bibel ingkon dirinta na taharingkothon sian halak na asing. Didok do, “Unang ma sai naeng marbada hamu manang holan mamingkiri diri sandiri. Alai sangap ma bahen hamu tu donganmuna di bagasan toruk ni roha.”—Plp. 2:3; jaha Rom 12:3.
15. Didok rohamu, boasa denggan mangihuthon poda ni Bibel taringot ndang mangkaringkothon diri sandiri?
15 Godang halak saonari mandok ndang marguna ajaran ni Bibel. Didok nasida do molo umringkot tabahen halak na asing, gabe mura ma hita dioto-otoi halak. Alai, aha do hasilna molo mangihuthon bisuk ni portibi on? Aha ma na boi diida hamu sian halak na mangkaringkothon diri sandiri? Las do rohana? Denggan do keluargana? Dapotna do dongan na burju? Boi do ibana marale-ale tu Debata? Molo pandapotmuna, dia do na dumenggan? Mangihuthon bisuk ni portibi on manang bisuk na sian Jahowa?
16-17. Boasa tadok mauliate tu Jahowa?
16 Halak na mangihuthon halak na marbisuk di portibi on, dos do i songon halak na lilu manungkun dalan tu halak lilu. Taringot halak na “marbisuk” di jaman ni Jesus, didok ibana, “Panogu-nogu na mapitung do nasida. Molo na mapitung manogu-nogu na mapitung, tarrobung do duansa.” (Mat.15:14) Tutu ma, haotoon do di Debata bisuk ni portibi on.
Marlas ni roha do naposo ni Debata ala sai mangihuthon bisuk na sian Jahowa (Ida paragraf 17) *
17 Tangkas ma molo poda ni Bibel sai “marguna do i mangajari, maminsang, padengganhon pangalaho, manogu-nogu laho mangulahon na sintong”. (2 Tim. 3:16) Mandok mauliate do hita tu Jahowa ala marhite organisasina, dijaga do hita sian bisuk ni portibi on! (Eps. 4:14) Diajari do hita asa boi tongtong togu mangihuthon prinsip ni Bibel. Tontu las do rohanta ala dilehon Jahowa bisuk na dumenggan na adong di Bibel laho manogu-nogu hita!
ENDE 54 “On do Dalan”
^ par. 5 Di parsiajaran on taulas ma, holan poda sian Jahowa do na boi denggan manogu-nogu hita. Jala taulas ma muse aha akibatna molo mangihuthon bisuk ni portibi on. Hape godang do labana molo taihuthon bisuk na sian Jahowa na adong di Bibel.
^ par. 9 Umpamana, ida Pertanyaan Kaum Muda—Jawaban yang Praktis, Jilid 1 pasal 24-26, dohot Jilid 2, pasal 4-5.
^ par. 50 HATORANGAN NI GAMBAR: Taida ma sian tingki tu tingki angka na masa tu donganta Sitindangi na marsaripe. Rap marbarita do nasida di ujung ni taon 1960-an.
^ par. 52 HATORANGAN NI GAMBAR: Di taon 1980-an, tingki marsahit istrina, disarihon suamina do ibana jala diparrohahon boruna do nasida.
^ par. 54 HATORANGAN NI GAMBAR: Saonari, marlas ni roha do nasida ala sai diihuthon nasida do bisuk na sian Jahowa. Jala dohot do marlas ni roha boru ni nasida naung mardongan saripe.
