1-2. Songon na didok di Psalmen 40:6, akka silehon-lehon aha do naung tadapot sian Jahowa, jala boasa porlu taulas i di parsiajaran on?

DEBATA na burju do Jahowa i. Rimangi ma akka silehon-lehon naung tadapot sian Ibana. Dilehon Ibana do tano on gabe inganatta asa boi mangolu. Dilehon Ibana do utok-utok asa boi hita marpikkir dohot makkatai. Jala dilehon Ibana do Bibel, asa boi taboto alus ni akka sukkun-sukkun na rikkot di ngolutta.​—Jaha Psalmen 40:6.

² Di parsiajaran on, taulas ma taringot tolu silehon-lehon i. Molo tarimangi i sude, gabe lam taargai ma akka silehon-lehon i. Jala gabe lomo ma rohatta mambahen las roha ni Jahowa, Debata na manoppa hita. (Pgk. 4:11) Asing ni i, gabe lam denggan ma caratta paboahon hasittongan tu akka halak na porsea tu evolusi.

3. Boasa tano on planet na istimewa?

³ Boi do taida bisuk ni Debata sian carana manoppa tano on. (Rom 1:20; Heb. 3:4) Sasittongna adong do akka planet na asing na makkaliangi mataniari asing ni tano on. Alai, tano on ma planet na istimewa. Alana holan dison do diparade sude na tahaporluhon asa boi mangolu.

4. Songon dia bisuk ni Debata tarida sian carana manoppa tano on? Bahen ma tudosan.

⁴ Boi ma tabandingkon tano on tu pesawat terbang. Adong do imbar ni tano on dohot pesawat. Misalna, bayangkon ma molo adong akka halak na marpesawat.  Boha do molo ikkon diparade nasida sandiri oksigen, sipanganon, dohot aek tu nasida? Jala boha do molo dang boi nasida mambolokkon sampah sian pesawat i? Sadia leleng do nasida boi mangolu? Boi do gabe hatop nasida mate. Alai imbar do tano on sian kapal i. Boi do marmiliar jolma dohot binatang toktong mangolu dison. Sai toktong do adong oksigen, sipanganon, dohot aek. Jala dang marnahabis i. Memang, dang hea akka sampah di tano on dibolokkon tu luar angkasa. Alai toktong do uli tano on jala boi diingani. Boasa? Ala dibahen Jahowa do adong sistem daur ulang di tano on. Saonari taulas ma taringot dua sistem daur ulang, i ma daur ulang oksigen dohot daur ulang aek.

5. Boasa dang marnahabis oksigen di tano on, jala aha do na boi taboto sian i?

⁵ Oksigen do na dihirup jolma dohot binatang asa boi toktong mangolu. Alai dang hea habis oksigen di tano on. Jala, nang pe jolma dohot binatang pakaluarhon karbon dioksida sian pernapasan, dang hea gabe pagodangku karbon dioksida di langit. Boasa? Alana ditoppa Jahowa do akka suan-suanan, na gelleng nang na balga. Akka suan-suanan i ma na mambuat karbon dioksida i jala pakaluarhon oksigen. Sian sistem daur ulang oksigen on, gabe taboto ma na tutu do hata na disurat di Ulaon ni Apostel 17:24, 25, ‘Debata do na mangalehon hangoluan dohot hosa.’

6. Boasa dang marnahabis aek di tano on, jala aha do na boi taboto sian i? (Ida kotak “ Silehon-lehon sian Jahowa do Sistem Daur Ulang Aek.”)

⁶ Boi do adong aek di tano on, ala pas do jarak ni tano on tu mataniari. Molo otik pe unjonok tano on sian mataniari, boi do gabe gurgur sude aek, jala gabe lam mohop ma tano on. Jala molo otik pe undao sian mataniari, gabe beku ma sude aek, jala gabe es ma sude isi ni tano on. Alai, ala pas do parpeak ni tano on dibahen Jahowa, gabe adong ma sistem daur ulang aek jala boi ma hita mangolu di tano on. Mohop ni mataniari i ma na mambahen aek na di laut dohot di permukaan ni tano on menguap, jala gabe awan di langit. Ganup taon, adong martriliun liter aek na menguap gabe awan di langit. Toktong do aek i di langit hira-hira saleleng sappulu ari. Dung i, madabu ma i tu tano gabe udan manang salju. Mulak ma muse aek i tu laut, tu tao, manang tu sunge. Songon i ma na masa marulak-ulak. Sian sistem daur ulang aek on, tarida do na marbisuk Jahowa jala balga situtu do huasona.​—Job 36:27, 28; Pjm. 1:7.

7. Songon dia carana patuduhon na taargai do silehon-lehon sian Jahowa na ditaringoti di Psalmen 115:16?

⁷ Songon dia caratta patuduhon na taargai do tano on dohot akka isina? (Jaha Psalmen 115:16.) Rimangi ma akka toppaan ni Jahowa. Boi do on mangonjar rohatta asa mandok mauliate tu Ibana ala dilehon do akka na denggan tu hita ganup ari. Asing ni i, sai tajaga ma akka na di humaliangta asa toktong ias.

8. Boasa boi tadok massai denggan do ditoppa Jahowa utok-utokta?

⁸ Massai denggan do ditoppa Jahowa utok-utokta. Tikki di bortian dope hita, nungnga ditottuhon hian songon dia perkembangan ni utok-utokta. Jala ganup minut, adong marribu sel baru di utok-utok i! Akka peneliti mandok, di  bagasan utok-utok ni halak naung dewasa, adong hira-hira 100 miliar sel na digoari neuron. Akka sel on ma na dibentuk gabe utok-utok na boratna 1,5 kilogram. Saonari taulas ma akka aha do na boi diulahon utok-utok ni jolma.

9. Aha do na patuduhon sada silehon-lehon sian Debata do ala boi hita makkatai?

⁹ Ala adong do utok-utokta umbahen gabe boi hita makkatai. Rimangi ma aha na masa di utok-utokta tikki makkatai hita. Holan sada hata pe na tadok, adong hira-hira 100 otot na ikkon diatur utok-utok asa boi bergerak, i ma akka otot na adong di dila, aru-aru, bibir, rahang, dohot andora. Sude otot i ikkon bergerak di tikki na pas, asa jelas hata na tadok jala boi diattusi halak na mambege. Godang akka ilmuwan porsea, sian na tubu pe nungnga dirancang hian hita asa boi mamparsiajari bahasa. Jala adong hasil penelitian di taon 2019 na mandok, poso-poso na baru tubu pe nungnga boi mangattusi sada hata na dibege ibana. Jadi takkas ma, sada silehon-lehon sian Debata do ala boi hita makkatai.​—2 Mus. 4:11.

10. Ala boi hita makkatai, songon dia do hita patuduhon pangargaionta tu Debata?

¹⁰ Ala boi hita makkatai, songon dia carana patuduhon pangargaionta tu Debata? Sada cara, i ma paboahon haporseaonta taringot Debata tu akka halak na porsea tu evolusi. (Ps. 9:2; 1 Ptr. 3:15) Porsea do nasida molo tano on dohot sude isina adong alani kebetulan do, dang ala na ditoppa. Tapakke ma Bibel dohot akka hatorangan naung taulas di parsiajaran on lao paboahon taringot Debata. Molo olo do nasida manangihon, boi ma tapatorang boasa pos rohatta Jahowa do na manoppa langit dohot tano on.​—Ps. 102:26; Jes. 40:25, 26.

11. Boasa luar biasa utok-utokta?

¹¹ Alani utok-utok, gabe godang ma na boi taingot. Najolo, adong sahalak penulis na mandok molo utok-utok ni jolma boi mangingot sude informasi na disurat di 20 juta bukku. Alai saonari didok akka peneliti, sasittongna unggodang sian i pe boi do taingot. Aha do labana ala boi hita mangingot?

12. Aha do na mambahen hita imbar sian akka toppaan na asing?

¹² Sian sude toppaan na adong di tano on, holan jolma do na boi marsiajar sian pengalamanna. Alani i, gabe boi ma hita paubahon cara marpikkirta dohot parniulaonta asa gabe lam denggan. (1 Kor. 6:9-11; Kol. 3:9, 10) Jala, boi do talatik panggora ni rohatta asa taboto dia do na sala jala dia do na sittong. (Heb. 5:14) Boi do hita marsiajar patuduhon holong, haburjuon, dohot asi ni roha. Jala boi do hita maniru hatigoran ni Jahowa.

13. Hombar tu na didok di Psalmen 77:12, 13, ala boi do hita mangingot, songon dia do hita patuduhon pangargaion tu silehon-lehon on?

 ¹³ Ala boi do hita mangingot, songon dia do caratta patuduhon pangargaion tu silehon-lehon on? Sada cara, i ma mangingot sude na hea diulahon Jahowa lao mangurupi jala patoguhon hita. Molo taulahon i, gabe pos ma rohatta, di ari na naeng ro pe sai diurupi Jahowa do hita. (Jaha Psalmen 77:12, 13; 78:4, 7) Asing ni i, taingot ma akka na denggan na hea dibahen halak tu hita. Jala tadok ma mauliate tu nasida. Akka peneliti mandok, ussonang do roha ni akka halak na jotjot mangargai akka na dibahen halak na asing. Jala tatiru ma Jahowa na so mangingot-ingot hasalaanta. Sempurna do ingatan ni Jahowa, alai molo muba hita, olo do Ibana manalpuhon hasalaanta. Jala dang diingot-ingot Ibana be hasalaanta i. (Ps. 25:7; 130:3, 4) Jadi, lomo do rohana asa tasalpuhon hasalaan ni halak na mambahen haccit rohatta.​—Mat. 6:14; Luk. 17:3, 4.

14. Ala dilehon Jahowa do utok-utok tu hita, songon dia do caratta mangargai i?

¹⁴ Ala dilehon Jahowa do tu hita utok-utok asa boi hita marpikkir, tapakke ma i lao pasangappon Ibana. Adong do halak na gabe holan makkarikkothon dirina sandiri. Lomo-lomona do manottuhon dia na sala jala dia na sittong. Alai ala ditoppa Jahowa do hita, tottu dao do undenggan uhum na dilehon Ibana sian uhum na tabahen sandiri. (Rom 12:1, 2) Molo taihutton uhumna i, gabe dame ma ngolutta. (Jes. 48:17, 18) Jala gabe taboto ma aha do tujuan ni ngolutta, i ma lao pasangappon Debata na manoppa hita, jala mambahen las rohana.​—Poda 27:11.

15. Boasa Bibel i gabe bukti na holong do roha ni Jahowa tu jolma?

¹⁵ Silehon-lehon sian Debata do Bibel i. Ala massai holong do roha ni Debata  tu hita, disuru Ibana do piga-piga bawa asa manuratton Bibel. Marhite Bibel ma, dipaboa Jahowa alus ni sukkun-sukkun na rikkot di parngoluonta. Misalna, songon dia do jolma ditoppa? Boasa ditoppa Debata jolma? Aha do na lao masa di ari na naeng ro? Lomo do roha ni Debata asa sude jolma mamboto alus ni sukkun-sukkun i. Jadi saleleng marratus taon, diurupi Ibana do piga-piga halak asa menerjemahon Bibel tu godang bahasa. Saonari, nungnga diterjemahon be Bibel di lobi sian 3.000 bahasa. Adong naung lengkap isina, adong na sebagian dope. Bibel ma bukku na unggodang diterjemahon jala disarhon di liat portibi on. Manang didia pe hita tinggal, jala bahasa aha pe na tapakke, boi do hita mamparsiajari isi ni Bibel di bahasatta sandiri.​—Ida ma kotak “ Menerjemahon Bibel tu Akka Bahasa di Afrika.”

16. Hombar tu na didok di Mateus 28:19, 20, songon dia hita patuduhon na taargai do Bibel i?

¹⁶ Taargai ma Bibel. Carana, tajaha ma i ganup ari. Tarimangi ma akka na taparsiajari sian i, jala taulahon ma i di parngoluonta. Asing ni i, marsitutu ma hita lao mambagihon barita sian Bibel tu godang halak.​—Ps. 1:1-3; Mat. 24:14; jaha Mateus 28:19, 20.

17. Akka silehon-lehon aha do naung taulas di parsiajaran on, jala aha do na lao taulas di parsiajaran na mangihut?

¹⁷ Di parsiajaran on, nungnga taulas be akka silehon-lehon sian Debata tu hita. I ma tano on, utok-utok, dohot Bibel. Alai, adong dope silehon-lehon na asing na so boi diida mata. Lao taulas ma i di parsiajaran na mangihut.